Ndị isi mpaghara Etiti Ọwụwa Anyanwụ na Yurop anabatala atụmatụ udo Gaza nke Trump

Mkpuchi Na Eme Ozugbo

Uzoamaka Ewuzie, Ikechukwu Kalu, Michael Ngene, Chinonso Ugorji, Michael Ilediagu, Adline Okere, Marvelous Obomanu

1. 30 Septemba 2025Ndị 'Genz' Madagascar ekwechirila n'ime ngaghariwe na-agbanyeghí mkposa imeobi Onyeisiala ha

   

   Ebe foto si, Reuters

   Na-agbanyeghị na Onyeisiala mba Madagascar bụ Andry Rajoelina chụrụ kposara ndị imeobi ya ma chụọ ha n'ọrụ, ndị ntorobịa mba ahụ gara n'ihu na ngagharịiwe ha na-eme maka ọnọdụ akụnaụba mba ahụ n' ụbọchị Tuzde.

   Ndị uweojii Madagascar gbara ndị ntorobịa na-eme ngagharịiwe anwụrụ anyammiri dịka ha lọghatachiri n' okporoụzọ.

   A malitere ngagharịiwe n;isobodo Antananarivo mana ngahariiwe ahụ gbasara na obodo asatọ ndị ọzọ mepere emepe na mb ahụ n'ihi megide nsogbu mmiri na ọkụ.

   N'ụbọchị Monde, Onyeisiala Rajoelina kposara imeobi ya iji mee ka obi dajụọ ndị ntorobịa na-eme ngagharịiwe.

   Mana ndị na-ahazi ngaghariiwe ahụ juru ịnabata ozi onyeisiala, dịka ha kporo ya oku ka ọ rịọ mgabghara maka ndị ọrụ nchekwa gburu na ngharịiwe ahụ.

   Otu onyeisi otu 'United Nations' kwuru na e gburu mmadụ ruru22 ebe ndị merụrụ ahụ ruru 100.

2. 30 Septemba 2025Onye nnọchianya Saụt Afịka na France bụ Nathi Mthethwa anwụọla

   

   Ebe foto si, Getty Images

   Onye na-anọchiteanya mba Saụt Arịka na mba France Nathi Mthethwa anwụọla.

   Akụkọ kwuru na Mthethwa si n’elu ụlọ oriri na ọṅụṅụ Hyatt dị na Porte Maillot France wụtụo ma nwụọ.

   Nke a na-abịa dịka a malitere ịchọ ya achọ kemgbe awa iri abụọ na anọ gara aga.

   Ndị isi obodo gwara ndị ntaakụkọ na ha nwetara “ozi na-echegbu onwe n’aka Mthethwa” tupu ozi ọnwụ ya abịa.

   Mthethwa dị afọ iri ise na asatọ, bụbu minista na-ahụ maka omenala site n'afọ 2014 ruo 2019 tupu a họpụta ya dịka onye nnochịteanya mba Saụt Afrịka na Fransi n'afọ 2024.

3. 30 Septemba 2025Trump na ndị ọchịagha Amerịka ga-enwe nzukọ

   

   Ebe foto si, Getty Images

   Onyeisiala Donald Trump mba Amerịka na onye odeakwụkwọ nchekwa bụ Pete Hegseth ga-ezute ndị ọchịagha Amerịka n’ụbọchị Tuzde Septemba 30, 2025.

   Akụkọ kwuru na ndị ga-esonye n'ọgbakọ a ga-eme na Marine Corps Base Quantico gụnyere ndị isi ndịagha nakwa ndị ọchịagha Amerịka niile n'ụwa niile gbaa gburugburu.

   O nweghị onye ma ihe mere e ji enwe ọgbakọọ a mana Onyeisiala Trump kwuru na ọ ga-abụ "ọgbakọ dị nnukwu mkpa".

4. 30 Septemba 2025Lee ụfọdụ okporoụzọ a na-atụ anya Onyeisiala Tinubu ịgbape n’Imo Steeti

   

   A na-atụ anya na Onyeisiala Bola Tinubu ga-abịa njem neleta n’isi obodo Owere dị n’Imo steeti taa bụ Tuzde 30 Septemba 2025, iji igbapee ọrụ ụfọdụ nke gụnyere okporoụzọ nke ọchịchị Gọvanọ Hope Uzodimma rụchara.

   E kwukwara na njem Onyeisiala ahụ bụ maka ịgbape okporoụzọ, 'flyover' nakwa atụmatụ ọrụ ndị ọzọ gọọmenti rụrụ ọhụrụ n'Imo steeti.

   Play video, "Lee ụfọdụ okporoụzọ a na-atụ anya Onyeisiala Tinubu ịgbape n’Imo Steeti", Duration 1,34

   01:34

   

   Ọrụ ndị a tụrụ anya na onyeisiala ga-agbape gụnyere okporoụzọ Owerri – Mbaise–Obowo–Umuahia nke arụgharịrị arụgharịrị, ụgbọelu ọhụrụ jikọtara Pọt Takọt na okporoụzọ Ọnịcha, nke nwere nnukwu nkwalite gburugburu Assumpta Cathedral n’Owere.

   Ka ọ dị ugbua, ndị Imo steeti ka na-arịọkwa gọvanọ steeti ahụ ka ọ rụọ ọtụtụ okporoụzọ ndị ọzọ mebiri emebi steeti ahụ.

   

   

5. 30 Septemba 2025Ndị isi mpaghara Etiti Ọwụwa Anyanwụ na Yurop anabatala atụmatụ udo Gaza nke Trump

   

   Ebe foto si, Getty Images

   Ndị isi Yurop na mpaghara Etiti Ọwụwa Anyanwụ anabatala atụmatụ udo Gaza ọhụrụ nke mba Amerịka bụ nke Onyeisiala Donald Trump dọrọ ndị Hamas aka na nti ka ha nabata.

   Atụmatụ ahụ nke Trump na Praịm Minista Benjamin Netanyahu kwenyere na-atụ aro maka nkwụsị ọrụ ndịagha ozugbu.

   Atụmatụ ahụ na-akọwa na ndị Hamas ga-ahapụrịrị mmadụ iri abụọ ndị Izrel dị ndụ ya na ozu ihe karịrị mmadụ iri na abụọ ejidere bụ ndị e kwenyere na ha nwụrụ anwụ, iji gbanwee ọtụtụ narị ndị Gazan eji eji, n'ime awa iri asaa na abụọ,.

   Otu onye Palestine maara mkparịtaụka nkwụsị ọgụ ahụ nke ọma gwara BBC na e nyere ndị ọrụ Hamas atụmatụ isi iri abụọ nke obi ọchịchị mba Amerịka bụ ‘White House’.

   Ọzọ, atụmatụ ahụ na-atụ anya na Hamas agaghị etinye aka ọ bụla n’ịchị Gaza, ma kwete ka e nwee mkparịtaụka banyere mba nwere onwe Palestine.

6. 30 Septemba 2025Ndị be anyị, ụnụ abọọla chi?

   Anyị ji obi ụtọ anabata ụnụ n'ọgbakọ BBC News Igbo n'ụbọchị taa bụ Tuzde, 30 Septemba 2025.

   Ekpere anyị bụ na ihe ọjọọ agaghị akpọ anyị ihu dịka anyị na-apụ na-abata abata taa.

   Biko gaa n’ihu sonyere anyị na websaịtị anyị dịka anyị na-ewetere ụnụ akụkọ ihe na-eme na Naịjirịa nakwa ụwa niile.

   Sonyekwara anyị na Facebook, Instagram nakwa Whatsapp Chanelụ anyị maka akụkọ vidiyo na foto.

   Biko sonyekwara anyị!

7. 29 Septemba 2025Somtochukwu Maduagwu:Onyentaakụkọ Arise TV anwụọla

   

   Ebe foto si, Arise TV

   Akụkọ na-eru anyị ntị na-ekwu na otu onye ntaakụkọ ụlọntakụkọ 'Arise TV; anwụọla n'Abuja n'ụzọ ụtụtụ Monde, abalị 29 nke ọnwa Septempa, afọ 2025.

   Somtochukwu Christelle Maduagwu gbara afọ 29 nwuru dịka ndị a na-enyo na ha bụ ndị ekperima wakporo ebe o bi na Katampe dị n'Abuja, dịka ndịisi ụlọọrụ mgbasaozi ahụ si gbaa ama n'ozi ha wepụtara n'ọbaozi websaitị ha n'abalị Monde.

   Ozi ahụ kwuru sị, " O bụ obu mgbawa ka ndị isi nakwa ndịọrụ "ARISE News" ji ama ọkwa ọnwụ onye otu anyị nakwa onye ntakụkọ bụ Somtochukwu Christelle Maduagwu.

   "Sommie nwụrụ n'ike n'ụzọ ụtụtụ Monde abalị 29 nke ọnwa Septemba fịka ndị ojiegbe wakporo ebe obi na Katampe dị n'Abuja nke ndị uweojii na-enyocha."

   Tupu ọ laa mụọ, Madunagwu bụ onye ọkaiwu mabụrụkwa onye ntaakụkọ,

8. 29 Septemba 2025Ụlọikpe Saụt Sudan ajụla atụmatụ ịkwụsị ikpe osote onyeisiala Riek Machar a kwụsịtụrụ ọrụ

   

   Ebe foto si, AFP via Getty Images

   Ụlọikpe pụrụiche na Saụt Sudan ekwuola na o nweghị ikike ikpe osote onyeisiala bụ Riek Machar onye nke a kwụsịtụrụ ọrụ na mmadụ asaa ndị ọzọ ikpe.

   A na-ebo Riek Machar ebubo igbu ọchụ, ịgba ọchịchị mgba okpuru na mpụ megidere mmadụ.

   Ụlọikpe a kagburu mkpesa niile ndị otu ọkaiwu Machar kpesara nke gunyere: ikike ụlọikpe ikpe ya ikpe, iwu usoro ikpe ahụ nakwa iwu nyere Machar mgbuchite ikpọpụ ya n'ụlọikpe dịka ọ nọ n’ọchịchị.

   Okwu a ga-aga n’ihu n’ụbọchị Wenezde abalị mbụ nke ọnwa Ọktoba, 2025 mana Machar kagburu ebubo ndị a e boro ya ma kọwaa na “ndị ndọrọndọrọ ọchịchị na-agba ya mgba okpuru ”

9. 29 Septemba 2025Trump ga-ewepụta atụmatụ udo ọhụrụ dịka ya na Netanyahu ga-enwe mkparịtaụka

   

   Ebe foto si, Reuters

   Onyeisiala mba Amerịka bụ Donald Trump ekwuola na ọ ga-ewepụta atụmatụ udo ọhụrụ iji kwụsị agha Izrel na Gaza oge ya na Praịm Minista Izrel bụ Benjamin Netanyahu ga-enwe mkparịtaụka n’ụbọchị Mọnde 29 Septemba, 2025.

   Ozi banyere atụmatụ ahụ nke ndị ntaakụkọ Amerịka na Izrel wepụtara, kwuru na nkwekọrịta ọhụrụ a gunyere ịtọhapụ ndị niile e ji eji kemgbe awa iri anọ na asatọ e nwechara nkwekọrịta ahụ dịka Izrel ga-atọhapụ ndị Palestine karịrị otu narị a tinyere n'ụlọmkpọrọ.

   Ndị otu Hamas nabatara atụmatụ udo a ga-enweta mgbaghara ma nwee ohere ịbata na Gaza. E kwuru na a ga-emebi akụrụngwa ndịagha Hamas niile.

   Otu Israel Defense Forces (IDF) ga-ewezuga onwe h na Gaza.

10. 29 Septemba 2025Gọọmentị arịola PENGASSAN ka ha ghara ịgba abụbọọrụ maka nsogbu ha na Dangote

    

    Ebe foto si, Benson Ibeabuchi via Getty Images na PENGASSAN/X

    Gọọmenti Naịjirịa arịola otu ndị ọrụ mmanụ agbịdị PENGASSAN ka ha ghara ịgba abụbụọrụ maka nsogbu dị n’etiti ha na ụlọọrụ Dangote.

    Minista na-ahụ maka ndị ọrụ bụ Muhammad Dingyadi kwuru na gọọmenti na-agba mbọ iji kwụsị esemokwu ahụ ngwa ngwa.

    PENGASSAN kwuru na abụbụọrụ ha gbara bụ maka ọdịmma ndị otu ha ụlọọrụ Dangote chụrụ n’ọrụ, mana Dangote na-ekwu na ihe ha mere bụ maka nchekwa ụlọọrụ ha.

    Ka ọ dị ugbua, PENGASSAN agbachiela ụlọọrụ NNPCL dị n’Abuja, tinyere NUPRC na NMDPRA, dịka ha bidoro ịgba abụbụọrụ na Naịjirịa niile.

11. 29 Septemba 2025Ndị mbịarambịara ga-egosi na ha na-enyeaka n’obodo tupu ha enweta ikike ịnọ na UK – Odeakwụkwọ obodo

    

    Ebe foto si, Getty Images

    Ndị mbịarambịara ga-egosipụta na ha na-enyeaka n’obodo iji nweta ikike ịnọ na UK, odeakwụkwọ obodo ga-ekwupụta.

    N'okwu ọgbakọ ndị otu ndọrọ ndọrọ ọchịchị Labour, Shabana Mahmood ga-akọwapụta usoro ọnọdụ ọhụrụ ndị mbịarambịara ga-ezute iji tozuo inwete ikike ebighi ebi ịnọ na mba ahụ.

    N'okpuru atụmatụ a, ndị mbịarambịara n'ụzọ iwu kwadoro ga-amụ asụsụ Bekee n'ọkwa dị elu, nwee ndekọ mpụ dị ọcha ma wepụta onwe ha inyeaka n'obodo ha iji nwete ọkwa ịnọ na mba nke na-adịgide adịgide.

    Ndị otu ndọrọ ndọrọ ọchịchị Labour na-ekwu na iwu ahụ ga-ewepụta nkewa doro anya n'etiti gọọmenti na atụmatụ ‘Reform UK’, nke na-ekwu na ọ ga-akagbu inye ezumike ebighi ebi ịnọ.

    Ka ọ dị ugbua, ndị mbịarambịara nwereike itinye akwụkwọ maka ezumike ebighi ebi ka ha nọrọ afọ ise gachara, nke ga-enye ha ikike ibi, ịgụ akwụkwọ na ịrụ ọrụ na UK n’oge na-adịgide adịgide.

12. 29 Septemba 2025Onye ojiegbe awakpoola ma gbagbuo mmadụ anọ n'ụlọụka Mormon dị na Michigan

    

    Ebe foto si, Getty Images

    Ndị uweojii kwuru na opekatampe mmadụ anọ anwụọla, ebe asatọ ndị ọzọ merụrụ ahụ dịka onye ojiegbe ji ụgbọala gbaba n’ime ụlọụka Mormon dị na Michigan, malite ịgba egbe ma mụnye ụlọụka ahụ ọkụ.

    Ndị ọrụ gọọmenti kwuru na a wakporo ụka Jesus Christ of Latter-day Saints dị na Grand Blanc, obodo dị kilomita 100 na mpaghara ugwu-ọdịda anyanwụ Detroit, n'oge ofufe na-aga n’ihu n’ụbọchị Sọnde, bụ nke ọtụtụ mmadụ gara.

    E kwuru na ọtụtụ mmadụ nọ n’ụlọụka mgbe o ji nkeji iri abụọ na ise gafee elekere iri, bụ mgbe onye ojiegbe gbabatara ụgbọala n'ime ụlọụka ahụ.

    Mana ndị uweojii mechara gbagbuo otu onye a na-enyo enyo, aha ya bụ Thomas Jacob Sanford dị afọ iri anọ sikwa Burton n'ogige ebe a na-adọba ụgbọala n’ụlọụka Michigan.

    Ka ọ dị ụgbua, ndị ọchịchị na-enyocha ihe merenụ dịka "omume ime ihe ike."

13. 29 Septemba 2025Ụtụtụ ọma, ụmụ Igbo anyị ji eme ọnụ

    Anyị ji obi ụtọ anabata ụnụ n'ọgbakọ BBC News Igbo n'ụbọchị taa bụ Mọnde, 29 Septemba 2025.

    Anyị na-asị ka izu ọhụrụ a mịtara anyị niile mkpụrụ ọma.

    Biko gaa n’ihu sonyere anyị na websaịtị anyị dịka anyị na-ewetere ụnụ akụkọ ihe na-eme na Naịjirịa nakwa ụwa niile.

    Sonyekwara anyị na Facebook, Instagram nakwa Whatsapp Chanelụ anyị maka akụkọ vidiyo na foto.

    Daalụ!

14. 28 Septemba 2025Paul Biya dị afọ 92 ejirila AI-vidiyo na-achụ nta vootu na-ntụliaka ọkwa onyeisiala mba Kameroon

    

    Ebe foto si, Kevin Dietsch/Getty Images

    Dịka e bidoro ịchụ nta vootu maka ntụliaka ọkwa Onyeisiala mba Kameroon, Onyeisiala ha bụ Paul Biya dị afọ iri itoolu na abụọ ejirila nkanụzụ AI-vidiyo mee onyonyo e kesara n’akara X soshal midia ya.

    N’ụbọchị Satọde 27 Septemba 2025 ka e kesara AI-vidiyo ahụ bụ nke e ji ihu ya mee na-agwa ndị mba Kameroon okwu.

    Na vidiyo ahụ ka ọ na-ekwu ihe mere a ga-eji tinyechi ya azụ n’ọchịchị dika Onyeisiala mba Kameroon.

    Nke a na-eme dịka ndị niile na-azọ ọkwa Onyeisiala mba Kameroon na-aga na mpaghara dị icheiche na-achụ nta vootu mana Paul Biya anọghị nso.

    E bugara Biya n’otu mba dị na Yurop ebe e kwuru na ọ gara nzụkọ n’agbanyeghị na ịchụ nta vootu họrọ abalị ole ma ole ka o bido na Kameroon.

15. 28 Septemba 2025Zelensky akatọọla ogbunigwe, droonu 600 Rọshịa ji awa 12 mwakpoo Kyiv

    

    Ebe foto si, Getty Images

    Onyeisiala mba Yukren bụ Volodymyr Zelensky akatọọla ogbunigwe na droonu ruru narị isii mba Rọshịa ji ihe ruru awa iri na abụọ mwakpoo isi obodo mba Yukren bụ Kyiv.

    Mwakpo ahụ butere ọnwụ mmadụ ruru anọ, ebe mmadụ iri asatọ ka a sị meruru ahụ.

    Volodymyr Zelensky kwuru na ọ bụ na Kyiv ebe Rọshịa mwakporo ka ndị mmadụ nwụrụ.

    O kwuru na otu n’ime ndị nwụrụ bụ nwatakịrị nwaanyị dị naanị afọ iri na abụọ.

    Zelensky dọrọ aka na ntị ma kwuo na mba Yukren ga-atụgwara Rọshịa ogbunigwe ahụ ma kọwa ihe mere dịka mmasị mba Rọshịa were n’ịlụ agha na-aga n’ihu.

    Mana mba Rọshịa kwuru na ha mwakporo ụgbọala ndịagha nakwa ụlọọrụ na-akwado ndịagha mba Yukren.

    Mịnịsta na-ahụ maka nchekwa na Yukren bụ Igor Klymenko kwuru na ihe ruru ebe obibi ndị nkịtị otu narị bụ ihe mwakpo ahụ mebiri maọbụ dobe n’ajọ ọnọdụ.

    Ebe ndị ọrụ gbatagbata na-ekwu na ogbunigwe dara n’ụlọọgwụ gburu otu nọọsụ nakwa onye ọrịa a na-agwọ.

16. 28 Septemba 2025Mmadụ 39 anwụọla n'ọgbaaghara ndọrọ ndọrọ ọchịchị mere n’Ịndia

    

    Opekatampe mmadụ iri atọ na itoolu anwụọla nke gụnyere ụmụaka n'ọgbaaghara dara oge a na-eme ngagharị ndọrọ ndọrọ ọchịchị na steeti Tamil Nadu dị na mpaghara ndịda Ịndia, ndị ọrụ kwuru.

    E kwuru na ọtụtụ narị puku mmadụ gbakọrọ n’ụbọchị Satọde 27 Septemba 2025 maka emume nke onye ejije tụgharịrị bụrụzie onye ndọrọ ndọrọ ọchịchị Vijay, na mpaghara ndịda Karur.

    Ọzọ, e gburu oge ruru ọtụtụ awa iji malite dịka ụlọọrụ mgbasa ozi mpaghara siri kwuo.

    Mana foto ndị e tinyere na telivishọn gosiri na ndị mmadụ malitere ịda n’ala n'ihi ekuteghị ume n'ebe ahụ igwe mmadụ juru.

    Tamil Nadu Onyeisi MK Stalin gwara ndị ntaakụkọ na Karur na ọnụọgụgụ ndị nwụrụ anwụ gụnyere ụmụnwaanyị ruru iri na asaa, ụmụnwoke iri na atọ na ụmụaka itoolu.

    O kwukwara na mmadụ iri ise na otu ọzọ na-anata ọgwụgwọ.

17. 28 Septemba 2025A ga-amalite njem n’okporo ụgbọoloko si Abuja gawa Kaduna n’izuụka ọzọ

    

    Ebe foto si, NRC

    Ụlọọrụ na-ahụ maka njem ụgbọoloko na Naịjirịa bụ Nigerian Railway Corporation (NRC) ekwuola na ha edozichaala ebe ndị mebiri emebi n’okporo ụgbọoloko si Abuja gawa Kaduna.

    NRC kwuru na ụgbọoloko ga-amalite ịkwọ ndị njem n’okporo ahụ malite n’izuụka na-abịa abịa.

    Cheta na otu ụgbọoloko gbapụrụ n’okporo ahụ n’ụbọchị 26 Ọgọst 2025, ma merụọ ụfọdụ mmadụ ahụ, bụ nke mere e jiri mechie ya iji nwee ike rụzigharịa ya.

    N’ozi ọnụ na-ekwuru ụlọọrụ Nigerian Railway Corporation bụ Callistus Unyimadu wepụtara, ụlọọrụ ahụ kwuru na ha agbaala mbọ iji hụ na a rụzigharịrị okporo ụgbọoloko ahụ na-egbughị oge.

    “Na mbọ anyị na-agba iji kwalite ọdịmma ndị njem, NRC akwụghachila ụgwọ tiketi ndị njem narị ise na iri na abụọ nọ n’ime ụgbọoloko ahụ gbapụrụ n’okporo ya”.

    Anyị na-akwadokwa ịkwụghachi ndị njem fọrọ afọ ụgwọ ha iji hụ na onye niile nwetara ego ha,” ka Unyimadu kwuru.

    Ka o sina dị, ozi ahụ ekwupụtaghị kpọmkwem ụbọchị njem ga-amalite n’okporo ụgbọoloko ahụ, kama NRC sịrị na ha ga-ama ọkwa gbasara nke ahụ n’ime ụbọchị ole na ole nọ n’ihu.

18. 28 Septemba 2025E tighachila mmachibido n’Ịran maka atụmatụ akụrụngwa nuklia ya ka afọ iri gachara

    

    Ebe foto si, Reuters

    E weghachila mmachi akụnaụba nke mba ụwa UN na nke ndịagha n’Ịran ka afọ iri ewepụrụ ya n’ihi nkwekọrịta mba ụwa gbasara atụmatụ akụrụngwa nuklia ya, gachara.

    Usoro ọhụrụ a malitere dịka mba atọ si Yurop tinyere aka na nkwekọrịta ahụ - UK, Fransị na Jamini - kwalitere usoro a na-akpọ "snapback", nke na-ebo Ịran ebubo "ịga n'ihu na-abawanye akụrụngwa nuklia " na enweghị nkwado.

    Cheta na Ịran kwụsịtụrụ inyocha akụrụngwa nuklia ya – iji sonye iwu dị n'okpuru usoro nke nkwekọrịta 2015 - mgbe Izrel na Amerịka gbagburu ọtụtụ saịtị akụrụngwa nuklia ya na ntọala ndịagha ya n’ọnwa Juun nke afọ 2025.

    Mana Onyeisiala Ịran bụ Masoud Pezeshkian siri ọnwụ n'izu gara aga na mba ahụ enweghị ebumnuche imepụta ngwaagha nuklia.

19. 28 Septemba 2025Rọshịa emeela nnukwu mwakpo n’isi obodo Kyiv - Onyeisi obodo

    

    Ebe foto si, Reuters

    Rọshịa ejirila abalị mee nnukwu mwakpo n’isi obodo Yukren dịka onyeisi obodo Vitali Klitschko siri kwuo.

    O kwuru na e bibiri ụlọ nwere ogogo ise dịka a kpọgara opekempe mmadụ atọ n'ụlọọgwụ.

    N’aka nke ọzọ, minista na-ahụ maka mba ofesi nke Yukren kwuru na eji ọtụtụ narị duronu na ogbunigwe mee mwakpo kachasị ọhụrụ na mba ahụ.

    "Anyị ga-enyocha ihe Rọshịa ịga n'ihu na-eme mwakpo ga-eri," Andrii Sybiha kwuru.

    Ka ọ dị ugbua, Rọshịa ekwubeghị okwu.

    Cheta na Satọde 27 Septemba 2025, Onyeisiala Yukren bụ Volodymyr Zelensky dọrọ aka na ntị na Rọshịa agaghị akwụsị na mba ya – dịka Rọshịa na-anwale nchekwa ikuku nke mpaghara Yurop site na ịwakpo ọtụtụ mba nke ndịagha Nato jikọrọ aka n'oge na-adịbeghị anya.

    "Putin agaghị eche ịkwụsị agha ya na Yukren. Ọ ga-emeghe ọtụtụ ụzọ ọzọ. Ọ dịghị onye maara ebe ọ chọrọ," ka Zelensky kwuru.

20. 28 Septemba 2025Igbo ndị ọma, ụtụtụ ọma

    Anyị ji obi ụtọ anabata gị n'ọgbakọ BBC News Igbo n'ụbọchị taa bụ Sọnde, 28 Septemba 2025.

    Anyị na-asị ka Chineke zaa anyị niile ekpere nke ụbọchị taa.

    Biko gaa n’ihu sonyere anyị na websaịtị anyị dịka anyị na-ewetere gị akụkọ ihe na-eme na Naịjirịa nakwa ụwa niile.

    Sonyekwara anyị na Facebook, Instagram nakwa Whatsapp Chanelụ anyị maka akụkọ vidiyo na foto.

    Udo dịrị gị!