د افغانستان اسلامي جمهوري دولت وروستي ۴۸ ساعتونه

سهار - طالبان پلازمېنې ته په نژدې کېدو دي

په پلازمېنه کې عادي ژوند روان دی خو طالبان کابل ته په نژدې کېدو دي. ورسره د بېلا بېلو هېوادونو د سفارتونو تړل کېدو او له افغانستانه د امریکايي ځواکونو د وتلو رپوټونو هم اندېښنې ډېرې کړې دي. خو له دې سره سره ناټو د افغان ځواکونو د ملاتړ د دوام خبره کړې. ملګرو ملتونو ویلي چې د افغانستان وضعیت له کنټروله وتونکی دی، او د امریکا دفاع وزارت کابل خوندي بللی خو د طالبانو پر ډراماتیک پرمختګ یې اندېښنه ښودلې.

د جګړې له ډګره رپوټونه وايي چې د افغانستان د نیمايي ولایتونو مرکزونو باندې اوس د طالبانو ولکه ده. د روزګان ترینکوټ، د غور فیروز کوه او د لوګر ځينې سیمې تازه طالبانو نېولې او په شمالي ولایت بلخ کې بیا سخته جګړه شوې. 

سهار ۹:۳۰ - ولسمشر نن درې مهم کارونه لري

ګنګوسې دي چې ولسمشر محمد اشرف غني استعفا کوي او ولسمشرۍ ماڼۍ پرېږدي.  د ده د یوه سلاکار وحید عمر د یادښت له مخې، نن یې په اجنډا کې درې مهم کارونه دي. یو دا چې ولس ته نوی پیغام ثبت کړي. د پروني پیغام د نه خپرېدو پرېکړه شوې. هغه د طالبانو پر ضد د مقاومت په اړه و او پرون یې د دفاع وزارت له چارسمبالي بسم الله محمدي سره په  بالاحصار کې ثبت کړی و. دویم کار له شمالي ولایتونو کابل ته د راکډه شویو کډوالو ستونزو ته د رسېدو لپاره په یوه جلسه کې ګډون دی او درېیم، له ځينو سیاسي مشرانو سره په ارګ کې کتنه

د سقوط د ورځې سهار

ښار ارامه ښکاري خو په خلکو کې وېره خوره ده او کم شمېر دولتي مامورین خپلو دفترونو ته روان دي. نن تر پرون هم د بانکونو او اې ټي اېم ماشینونو ته اوږده کتاارونه ولاړ دي، خو اوس تر ډېره ډالر نه بلکې یوازې یوه کمه اندازه افغانۍ ورکول کېږي

ننګرهار؛ جلال اباد ښار ته طالبان ننوتل

د لغمان مرکز مهترلام، د فاریاب میمنه او د ننګرهار جلال اباد  هم طالبانو نیولي دي او د کابل دروازو ته په رسېدو دي.

د ننګرهار والي ضياءالحق امرخېل پر ټوېټر پاڼه یو عکس خپور کړی چې پخپل دفتر کې له یو شمېر طالبانو سره ناست دی او لیکلي یې دي، په سوله ييز ډول د مرکز او ولسوالیو واک طالبانو ته وسپارل شو.

۹ بجې - د څرخي پله زندان دروازې خلاصې شوې

اوس د څرخي پله زندان هم طالبانو نیولی دی او دروازې یې د زرګونه بندیانو پر مخ پرانیستل شوې دي. د پژواک اژانس په خپره کړې ویډيو کې ښکاري چې ډله ډله بندیان خپلې بسترې او توکي په شا روان دي.

۹:۳۰ - امرالله صالح "نامالوم" ځای ته تللی

ولسمشر د حرم سرای په انګړ کې ناست او د ملي امنیت سلاکار حمدالله محب سره په خبرو بوخت دی.  امنیتي چارواکو ته یې سپارښتنه دا ده چې وضعیت باید نورمال وښودل شي چې د خلکو اندېښنه ډېره نه شي. وحید عمر، چې په دې اړه یې یادښت لیکلی وايي، ولسمشر د خپل دفتر رئیس متین بېک او د چارو ادارې مشر ښاغلي فضلي ته سپارښتنه کوي چې په پډوله دښته کې د بېځایه شویو پنډغالي ته د ورتګ زمینه ورته برابره کړي. خو هغه دواړه ورته وايي، چې د کابل وضعیت اوس هلته د تلو نه دی.

وروسته پرېکړه کېږي چې د کابل او په ټوله کې د افغانستان د وضعیت په اړه ماسپښین دوه بجې به د کابینې ناسته کېږي او لومړی مرستیال امرالله صالح هم باید خبر شي. خو هغه ولسمشر ته له څه ویلو پرته له خپل دفتره وتلی او یوه نامالوم ځای ته تللی دی.

۱۰ بجې - بګرام زندان هم مات شو

طالب ویاند ذبیح الله مجاهد پر ټوېټر پاڼه ولیکل چې د افغانستان تر ټولو لوی او مهم زندان بګرام یې هم نیولی او ټول بندیان  خوشې شوي دي. خو بي بي سي ته ځينو بندیانو وویل چې نن سهار امریکايي الوتکو پر بګرام بمبار وکړ چې شاوخوا سل زندانیان پکې ووژل شول او دوی ته وویل شول چې د بل برید خطر شته نو صبر دې وکړي. وروسته پر مړو راتېر او کورونو ته لاړل.

طالبان د کابل ښار په دروازو کې لیدل شوي

طالبان اوس د کابل تر دروازو رسېدلي او په ځينو سیمو لکه د میدان ښار له لوري د کابل په کمپنۍ او میرویس میدان  سیمه کې خو له سپينو بیرغونو او وسلو سره طالبان پر موټرسایکلونو سپاره پر ګزمو لیدل شوي دي. 

۱۰:۱۱ - "په زور او جګړه کابل ته نه ننوځو"

طالبانو خبرپاڼه خپره کړه چې له خپلو وسله والو یې پکې غوښتي، کابل ته به په زور نه ننوځي او تر هغه به صبر کوي چې له مقابل لوري سره تر خبرو وروسته په سوله ييز ډول د واک د سیاسي لېږد بهیر ډاډمن شوی نه وي.

۱۱:۱۹ - قطر ته د وروستي پلاوي لېږل

مخکیني ولسمشر حامد کرزي او د سولې عالي شورا مشر عبدالله عبدالله سره لیدلي دي. دوی غواړي له ولسمشر غني سره په پرونۍ غونډه کې د شوې هوکړې پر بنسټ دوحې ته له طالبانو سره د خبرو لپاره باصلاحیته پلاوی ولېږي

تنکۍ غرمه - وېره او له ښاره تېښته

پر سړکونو او کوڅو د پلیو خلکو ګڼه ګوڼه ډېره شوې. زرګونه ګاډي پر سړکونو بیروبار کې بند پاتې دي. هر څوک هڅه کوي چې ځانونه خپل منزل او کورونو ته ورسوي.  

۱۲:۱۱ - خلکو ته د ډاډ ورکولو بله هڅه

ولسمشرۍ ماڼی پرخپله ټوېټر پاڼه کابل مېشتو ته بیا د ډاډ لپاره لیکلي چې په ښار کې پراګنده ډزې شوې دي خو پر کابل برید نه دی شوی او دوی دې ډاډه اوسي چې وضعیت کنټرول دی.

د کابل مېشتو ترمنځ وېره په ډېردو ده. هټۍ او مارکیټونه په بندېدو او ښوونځي او ادارې رخصت شوې دي

یوه "پټه امنیتي غونډه"

د ولسمشر د دفتر مشر متین بېک هم پرخپله ټوېټرپاڼه خلکو ته ولیکل چې وارخطا کېږي دې نه او ستونزه نه شته.

خو وروسته د ملي امنیت سلاکار حمدالله محب وویل چې وضعیت په خرابېدو و او یوه "پټه امنیتي غونډه" راوبلل شوه.

غرمه ۱۲ بجې - پاکستان ته تلونکی پلاوی

د یونس قانوني، محمد محقق، احمد ضیامسعود، ‌احمد ولي مسعود، صلاح الدین رباني، کریم خلیلي، لطیف پدرام، میر رحمان رحماني، باتوردوستم او د عطا محمد زوی خالد نور په ګډون شاوخوا دېرش تنه، چې غواړي د ولسمشر غني له مخالفت سره سره اسلام اباد ته لاړ شي، په کابل هوايي ډګر کې بند پاتې دي. پروازونه ځنډېدلي دي.

د پارلمان ځينې غړي هم هوايي میدان ته رسېدلي چې له دغه ډګره د ترکش ایرلاین او کام ایر وروستیو الوتنو ته ځانونه ور ورسوي.

وروسته په کابل کې د پاکستان سفارت ولیکل چې یاد سیاسي مشران اسلام اباد ته رسېدلي دي

۱۲:۳۰ - "ولسمشر ته هېڅ شی نه دي ورپاتې"

د وحید عمر د یادښت له مخې، دا هغه شېبې دي چې ولسمشر غني‌ ته نور د حکومت، ادارې او امنیتي دستګاه په نوم څه نه وو ورپاتې او دولت پاشل شوی و. دی وايي، هڅه کېږي چې ولسمشر له دفاع وزیر بسم الله محمدي سره خبرې وکړي خو د هغه درک نه شته. بیا د کورنیو چارو وزیر عبدالستار میرزکوال او د ملي امنیت مشر احمد ضیاء سراج سره پر تیلیفون غږیږي او د کابل د خوندیتوب لپاره ځينې سپارښتنې ورته کوي.

ماسپښين ۱۴:۴۹ - د ولسمشر وروستی پیغام

په ښار کې اوازه ده چې ولسمشر غني له هېواده وتلی. خو هغه لا د ارګ په ګلخانه ماڼۍ کې پر څوکۍ د شاه غازي امان الله خان مېز ته د ملي بیرغ تر څنګ ناست دی او تر شا یې د احمدشاه بابا پر سر د تاج اېښودلو مراسمو تابلو ښکاري. د امان الله خان د نیمګړي فصل د بشپړوونکي نارې وهونکی محمد اشرف غني همدلته د ولسمشر په توګه خپل وروستی ویډيويي پیغام ثبتوي

ویډیو په نیم کې پرې شوې خوا دا پیغام هم کابل ښاریانو ته د ډاډ او امنیتي مسولانو ته د سپارښتنو په اړه دی

۲:۳۰ - ولسمشر غني له هېواده په وتو دی

تیلیفون ولسمشر ته یو مهم خبر ورکړ. د نظام د سقوط خبر و. ورپسې ښاغلی محب او د ولسمشر د ځانګړي ګارد قومندان قهار کوچی ولسمشر ته ورغلل چې پي پي ایس هم سقوط کړی. ولسمشر خوست ته د تګ لپاره د چمتوالي خبره ورته کوي، خو هغه ورته وايي چې خوست او جلال اباد هم سقوط شوي دي. ښاغلي غني وروسته له بي بي سي سره خبرو کې وویل چې شاوخوا کسانو یې د ده د دفاع توان بایللی و. په ګاډي کې کېناست خو نه پوهېده چې چېرې ځي او وروسته ورته څرګنده شوه چې وطن پرېږدي.

ولسمشر تر چورلکې راوستل کېږي. ښاغلی محب او د پي پي ایس قومندان هم پکې سپرېږي. دوه چورلکې د کابل شمال لور ته الوځي، یوه داسې لور‌ ته چې په لومړیو کې یې منزل نه و مالوم.

مازدیګر ۵ بجې - کرزی وايي، "زه درسره یم"

مخکیني ولسمشر حامدکرزي پر فېسبوک خلکو ته د ډاډګېرنې لپاره یو ویډيويي پیغام خپور کړی او وايي، له طالبانو سره په اړیکه کې دی چې د واک لېږد ته یوه سولييزه لار ولټول شي.

۵:۳۰ - صالح: طالبانو ته نه تسلیمېږم

د ولسمشر لومړي مرستیال امرالله صالح، پرخپله ټوېټرپاڼه ولیکل چې طالبانو ته به هېڅکله تسلیم نه شي او نه به هم تر یوه چتر لاندې ژوند ورسره وکړي. مالومه نه ده چې دی په دې دوو ورځو کې چیرې و او اوس چیرې دی، خو ویل کېږي پنجشېر ته تللی