Who be US former Army major wey dem plan to livestream im firing squad execution
Wia dis foto come from, U.S. Government Uniformed Services University of the Health Sciences via Getty Images
Di public go fit watch di execution of one former US Army major by firing squad, US Defence Secretary Pete Hegseth don tok.
One Defense Department official tell di BBC say di execution of Nidal Hasan, wey shoot and kpai 13 unarmed US sojas for Fort Hood for 2009, go dey livestreamed.
Belief be say dis go be di first public execution for di US in almost almost 100 years. Di decision to livestream am "neva happun bifor for modern era" and "on uncertain legal terrain," John Mills tok. Mills na lawyer wey dey work wit inmates wey dem sentence to death.
"We go make sure say pipo dey able to watch am, say e dey public," Hegseth tok.
"Pipo need to understand say serious consequences for dis types of tins dey."
Hegseth tok inside interview wit conservative TV outlet Real America's Voice say Hasan "go get a firing squad of sojas. As e suppose be".
Wen dem ask am if Hasan don make any final request or reached out to President Donald Trump, Hegseth say: "I no care. We go see am on December 3rd."
One Pentagon tok-tok pesin on Monday say Trump bin approve di defence secretary recommendation. Di BBC don ask White House whether Trump support a livestreamed public execution.
Na more dan 2,700 executions dey across 17 kontris last year, and na only two kontris carry dem out publicly.
Eleven public executions dey known say Iran bin carry out for 2025, and anoda six for Afghanistan, according to Amnesty International.
Who be Nidal Hasan?
Nidal Hasan na former US Army major and psychiatrist who wey dem convict say e carry out one of di deadliest shootings for US military installation.
On 5 November 2009, Hasan open fire at di Soldier Readiness Processing Center for Fort Hood military base for Texas, and kpai 13 pipo and wound 32 odas. Dat time, di sojas bin dey undergo preparations for deployment. Hasan, wey bin dey work as Army Army psychiatrist, also chop bullet from one police officer and dis one paralyse am.
During im trial, Hasan admit say im carry out di shooting and link im actions to his opposition to US military operations for Muslim-majority kontris, including Afghanistan.
For August 2013, one military jury find am guilty of 13 counts of premeditated murder and 32 counts of attempted premeditated murder. Dem sentence am to death.
