د لندن په ګډون په يو شمېر لويو ښارونو کې د نوي ۲۰۲۵ کال لمانځنې
د نړۍ په ډېرو هېوادونو کې د ۲۰۲۵ کال د رارسېدو په مناسبت لمانځنې روانې دي. د لندن تر څنګ په دوبۍ، سېډني او يو شمېر نورو لويو ښارونو کې په زړه پورې اورلوبې نندارې ته وړاندې شوې.
د نيويارک په ګډون په يو شمېر نورو ښارونو کې خلک د نوي کال مراسمو ته چمتووالی کوی.
په سویلي کوریا کې بیا د الوتکې غورځېدو پېښې له کبله د نوي کال مراسم یا ځنډول شوي او یا هم لغو شوي دي.
د اسټرالیا په سډني کې ۱۲ بجو ته د ساعتونو ستنو له رسېدو سره سم اورلوبې پیل شوې او ځايي اوسېدونو د سمندر پر غاړه د مېلو لپاره د راټولېدو په بڼه خوښي څرګنده کړه.
له بیجینګ نیولې تر کوالالمپور پورې میلیونونه خلک په مېله ځایونو کې د ۲۰۲۴ کال پای ته رسېدو او نوي ۲۰۲۵ کال رادبره کېدو لمانځنې لپاره یو ځای شوي وو.
په چین کې د نوي کال له مراسیمو مخکي ولسمشر شي جینپینګ چینیایانو ته په وینا کې وویل، د هېواد اقتصاد یې ''مخ پر بره'' روان دی.
نوموړي دغه راز هغو کسانو ته خبرداری ورکړ، چې چین په خپلواکه تایوان کې د دیموکراسي پلوه ځواکونو په نظر ورته ګوري.
په سوریه کې بیا خلک له نیمې پېړۍ وروسته د نوي کال ورځ په داسې حال کې پیلوي، چې پر دغه هېواد د اسد کورنۍ واکمني له منځه تللې.
سوریه د کردانو، ارمینیایانو، اسوریانو، مسیحیانو، دروز، علوي شیعه ګانو او عرب سنیانو په ګډون د بېلابېلو توکمونو او مذهبونو پیروانو هېواد دی، چې سني عربان پکې د مسلمانانو اکثریت تشکیلوي.
هئیت تحریر الشام چې د بشار الاسد حکومت ړنګولو په بریدونو کې یې مخکښ رول درلود ژمنه کړې، چې په دې هېواد کې به د ټولو لږکیو حقونو او ازادي ساتي.
د عکس سرچینه، Reuters
د عکس سرچینه، Getty Images
د جي ایم ټي له مهال سره سم به د ماښام پنځه نیمې بجې په میانمار کې کال بدل شي او ورپسې به د جي ایم ټي پر مهال ماښام شپږ بجې بنګله دېش کې هم نوی ۲۰۲۵ کال پیل شي.
دغه رپوټ به پرلپسې تازه کېږي او موږ به تاسو د نړۍ له بېلابېلو برخو د نوي کال رارسېدو او مراسیمو لمانځلو حال درکړو.
د عکس سرچینه، Getty Images
