Six pipo die odas injure for Ghana military recruitment crush

One crush during military recruitment exercise for Ghana don kill at least six pipo and injure odas.

Di incident hapun for di El-Wak sports stadium near di military camp wia thousands of young pipo bin gada for di recruitment exercise on Wednesday.

Videos for social media videos on Wednesday bin show long queues for street as pipo bin turn out as early as 2:00am to form di line for di recruitment.

Di Ghana Armed Forces inside one statement wey confam di incident tok say di pipo wey injure dey receive treatment for di 37 military hospital.

"Our first investigation show say di plenty numbers of applicants wey wan enter di military choke for di El-Wak stadium, wey dem breach security protocol to rush inside di gate ahead of di exercise around 6 AM.

Medical teams dey work hard to stabilise those wey dey affected, wey and we dey make arrangement to inform di families of those wey die."

Di recruitment exercise still dey go on as di service tok say dem dey begin di documentation and body selection exercise from 12-13 November for di various screening centres.

President Mahama visit victims for hospital

Ghana president John Mahama visit di victims for di 37 military hospital togeda wit some top govment officials.

He direct say make di military halt di recruitment process until further notice.

Opposition and oda civil society groups dey call for investigation into di tragedy.

Di acting defense minister and his deputy and di minister for govment communication join di president for di visit.

Commander for di 37 military hospital Brigadier General Evelyn Vivian Abraham-Kwabiah tok journalists say "di casualties in total be 28 pipo, six die, five odas dey critical and 12 odas dey fairly critical wey di rest dey stable and out of danger."

She tok say dem go provide healthcare for di victims wey dem carry go di hospital.