अन्तरिम मन्त्रिमण्डलमा समावेश हुने केही मन्त्रीको नामको सूची तयार भएको बताइएको छ

लाइभ कभरेज

1. १४ सेप्टेम्बर २०२५आजका लागि 'लाइभ अपडेट' बाट बिदा दिनुहोस्

   नवनियुक्त अन्तरिम प्रधानमन्त्री सुशीला कार्कीले पदबहाली गरेको दिन भएका विभिन्न गतिविधिहरूबारे हामीले प्रस्तुत गरेका धेरै थरी सामग्रीहरू हेरिदिनुभएकामा तपाईँहरूलाई धेरैधेरै धन्यवाद छ।

   आजका लागि हामी यो लाइभ पेजलाई यहीँ टुङ्ग्याउँछौँ।

   हाम्रा अरू सामग्रीका लागि हाम्रो वेबसाइट हेर्दै रहनुहोला।

   बीबीसी न्यूज नेपाली यूट्यूबमा पनि छ। हाम्रो च्यानल सब्स्क्राइब गर्न तथा प्रकाशित भिडिओहरू हेर्न यहाँ क्लिक गर्नुहोस्। तपाईँ फेसबुक, इन्स्टाग्राम र ट्विटरमा पनि हाम्रा सामग्री हेर्न सक्नुहुन्छ। अनि बीबीसी नेपाली सेवाको कार्यक्रम बेलुकी पौने नौ बजे रेडिओमा सोमवारदेखि शुक्रवारसम्म सुन्न सक्नुहुन्छ।

   धन्यवाद।

2. १४ सेप्टेम्बर २०२५प्रधानमन्त्री सुशीला कार्कीका तीन मन्त्रीका नाम 'टुङ्गियो', सोमवार शपथ

   अन्तरिम प्रधानमन्त्री सुशीला कार्कीले आफ्नो मन्त्रिमण्डलमा सहभागी हुने तीन सदस्यहरूको नाम टुङ्गो लगाएकी छन्।

   यसबारे थप विस्तृतमा पढ्नुहोस् :

   प्रधानमन्त्री सुशीला कार्कीका तीन मन्त्रीका नाम 'टुङ्गियो', सोमवार शपथ

3. १४ सेप्टेम्बर २०२५चोरी तथा लुटपाट भएका सामग्री खरिदबिक्री नगर्न सीआईबीको आग्रह

   

   तस्बिर स्रोत, CIB

   नेपाल प्रहरीको केन्द्रीय अनुसन्धान ब्यूरो (सीआईबी)ले गत साताको प्रदर्शन, तोडफोड तथा आगजनीका क्रममा चोरी तथा लुटपाट भएका बहुमूल्य सामग्रीहरूको खरिदबिक्री नगर्न सर्वसाधारणलाई सचेत गराएको छ।

   आज एक सार्वजनिक सूचना जारी गर्दै ब्यूरोले यस्ता सामग्रीको खरिदबिक्री तथा सञ्चय गरेको पाइएमा कानुनबमोजिम कारबाही गरिने चेतावनी दिएको छ।

   चोरिएका वा लुटपाट भएका ऐतिहासिक दस्ताबेज तथा कागजातहरू, हातहतियार र अन्य महत्त्वपूर्ण वस्तुहरू फेला पारेमा वा तिनीहरूबारे केही जानकारी पाएमा नजिकका सुरक्षा निकायमा खबर गरिदिन पनि सीआईबीले सर्वसाधारणलाई आग्रह गरेको छ।

4. १४ सेप्टेम्बर २०२५नयाँ महान्यायाधिवक्ता सविता भण्डारी, प्रथम महिला महान्यायाधिवक्ता

   अन्तरिम सरकारकी प्रधानमन्त्री सुशीला कार्कीले वरिष्ठ अधिवक्ता सविता भण्डारीलाई महान्यायाधिवक्तामा सिफारिस गरे बमोजिम राष्ट्रपतिले नियुक्त गरेका छन्।

   उनी नेपालको इतिहासमा पहिलो महिला महान्यायाधिवक्ता बनेकी छन्।

   महान्यायाधिवक्ता भण्डारीले प्रधानमन्त्रीको कानुनी सल्लाहकारको रूपमा काम गर्ने छिन्।

   

   तस्बिर स्रोत, Sabita Bhandari Facebook

5. १४ सेप्टेम्बर २०२५४६ मध्ये २६ वटा शवको पोस्टमोर्टम सकियो, २१ वटा शव परिवारलाई हस्तान्तरण

   त्रिवि शिक्षण अस्पतालका फरेन्सिक विभाग प्रमुख डा गोपाल चौधरीका अनुसार 'जेन जी' प्रदर्शनका क्रममा ज्यान गुमाएका मध्ये हालसम्म २६ जना मृतकको शवको पोष्टमोर्टम सकिएको छ।

   ती मध्ये २१ वटा शव आफन्तहरूलाई हस्तान्तरण गरिएको छ।

   हालसम्म त्रिवि शिक्षण अस्पतालमा ४६ वटा शव ल्याइएका बताइएको छ। जसमध्ये ७ वटा जलेका शवहरुको भने पहिचान गर्न बाँकी रहेको र पोस्टमोर्टम समेत सुरु नभएको अस्पतालले जनाएको छ।

6. १४ सेप्टेम्बर २०२५महान्यायाधिवक्ता रमेश बडालको राजीनामा स्वीकृत

   महान्यायाधिवक्ता रमेश बडालको राजीनामा स्वीकृत भएको छ।

   अन्तरिम प्रधानमन्त्री सुशीला कार्कीले पदभार सम्हालेकै दिन बडालको राजीनामा स्वीकृत भएको समाचार आएको हो। प्रधानमन्त्री केपी शर्मा ओलीले राजीनामा दिएकै दिन अर्थात्‌ मङ्गलवार उनले पनि राजीनामा दिएका थिए।

   “प्रधानमन्त्रीले नै राजीनामा दिनुभएपछि म पदमा बसिरहने कुरा भएन। मैले पनि सोही दिन राजीनामा दिएको हुँ। स्वीकृतिपत्र आज पाएको हुँ,” बीबीसी न्यूज नेपालीसँग उनले भने।

   महान्यायाधिवक्ताको भूमिका प्रधानमन्त्रीको प्रमुख कानुनी सल्लाहकारका रूपमा हुने गर्छ।

7. १४ सेप्टेम्बर २०२५अझै १० हजारभन्दा धेरै कैदीबन्दी जेलबाहिर

   भदौ २३ र २४ गतेका प्रदर्शनपश्चात् सिर्जित परिस्थितिका कारण देशभरका विभिन्न कारागारबाट भागेकामध्ये झन्डै चार हजार कैदीबन्दी पक्राउ परेको तर अझै १० हजारभन्दा धेरै फरार रहेको प्रहरी प्रवक्तालाई उद्धृत गर्दै राष्ट्रिय समाचार समिति (रासस)ले जनाएको छ।

   “नेपाल प्रहरीका केन्द्रीय प्रवक्ता एवं प्रहरी नायब महानिरीक्षक विनोद घिमिरेले (आइतवार) मध्याह्नसम्ममा तीन हजार ७२३ कैदीबन्दी पक्राउ गरी कारागामा ल्याइएको जनाउँदै अझै १० हजार ३२० कैदीबन्दी फरार रहेकाले आवश्यक सर्तकता अपनाउन सर्वसाधारणमा आग्रह गर्नुभयो,” राससले दिएको विवरणमा उल्लेख छ।

   कतिपयलाई भारत भाग्न खोजिरहेको अवस्थामा भारतीय प्रहरीले समातेर फिर्ता गरेका छन् भने कतिपय सेना, प्रहरी र सशस्त्र प्रहरीले पक्राउ गरेको उनले बताएको पनि विवरणमा उल्लेख छ।

   साथै कतिपय आफैँ फिर्ता भएर कारागार आएका बताउँदै प्रवक्ता घिमिरेले कैदीबन्दीको खोजी अभियान जारी रहने बताए।

   गत भदौ २४ गतेको तनावका बीच नक्खु कारागारबाट निस्किएका राष्ट्रिय स्वतन्त्र पार्टीका सभापति रवि लामिछाने शनिवार कारगार फर्किएका थिए।

   कैदीबन्दीका बारेमा केही सूचना प्राप्त भएमा नजिकको प्रहरी कार्यालय तथा सुरक्षा निकायमा जानकारी दिन प्रहरीले अनुरोध गरेको छ।

8. १४ सेप्टेम्बर २०२५प्रधानमन्त्रीको सम्बोधन: '६ महिनाभित्र नयाँ संसद्लाई कार्यभार सुम्पिने अठोट', २७ घन्टाको आन्दोलनले अन्त सत्तापलट गरेको मलाई थाहा छैन

   पदभार ग्रहणपश्चात् उच्च सरकारी अधिकारीहरूलाई सम्बोधन गर्दै प्रधानमन्त्री सुशीला कार्कीले मुलुकका अत्यावश्यक संस्थाहरूमा छानीछानी प्रहार भएको बताएकी छन्।

   “प्रहरीका चौकी, थाना जले। अदालतका फाइल नष्ट भए। सिंहदरबारमा पनि भयो। बडो आश्चर्यको कुरा छ किन अत्यावश्यक भवन तथा कागज नष्ट गरिए? अलिकति लाज पनि लाग्यो। नेपाली नै भएर यो काम गरेको भए तिनलाई कसरी नेपाली भन्ने। यो देशमा यस्तो पहिलो पटक भएको छ,” उनले भनिन्।

   “अनुहार देखाउन नसक्ने अवस्था छ। षड्यन्त्रै भएको पो हो कि? अनुसन्धान गरेर यसरी नोक्सान गर्नेहरूलाई छानबिन गर्नुपर्ने छ।”

   आफू रहरले प्रधानमन्त्री नबनेको पनि उनले बताइन्।

   “म रहरले आएको होइन। सडकबाट जताततै आवाज उठ्यो विवश भएर आउनुपर्‍यो। सत्ताको रसास्वादन गर्न म आएको होइन।”

   उनले ६ महिनामात्र अवधि काम गर्ने र त्योभन्दा बढी नबस्ने अनि नयाँ आउने संसद्‌ र मन्त्रीलाई सुम्पने अठोट गरेको बताइन्। उनले सुरक्षा निकाय तथा अन्य सबैको साथविना यो सम्भव नहुने भएकाले सहयोगको अपिल पनि गरिन्।

   

   तस्बिर स्रोत, RSS

9. १४ सेप्टेम्बर २०२५दुःखद परिस्थितिमा ज्यान गुमाएका परिवारप्रति समवेदना अनि घाइतेको शीघ्र स्वास्थ्य लाभको कामना, मृतक परिवारलाई क्षतिपूर्तिस्वरूप १० लाख दिइने

   नयाँ प्रधानमन्त्रीलाई स्वागत गर्दै मुख्य सचिव एकनारायण अर्यालले शुभकामना व्यक्त गरेका छन्।

   सुरुमा भदौ २३ र २४ का घटनामा ज्यान गुमाएकाहरू प्रति श्रद्धाञ्जली प्रकट गर्न एक मिनेट मौन धारण गरिएको छ।

   दुःखद परिस्थितिमा परिवारप्रति समवेदना अनि घाइतेको शीघ्र स्वास्थ्य लाभको कामना पनि गरिएको छ।

   स्वागत कार्यक्रममा जानकारी दिँदै मुख्य सचिव अर्यालले यो साता भएका घटनाहरूमा परी ५९ जना सर्वसाधारण, १० जना कैदीबन्दी अनि ३ जना प्रहरी गरी ७२ जनाको ज्यान गएको बताए।

   त्यस्तै १३४ सर्वसाधारण र ५७ सुरक्षाकर्मीसहित १९१ जना घाइते भएको उनले बताए।

   घाइतेहरूको सरकारले नि:शुल्क उपचार गर्ने र मृतकका परिवारलाई १० लाख क्षतिपूर्तिस्वरूप दिइने पनि उनले बताए।

   अर्यालले विषम परिस्थितिमा धेरै चुनौती रहेको भन्दै युवा पुस्ताको विषयहरूको सम्बोधन गर्न सुशासन र सेवा प्रवाह गर्नु पर्ने अवस्था रहेको बताए।

   

   तस्बिर स्रोत, RSS

10. १४ सेप्टेम्बर २०२५जेन जी आन्दोलनका क्रममा ज्यान गुमाउनेको सङ्ख्या ७२

    मूख्य सचिव एक नारायण अर्यालले प्रधानमन्त्रीको पदभार ग्रहण कार्यक्रमका अवसरमा सम्बोधन गर्ने क्रममा दिएका जानकारी अनुसार गत सोमवारको जेन जी आन्दोलनयता भएका विभिन्न हिंसाका घटनामा ज्यान गुमाउनेको सङ्ख्या ७२ पुगको छ।

    उनले १९१ जना घाइतेहरूको विभिन्न अस्पतालहरूमा उपचार भइरहेको पनि जनाए। उनका अनुसार आन्दोलनका क्रममा ज्यान गुमाएकाहरूको परिवारलाई १० लाख रुपैयाँ क्षतिपूर्ति उपलब्ध गराउने निर्णय पनि भएको छ।

11. १४ सेप्टेम्बर २०२५प्रधानमन्त्रीको पदभार ग्रहण अवसरका केही तस्बिर

    

    तस्बिर स्रोत, BBC/Bijay Gajmer

    

    तस्बिर स्रोत, BBC/Bijay Gajmer

12. १४ सेप्टेम्बर २०२५प्रधानमन्त्री कार्कीद्वारा ‍औपचारिक कार्यभार ग्रहण

    आगलागीपछि जलेर क्षतिग्रस्त भएको सिंहदरबार परिसरस्थित एक भवनमा आइतवार नवनियुक्त प्रधानमन्त्री सुशीला कार्कीले औपचारिक रूपमा कार्यभार ग्रहण गरेकी छन्।

    गृहमन्त्रालयको निम्ति भनेर बनाइएको नयाँ भवनमा प्रधानमन्त्री तथा मन्त्रिपरिषद्‌को कार्यालय सारेर नयाँ प्रधानमन्त्रीलाई त्यहाँ उच्च अधिकारीहरूले स्वागत गरेका छन्।

    सञ्चारकर्मी तथा अधिकारीहरूको बाक्लो उपस्थितिका माझ प्रधानमन्त्री कार्की कार्यालयमा प्रवेश गरेकी थिइन्।

    

    तस्बिर स्रोत, NTV screengrab

13. १४ सेप्टेम्बर २०२५अन्तरिम प्रधानमन्त्रीले आजबाट कार्यभार सम्हाल्न सुरु गरिन्

    जेन जी आन्दोलनपछि नियुक्त भएकी अन्तरिम प्रधानमन्त्री सुशीला कार्कीले आजबाट कार्यभार सम्हालेकी छन्।

    सिंहदरबार परिसरमा रहेको पहिले गृह मन्त्रालयका निम्ति तयार पारिएको भवनमा रहेको कार्यालयबाट आफ्नो काम आरम्भ गरेकी छन्।

    

    तस्बिर स्रोत, RSS

14. १४ सेप्टेम्बर २०२५नयाँ सरकारलाई अमेरिकी सन्देश: सहकार्य गर्न तयार

    नेपालको अन्तरिम सरकारको प्रधानमन्त्रीमा सम्माननीय सुशीला कार्की नियुक्त हुनुभएको छ।

    गत हप्ताको दुखद घटनाहरूपछिको शान्तिपुर्ण समाधानको हामी स्वागत गर्दछौं।

    हामी लोकतान्त्रिक समाधानप्रतिको प्रतिबद्धताको लागि राष्ट्रपति रामचन्द्र पौडेल र युवा नेताहरूको प्रशंसा गर्दछौं, यद्यपि यो दुखद समयमा हामी नेपालसँग शोकमा साथ मै छौं। हामी नेपाली सेना र प्रधानसेनापति अशोक राज सिग्देललाई संक्रमणलाई सहज बनाउदै शान्तिपूर्ण नागरिक सरकार र व्यवस्था पुनर्स्थापित गर्न महत्वपूर्ण भूमिका निर्वाह गरेकोमा सम्मान गर्दछौं। अन्तरिम सरकारले आगामी महिनाहरूमा नयाँ निर्वाचनको तयारी गर्ने क्रममा हामी नेपालसँग सहकार्य गर्न तयार छौं।

15. १४ सेप्टेम्बर २०२५सर्वोच्च अदालतले आजबाट बन्दी प्रत्यक्षीकरण सुनुवाइ थाल्ने, ‘८५% कागजात जलेर नष्ट’

    भदौ २४ मा भएको आगजनी तथा तोडफोडले ध्वस्त सर्वोच्च अदालतले आइतबारबाट बन्दी प्रत्यक्षीकरणको निवेदन दर्ता हुन आए सुनुवाइ थाल्ने जनाएको छ।

    अन्य इजलासहरू बस्ने अहिले अवस्था नरहेको सर्वोच्चका प्रवक्ताले बताएका छन्।

    “भौतिक संरचना सबै ध्वस्त भएको कारणले हामीले पूर्ण रूपमा काम गर्न सक्ने अवस्था छैन,” प्रवक्ता अर्जुन कोइरालाले बताए।

    “बन्दी प्रत्यक्षीकरणको एउटामात्र इजलास पनि हामीले पालबाट नै सुरुवात गर्न लागेका हौँ।”

    सर्वोच्च अदालतमा भएको आगजनीमा केवल १०-१५ प्रतिशतमात्र कागजात बाँकी रहेको पनि उनले बताए।

16. १४ सेप्टेम्बर २०२५जेन जी आन्दोलनको सातौँ दिनका घटनाक्रम

    नमस्कार। बीबीसी न्यूज नेपालीको लाइभ पेजमा तपाईँलाई स्वागत छ।

    आज हामी तपाईँहरूलाई युवाहरूको आन्दोलनपछिको सातौँ दिनमा देश सामान्य अवस्थामा फर्कने प्रयासमा दिनभर हुने विभिन्न घटनाक्रम तथा अन्तरिम सरकार, कार्यपालिका र न्यायपालिकाबारेका गतिविधिहरू यो लाइभ पेजबाट जानकारी गराउने छौँ।