بریتانیا د "اېچ ای وي" د مخنیوي درمل بازار ته وړاندې کوي

د بریتانیا د عامې روغتیا چارواکو اعلان کړی دی چې له اپرېل میاشتې نه به د "اېچ ای وي " وېروس د خپرېدو مخنیوي لپاره ځانګړي درمل بازار ته وړاندې کوي.

د پرېپ په نامه دا درمل که په ورځ کې یو ځل وخوړل شي نو د ناخوندي جنسي اړیکو پر وخت د اېچ ای وي وېروس د لېږدېدو مخه نیسي.

په سکاټلنډ او وېلز کې دا ګولۍ وار د مخه شته.

د بریتانیا د عامې روغتیا وزارت وایي، دا ګولۍ کولی شي چې په لسو کالو کې د اېچ ای وي وېروس نوې قضیې ختمې کړي.

داسې اټکل کېږي چې په بریتانیا کې څه باندې سل زره کسان په اېچ ای وي وېروس اخته دي.

مرستندویه ادارې وایي، بریتانیا کې د ناروغه کسانو له ډلې کابو ۷ سلنه یې خبر هم نه وي چې په دې وېروس اخته دي.

یاده دې وي چې پرېپ ګولۍ یوازې د اېچ ای وي وېروس پر ضد اغېزمنې دي، او د ناخوندي جنسي اړیکو پر وخت د نورو ناروغیو د لېږد مخه نه نیسي.

یو شمېر کسانو پر دې نویو ګولیو نیوکه هم کړې او وایي، که دا ګولۍ عامې شي نو خلک به د جنسي اړیکو پر وخت بې احتیاطي کوي او ښایي د کانډوم کارېدل کم شي.

دوی وایي، د داسې یو ذهنیت له کبله د نورو ناروغیو خپرېدو ته لاره هوارېدلی شي.