د امریکا ټاکنې: د ټرمپ او بايډن وروستۍ مناظره

امريکا کې د ډونلډ ټرمپ او جو بايډن ترمنځ وروستۍ مخامخ مناظره د ټېنيسي نشوېل کې وشوه. دا ځل یې ترمنځ خبرې او بحث تر ډېره کنټرول او تر ولکې لاندې و. يو د بل خبرو کې ډېر کم ورلوېدل او يو پر بل یې چيغې هم نه وهلې.

دا د ولسمشر ټرمپ لپاره يو فرصت و، چې نظرپوښتنو کې يو څه مخکې شي، چې ښيي له پخواني مرستيال ولسمشره شاته دی خو د تاوده بحث او خبرو لپاره بيا هم ځای و، چې دوی په کې د اقتصاد، روغتيا، توکميزو او اړيکو او اقليمي بدلون پر سر سره ټکر شول.

دواړه د کورونا ويروس سره په تړاو د سپينې ماڼۍ کړنلارې پر سر سره جوړ نه دي او يو بل ته یې د مالي فساد او درغليو ګوته نيوله.