नेपाली कांग्रेस महाधिवेशन: शीर्ष नेतृत्वमा दाबेदारी गरेका पाँच नेताले कस्तो प्रतिबद्धता गरेका छन्

नेपाली कांग्रेसको शीर्ष नेतृत्वका दाबेदारहरूले आगामी तीनै तहका निर्वाचनमा पार्टीलाई बहुमत दिलाउनेदेखि पार्टीमा गुटबन्दी अन्त्य र पारदर्शिताको मुद्दा अघि सारेका छन्।

काठमाण्डूमा जारी १४ महाधिवेशनका लागि गठित निर्वाचन समितिका अनुसार कांग्रेस सभापतिका लागि पाँच जना उम्मेदवार छन्। शनिवार छ जनाले उम्मेदवारी दर्ता गरेका भए पनि एक जनाले आइतवार मनोनयन फिर्ता लिएपछि कांग्रेस नेतृत्वमा पाँच जनाबीच प्रतिस्पर्धा हुने भएको हो।

वर्तमान सभापति शेरबहादुर देउवासहित उपसभापति विमलेन्द्र निधि, पूर्वमहामन्त्री प्रकाशमान सिंह र केन्द्रीय सदस्य शेखर कोइराला प्यानलसहित प्रतिस्पर्धामा ओर्लिएका छन्। युवा नेता कल्याण गुरुङले भने समूहबिनै सभापतिमा उम्मेदवारी दिएका छन्।

कांग्रेसको महाधिवेशनबाट चयन हुने १३४ पदका लागि ४८७ जनाको उम्मेदवारी परेको निर्वाचन समितिले प्रकाशित गरेको अन्तिम नामावलीमा उल्लेख छ। महाधिवेशनस्थलमा सोमवार बिहान ८ बजेबाट मतदान सुरु गर्ने कार्यतालिका सार्वजनिक गरिएको छ।

मतदानस्थलमा एक पटकमा करिब एक हजार जना अटाउन सक्ने व्यवस्था गरिएको छ।

तीन फरक ठाउँबाट मतदाताहरू मतदान स्थलमा प्रवेश गर्ने व्यवस्था गरिएको छ। महाधिवेशनमा ४,७०० भन्दा बढी मतदाता रहेको निर्वाचन समितिले जनाएको छ। मतदान सुरु भएको पाँचदेखि सात घण्टामा सकिने अनुमान गरिएको निर्वाचन समिति संयोजक गोपालकृष्ण घिमिरेले जानकारी दिए।

कांग्रेस प्रतिनिधिले सभापतिसहित दुई उपसभापति, दुई महामन्त्री र समावेशीसहित आठ सहमहामन्त्रीका लागि पदाधिकारीमा मतदान गर्नेछन्।

मतदानबाट खुल्ला ३५, महिला, मधेशी र दलित ९-९, प्रत्येक प्रदेशबाट तीन जनासहित २१, आदिवासी जनजाति १५, खस आर्य १३, थारु चार, मुस्लिम तीन र पिछडिएको क्षेत्र, अपाङ्ग तथा अल्पसङ्ख्यकबाट एक-एक जना केन्द्रीय सदस्य निर्वाचित हुनेछन्।

कांग्रेसको कोषाध्यक्षसहित ३३ केन्द्रीय सदस्य निर्वाचित सभापतिको सिफारिसमा केन्द्रीय समितिबाट मनोनीत हुने व्यवस्था छ।

सभापति पदमा उठेका नेताका पाँच नेताका प्रतिबद्धता कस्ता छन्?

शेरबहादुर देउवा

अघिल्लो महाधिवेशनमा पहिलो चरणको निर्वाचनमा आफ्ना प्रतिस्पर्धी रहेका कृष्णप्रसाद सिटौलासँग मिलेर प्यानल बनाएका देउवाले महामन्त्रीमा डा. प्रकाशशरण महत र युवानेता प्रदीप पौडेललाई उम्मेदवार बनाएका छन्।

प्रधानमन्त्री समेत रहेका देउवाले आफू सभापतिमा दोहोरिए तीनै तहका संरचनामा कांग्रेसको सरकार बनाउने प्रतिबद्धता दोहोर्‍याउँदै आएका छन्।

शेखर कोइराला

सभापतिका आकाङ्क्षी शेखर कोइरालाले एक व्यक्ति एक जिम्मेवारीको नारालाई प्राथमिकता दिँदै आफ्नो प्रतिबद्धता सार्वजनिक गरेका छन्।

प्रकाशमान सिंह

अर्का उम्मेदवार प्रकाशमान सिंहले चुनावी अवधारणा पत्रमा नीति, नेतृत्व र कार्यशैली परिवर्तनलाई मुख्य मुद्दा बनाएका छन्।

विमलेन्द्र निधि

आफ्नो समूहबाट तीन पदमा मात्रै उम्मेदवारी दिएका विमलेन्द्र निधिले पार्टीमा वैचारिक स्पष्टता, गतिशीलता, जनतासँग जोडिने र सङ्घीय लोकतान्त्रिक गणतन्त्रलाई सार्थक पार्ने कांग्रेस नेतृत्व दिने प्रतिबद्धता अघि सारेका छन्।

कल्याण गुरुङ

युवा उम्मेदवार कल्याण गुरुङले पार्टीमा युवा पुस्ताको नेतृत्व र परिवर्तनको मुद्दा अघि सारेका छन्।

यो पनि हेर्नुहोस्