Hamas ekwela ịtọhapụ mmadụ iri ha ji ma chọọ nkwụsị agha na-adịgide na nzaghachi mba Amerịka

Mkpuchi Na Eme Ozugbo

Uzoamaka Ewuzie, Ikechukwu Kalu, Michael Ngene, Chinonso Ugorji, Michael Ilediagu, Adline Okere

1. 3 Juun 2025Otu ha na Al-Qaeda nwere mmekọ ekwuola na ha wakporo ndịagha mba Mali

   

   Ebe foto si, Getty Images

   Otu na-eyi ọha egwu ha na otu Al-Qaeda nwere mmekọ ekwuola na ọ bụ ha wakporo ogige ndịagha mba Mali n’obodo Boulikessi.

   Ihe karịrị ndịagha 30 nwụrụ na mwakpo ahụ mere ụbọchị Sọnde, 1 Juun, 2025 mana ndị ọchịchị ekwubeghị ka nke ọ bụ eziokwu.

   Ụbọchị Mọnde, 2 Juun, 2025, otu Jama’a Nusrat ul-Islam wa-Muslimin (JNIM) kwuru na ọ bụ ogige ndịagha Timbuktu ka ha chọrọ ịwakpo, dịka ndị obodo kwuru na ha nụrụ ụda egbe.

   Ozi ndịagha wepụtara ụbọchị Mọnde 2 Juun, 2025, kwuru na ha gbochiri mwakpo ndịagha nnupuisi mere na Timbuktu gbuo mmadụ 14 n’ime ha ma nwụchie mmadụ 31.

2. 31 Mee 2025Hamas ekwela nkwa ịtọhapụ mmadụ iri ha ji ma kwuo na ha chọrọ ka ịkwa mgbọ kwụsị

   

   Ebe foto si, Reuters

   Hamas ekwuola na ha dị njikere ịtọhapụ mmadụ iri ha ji nakwa ozu mmadụ 18 na nzaghachi oku mba Amerịka kpọrọ ka a kwụsị ịkwa mgbọ na Gaza.

   Otu Hamas kwuru na ha chọrọ ka Izrel tọhapụ ụfọdụ ndị Palestinia ha ji, mana mba Izrel ekwubeghị ihe ọbụla maka nke a.

   Cheta na obi ọchịchị White Houes mba Amerịka nọrọ na mbido izuụka kwuo na Izrel ebinyela aka n’atụmatụ ahụ Steve Witkoff wepụtara.

   Ọzọkwa, mba Izrel malitere mgbochi n’okeala ha na Gaza ma malitekwa mbuso agha megide otu ndị Hamas na 18 Maachị 2025 nke mebiri nkwekọrịta nkwụsị ịkwa mgbọ ọnwa abụọ n’etiti mba abụọ ahụ nke mba Amerịka, Kataa na Ijiput wetere.

   Ihe ruru mmadụ 54,381 anwụọla n’agha Gaza kemgbe Izrel malitere ịtụ ogbunigwe megide mbuso agha ndị Hamas mere n’Izrel na 7 Ọktoba 2023 nke gburu mmadụ otu puku na narị abụọ ma jidekwa mmadụ narị abụọ na iri ise na otu ndị ọzọ dịka ụlọ ahụike ndị Hamas siri kwuo.

3. 31 Mee 2025E ruoola mmadụ 151 nwụrụ n'oke idemmiri mere na Nịja steeti nke Naịjirịa

   

   Ebe foto si, Mikail Musa

   Ihe ruru mmadụ otu narị na iri ise na otu anwụọla na mpaghara etiti nke Naịjirịa maka oke idemmiri mebiri ọtụtụ ụlọ obibi ma chụpụ ọtụtụ puku mmadụ n’ụlọ n’izu a.

   Ụlọọrụ na-ahụ maka gbatagbata na Nịja steeti a kpọrọ Niger State Emergency Management Agency (Nsema) gwara ụlọ mgbasa ozi BBC na ọnwụ mmadụ e biliela n’ọnụọgụgụ site na 115 mgbe idemmiri ahụ mechara n’obodo Mokwa ruo 151 ugbua.

   Ọnụ na-ekwuchitere ụlọọrụ Nsema gwara BBC na ihe karịrị ụlọ dị narị ise na mmadụ karịrị puku atọ ka ihe mberede idemmiri ahụ metụtara.

   O kwuru na ụfọdụ ezinaụlọ gwara ha na ihe dịka ndị ha hụrụ n’anya mmadụ abụọ maọbụ ise nwụrụ nke gụnyere ụmụaka.

   Ụlọọrụ ahụ dọrọ aka na ntị na ọnụọgụgụ ndị nwụrụ anwụ nwereike ibili dịka idemmiri bugara ndị mmadụ n’oke osimiri Riva Nịja.

4. 31 Mee 2025Yukren boro Rọshịa ebubo imebi ọganihu mkparịtaụka udo

   

   Ebe foto si, Getty Images

   Onyeisiala mba Yukren agbaghawo nkwa Rọshịa kwere na ha ga aga n'ihu na mkparịtaụka udo mgbe mba ahụ kwupụtara na ọ ga-eziga ndị nnọchiteanya na mkparịtaụka a ga-enwe n’isi obodo Tọkị bụ Istanbul n’ụbọchị Mọnde 2 Juun 2025.

   Mba Rọshịa ezigabeghị atụmatụ mkparịtaụka ya na mba Yukren – nke bụ isi ihe Yukren chọrọ. Ọnụ na-ekwuchitere Kremlin bụ Dmitry Peskov kwuru na a ga-atụle ọnọdụ Rọshịa wepụtara maka nkwụsị ọgụ na Tọkị.

   Mana Onyeisiala Volodymyr Zelensky na-ebo mba Rọshịa ebubo ime ihe niile ha nwereike iji ahụ na nzukọ ọzọ a gaghị amịta mkpụrụ.

   "Ka nzukọ wee nwee isi, ebumnuche ya ga-edo anya, a ga-akwado nke ọma maka mkparitaụka," ka o kwuru.

   Cheta na mba Yukren ezigala atụmatụ ya na Rọshịa, nke na-egosi "njikere maka nkwụsịtụ ọgụ zuru oke na enweghị ọnọdụ".

   Ugbu a, Rọshịa na-achịkwa ihe dịka 20% nke ókèala Yukren Yukren, gụnyere ndịda Crimea peninsula nke Rọshịa weghaara na 2014.

5. 31 Mee 2025Ihe mere n’ụbọchị ule ‘English’ agaghị emekwa ọzọ - Ụlọọrụ WAEC

   

   Ebe foto si, Getty Images/WAEC

   Ndị nkụzi na ụmụakwụkwọ na-ede ule WAEC n'Aba dị n'Abịa steeti akọwaala ihe ha gabigara n’ụbọchị Wenezde 28 Mee 2025, bụ ụbọchị ha dere ihe ọmụmụ asụsụ Bekee.

   Otu nwataakwụkwọ na-ede ule WAEC aha ya bụ Success gwara onye ntaakụkọ BBC News Igbo na onye nlekọta ha bụ 'invigilator' butere akwụkwọ ule nke abụọ bụ ihe ọmụmụ asụsụ Bekee mgbe ọ kụrụ elekere ịse nke mgbede.

   O kwuru na ha dechara ule ahụ n'ihe dịka elekere asaa nke abalị, ebe ha jizi ọkụ tọọchị nakwa ọkụ ekwentị ndị nkụzi ha na-ahụ ihe ha na-ede mgbe ọchịchịrị gbara.

   Nwataakwụkwọ ahụ kwuru na ya bụ ọnọdụ tinyere ha na mgbagwojuanya, dịka ọ na-atụ egwu na nke a nwereike imetụta akara ha n'ule ahụ.

   Otu onye nkụzi aha ya bụ Maazị Uche Imeuka gwara anyị na ụmụakwụkwọ na-ele ule lechara mgbe ọ kụchara elekere asatọ nke abalị.

   O kwuru na ihe kpatara nke a bụ na e butere akwụkwọ ule mgbe ọ gafechara elekere isii, nke meziri e jiri malite ya bụ ule n'azụ oge.

   O kwuru na e tinyeziiri ụmụakwụkwọ ọkụ ka ha jiri hụ ụzọ dechaa ule ha.

   N'ebe ụfọdụ, ụmụakwụkwọ kwuru na a mụnyeere ha ọkụ oriọna ka ha jiri hụ ụzọ na-ede ule.

   Onye ntaakụkọ BBC News Igbo n’Aba dị n’Abịa steeti sị ya hụrụ ka ụmụakwụkwọ na-ede ule nọ n'okporoụzọ na-ala mgbe ọ kụrụ ihe dịka n'elekere iri nke abalị n’ụbọchị Wenezde ahụ.

   Ọnọdụ a metụtara ụmụakwụkwọ niile dere ule n'ụbọchị ahụ.

   Ka o sina dị, ụlọọrụ West African Examinations Council (WAEC) ekwuola na ọ bụ nsogbu ime njem na ọnọdụ enweghị nchekwa mere ha jiri haziere ụmụakwụkwọ ule n’azụ oge n’ụbọchị Wenezde 28 Mee 2025.

   N’ozi o wepụtara, ọnụ na-ekwuru WAEC bụ Moyosola Adeshina kọwara na dịka ha mechichara oghere niile, ha zutere nsogbu ime njem nakwa nsogbu nchekwa, bụ nke mere e ji hazie ule ahụ n’azụ oge.

   WAEC kwere nkwa na ha na-agbakọrọ ụlọorụ nchekwa dị iche iche aka iji hụ na ụdị mkpọbiụkwụ ahụ adapụtaghị ọzọ.

   Ụlọọrụ ahụ jikwa obi ha niile rịọ ụmụakwụkwọ, ụlọakwụkwọ nakwa ndị nne na nna mgbaghara maka ọnọdụ ahụ.

6. 31 Mee 2025Amerịka ga-agbakwunye ụtụisi 50% na ‘steel’ na ‘aluminium’ a tụbatara na mba ahụ

   

   Ebe foto si, Getty Images

   Onyeisiala Amerịka bụ Donald Trump ekwupụtala na mba Amerịka ga-agbakwunye ụtụisi n’elu nke ha tinyere ugbua maka igwe steel na aluminium ndị a tụbatara na mba ahụ.

   Trump kwuru na malite n’ụbọchị Wenezde, a ga-agbakwunye ụtụisi 50% n’elu igwe steel na aluminium ndị a tụbatara na mba ahụ, na-abụghịzi 25% ọ bụbu.

   Oge ọ na-ekwu okwu n’ọgbakọ rally a haziri na Pittsburgh dị na Pennsylvania, Trump kwuru na atụmatụ ahụ ga-enye aka kwalite ụlọọrụ steel ndị e nwere na mba Amerịka ma belata ndabere ha nwere na mba Chaịna.

   Trump kwukwara na a ga-etinye ijeri $14 maka mmepụta steel na mpaghara ahụ site na mgbakọaka ụlọọrụ US Steel na Nippon Steel nke mba Chaịna.

   Ka o sina dị, o mechara gwa ndị ntaakụkọ na ya ahụbeghị maọbụ binye aka na nkwekọrịta ikpeazụ nke atụmatụ ahụ.

   Nkwupụta a Trump mere bụ nke ọhụrụ ya kemgbe ọ malitere itinye ụtụisi aghara aghara dịka ọ banyere n’ọchịchị nke ugboro abụọ n’ọnwa Jenụwarị.

7. 31 Mee 2025Igbo bụ Igbo, ụnụ asaala chi, Ngwụcha izuụka ọma nụ

   Obiụtọ ka anyị ji anabata gị n'ọgbakọ BBC News Igbo taa bụ Satọde 31 Mee 2025.

   Chinonso Ugorji nọ ebe a n'ụtụtụ a iwetere gị akụkọ niile na-akpọtụ n'ala Igbo, na Naịjirịa, n'Afrịka nakwa n'ụwa dum gbaa gburugburu mana Uzoamaka Ewuzie na Michael Ngene ga-esonyere ya ma e mesịa.

   Biko gaa n'ihu nọnyere anyị taa.

8. 30 Mee 2025Mkparịtaụka azụmaahịa nke mba Chaịna na Amerịka akwụsịla - Odeakwụkwọ ego mba Amerịka

   

   Ebe foto si, PA Media / Getty Images

   Mkparịtaụka azụmaahịa nke e kwuru ga-adị n’etiti mba Amerịka na Chaịna akwụsịla, onye odeakwụkwọ ego nke mba Amerịka Scott Bessent kwuru.

   Okwu Bessent na-abịa ihe dịka izu atọ mgbe ekwenyechara nkwụsị agha azụmaahịa nwa oge n'etiti mba abụọ ahụ akụnaụba ha kachasị ukwuu n'ụwa, na-ekwenye na ha abụọ ga-ebelata tarifụ mmegwara.

   Odeakwụkwọ Bessent gwara ụlọ mgbasa ozi Fox News n’ụbọchị Tọzde 29 Mee 2025: “Echere m na n'ihi na mkparịtaụka ahụ nwere mgbagwoju anya, na ọ ga-achọ ka ndị isi nke mba abụọ ahụ na-atụle onwe ha".

   Cheta na ụtụisi Onyeisiala mba Amerịka Donald Trump manyere na mbubata ngwaahịa niile sitere na mba dị iche iche ka ụlọikpe na-ahụ maka azụmaahịa n’Amerịka wepụtara mkpebi ọhụrụ n’ụbọchị Wenezde nke kwuru na Onyeisiala Trump gafere ikike ya.

   Ụtụisi Onyeisiala Trump ka na-aga n’ihu maka n’obi ọchịchị Amerịka White House wegara ikpe ahụ n’ụlọikpe mkpegharị.

9. 30 Mee 2025Ndị uweojii agbagbuola nwoke a na-eyo eyo gburu nwataakwụkwọ mahadum na Saụt Afrịka

   

   Ebe foto si, South Africa police / X

   Otu onye a na-eyo eyo na aka ya dị n’ọnwụ nwataakwụkwọ mahadum South African University anwụọla dịka ya na ndị uweojii kwatara mgbọ.

   Nwoke ahụ ka akụkọ kwuru na aka ya dị n’ọnwụ Olorato Mongale, onye a chọpụtara ozu ya na Johannesburg ụbọchị Sọnde, 25 Mee, 2025 dịka o mere awa abụọ a malitere ịchọ ya achọ ka ọ gara ịhụ enyi ya.

   Ọnụ na-ekwuru ndị uweojii bụ Athlenda Mathe kwuru na n’ụtụtụ Fraịde, 30 Mee, 2025, ndị uweojii chọpụtara nwoke ahụ a na-eyo eyo ebe o zoro n’ebe obibi dị n’obodo Amanzimtoti.

   O kwuru na nwaamadị ahụ a na-ekwughị aha ya, malitere ịgba ndị uweojii egbe ngwa ọ hụrụ ha. Ọ bụ oge ịkwakọrịta mgbọ a ka ndị uweojii gburu ya.

   Kọmịshọna ndị uweojii na mpaghara ahụ bụ Nhlanhla Mkhwanazi kwuru na ihe ha nwetara n’aka nwoke ahụ gụnyere akwụkwọ njirimara 28 na ọtụtụ ekwenti.

10. 30 Mee 2025Idemmiri gburu mmadụ 110 n'ihi oke mmiri ozuzo na Naịjirịa

    

    Ebe foto si, Mikail Musa

    Ihe ruru mmadụ otu narị na iri (110) anwụọla n’idemmiri nke oke mmiri ozuzo kpalitere na mpaghara etiti Naịjirịa, ndị ọchịchị gwara ụlọ mgbasa ozi BBC.

    Mmiri ozuzo ahụ were ọtụtụ awa, ka onyeisi ụlọọrụ na-ahụ maka ihe mberede na Nịja steeti (Nsema), Abullahi Baba-Arah siri kwuo.

    Ọ gbakwunyere na idemmiri ahụ rikpuru ma bufuo ihe karịrị ụlọ obibi iri ise (50) na ndị bi na ha.

    Nsema kwuru na ọ bụ mpaghara Tiffin Maza na Anguwan Hausawa dị n’obodo Mokwa ka idemmiri ahụ kacha metụta.

    Onyeisi mpaghara Mokwa bụ Muhammad Shaba Aliyu kwuru na o ruola afọ iri isii kemgbe obodo ahụ malitere ịta ahụhụ maka idemmiri.

11. 30 Mee 2025Ụgbọelu bu Onyeisiala Liberịa gbanarịrị nsogbu dị egwu mgbe ọ na-ada

    

    Ebe foto si, Executive Mansion - Liberia / Facebook

    Akwụsịtụrụ ụgbọelu nwa oge n’ọdụ ụgbọelu Liberịa n'abalị Tọzde 30 Mee 2025 ka ụgbọelu bu Onyeisiala Joseph Boakai nwere nsogbu fọrọ nke nta ka ọkpọkaa mgbe ọ na-ada.

    Ndị isi ọdụ ụgbọelu kwuru na ụgbọelu Onyeisiala malitere inwe nsogbu mgbe ọ na-ada n’okporoụzọ ụgbọelu nke mere ka o were ike daa.

    Ihe ahụ merenụ, nke kpalitere ụjọ na ọdụ ụgbọelu ahụ, manyere ịkagbu ụgbọelu niile e were n'abalị ahụ, dịka ndị mgbasa ozi mpaghara kwuru.

    Onyeisiala Boakai na ndị so ya gara njem na mba Naịjirịa mana ha pụtara n’ụgbọelu ahụ n’udo. E kwuru na ndị isi amalitela nnyocha ụgbọelu Onyeisiala ahụ iji a chọpụta ebe mmiri si were baa n’opi ụgbọgụrụ.

    Ndị mgbasa ozi mpaghara, kwuru na ndị isi ọdụ ụgbọelu gwara ha na otu taya ụgbọelu ahụ gbawara ka ọ na-agbadata ma tọgbọrọ n'okporoụzọ ụgbọelu.

    Nkwupụta ndị na-ahụ maka ọdụ ụgbọelu Liberịa (LAA) kwadoro kọwaara na ọnọdụ ahụ adịghị mma nke kara akpalite ihe mberede metụtara ụgbọelu onyeisiala mba ahụ.

12. 30 Mee 2025Hamas na-enyocha atụmatụ nkwụsị ịkwa mgbọ Amerịka wepụtara

    

    Ebe foto si, Reuters

    Nnukwu onyeisi otu Hamas agwala BBC na atụmatụ mba Amerịka wepụtara maka nkwụsị ịkwa mgbọ na Gaza adabaghị n’ihe ndị ha chọrọ mana ha ga-aga n’ihu na-enyocha ya bụ atụmatụ.

    Obi ọchịchị Amerịka kwuru n’ụbọchị Tọzde na Izrel “anabatala” atụmatụ onye nnọchiteanya Amerịka bụ Steve Witkoff ma na-echezi maka nzaghachi Hamas.

    Ụlọmgbasaozi Izrel kwuru na ndị ọchịchị Izrel sịrị na ha ga-ahụ na Hamas nyefere ha mmadụ 10 dị ndụ na ozu mmadụ 18 ha ji eji, bụ nke ha ga-eji gbanwerịta nkwụsị ịkwa mgbọ ụbọchị 60 nakwa ntọhapụ ndị Palestine a tụrụ mkpọrọ n’Izrel.

    Izrel tinyere mmachibido na Gaza ma maliteghachi ibu agha n’ụbọchị 18 Maachị n’isochi ndakpọ nke nkwekọrịta nkwụsị ịkwa mgbọ nke mba Amerịka, Qatar na Ijipt nyere aka tinye.

    Dịka Mịnịstrị na-ahụ maka ahụike ndị otu Hamas na-elekọta siri kwuo, e gbuola ihe ruru mmadụ 4,000 na Gaza n’ime izuụka 10 gara aga.

13. 29 Mee 2025Nwaanyị rere nwa ya nwaanyị dị afọ isii ka ụlọikpe tụrụ nga mkpụrụ ọka na Saụt Afrịka

    

    Ebe foto si, Executive Mayor Andrè Truter/ Facebook

    Otu nwaanyị onye Saụt Afrịka nke a mara ikpe maka ịtọrọ nwa ya nwaanyị dị afọ isii ka a tụrụ nga mkpụrụ ọka, ya na ndị otu ya abụọ.

    Nga a tụrụ Racquel "Kelly" Smith, enyi ya nwoke Jacquen Appollis na enyi ha Steveno van Rhyn na-abịa ihe karịrị otu afọ ka Joshlin Smith furu n'ụzọ dị omimi n'azụ ụlọ ya nọ na Saldanha Bay, nke dị nso n’obodo Cape Town.

    N'agbanyeghị etu e siri gwa ọha na eze maka o fufu nwa agbọghọ ahụ, onye furu n’ọnwa Febụwarị 2024, a ka ahụbeghị ya ruo ugbua.

    Mkpebi a na-esochi ikpe were izu asatọ na Saụt Afrịka, ebe ndị akaebe na ndị ọkaiwu kwupụtara ọtụtụ ebubo na-awụ akpata oyi n'ahụ.

    Mana, ndị uweojii kwuru na a ga-aga n'ihu na-achọ obere nwa agbọghọ ahụ, ọbụlagodi ịgafe okeala Saụt Afrịka.

14. 29 Mee 2025'Igwe ndị agụụ na-agụ’ tiwara ụlọ nkwakọba ihe na Gaza - WFP kwuru

    

    Ebe foto si, EYAD BABA/AFP

    Igwe ‘ndị agụụ na-agụ’ tiwara ụlọ nkwakọba ihe na mpaghara etiti na Gaza dịka ụlọọrụ World Food Programme (WFP) nke UN siri kwuo.

    Akụkọ kwuru na mmadụ abụọ nwụrụ ebe ọtụtụ ndị mmadụ merụrụ ahụ, ụlọọrụ ahụ kwuru ma agbakwunye na ha ka na-achọpụta ihe mere.

    Ihe onyonyo gosiri ọtụtụ puku mmadụ na-abanye n'ụlọ nkwakọba ihe Al-Ghafari dị na Deir Al-Balah na-ewere akpa ntụ ọka na katọn nri, dịka mgbọ egbe na-ada.

    Amabeghị ebe mgbọ egbe ahụ si bịa maọbụ onye gbagburu ha.

    Nkwupụta ndị WFP kwuru na mkpa enyemaka mmadụ na Gaza enweghị nchịkwa ugbua, dịka ọ fọrọ nke nta ka ọ bụrụ ọnwa atọ mba Izrel malitere mgbochi n’okeala ya na Gaza nke kwụsịrị n'izu gara aga.

    Cheta na ụlọọrụ UN Humans Right Office kwuru na mmadụ iri anọ na asaa (47) merụrụ ahụ n’ụbọchị Tuzde mgbe ndị mmadụ gafere otu n'ime ebe nkesa ihe GHF dị na ndịda obodo Rafah, otu ụbọchị ka ọ malitere ịrụ ọrụ ebe ahụ.

    N’aka nke ọzọ, ndị ọchịchị Izrel kwuru na Wenezde na gwongworo narị na iri abụọ na otu (121) nke UN na mba ụwa bu gara ihe enyemaka mmadụ gụnyere ntụ ọka na nri na Gaza.

15. 29 Mee 2025N'ikpeazụ, Elon Musk ahapụla ọchịchị Onyeisiala Donald Trump

    

    Ebe foto si, Getty Images

    Onye ọchụnta ego nke mba Amerịka bụ Elon Musk ekwuola na ọ ga-ahapụ ọchịchị Onyeisiala Amerịka bụ Donald Trump dịka o nyeere ya aka ibelata nha gọọmentị US nke mere ka ọtụtụ ọrụ gọọmentị etiti kwụsị.

    Elon Musk onye kwupụtara nke a site na mbipụta o mere n'ọba mgbasa ozi X, kelere Onyeisiala Trump maka ohere o nyere ya ka o soro ya rụọ ọrụ na ngalaba gọọmentị arụmọrụ nke a na-akpọ DOGE n'okwu nkenke.

    Musk kwuru na ya nwere nkụda mmụọ banyere ụfọdụ ịwu ndị Onyeisiala Trump mere.

    Dịka ohere enyere Elon Musk iji rụọ ọru na DOGE nwere oge oji abia na njedebe, mana nke a biara n’eme mgbe ọ katọrọ isiụlọ omebe iwu nke atụmatụ Trump dịka o kwuru na "o nwere mmechu ihu" na ụgwọ mmefu ego nke Trump, nke na-atụ aro nkwụsịtụ ụtụisi nke ọtụtụ puku ijeri dollar na nkwalite ego ndị nchekwa.

16. 29 Mee 2025Ụlọikpe azụmaahịa mba Amerịka egbochiela ụtụisi Trump tinyere, na-ekwu na onyeisiala 'gafere ikike ya’

    

    Ebe foto si, Getty Images

    Ọkaipe atọ n’ulọikpe gọọmenti etiti mba Amerịka etinyela ọnụ na-ụtụisi Donald Trump tinyere ma gbochie ya iga n’ihu dịka ha kwuru na ọdika omume ahụ ‘gafere ikike ya’.

    N’ihi nkwupụta a ndị ọkaipe mere, ndị okammuta na ọkachamara azụmaahịa na-ele anya ma nkwupụta a onwere ike imetụta azụmahịa ụwa nke ọma.

    N’agbanyeghị nka, ọchịchị Trump rịọrọ arịrịọ, na-ekwu, sị:

    "Ọ dighị ndị ikpe a na-ahọpụtaghị n’aka ịkpebi ka ha ga-esi edozi nsogbu ọbula metụtara mba Amerịka"

    Ka ọna eme ugbu a, US na-akparịta ụka azụmahịa otu n'otu na ọtụtụ mba mana okwu ndị ahụ ugbua abala n'ọgba aghara n’ihi ihe ụlọikpe gọọmenti etiti mba Amerịka kwuru.

17. 28 Mee 2025Otu onye anwụọla oge nnukwu ugbo 'billboard' dara n'Abịa steeti

    

    Opekatampe otu mmadụ nwụrụ na nnukwu ọdachi mere oge nnukwu ugbo mgbasa ngwaahịa bụ billboard n'asụsụ Bekee dara ma kụgide ha.

    Ya bụ mkpamkpa kpara na Salad Market Junction n'okporoụzọ si Aba gawa Owere n'Abia steeti n'ụbọchị Wenezde 28 Mee 2025.

    Ndị hụrụ ihe merenụ kwuru na nnukwu ugbo mgbasa ngwaahịa ahụ eji igwe rụọ dara oge ifufe mmiri na-efe ma kụgide ụgbọala keke anọ ndị nọ ebe ahụ n'oge ahụ.

    

    Onye Mayor nke okpuru ọchịchị Aba North bụ Timothy Kalu Iheke, onye duuru ndị ọrụ enyemaka gaa n'ogige ahụ ihe ọdachi mere gwara onye ntaakụkọ BBC News Igbo na ọ kụgidere mmadụ asaa ndị nọ n'ime ụgbọala Keke.

    O kwuru na otu onye nọ ebe ahụ nwụọ ozugbo dịka e bugara ozu ya n'ọbaozu.

    Kalu kwuru na akpọgaala ndị nke merụrụ ahụ n'ụlọọgwụ Living Word Hospital nọ n'Aba maka nlekọta ahụike.

    

18. 28 Mee 2025Emefiele na-achọ onye ọkachamara nnyocha ka o nyochaa nde $17 nke ahụrụ na WhatsApp nke gosiri na ọ natara otu nwoke azumahia

    

    Ebe foto si, Getty Images

    Onye bụbu Gọvanọ ụlọakụ etiti Naịjiria CBN bụ Godwin Emefiele ariọla ụlọikpe pụrụiche dị na Legọs steeti ka ha nye ya ikike itinye onye ọkachamara n'ihe gbasara nnyocha ka o nyochaa ekwentị e jiri wepụ mkparịtaụka WhatsApp gosipụtara dịka ihe akaebe na ikpe ya na-aga n'ihu maka ebubo ijeri $4.5 na ijeri naira 2.8.

    Ụlọọrụ na-ahụ maka mmegide mpụ na nrụrụaka ego, Economic and Financial Crimes Commission (EFCC) boro Emefiele ebubo na ọ natara $17,100,000 n'aka onye ọchụnta ego site n'aka otu onye ọrụ ha a nakpọ Monday Osazuwa, dịka ụgwọ ọrụ maka ịkwado oke ego mgbanwe mba ọzọ n'aka CBN.

    Mgbe a na-ekpe ikpe ahu ubọchi Tuzde Mee 27, 2025, onye ọrụ EFCC bụ Alvan Gurumnaan gbara akaebe na n'ọnwa Septemba 2020 na Junn 2, 2023, ụbọchị ole na ole tupu Emefiele akwusi ọrụ dịka Gọvanọ CBN, ọ natara ọtụtụ ụgwọ ruru nde $17.1 site n'aka Osazuwa.

    Onyeisi ọkaiwu EFCC, Rotimi Oyedepo (SAN) chọrọ ka e jiri mbipụta nọ na WhatsApp nke mkparịtaụka dị n'etiti onye ọchụnta ego ahụ na onye were ya n'ọrụ dịka ihe akaebe.

    Ọkaiwu na-anọchiteanya Emefiele, Olalekan Ojo (SAN), emegideghị ntinye akara ekwenti na mbipụta ahụ dịka akaebe mana o kwuru na ha kwesịrị inwe ikike inyocha ngwaọrụ ahụ n'onwe ha maọbụ site n'aka onye ọkachamara n'ihe gbasara nnyocha iji chọpụta na ozi ahụ ọ bụ eziokwu.

19. 28 Mee 2025Ihe na-ebe ka na-ebe na pati PDP dịka ha na-agba mbọ ime udo n'etiti ha

    

    Ebe foto si, Stella Kalu

    Ọgbaghara dị n'etiti otu ndọrọndọrọ ọchịchị Peoples Democratic Party (PDP) nwereike ọ gaghị akwụsị ozugbo dịka ngalaba National Executive Committee (NEC) na-eme mkpebi kachasị n'otu ahụ, enwebeghi ike idozi nsogbu ahụ n'ọgbakọ ha nwere n'Abuja n'ụbọchị Tuzde 28 Mee, ma yigharịa ya na Fridee 30 Mee.

    Na nkwupụta onye na-aru ọru dịka Onyeisioche bụ Iliyasu Umar Damagum kwuru na ha nwere ike ịme nzuko NEC ọzọ n'ihu tupu ọgbakọ ha a na-akpo 'National Convention' eruo.

    

    Ebe foto si, Stella Kalu

    Otu n’ime nsogbu ndi pati PDP na-akwado idozi bụ gbasara ntuziaka di iche iche nke odeakwụkwọ Samuel Anyanwu na osote odeakwụkwọ Setonji Koshoedo nyere dịka ha na-achọ idozi onye ga-abu ezigbo onye odeakwụkwọ pati ha.

    Ndị so bịa nzukọ ahụ gụnyere; ndị Gọvanọ Bauchi, Enugwu, Adamawa, Taraba, Oyo, Osun, Zamfara na Bayelsa steeti na ndị otu Board of Trustees, ndịisi oche otu pati steeti na ndị otu ọgbakọ omeiwu si na pati ahụ.

    Onye bu ọkọlọtọ onyeisiala n'afọ 2023 Atiku Abubakar, Minista nke Federal Capital Territory. Nyesom Wike na Gọvanọ Akwa Ibom, Umo Eno anọghị na nzukọ ahụ

20. 28 Mee 2025Amerịka akwụsịtụla inye ụmụakwụkwọ si mba ọzọ ohere inwete 'visa'

    

    Ebe foto si, Bloomberg via Getty Images

    Onyeisiala mba Amerịka bụ Donald Trump enyela iwu ka ụlọọrụ ha dị na mba ndị ọzọ kwụsị inye ụmụakwụkwọ ikike ịbata n’obodo dịka ha na-akwado ịgbatikwu oge nnyocha ha na-eme n’akara soshal midia ndị dị etu ahụ.

    N’akwụkwọ ozi, e zigaara ụlọọrụ ha dị iche iche, odeakwụkwọ gọọmentị bụ Marco Rubio kwuru na “nkwụsịtụ ahụ ga-adị ire ruo oge a ga-enye ntuziaka ọzọ”.

    Ozi ahụ kwuru na ha ga-ewelite aka n’inyocha akara soshal midia ndị mmadụ nakwa akwụkwọ njem ndị a, nke a sị ga-asị dị “oke mkpe” nye ụlọọrụ nnọchiteanya.

    Nke a na-abịa dịka Trump na-ewesara ụfọdụ ụlọakwụkwọ Amerịka iwe, bụ ndị o kwenyere na ha anaghị eme nnyocha ọfụma, ma kwuo na ụfọdụ ha na-akpaoke n’ịnabata ụmụakwụkwọ n’ụlọakwụkwọ ha.

    Ozi a nke ụlọọrụ ntaakụkọ CBS hụrụ nyere ụlọọrụ ndị a iwu ka ha kagbuo nnyocha akwụkwọ njem ọbụla ha na-etinyebeghi ụbọchị onye ahụ ga-abịa kama gaa n’ihu mee ndị nke e tinyerela ụbọchị a sị ha abịa.

    A na-enyocha ụmụakwụkwọ si mba ọzọ chọrọ ịgụ akwụkwọ n’Amerịka n’ụlọọrụ ha dị na mba ndị a tupu e nye ha akwụkwọ ikike ịbanye Amerịka.

    Ọtụtụ ụlọakwụkwọ ndị a na-enwetekaarị ọkpụrụkpụ ego ha ji arụ ọrụ site n’aka ụmụakwụkwọ si mba ọzọ bịara ịgụ akwụkwọ n’Amerịka.

    Mahadum Havard bụ otu ụlọakwụkwọ Onyeisiala Trump kpụụ n’ọnụ n’okwu ahụ, n’izuụka gara aga Trump machiri ụlọakwụkwọ ịnabata ụmụakwụkwọ si na mba ndị ọzọ ma kwụsị ndị nkuzi si mba ọzọ ịbịa mee nnyocha na mahadum ahụ.