افغان لیکوال او ژورنالیست محمد اسحاق نګارګر د ۸۲ کالو په عمر وفات شو

افغان لیکوال، کره کتونکی او ژورنالیست محمد اسحاق نګارګر د ۸۲ کالو په عمر د کوویډ - ۱۹ ناروغۍ له کبله د انګلستان په برمنګهم کې وفات شو.

د ښاغلي نګارګر کورنۍ وايي، محمد اسحاق نګارګر له دوو ورځو راهیسې په روغتون کې بستري وو .

نوموړی به په برمنګهم کې خاورو ته وسپارل شي.

ښاغلی نګارګر له تېرو نژدې دریو لسیزو راهیسې په انګلستان کې مېشت و.

محمد اسحاق نګارګر د فاریاب ولایت په مېمنه کې زېږېدلی و او د کابل پوهنتون په ادبیاتو او بشري علومو پوهنځي کې یې لوړې زدکړې کړې وې.

نوموړي وروسته د ماسټرۍ تر کچې د بریتانیا په برمنګهم کې زدکړې وکړې.

محمد اسحاق نګارګر د کابل پوهنتون ادبیاتو پوهنځي کې د استاد په توګه دنده تر سره کړې او وروسته یې څه موده پاکستان ته د کډوالۍ پر مهال هم د استاد په توګه دنده درلوده.

ښاغلي نګار ګر په بریتانیا کې د بي بي سي له افغان څانګې سره تر کلونو پورې د خبریال په حیث دنده درلوده.

محمد اسحق نګارګر پر ټولنیزو، تاریخي او کلتوري مسایلو ګڼ شمېر اثار لیکلي، او دغه راز یې د پښتو او فارسي د شعر کره کتنې په برخه کې لیکنې کړې دي.

نوموړی د هند مشهور فارسي ژبي شاعر مرزا عبدالقادر بیدل پېژندنې برخه کې خورا په زړه پورې اثار لیکلي.