Nigeria vs South Africa match preview, team news
Wia dis foto come from, Getty Images
Nigeria go open dia 2022 Women Africa Cup of Nations tournament wit di match against South Africa on Monday.
Di super falcons wey be di defending champions go play Banyana Banyana for dia first match for group C.
Di crunch match go hold between di two ogbonge kontris for Moulay Hassan stadium for Rabat by 6pm (Nigeria time).
Nigeria vs South Africa match preview
Currently Super Falcons na di best female football team for Africa, according to stats.
For di Fifa ranking Nigeria dey for 39th position while South Africa na di third-best team for Africa on 58th position.
Falcons Coach Randy Waldrum dey expected to send out im best squad against di Bayana Bayana – team wey be one of Nigeria strongest opposition for di African continent.
“We don obviously evolve in di last year, I don get more time wit di team over di past year. We get plenty respect for South Africa,” Waldrum.
South Africa coach Desiree Ellis on her side also dey expected to unleash her young squad on Nigeria ahead of di ogbonge match.
End of Di one wey oda users dey read well well
Nigeria vs South Africa head to head
Wia dis foto come from, Super Falcons
Na di 13th time wey Nigeria and South Africa go meet for di Women Africa Cup of Nations.
Di Super Falcons neva miss any edition of di Women Africa Cup of Nations since e start.
Dem don reach semi-finals for all di competitions and dem don win di tournament for nine times.
South Africa dey unbeaten for each of dia last seven matches for di Africa Cup of Nations – dem get six wins and one draw.
Di last time Bayana Bayana lose na against di Super Falcons for di 2018 edition of di tournament for Accra, Ghana. Di game bin end for 0-0 during regular time but Super falcons win 4-3 on penalty.
Nigeria vs South Africa prediction
Di last time wey Super falcons and Bayana Bayana meet na for di final of di Aisha Buhari cup for September 2021 wia South Africa win 4-2 for Lagos.
Di young and energetic visitors beat Nigeria for dia home, Lagos to win di first edition of the tournament.
But Godwin Enakhena, wey be sports journalist believe say Nigeria na still di best women football team for Africa.
“E get as female football be. E dey different from di male own. For di women, na experience count. And Super Falcons get experience well-well,” e tok.
Enakhena add say for di statistics Super Falcons get better strikers wey sabi score goals and goalkeeper wey be like di best for di continent. E believe say falcons go win.
Prediction: 4-1 (Nigeria to win)
