د افغانستان کرېکټ بورډ: د اسټرالیا لغوه شویو لوبو په اړه کرېکټ نړیوالې شورا سره خبرې کوو
د عکس سرچینه، Getty Images
د افغانستان کرېکټ بورډ چارواکي وايي، له افغانستان سره د اسټرالیا د لغو شویو لوبو په اړه د کرېکټ د نړیوالې شورا له مرستیال مشر سره خبرې کړې دي.
د کرېکټ بورډ اجرایوي مشر نصیب خان وايي "په دې اړه مو مفصلې خبرې وشوې" خو دا یې نه دي چې په خبرو پر څه بحث شوی او دا چې کومې پرېکړې ته رسېدلي او کنه.
نوموړي وايي، ټاکل شوې راتلونکو دوو اونیو کې یو ځل بیا د کرېکټ نړیوالې شورا له مشرتابه سره وګوري او په "ټولو حقوقي لارو" به خبرې وکړي.
وروسته له هغه چې اسټرالیا له افغانستان سره د لوبو لړۍ لغوه کړه، ګڼو افغان لوبغاړو پر دغه پرېکړه ناخوښي په ډاګه کړه او د بېرته اخیستو غوښتنه یې کړې.
ښاغلی نصیب خان وايي، د افغانستان د کرېکټ بورډ مشر میرویس اشرف متحده عربي اماراتو کې دی او په همدې اړه یې د هند، پاکستان او شري لنکا د کرېکټ له چارواکو سره کتلي دي.
د افغانستان کرېکټ بورډ د اسټرالیا پرېکړه "سیاسي او نا عادلانه" ګڼي. خو د اسټرالیا کرېکت بورډ اداري مشر نیک هاکلي له افغانستان سره د لوبو نه کولو پرېکړه سیاست نه بولي او وايي: "په افغانستان کې حالت ننګونکی او زړه بدوونکی دی."
اسټرالیا وايي په افغانستان کې د طالبانو د حکومت له خوا پر ښځو د بندیزونو له امله یې دغه پرېکړه کړې ده.
