Сүрөт баяндама: Бангладешке качкан рохинжа мусулмандары

Жүз миңдеген рохинжа мусулмандары оор жаракаттар менен Бангладешке качып келүүдө. Reuters агенттиги чек арадан өткөн качкындардын сүрөттөрүн топтоду.

Ansar Allah

Сүрөттүн булагы, Reuters

Сүрөттүн түшүндүрмөсү, Мьянманын армиясы рохинжа мусулмандарынын турак жайларын өрттөп, жөн жай тургундарды кыйноого алды деп айыпталууда. Зомбулуктан миңдеген рохинжа мусулмандары аргасыз Бангладешке жер которгон. Reuters агенттиги чек арадан оор жаракаттар менен өткөн качкындардын сүрөттөрүн топтоду. Ансар Алла 11 жашта, анын бутуна ок тийген. "Биздин үйдү өрттөп, тынбай ок жаадырышты. Мен эмнеге кудай бизди жазалап жатат деп токтобой ойлоном", -деди Ансардын апасы Самара.
Mohamed Heron, 6, and his brother Mohamed Akter, 4

Сүрөттүн булагы, Reuters

Сүрөттүн түшүндүрмөсү, Мухаммед Херон менен Мухаммед Актер өрттөн жабыркаган. Биртууган балдардын аталаш агасынын айтымында, аскерлер кыштакка ракета атып, балдардын эки карындашы көз жумган. Мьянманын армиясы өткөн аптада окуя боюнча өз тергөөсүн жарыялап, аскерлер мыйзам бузган жок деген тыянак чыгарган. Бирок Мьянманын армиясы жарыялаган баяндама Би-Би-Синин кабарчылары көргөн далилдерге дал келбейт. Бириккен Улуттар Уюму болсо Ракхайн аймагындагы кейиштүү окуяларды "этникалык тазалоо" деп мүнөздөгөн.
Anwara Begum

Сүрөттүн булагы, Reuters

Сүрөттүн түшүндүрмөсү, Анвара Бегум үйү өрттөнүп жатканда ойгонгон. 36 жаштагы Анвара имараттан качып чыгууга аракеттенген, бирок чатыр кулап түшүп, анын кийими өрттөлүп терисине жабышып калган. Анваранын күйөсү аны сегиз күн чек арага чейин көтөрүп барган. "Мен өлөм го деп ойлогом. Балдарым үчүн күрөштүм", -деди Анвара.
Imam Hossain

Сүрөттүн булагы, Reuters

Сүрөттүн түшүндүрмөсү, 42 жаштагы Имам Хуссейин медреседе мугалим болуп иштейт. Медреседен үйүнө басып баратканда, үч адам кол салып, бычактап кеткен. Эмдиги күнү ал аялын жана эки баласын кыштактын тургундары менен чогу Бангладешке жөнөткөн. Ал үй-бүлөсүнүн артынан келип, жакындарын издеп жүргөн учурда сүрөт тартылган. "Мен Мьянманын өкмөтүнөн сурагым келет - рохинжаларды эмнеге кыйноого алып жатасыңар? Биздин кандай күнөөбүз бар?", -деди Имам Хуссейин.
Nur Kamal

Сүрөттүн булагы, Reuters

Сүрөттүн түшүндүрмөсү, Өткөн аптада, шаршемби күнү АКШнын мамлекеттик катчысы Рекс Тиллерсон көз карандысыз тергөөнү талап кылды. Окуяга күбө болгондордун көргөзмөлөрү менен Мьянманын армясы сунуштаган далилдер бир-бирине карама-каршы келүүдө. 17 жаштагы Нур Камалды аскерлер сабап, мылтыгы менен башына уруп, бычактап кеткен.
Abdu Rahaman

Сүрөттүн булагы, Reuters

Сүрөттүн түшүндүрмөсү, Абду Рахман башка тургундар менен чек араны көздөй качып баратканда Мьянманын аскерлери чабуул койгон. Алардын бири мачете бычагын ыргытып, Абду Рахмандын бутунун үч манжасын кесип кеткен. Аны чек арага көтөрүп келишкен. "Биздин келечегибиз бүдөмүк бойдон. Кудай жардам берсе экен. Эл аралык коомчулук бир нерсе жасашы керек", -деди Абду Рахман.
Momtaz Begum

Сүрөттүн булагы, Reuters

Сүрөттүн түшүндүрмөсү, Аскерлер 30 жаштагы Момтаз Бегумдун кыштагына келип, андан акча талап кылган. "Менин эчтекем жок, жакыр жашайм деп айттым. Алар мени сабап, акча бербесең өлтүрөбүз" деп кыйкырышты. Момтаз Бегумду үйүнө камап, чатырын өрттөп кетишкен. Ал эптеп качып чыгып, үч баласынын сөөгүн тапкан. Аскерлер кызын зордуктап, сабап кетишиптир. "Келечек тууралуу эмне деп айта алам. Азыр бизде турак жай, тамак-аш, жакындарыбыз да жок. Алар биздин келечекти дагы өлтүрдү", -деди Момтаз Бегум.