How Finidi George beat Amuneke, odas to emerge new Super Eagles coach

Di Board of Nigeria Football Federation on Monday 29 April approve di recommendation of dia Technical and Development Committee to appoint former ogbonge winger Finidi George as head coach of di Super Eagles.

George bin take charge of di squad in interim capacity during two friendly matches for Morocco last month.

Im bin spend 20 months as assistant to José Santos Peseiro bifor di Portuguese voluntarily leave di post afta di accomplishment of Africa Cup of Nations runner-up position for Cote d’Ivoire 2023.

How Finidi George become Eagles Coach

Finidi George na popular name for Nigeria Football and im begin enta football fans eye well well wen Enyimba International Football club appoint am as coach for September, 2021.

Interest begin rise for Finidi wen im lead Enyimba to win di Nigeria Premier League title last season.

Na im first title win since im join Enyimba and na di 9th title for di 'Peoples Elephants'.

Finidi George lead Enyimba to victory afta e draw 1-1 wit Rivers United for dia final game of di Super Six play-off.

Na narrow win sake of goals difference afta dem bin tie on nine points wit Rivers United and Remo Stars.

For di Super Six Enyimba bin draw three matches and win just two out of di five matches wey dem play.

Currently Finidi George and Enyimba International dey second for di Nigeria Professional Football League table wit 55 points.

Due to dis achievement di Nigeria Football Federation appoint Finidi George as assistant coach of di Super Eagles.

Na one year and eight months Finidi spend as Assistant coach to José Santos Peseiro.

Peseiro comot as coach afta e guide di Super Eagles to win Silver for di 2023 Africa Cup of Nations wen im contract expire.

As Peseiro comot, Finidi take charge of di Eagle for two friendly matches for Morocco last March.

Im team beat Ghana 2-1 for di first match, dis win end 18-years history wey dem neva win di Black Stars. Dem lose di second match 0-2 to Mali.

Finidi George number one assignment na to qualify Nigeria for di 2026 Fifa world Cup.

Di Nigeria Football Federation tok for statement wey dem use announce im appointment say "George immediate task na to guide di Super Eagles to victory for di two 2026 Fifa World Cup qualifying matches against South Africa and Benin Republic for Uyo and Abidjan"

In five weeka time dis matches go shele and na 'matches wey Finid George must win.

Nigerian s dey expect say Finidi George go deliver as dem still remember dia lose to Ghana for di last game of di 2022 Fifa World Cup qualifiers.

Nigeria lose to Ghana 0-1 for di Moshood Abiola National stadium, Abuja.

Dis lose make fan jump enta field begin destroy di tins, dem tear di goal post and even break di coaches bench.

Nigerians no go wan miss di Fifa 2026 World Cup at any cost.

As NFF don confam Fidi George pipo dey expect am to begin build im team and design a stable playing pattern for di Super Eagles.

Dem dey also expect say di challenge of goal scoring o become a tin of di past.

Success for di pitch and dressing room

As one of Nigeria best wingers of all time, George don get ogbonge career for club and international level.

E bin win three league titles wit Ajax wey e join for 1993. E also carry di Uefa Champions League, Uefa Super Cup and Intercontinental Cup wit di Dutch giants for 1995.

E bin spend some time for Betis wia e be runner up for di Copa del Rey for 1997, bifor e join Mallorca and Ipswich Town for England.

But e also do ogbonge work wit di Super Eagles, even as im score for im international debut against Burkina Faso for 1991.

George bin score di goal wey make Nigeria to qualify for di 1994 World Cup. E then go on to arrange di kontri first eva goal for di finals against Bulgaria.

E also follow for di team wey go di 1998 competition for France.

George help Nigeria to sama Zambia 2-1 and carry di Nations Cup trophy for 1994 and e also dey part of di team wey finish as runner up for 2000 and bronze medallist for 1992 and 2002.

E come turn oga of Nigeria most successful club, Enyimba for 2021, wia e carry di team to win dia first title in four years as dem win di league two years later.

Super Eagles dey expect new style wit Finidi

Di NFF decision to pick Finidi George no be shock even though na Emmanuel Amuneke pipo bin dey expect to replace Jose Poseiro.

Di recent friendlies wey Nigeria play wit West African rivals Ghana and Mali na audition wey di new coach passed even wit di mixed results and George get serious work for hand.

First na di 2026 World Cup qualifiers wey di ginger for am dey strong sake of say Nigeria no qualify for di last one for Qatar.

George get di work to organise team wey go fit win di fourth Nations Cup title for di kontri. Dis go be lift from di second position Nigeria carry from Ivory Coast dis year.

As pesin wey im winger moves bin sweet belle wen e be player, di expectation be say e go bring new style of play, and use and manage di ogbonge team wey im get wella as well as to bring up players from di Nigeria Professional Football League (NPFL).

George go continue to dey combine im work as coach of di national team and as coach of defending NPFL champions Enyimba wey dey second for di table wit six games to go.

But di fact say NFF carry Amuneke shift one side again go cause tok-tok from fans of Super Eagles.

Di 1994 African player of di year na im make Nigeria win di Under 17 World Cup for 2015 wit squad wey bin get players like Victor Osimhen and Samuel Chukwueze. Dis two na ogbonge part of di senior team.

Di former Barcelona forward bin also carry Tanzania to qualify for di 2019 Nations Cup.