Tribunal confam Sanwo-Olu as govnor of Lagos State

Afta about10 hours judgement, di governorship election petition tribunal wey siddon for Lagos don confam Babajide Sanwo-Olu as govnor of di state.

Dis na after a very long reading of di judgement for di petitions filed by Gbadebo Rhodes-Vivour of Labour Party, (LP) and Olajide Olaniran of People's Democratic Party (PDP).

Di tribunal dismiss di petition by Rhodes-Vivour of di Labour Party wey accuse di Deputy Govnor of di state Femi Hamzat say im don renounce im Nigerian citizenship to bear allegiance to US.

After plenti explanation wit evidences, Justice Ashom declare say di case dey dismissed as proof no dey to show say Hamzat dey bear allegiance to US.

Di court also strike out di petition of di PDP candidate Olajide Adediran wey pipo sabi as Jandor, as di judge rule say na dead on arrival.

For im ruling, justice Abdullahi strike out di petition wey say Sanwo-Olu no submit im GCE O'level result.

Di tribunal bin also strike out di Labour Party and dia candidate, Rhodes-Vivour, from di petition of di PDP and dia candidate Jandor, wey dem bring against di recent govnorship election.

Chairman of di tribunal Justice Arum Ashom for di Monday proceeding bin announce say di court go first deliver judgement for di case of di PDP and dia candidate before dem rule on di petition of di Labour Party govnorship candidate, Gbadebo Rhodes-Vivour.

Di tribunal for dia judgement wey Justice Abdullahi read bin first rule on di preliminary objections wey di parties file.

Di first objection dem first look na weda di 3rd Respondent, di Lagos deputy govnor, Obafemi Hamzat na separate and distinct candidate from di 2nd respondent, Babajide Sanwo-Olu.

Dem also ask di tribunal to determine weda di deputy govnor fit dey listed as respondent for di petition.

Di tribunal hold say di deputy govnor and govnor no be separate candidates and dem no dey required to pay separate security deposit.

For di second objection, di petitioners ask di tribunal to decide weda pesin wey lose election fit dey joined as a respondent for election petition.

Jandor bin join di Candidate of di Labour Party, Rhodes-Vivour as a respondent for im petition. Citing a list of decided cases, di tribunal agree say na pesin wey win or pesin wey lose fit file election, e no dey between two pipo wey lose.

Sake of dat, di tribunal uphold di preliminary objection and subsequently strike out di name of di 5th respondent, Rhodes-Vivour from di petition wey Jandor file.

Di tribunal also remove from dia records all exhibits in evidence wey Rhodes-Vivour tender for di petition wey Jandor file.

Di tribunal go ahead to hold say Rhodes-Vivour no fit go on to challenge any part of di judgement of Jandor petition or else e go become busybody.

Di tribunal hold say di 6th respondent, di Labour Party for no be respondent for Jandor & di PDP petition. Sake of dat, dem strike out di LP say e no join properly. Dem also remove all evidence and exhibits concerning di party comot for di tribunal records.

Di tribunal however disagree wit di objections wey di APC and dia candidate make say di Mis joinder of di LP & dia candidate na beta ground for striking out di petition.

Di candidate of di Labour Party Gbadebo Rhodes-Vivour and im counterpart from PDP Olajide Olaniran alias Jandor bin challenge di results of di 2023 governorship election.

Both LP and PDP challenge say no be Babajide Sanwo-Olu of di All Progressives Congress (APC) win di election wey happun for March 18.

Dem carry di mata reach tribunal say dem no fit declare Sanwo-Olu as and im deputy Obafemi Hamzat as winner of Lagos election.

Di Independent National Electoral Commission (Inec) bin declare Sanwo-Olu winner of di Lagos state governorship election afta e poll 762,134 votes.

Im main opponents Rhodes-Vivour from LP get 312,229 votes and Jandor from PDP get 62,449 votes wey make dem challenge di result.

Wetin be Jandor petition

Jandor wey be leading opposition from PDP tok say make Inec disqualify Sanwo-Olu and Rhodes-Vivour say both of dem no dey qualified to contest di election.

Jandor petition na sake of say im challenge major oppositions say dem no comply wit di Electoral Act of 2022. Im also add say both Rhodes-Vivour and Sanwo-Olu no follow di guidelines wey Inec bin set for di election.

According to di petition wey dem file on 7 April, dem accuse di APC say dem no follow Inec rule wey provide say political parties gatz give 21 days notice bifor dem conduct dia primary elections.

Di petitioners also add say Sanwo-Olu no submit of im GCE O'level result wey im claim to get. Jandor say dis na failure against di requirements wey dey di Electoral Act 2022.

Anoda petition wey PDP file be say di APC violate di Electoral Act wey stipulate say political parties gatz submit dia candidate nomination form not later than 180 days bifor di general election.

Same PDP also fault di candidacy of di LP Rhodes-Vivour say im no comply wit di requirements of di Electoral Act wey concern conduct of primary election.

Jandor tok for im petition say Rhodes-Vivour never comot PDP wen e dey claim to be member of LP.

Wetin be Rhodes-Vivour and LP petition

LP petition na based on say di govnorship election for Lagos dey filled wit corrupt practices and e no comply wit di Electoral Act 2022.

Rhodes-Vivour of LP wey submit im own petition for 9 April, tok say Sanwo-Olu no win by majority votes for di election.

Di petitioners also accuse Sanwo-Olu running mate, Femi Hamzat say im don swear allegiance to United States and im don renounce im Nigerian citizenship.

Inec, Sanwo-Olu and APC be respondents for dis petition and di lawyers don adopt dia final written addresses for tribunal.

Both Jandor of PDP and Rhodes-Vivour of LP dey ask make court nullify Sanwo-Olu of APC as govnor make dem declare dem as winners of di election.