Британ Коргоо министрлиги Кипрдеги базага жасалган чабуулга жооп кайтарганын билдирди
Сүрөттүн булагы, Getty Images
Жекшемби күнү кечинде Кипрдеги британ аба күчтөрүнүн базасына "болжолдуу дрон сокуусу" жасалганы маалым болду. Коргоо министрлигинин маалыматына караганда, куралдуу күчтөр жергиликтүү убакыт боюнча саат 22:00 чамасында Кипрдеги Akrotiri аба күчтөрүнүн базасына жасалган чабуулга жооп кайтарган. Би-Би-Синин маалыматы боюнча, соккудан эч ким жабыркаган эмес.
"Аймактагы аскерлердин коопсуздугу эң жогорку деңгээлде корголгон. База кызматкерлердин коопсуздугун камсыз кылуу үчүн дароо аракет көрдү",- деп билдирди Улуу Британиянын Коргоо министрлиги.
Бул окуя премьер-министр Кир Стармер Улуу Британия АКШнын өтүнүчүн кабыл алганын билдиргенден кийин болду.
Өтүнүчтө АКШ британ аскердик базаларын Ирандын ракеталык системаларына каршы "коргонуу" соккулары үчүн колдонууну суранган.
Соңку жаңжал ишемби күнү эртең менен башталган. Анда Израил менен АКШ Ирандын жетекчилигине жана армиясына каршы уланып жаткан кол салуунун алкагында "ири масштабдагы" чабуул жасаган. Анын жүрүшүндө Ирандын жогорку лидери аятолла Али Хаменеи мерт болгон.
Иран буга жооп катары аймактагы америкалык объекттерге жана алардын өнөктөштөрүнө каршы баллистикалык ракеталарды жана дрондорду учуруп, Израилди, Бахрейнди, Кувейтти, Катарды, Бириккен Араб Эмираттарын жана Иорданияны бутага алды.
Коргоо министри Жон Хили жекшемби күнү эртең менен Жакынкы Чыгыштагы британ аскерлери жана жайкын тургундар Ирандын "баш аламан чабуулдарына" кабылуу коркунучунда экенин айткан.
Мурдараак болгон башка окуя боюнча Хили Кипрге эки баллистикалык ракета учурулганын билдирип, бирок арал негизги бута эмес экенин кабарлаган.
Күндүн башкы жаңылыктарын Би-Би-Синин WhatsApp каналынан окуңуз
Катталыңыз
Жарыянын аягы
Кийин Кипр өкмөтүнүн өкүлү премьер-министр Кир Стармер өлкө президенти Никос Христодулидис менен телефон аркылуу сүйлөшүүдө "Кипр бутага алынбаганын" так билдиргенин маалымдады.
Жекшемби күнү Катарда жайгашкан Улуу Британиянын Аскер-аба күчтөрүнүн курамындагы RAF Typhoon учагы "коргонуу мүнөзүндөгү аба кайгуулу" учурунда ирандык дронду атып түшүргөнү айтылды.
Бул АКШ менен Иран ортосундагы сокку башталгандан берки британ истребители ирандык дронду атып түшүргөн биринчи учур болду.
Мындан мурда Ирактагы британ күчтөрүнүн дрондорго каршы күрөшүү бөлүмү коалициялык базага багыт алган Иран дронун жок кылган. Ал базага британ аскерлери жайгаштырылган болчу.
Премьер-министр Кир Стармер Улуу Британия "Ирак боюнча кетирилген катадан" сабак алганын айтып, өлкө Иранга каршы алгачкы соккуларга катышпаганын жана "чабуулдук аракеттерге кошулбайт турганын" билдирген.
Кир Стармер билдиргендей, АКШнын британ аскер базаларын колдонуу өтүнүчүн кабыл алуунун негизги себеби - союздаштардын "жамааттык өзүн-өзү коргоосу" жана британ жарандарынын өмүрүн коргоо болгон. Ал Иранды "тыптыйпыл кылуу стратегиясын" жүргүзүп жатат деп айыптады.
BBC маалыматына ылайык, АКШ Ирандын ракета жайгашкан объекттерине сокку уруу үчүн Глостерширдеги Фэрфорд авиабазасын жана Инди океандагы Диего-Гарсия аралын колдонушу ыктымал.
