Ụlọikpe Saụt Korịa enyela iwu ka a nwụchie Yoon Suk-yeol a chụpụrụ dịka Onyeisiala

Mkpuchi Na Eme Ozugbo

Ikechukwu Kalu, Michael Ngene, Jessica Nwankwo, Chinonso Ugorji, Michael Ilediagu, Adline Okere

1. 31 Disemba 2024Mba Australia na New Zealand anabatala afọ 2025

   

   Ebe foto si, Getty Images

   Ka afọ 2024 na-agwụ taa, ọtụtụ mmadụ na-enwe anụrị na mpaghara dị iche iche na mbaụwa gbaa gburugburu.

   Ka ọ dị ugbua, mba New Zealand abaala afọ 2025. Ha ji ọkụ e ji-achụ afọ nabata ya taa.

   

   N'aka nke ọzọ, ọtụtụ mmadụ gosịpụtara obi aṅụrị na Sydney dị na mba Austrilia dịka ha nabatara afọ 2025.

   Na mba Spen, ndị mmadụ na-enwe aṅụrị ma na-eme emume omenaala e jiri mara ha dịka ha na-eche afọ 2025.

   

   Ebe foto si, Getty Images

   Emume ọmenaala ahụ gunyere ịgụ mkpụrụ osisi grepụ ọnụ ma na-eri ya n'abalị tupu ha abanye afọ ọhụrụ.

   Emume a bụ nke a malitere ime na mba Spen kemgbe afọ 1909 oge ndị ọrụugbo na-akọpụta mkpụrụosisi grepụ chọrọ ime ka ndị mmadụ mara ha ma malite ịzụ ha ahịa.

2. 31 Disemba 2024Ụlọikpe Saụt Korịa enyela iwu ka a nwụchie Yoon Suk-yeol a chụpụrụ dịka Onyeisiala

   

   Ebe foto si, Getty Images

   Ụlọikpe Saụt Korịa enyela iwu ka a nwụchie Yoon Suk-yeol ụlọomeiwu chụpụrụ dịka Onyeisiala maka ebubo inyefe ikike ọchịchị n’aka ndịagha.

   Ndị na-enyocha ebubo ahụ e boro Yoon Suk-yeol nwetara akwụkwọ ikike ịnwụchi ya dịka ọ jụrụ ịza ajụjụ banyere ebubo ahụ.

   Mana ọkaiwu Yoon kwuru na akwụkwọ ikike nwụchi ahụ bụ nke megidere iwu mba Saụt Korịa ma megide ikike ya dịka mmadụ.

   Ka ọ dị ugbua, enweghị onye ma oge enwereike ịnwụchi ya mana onye ọrụ BBC nọ na Seoul, kwuru na a na-atụ anya na Yoon nwereike inyefe onwe n’aka ndị uweojii.

   Ụfọdụ ndị obodo na-ekwu na oteela aka ekwesịrị ịnwụchi Yoon Suk-yeol oge o nyefere ikike ọchịchị n’aka ndịagha.

3. 31 Disemba 2024Ndị omekome egbuola mmadụ asaa n’Ihiala, Anambra Steeti

   

   Ebe foto si, Nigeria Police

   Kọmishọna ndị uweojii Anambra steeti bụ Nnaghe Obono Itam enyela iwu ka a achọpụta ndị omekome ahụ wakporo ndị ọrụ nchekwa na ndị nkịtị ma gbuo mmadụ asaa ebe ndị ọzọ meruru ahụ n’obodo Ihiala dị n’Anambra steeti ụbọchị Mọnde 30, Disemba, 2024.

   Ozi kọmishọna ahụ dara ụda dịka ọ gara mee nleta n’ogige mwakpo ahụ mere.

   Akụkọ kwuru na ndị omekome ahụ rutere ebe a na-akwado emume oliliozu ma malite ịgbapụ mgbọ egbe n’elu. Ngwa ngwa ndị ọrụ nchekwa wuchiri ebe ahụ, ndị omekome ahụ gbara ndị ọrụ nchekwa abụọ nọ ọrụ n’ogige dị nso n’isi ụlọọrụ okpuruọchịchị Ihiala dị egbe.

   Ozi anyị wetara n’aka ọnụ na-ekwuru ndị uweojii steeti ahụ bụ Tochukwu Ikenga, kwuru na Kọmishọna Itam ezigala ozi iti aka n’obi nye ezinaụlọ ndị nke ha nwụrụ site na mwakpo ahụ. Ọ gara n’ihu kwuo na ndị uweojii steeti ahụ amalitela ime nnyocha iji nwụchie ndị omekome ahụ.

   

   Ebe foto si, Nigeria Police

4. 31 Disemba 2024A malitela ime nnyocha black box ụgbọelu Jeju Air kụpkọrọ na Saụt Korịa

   

   Ebe foto si, Getty Images

   Ndị ọrụ nnyocha amalitela inyocha akpati ojii (black box) na akụrụngwa na-edekọ olu okwu kokpiiti ụgbọelu Jeju Air ahụ kpọkara na Saụt Korịa ụbọchị Sọnde 29, Disemba, 2024 ma gbuo mmadụ 179.

   A na-ekwu na a na-achọ akụrụ flight data recorder ụgbọelu ahụ. Nke a bụ akụrụngwa e kwuru na-achịkọta etu ụgbọelu si eme njem.

   Ka ọ dị ugbua, ụlọọrụ Jeju Air na-eme mgbasaozi nke mbụ ha kemgbe ọdachi ụgbọelu ahụ mere.

   A na-atụ anya na a ga-eme oliliozu ụfọdụ ndị nwụrụ n’ụgbọelu ahụ taa ebe ụfọdụ ezinaụlọ na-eche inweta ozu ndị nke ha nwụrụ n’ọdachị ahụ.

   Cheta na ọ bụ naani mmadụ abụọ ji ndụ ha pụta ụgbọelu ahụ kpọkara. Mmadụ abụọ ahụ bụ ndị orụ Jeju Air nọ ọrụ n’ụgbọelu ahụ.

   Ezinaụlọ ụfọdụ ihe a metutara akọwaala ya dịka ihe mwute dị ukwuu ma kpọ oku enyemaka

   Ruo ugbua, enwebeghị ihe a ga-ejide aka kpatara nkpọka ụgbọelu ahụ.

   

   Ebe foto si, Getty Images

   

   Ebe foto si, Getty Images

5. 31 Disemba 2024Ụtụtụ ọma dị bụ onye ihe ọma na-amasị

   Nnọọ n'ọgbakọ BBC Igbo taa bụ abalị ikpeazụ n'afọ 2024.

   Gaa n'ihu sonyere anyị dịka anyị na-enwetara gị akụkọ si mbaụwa niile taa.

   Ndewoo.....

6. 30 Disemba 2024Obi dị mụ na ndị Naịjirịa ụtọ maka ụlọorụ mmanụ agbịdị Warri a rụzigharịrị - Tinubu

   

   Ebe foto si, State House

   Onyeisiala Naịjirịa bụ Bola Tinubu ekwuola na obi jupụtara ya na ụmụafọ Naịjirịa n’aṅụrị n’ihi ụlọọrụ mmanụ agbịdị Warri nke ụlọọrụ Nigerian National Petroleum Corporation Limited (NNPCL) rụzigharịrị.

   Ozi e wepụtara n’akara ọbaozi X onyeisiala kwuru na “nke a ga-enyekwu ụmụ amaala Naịjirịa nchekwube n’olileanya ha nwere gbasara nkwa ndị anyị kwere ha”.

   Ọ gbakwunyere na ozi ahụ bụ “ụzọ kachasị mma iji chụọ afọ 2024, ọ bụrụ ma a gbakwunye ọganihu e nwetara n’ụlọọrụ mmanụ agbịdị nke Pọtakọt”.

   Oge ọ na-agwa ndị ntaakụkọ okwu n’ụbọchị Mọnde 30 Disemba 2024, onyeisi ụlọorụ NNPCL bụ Mele Kyari kwuputara na arụzigharịala ụlọorụ mmanụ agbịdị ahụ dịka ọ na-arụ ọrụ n’ogogo pasenti iri isii (60%).

   Tinubu kwuru sị “dịka ụlọọrụ mmanụ agbịdị Warri malitere ọrụ ugbua n’ogogo pasenti iri isii, atụmatụ gọọmenti m ịrọpụta mmanụ ụgbọala bụ nke na-aga n’anya ya.

   “Ana m enye NNPCL ndụmọdụ ka ha rụzigharịa ụlọorụ mmanụ agbịdị Kadụna na nke Pọtakọt iji hụ na Naịjirịa weere ọnọdụ ya dịka onye na-ekesa mmanụ na mbaụwa.”

7. 30 Disemba 2024Roshia na Yukren agbanwerịtala ndịagha ha ji na mkpọrọ

   

   Ebe foto si, Reuters

   Mba Rọshịa na Yukren ejirila isi gbanwere isi ndị ha nwuchiri na agha dị n'etiti mba abụọ ahụ dịka nkwekọrịta nke mba United Arab Emirate hiwere ha.

   Ngalaba na-ahụ maka nchekwa mba Rọshịa kwuru na ha nyefere ndịagha Yukren 150 iji gbara isi ndị nke ha.

   N'aka nke Ọzọ onyeisiala Yukren bụ Volodymyr Zelensky kwuru na ndị Yukren 189 alọtala.

   O kwuru na ndị a tọhapụrụ gụnyere "ndị na-echekwa Azovstal na Mariupol", bụ ebe ụlọọrụ nuklia Cherbobyl dị nakwa Snake Island.

   Cheta na n'ọnwa Maachị afọ 2022, Rọshịa kwuru na ha emeriela ndị Yukren dịka ha lụrụ ọgụ otu ọnwa ma weghara Ọdịda Anyanwụ obodo Yukren a kpọrọ Mariupol bụ ebe ndị agha na-echekwa ụlọ mmepụta igwe bụ Azovstal steel plant chiriliri ha aka mmeri.

   Ndịagha Rọshịa merikwara ma weghara Chernobyl n'ọmwa Febụwarị afọ 2022 mana mecha nyefeekwaa ya n'aka ndị ọrụ ụlọọrụ ahụ.

   Zelensky kwuru na ndịnkịtị abụọ so na ndị a tọhapụrụ ụbọchị Monde.

8. 30 Disemba 2024Azụ shaak egbuola onye gara njem nlegharịanya n’osimiri uhie mba Ijipt

   

   Ebe foto si, Getty Images

   Azụ shaak egbuola otu nwoke gara njem nlegharịanya n’oke osimiri uhie dị na mba Ijipt ma meruo onye nke ọzọ ahụ.

   Mịnịstrị na-ahụ maka gburugburu na mba Ijipt kwuru na ihe ahụ mere na mpaghara Marsa Alam n’ụbọchị Sọnde 29 Disemba 2024.

   Ha sịrị na nwoke ahụ nwụrụ anwụ gara gwuo mmiri n’ime ime ebe ndị mmadụ ekwesịghị igwu mmiri bụ nke mere azụ shaak ji wakpo ma gbuo ya ma meruo onye nke ọzọ ahụ.

   Ka mịnịstrị na-ahụ maka gburugburu na mba Ijipt kwuru na ndị niile mkpamkpa ahụ metụtara bụ ndị mba ọzọ,ụlọmgbasaozi AFP kwuru na ha bụ ụmụ amaala mba Itali.

   AFP kwuru na nwoke nke nwụrụ anwụ dị afọ iri anọ na asatọ (48) ma biri na Rome dị na mba Itali ebe onye nke merụrụ ahụ dị afọ iri isii na asatọ (68).

   Ndị ọrụ n’obi gọọmenti Ijipt kwuru na e bugara mmadụ abụọ ndị ahụ n’ụlọọgwụ dị na Port Ghalib.

   Kemgbe afọ iri gara aga, azụ shaak egbuola ndị si mba ofesi bịa njem nlegharịanya n’oke osimiri uhie.

   N’ọnwa Juun afọ 2023 ka ụdịrị mkpamkpa ahụ kpara na mpaghara Hurguda ma gbuo nwata nwoke mba Rọshịa dị afọ iri abụọ na anọ (24).

9. 30 Disemba 2024Ụgbọala gwongworo adanyela n’osimiri, gbuo mmadụ 71 n’Itiopịa

   

   Ebe foto si, Sidama Regional Health Bureau

   Opekatampe mmadụ iri asaa na otu (71) anwụọla na ndịda Itiopịa oge ụgbọala gwongworo danyere n’ime osimiri.

   Otu onye ọchịchị obodo gwara ụlọmgbasaozi Reuters na ụgbọala ahụ na-eme njem na Sidame steeti tupu ọ danye n’osimiri oge ọ gbapụrụ n’akwammiri n’ụbọchị Sọnde 29 Disemba 2024.

   Wosenyeleh Simion kwuru na ọtụtụ ndị njem nọ n’ime ụgbọala gwongworo ahụ bụ ndị gara mmemme agbamaakwụkwọ.

   Ndị uweojii na-ahụ maka njem okporoụzọ kwuru na ihe butere ya bụ ọdachi bụ n’ihi na gwongworo ahụ bu ibu karịrị ya.

   Ngalaba ụlọọrụ Sidama Police Commission Traffic Prevention and Control Directorate sịrị na mmadụ ndị nwụrụ n’ihe mberede ahụ gụnyere ụmụnwoke iri isii na asatọ (68) na ụmụnwaanyị atọ.

10. 30 Disemba 2024A tụọla ụmụakwụkwọ abụọ mkpọrọ na Chaịna maka ọnwụ nwata akwụkwọ ibe ha

    

    Ebe foto si, Getty Images

    Otu ụlọikpe na mba Chaịna atụọla otu nwata akwụkwọ mkpọrọ ndụ maka ọnwụ nwata akwụkwọ ibe ya nwụrụ n’ọnwa Maachị.

    Ụmụakwụkwọ ahụ si mpaghara Hebei province aha nna ha bụ Zhang na Li dị naanị afọ iri na atọ oge ha kpara nkata ma gbuo nwata akwụkwọ ibe ha aha ya bụ Wang ma kee ego ha napụrụ ya.

    Akwụkwọozi ụlọikpe wepụtara kwuru na ha ji shọvel wakpo ma gbuo Wang. Ha gara n’ihu lie ozu ya n’ọrụugbo akwụkwọ nri dị n’ogige ahụ. Ụlọikpe kọwara agwa ụmụaka abụọ dịka nke jọgburu onwe ya.

    Ezinaụlọ Wang kwuru na ụmụakwụkwọ atọ ibe ya na-emekpa ya ahụ n’ụlọakwụkwọ.

    Ụlọikpe tụrụ ụmụaka abụọ ahụ mkpọrọ ndụ ebe onye nke nwata akwụkwọ nke atọ ahụ enwetaghị ntaramahụhụ ọbụla.

11. 30 Disemba 2024Ezinaụlọ ndị nwụrụ n’ụgbọelu kpọkara na Saụt Korịa akpọọla oku maka enyemaka

    

    Ebe foto si, Getty Images

    Ezinaụlọ ndị nwụrụ n’ụgbọelu Jeju Air kpọkara n’ụbọchị Sọnde 30 Disemba, 2024 na Saụt Korịa agbakọọla n’ogige ọdọụgbọelu Muan International Airport ma na-eche ka e bunye ha ozu ụmụnne ha nwụrụ n’ọdachi ụgbọelu ahụ.

    Mana ndị ọrụ kwuru na ihe mere o ji enwee ha oge bụ iji hụ na ihe niile gara etu o kwesịrị.

    Onye uweojii bụ Na Won-o kọwaara ezinaụlọ ndị nke ha nwụrụ na ndị ọchịchị chọrọ ịkpachapụ anya chọpụta mmadụ ozu ndị nwụrụ anwụ n'ọdachi maka na ọkụ gbariri ahụ ha mgbe ụgbọelu ahụ kpọkara.

    Ka ọ dị ugbua, ndị ọrụ nnyocha amalitela ime nnyocha n’ogige ebe ụgbọelu ahụ kpọkara iji chọpụta ihe kpatara ya.

    Cheta ụgbọelu Boeing 737-800 nke ụlọọrụ Jeju Air bu mmadụ 181 oge ọ kpọkara dịka ọ na-eme njem aga Bangkok, Taịland ma gbuo mmadụ 179.

    Ezinaụlọ ndị ahụ nwụrụ na-arịọ enyemaka n’ihi na ha enwetabeghị ozi si n’aka ụlọọrụ Jeju Air banyere ọnọdụ ozu ndị ezinaụlọ ha nwụrụ.

    

    Ebe foto si, Getty Images

    

    Ebe foto si, Getty Images

    

    Ebe foto si, Getty Images

12. 30 Disemba 2024Gọvanọ Alex Otti ebuliela ụgwọọnwa ndị nkụzi n'Abia Steeti

    

    Ebe foto si, Alex Otti/X

    Aka na-achị Abia steeti bụ Alex Otti ebuliela ụgwọọnwa ndị nkụzi steeti ahụ.

    O kwuru na atụmatụ a bụ iji mee mwulite ọnọdụ agụmakwụkwọ steeti ahụ ma mwụlite mmụọ ndị nkụzi nọ n’Abia steeti.

    Gọvanọ Otii mere ka a mata nke na mmemme Arochukwu Day, kwuru na gọọmenti ya mapụtara ego dị pasenti 20 na bọjeti steeti maka agụmakwụkwọ. Ọ gara n’ihu kwuo na mbuli ụgwọọnwa a ga-amalite n’ọnwa Jenụwarị 2025.

13. 29 Disemba 2024Nigeria Customs ekwuola na ha ga-ere mmanụ ụgbọala ha jidere otu lịta N400

    

    Ebe foto si, Nigeria Custom Service / X

    Ụlọọlụ na-ahụ maka ihe dị icheiche e si mba ọzọ ebubata na Naịjirịa bụ Naịjirịa Customs Service ekwuola na ha ga-erefu mmanụ ụgbọọla ha jidere.

    Ha sị na ha wetere mmanụ ahụ n’aka ndị na-atụmgbere mmanụ ụgbọala n’ụzọ adịghị n’iwu Naịjirịa na mpaghara Legos steeti na Ogun steeti.

    Onyeisi na-ahụ maka ọrụ pụrụiche ha kpọrọ ‘Operation Whirlwind’ bụ Hussein Ejibunu kwuru na ụlọikpe enyela ha ikike irefu mmanụ ụgbọala ndị ahụ.

    

    Ebe foto si, Nigeria Custom Service / X

    Ọ kwukwara na mmanụ ụgbọala ahụ dị lịta 15,325, ma kọwaa na ihe ha ga-ere 25-lịta bụ N10,000 ; nke a pụtara N400 maka otu lịta.

    Ejibunu kwuru na ha bidoro na-ejide ndị na-atụ mgbere mmanụ ụgbọala n’ụzọ adịgboroja kemgbe ọnwa Maay, afọ 2024.

    Ọ sị na irefu mmanụ ụgbọala ahụ ugbua ga-enyere ndị niile zụtara ya aka n’ihe ụkọ dị na Naịjirịa.

    

    Ebe foto si, Nigeria Custom Service / X

14. 29 Disemba 2024Onye a zọpụtara n’ụgbọelu kpọkara na mba Saụt Korịa akọwaala ihe o chetara

    

    Ebe foto si, EPA-EFE/REX/Shutterstock

    Otu onye n'ime mmadụ abụọ a zọpụtara na ndụ mgbe ụgbọelu dara ma kpọkasịa na mba Saụt Korịa akọwaala ihe ọ chetara n’oge ihe mberede ahụ na-eme.

    Nwoke ahụ dị afọ iri atọ na atọ (33) bụ onye na-eso ụgbọelu Jeju eme njem dịka onye ọrụ ha.

    Ụlọọrụ mgbasaozi Yonhap dị na Saụt Korịa kwuru na onyeisi ụlọọgwụ na-eleta nwoke ahụ anya kwuru na akọnuche nwoke ahụ ka kpakọrọ ọnụ.

    Ha sị na ọ gwara dọkịnta ihe ọ maara maka ihe mberede ahụ.

    N'okwu ya “mgbe m tetara, mepee anya ka m hụrụ na a zọpụtala m”.

    N’oge ụgbọelu ha kpọkachara ka e zigara ya n’ụlọọgwụ dị na mpaghara Mokpo tupuu e zịgaa ya n'ụlọọgwụ Ewha nke ụmụnwanyị dị n’isi obodo mba Saụt Korịa.

    “Ugbua ọ na-ekwu okwu. Enweghị ihe dịka o nwere ọnọdụ ichefu ihe, uche ezughịoke maọbụ ahụike dị etu ahụ”.

    Ọ na-enwete onwe ya ma na-aga nnyocha dị icheiche maka na ọtụ akụkụ ahụ ya gbajiri nakwa ụdịrị ahụ ọ merụrụ.

    Cheta na mbụ, ọ bụ mmadụ 124 ka e kwuru nwụrụ n’ụgbọelu ahụ, mana ugbua ọnụọgụ ndị nwụrụ na ya eruola mmadụ 179.

    Ụgbọelu Boeing 737-800 nke Jeju Air bu mmadụ 181 si na Bangkok dị na Thaionlan na-abata Saụt Korịa ebe ọ nọ kpọkaa.

    Ndị nọ n’ime ụgbọelu ahụ gụnyere mmadụ isii na-eso ụgbọelu na ọkwọụgbọelu nakwa ndị na-eme njem.

    N’ime mmadụ 181 ahụ, naanị mmadụ abụọ bụ ndị na-eso ụgbọelu a zọpụtara mgbe ụgbọelu ha kpọkara.

15. 29 Disemba 2024Mmadụ 124 anwụọla dịka ụgbọelu kpọkara na South Korea

    

    Opekatampe mmadụ otu narị na iri abụọ na anọ (124) anwụọla oge ụgbọala kpọkara dịka ọ na-achọ ifedata n’ọdọụgbọelu dị na Saụt Korịa.

    Ya bụ ụgbọelu Boeing 737-800, nke ụlọọrụ njem ụgbọelu Jeju Air na-elekọta nwere mmadụ otu narị na iri asatọ na otu (181) n’ime ya.

    Akụkọ anyị nwetara kwuru na ụgbọelu ahụ si n’ọdọụgbọelu Muan Airport dị na Taịland na-efedata n’ọdọụgbọelu dị na Saụt Korịa.

    Ihe onyonyoo fesara na soshal midịa gosiri ka ụgbọelu ahụ siri gbapụ n’okporo ụgbọelu, kpọkaa mgbidi nọ ebe ahụ ma nwuru ọkụ.

    E nwebeghị ihe a kpọrọ aha butere ihe ọdachi ahụ mana ndị ọrụ mgbanyụọkụ kwenyere na o nwere ike ịbụ nnụnụ nakwa ọnọdụ ihu eluigwe ọjọọ.

    A napụtala ndị ọrụ ụgbọelu abụọ na ndụ dịka ọrụ gbatagbata ka na-agakwa n’ihu ugbua.

    Ọnọdụ a na-abịa n'ime mkpụrụ ụbọchị anọ ụgbọelu Azerbaijan Airlines kpọkara na mba Kazakhstan n'ụbọchị Wenezde 25 Disemba, 2024 ma gbuo mmadụ iri atọ na asatọ (38).

16. 29 Disemba 2024Ndị be anyị, ụnụ asaala chi eee

    Ụbọchị ụka ọma nụ ooo!

    Sonyere anyị taa dịka Chinonso Ugorji na Michael Ilediagu ga na-ewetara gị akụkọ ndị na-akpọtụ na mpaghara ụwa dị iche iche.

    Gaa n'ihu nọnyere anyị.

17. 28 Disemba 2024Onyeisiala Russia, Putin arịọla mgbaghara maka ụgbọelu Azerbaijan ahụ kpọkasịrị

    

    Ebe foto si, Reuters

    Onyeisiala mba Russia bụ Vlladimir Putin arịọla Onyeisiala mba Azerbaijan mgbaghara maka mgbatu ụgbọelu dịka ọ na-efefe n’ihuelu igwe mba Russia, nke gburu mmadụ 38 – mana o kwughi na ọ bụ ndị Russia mere ya.

    N’ozi mbụ ọ na-agbasa banyere mgbọkasị ahụ mere n’ụbọchị Ekeresimesi, Putin kwuru na ọdachi ahụ mere mgbe ngwaagha nchekwa mba Russia nọ na-azaghachị mgbọ ndị Ukraine gbara ha.

    Onyeisiala mba Ukraine bụ Volodymr Zelensky kwuru na mba Russia “kwụsị ị na-agbasa akụkọ ụgha” banyere ogbunigwe ahụ.

    E cheere na mgbọ si na ngwaagha nchekwa mba Russia bụ ihe gbaturu ụgbọelu ahụ dịka ọ chọrọ ifetu na mpaghara Chechnya – nke mere o jiri fefee n’osimmiri Caspian.

    Ụgbọelu mba Azerbaijan ahụ daziri ma kpọkasịa n’akụkụ Aktau na mba Kazakhstan, gbuo mmadụ 38 n’ime mmadụ 67 nọ n’ime ya.

    Ọtụtụ ndị nọ n’ime ụgbọelu ahụ bụ ndị Azerbaijan, ebe ndị ọzọ bụ ndị Russia, Kazakhstan na Kyrgyzstan.

    Ọtụtụ ndị fọro ndụ bụ ndị nọ n’ebe azụ ụgbọelu ahụ.

    Ụgbọelu ahụ si na Baku bụ isiobodo mba Azerbaijan na-aga Chechen, bụ isiobodo Grozny n’ụbọchị 25 Disemba mana mgbe a gbara ogbunigwe, o feere gawazie ebe ọzọ.

    Mba Russia wepụtara ozi na Saturday ma kwuo na Putin na Onyeisiala mba Azerbaijan bụ Iiham Aliyev ekwuola n’ekwentị.

18. 28 Disemba 2024Mba Israel awakpoola ma bibie ụlọọgwụ ikpeazụ dị na Gaza – WHO

    

    Ebe foto si, Getty Images

    Ụlọọrụ na-ahụ maka ahụike na mbaụwa bụ World Health Organisation (WHO), akwaala arịrị maka mwakpo mba Izrel wakporo ma bibie ụlọọgwụ ikpeazụ dị na mpaghara ugwu Gaza.

    WHO kwukwara na akụkọ ruru ha ntị gosiri na mba Izrel bibiri ọtụtụ ihe dị mkpa oge ha wakporo ụlọọgwụ ahụ a kpọrọ Kamal Adwan Hospital n’ụbọchị Fraịde 27 Disemba 2024.

    Ndị isi WHO kwuputara mwute banyere ọnọdụ ahụike nke ndị nọ n’ọrịa a chụpụrụ n’ụlọọgwụ ahụ.

    Ka o sinadị, mba Izrel kwuru na Hamas ji ụlọọgwụ ahụ mere ụlọọrụ ha mana ha ewepụtaghị ihe akaebe gosiri na nke ahụ bụ eziokwu.

19. 28 Disemba 2024Trump akpọọla oku ka a ghara ịmachi TikTok ugbua n’America

    

    Ebe foto si, Getty Images

    Donald Trump agwala Ụlọikpe Kachasị n'Amerịka ka o gbochie iwu na-achọ ịmachi ọbaozi TikTok na mba ahụ.

    Ozi anyị nwetara mgbe gara aga kwuru na mba Amerịka ga-amachi iji TikTok eme ihe na mba ahụ ọ bụrụ na ndị Chaịna nwe ya eresịghị ya ụlọorụ dị n’Amerịka.

    Ụbọchị ikpeazụ e tinyere maka ire ọbaozi ahụ ga-akụrụ ọnụ tupu Trump abanye n’ọkwa ọchịchị n’ime ọnwa na-abịa abịa.

    Donald Trump kwuru na ka ọ dị ugbua, ọ kwadoghị ka a machie TikTok mana oge ọ bụbu onyeisiala, ọ chọburu ịmachi ya oge ahụ dịka ọ sịrị na TikTok bụ ihe iyi egwu nyere nchekwa Amerịka.

20. 28 Disemba 2024Mmadụ 69 anwụọla dịka ụgbọmmiri kpuru n’osimiri Morocco

    

    Ebe foto si, Getty Images

    Ndị ọchịchị mba Mali ekwuola na ihe ruru mmadụ iri isii na itolu gụnyere mmadụ iri abụọ na ịse si na mba Mali anwụọla dịka ụgbọmmiri buuru ha site n’ọdịda anyanwụ Afrịka na-aga mba Spain kpuru n’osimiri Morocco.

    Dịka ozi si na mịnịstrị ofesi nke mba Mali kwuru, oge ụgbọmmiri ahụ a rụru arụ bu mmadụ ruru iri asatọ kpuru, ọ bụ naanị mmadụ iri na otu pụtara n’ihe mberede ahụ.

    O kwukwara na ihe ruru mmadụ itolu so n’ime ndị pụtara n’ihe mberede ahụ bụ ndị si na mba Mali.

    Ụgbọmmiri ahụ kpuru n’ime izuụka gara aga mana mịnịstrị ahụ kwuputara ya n’ụbọchị Tọzde 26 Disemba 2024.

    E kwukwara na e zipụla ngalaba na-ahụ maka ọnọdụ gbatagbata ka ha nyochaa ọnọdụ ahụ.

    Cheta na ọgbaaghara dị na mba Mali nke sitere na mkpamkpa ndị otu jihadist na-akpa emeela ka ọtụtụ mpaghara ugwu na ọwụwa anyanwụ ghara ikwe ndị ọchịchị ka ha chịa nke ọma.

    Mba Mali ahụsiela anya n’aka ndị jihadist nke mere ka ndịagha were ọchịchị na mba ahụ n’afọ 2020 na 2021.

    Onyeisi ọchịchị nke mba ahụ kwere nkwa na ọ ga-enyefe ọchịchị n’aka ndị nkịtị n’ọnwa Maachị 2024 mana nke ahụ emebeghị ruo ugbua.