Price of egg, Elon Musk and Al Green: Seven takeaways from Trump big speech

President Donald Trump don address one loud joint session of di US Congress for di first time since e return to power for January, wia e declare say: "Di American Dream dey unstoppable."

Inside di longest presidential speech to lawmakers on record, e outline im vision for im second term, as Republicans hail im six weeks wey don reshape domestic and foreign policy.

Democrats shout give Trump and im too give dem back during di rowdy primetime speech.

Di Republican president so far don move to slash di federal workforce and crack down on immigration, while imposing tariffs on America biggest trading partners and shaking up di trans-atlantic alliance over di war for Ukraine.

Dis na seven takeaways from im speech.

'Thank you, Elon'

Trump hail im billionaire adviser Elon Musk, wey bin dey watch from di gallery, early for im 100-minute speech.

Di tech mogul Department of Government Efficiency taskforce don make move to fire tens of thousands of federal workers, cut billions of dollars in foreign aid and slash programmes across di US government.

Di SpaceX and Tesla boss, wey wear dark suit with blue tie, stand up to receive di hailing from di crowd.

"Thank you, Elon," di 78-year-old president tok. "E dey work very hard. E no need dis."

Trump go on to list some examples of wasteful spending e say don dey removed by Musk cost-cutting initiative, dis wan make di Republicans laugh.

"Eight million dollars to promote LGBTQI+ for di African nation of Lesotho, wey nobody don ever hear of," Trump tok.

Meanwhile, Democratic lawmakers hold up signs wey say "Musk steals" and "false".

Doge claim say dem don save $105bn already but dat figure no fit dey independently verified. Receipts don dey published for $18.6bn worth of savings but accounting errors don also dey reported by US media outlets wey don analyse di figures.

Democrats mock di president

Within di first five minutes of di address, Al Green of Texas bin dey escorted out of di chamber by di sergeant-at-arms after e refuse to comply with di House Speaker demands say make e stop to dey yab di president and take im seat.

As Trump speak, oda Democrats hold up signs wey say "Dis na lie".

With Republicans in control of di White House, House of Representatives and Senate, Democrats don dey largely leaderless as dem work to make dia message strong and counter di activity from di Trump administration.

Many Democratic women come di House chamber wearing pink pantsuits in protest. Dozens from dia party – some of dem wey wear di words "Resist" printed on di back of dia shirts - comot di chamber during di speech.

"E no get anytin wey I fit say to make dem happy," Trump tok.

Democratic leadership chose Elissa Slotkin of Michigan - one first-term senator wey dey elected for one battleground state wey Trump win for November - to deliver di party official response.

She accuse Trump of "unprecedented giveaway to im billionaire friends" and warn say "e fit lead us right into a recession".

'Important letter' from Zelensky

Trump say e don receive "important letter" from Ukraine leader earlier in di day, wey be like wetin match wetin Volodymyr Zelensky post publicly on social media.

Ukraine president bin say e don ready now to work under Trump "strong leadership" to end di war and "come to di negotiating table as soon as possible to bring lasting peace closer".

"I appreciate say e send dis letter," Trump tell lawmakers.

Zelensky reach out one day after Trump pause all military aid to Ukraine.

E come after one ogbonge Oval Office meeting last week wen di two leaders argue in front of TV cameras, before cancelling plans to sign one minerals deal wey go allow US to profit from economic partnership involving Ukraine resources.

Trump bin dey hope to announce during im speech to Congress say di deal don dey finally sealed according to reports. But e no work.

Trade war go cause 'small disturbance'

After a second day of market turbulence, Trump play down di potential economic fallout from one trade war wey e start dis week, including 25% tariffs on Mexico and Canada, and one additional 10% on Chinese imports.

But as against di ovations wey greet im oda policy objectives, many Republicans siddon, sign of how Trump import taxes don divide im party.

"Tariffs dey about making America rich again and making America great again," e tok.

"And e don dey happen. And e go happen quickly. Small disturbance go dey, but we dey okay wit dat. E no go dey much."

Trump add say di do-me-I-do -you reciprocal tariffs against US trading partners go "kick in" on 2 April.

Earlier in di day, US Commerce Secretary Howard Lutnick tell Fox Business say Trump fit announce a trade deal with Mexico and Canada as soon as Wednesday.

Biden collect blame for di price of egg

Di rising cost of eggs don top headline news in recent weeks, and Trump - wey bin promise voters say e go beat inflation on im return to office - make am clear who e feel say dey responsible.

"As you know, we inherit, from di last administration, economic catastrophe and inflation nightmare," Trump tok.

"Joe Biden especially let di price of eggs to get out of control - and we dey work hard to get am back down," e add.

Egg prices rise under Biden as im administration direct millions of egg-laying birds to dey slaughtered last year inside one bird flu outbreak, though prices don continue to dey rise for Trump new presidency.

Inflation bin rise slightly at 3% last month, but way down from im peak of 9.1% for 2022.

Only one in three Americans approve of Trump handling of cost of living, according to one Reuters/Ipsos survey on Tuesday.

One child dream come true

Inside one of di most viral moments of di night, Trump offer a surprise to one child diagnosed with brain cancer wey di president say dey aspire to become a policeman.

Di 13-year-old boy, DJ Daniel papa hold am up as Republicans and attendees House for di gallery dey hail "DJ."

Trump announce say DJ go dey sworn in by im new Secret Service director as a member of di force.

DJ wey bin dey shocked come receive Secret Service badge from di agency director Sean Curran, one of di agents wey rush go stage to protect Trump during di attempt on im life for Butler, Pennsylvania, for July.

More dan a dozen Democrats join di Republicans in a standing ovation.

Wildlife refuge dey renamed for murder victim

During di speech, Trump announce say e don rename one Texas wildlife refuge after one girl from Houston wey undocumented immigrants allegedly kill.

Dem find Jocelyn Nungaray, 12, dead for June 2024 after she bin dey reported missing. Alexis Nungaray, her mother, be a guest of First Lady Melania Trump during di president speech.

During im inaugural address for January, Trump promise say im administration go begin deporting "millions and millions" of immigrants with criminal records.

Di number of migrants wey dey illegally cross di southern border fall last month to di lowest level in at least 25 years.

But di Republican president don reportedly dey frustrated by rate of removals, wey so far don fail to pass di numbers wey dey deported during Biden last year in office.