फिनल्यान्ड साना मरिन: फिनल्यान्डकी प्रधानमन्त्रीले गराइन् लागु औषध जाँच

फिनल्यान्डकी प्रधानमन्त्री साना मरिनले आफू फिनिश पपस्टारसँग नाचिरहेको फूटेज बाहिरिएर आलोचनामा परेपछि लागु औषध परीक्षण गराएको बताएकी छन्।

उनको नाचेको भिडिओ सोसल मिडियामा चुहिएपछि केही नेताहरूले उनको नार्कोटिक्स अर्थात् लागु औषध लिए नलिएको परीक्षण गर्नुपर्ने माग गरेका थिए।

शुक्रवार एक प्रेस सम्मेलनमा प्रधानमन्त्री मरिनले आफूले लागु औषधको परीक्षण गराएको र आगामी हप्ता परिणाम आउने जनाएकी थिइन्।

उनले रिपोर्टरहरू सामुन्ने आफूले लागु औषध कहिल्यै सेवन नगरेको दोहोर्‍याइन्।

उनले हेलसिन्किमा रिपोर्टरहरूसँग भनिन्, "किशोरकालमा समेत मैले कुनै पनि प्रकारको लागु औषध सेवन गरेकी छैन।" उनले आफूमाथि उठेका प्रश्नको निवारण खोज्न त्यस्तो परीक्षण गराएको बताइन्।

पत्रकारहरूले सन् २०१९ देखि प्रधानमन्त्री पदमा रहेकी उनलाई सरकार प्रमुख भएका कारण केहीगरी तत्काल कुनै सरकारी निर्णय गर्नुपरेको भए कसरी गर्न सक्थिन् भनेर सोधेका थिए।

उनले अहिलेसम्म मध्यरातमा अचानक स्टेट काउन्सिल प्यालेसमा (प्रधानमन्त्री कार्यालय) जानुपर्ने गरी कुनै पनि अवस्था आइलागेको एक पटक पनि नभएको उनले बताइन्।

"मलाई लाग्छ म काम गर्न सक्ने अवस्थामा थिएँ। म पार्टीमा रमाइरहेका बेला कुनै बैठकहरू थिएनन्।"

फिनल्यान्डकी प्रधानमन्त्री सन्ना मरिनले मदिरापान गर्दै आफ्ना साथीभाइसँग रमाइरहेको भिडिओ चुहिएसँगै उनको चर्को आलोचना भएको थियो।

सामाजिक सञ्जालबाट लिइएको ठानिएको फूटेजमा फिनल्यान्डका 'सेलेब्रिटीहरू' सहित आफ्ना साथीहरूसँग मरिनले नाचगान गरिरहेको देखिन्छ।

खासगरी विपक्षी दलहरूले उनको आलोचना गरिरहेका छन् र एकजना नेताले त उनले लागु औषध सेवन गरे / नगरेको समेत जाँच गरिनुपर्ने माग गरेका थिए।

३६ वर्षीय मरिनले लागु औषध लिएको अस्वीकार गरेकी थिइन् र आफूले रक्सी पिएको र "चर्को पाराले" रमाएको बताएकी छन्।

केही अघिसम्म उनी विश्वकै कान्छी सरका प्रमुख थिइन्। आफू 'पार्टी' जाने कुरा मरिनले गोप्य राख्ने गरेकी छैनन्। उनले धेरैजसो साङ्गीतिक कार्यक्रममा फोटो खिचाएको पाइन्छ।

गत वर्ष उनले कोभिड-१९ सङ्क्रमितको सम्पर्कमा आएपछि समेत 'क्लब' गएको भनेर आलोचना भएपछि माफी मागेकी थिइन्।

जर्मन न्यूज आउटलेट बिल्डले गत हप्ता उनलाई "संसारकै रमाइली प्रधानमन्त्री" भनेको थियो।

बिहीवारको भिडिओबारे प्रतिक्रिया दिँदै उनले आफ्नो भिडिओ खिचिएको आफूले थाहा पाएको तर त्यसरी सार्वजनिक भएकोमा दुख लागेको बताइन्।

''मैले नाचेँ गाएँ र रमाइलो (पार्टी) गरेँ। सबै वैधानिक कुरा नै हो,'' उनले भनेकी थिइन्।

मरिन ३४ वर्षको उमेरमा सन् २०१९ मा प्रधानमन्त्री बनेकी थिइन्।

विपक्षी नेता रिक्का पुराले प्रधानमन्त्री मरिनले लागु औषध लिएकी हुन वा होइनन् भन्ने जाँच गर्नुपर्ने माग गरेकी थिइन्।

मरिनकै गठबन्धन सरकारमा रहेकी सांसद मिक्को कर्नले पनि प्रधानमन्त्रीले "स्व: परीक्षण गर्नु" ठिक हुने बताएका थिए।

मरिनले रिपोर्टरहरूलाई "आफूले लागु औषध नलिएको" र "लागु औषधको परीक्षण गर्न कुनै समस्या नरहेको" बताएकी थिइन्।

मरिनले भनिन्, "मेरो पारिवारिक जीवन छ, मेरो कामको जीवन छ र मेरो उमेरका अरू मानिसहरू झैँ साथीहरूसँग बिताउने समय पनि छ।"

आफ्नो व्यवहार परिवर्तन गर्न कुनै आवश्यकता नरहेको ठानेको उनले बताइन्।

"म अहिलेसम्म जस्ती छु त्यस्तै रहने छु र आशा छ मलाई त्यसैगरी स्वीकार गरिनेछ," उनले भनिन्।

फिनिस मिडियामा यो भिडिओको व्यापक चर्चा भएको छ।

तर अन्य विपक्षी दलका नेताहरूले सञ्चारमाध्यम र प्रधानमन्त्रीले अनेकौँ महत्त्वपूर्ण समस्याहरू हुँदाहुँदै पार्टीबारे कुराकानी गरेको भन्दै आलोचना गरेका छन्।

साना मरिन को हुन्?

फिनल्यान्डको राजनीतिमा दखल राख्ने पत्रकार तथा मिडिया टिप्पणीकार रोबर्ट सन्डम्यानले बीबीसीलाई भने, "सधैँ झैँ यस पटक पनि मरिले मानिसहरूलाई ध्रुविकृत गरिदिएकी छन्।"

"त्यो उमेरका महिलाहरूले त्यसरी रमाइलो गर्नु स्वाभाविक हो भन्नेहरू छन् र कोही स्तब्ध भएका पनि छन्। "

"के चाहिँ निश्चित हो भने यस अघिका पार्टी तस्बिर र अहिलेको फूटेजले पनि उनको वा उनको पार्टीको लोकप्रियता घटाएको छैन।"