Yaƙin Iran da abubuwan da ke faruwa a Najeriya da sassan duniya

Rahoto kai-tsaye

Ibrahim Haruna Kakangi da Aisha Aliyu Jaafar da Abdullahi Bello Diginza

1. Mintuna 47 da suka wuceSojojin Mali na janyewa daga yankin Tessit

   

   Asalin hoton, AFP via Getty Images

   Rahotanni daga Mali na cewa sojojin ƙasar na janyewa daga garin Tessit da ke arewa maso gabas, yayin da masu ta da ƙayar baya ke ƙara zafafa kai hare-hare bayan wani sabon farmaki da suka kaddamar a ƙarshen mako.

   A cewar wakilin BBC, Arewacin birnin Kidal da Kudancin yankin su ne inda aiyukan ƴan tada ƙayar bayan yafi mamayewa a Mali.

   Wata ƙungiya mai alaƙa da Al-Qaeda ta ce ta bai wa sojojin damar ajiye makamansu tare da barin yankin lami lafiya.

   Wannan ya biyo bayan janyewar Rundunar sojojin hayan Rasha da ke aiki a Afirka daga garin Kidal da ke yankin arewacin ƙasar, tare da sojojin Mali.

   Sojojin ƙasar sun ƙwace garin shekaru uku da suka gabata tare da taimakon Rasha. Kawo yanzu dai gwamnatin mulkin sojin Mali ba ta yi tsokaci kan lamarin ba.

2. Sa'a 1 da ta wuceTrump ya buƙaci ABC ta sallami Jimmy Kimmel

   

   Asalin hoton, Getty Images

   Shugaban Amurka Donald Trump ya ce ya kamata tashar ABC ta kori mai barkwancin nan Jimmy Kimmel nan take, bayan ya kwatanta matarsa da matar da mijin ta ya kusa mutuwa.

   Mai gabatar da shirin na dare ya yi wannan furuci ne, yayin wani jawabi na barkwanci a daren jajiberin liyafar cin abincin ‘yan jarida na Fadar White House.

   Shugaban ya bayyana jawabin a matsayin abin kyama kuma abin tunzuri ga tashin hankali. Tun da farko, Melania Trump ta wallafa a shafinta na sada zumunta cewa, Sau nawa shugabannin ABC za su ci gaba da kyale halayen Kimmel masu muni, suna cutar da al’ummarmu?

   A watan Satumban da ya gabata, an dakatar da Jimmy Kimmel na ɗan lokaci sakamakon matsin lamba daga Fadar White House, kan kalaman da ya yi game da yunƙurin kashe wani fitaccen mai goyon bayan Maga, Charlie Kirk.

3. Sa'a 1 da ta wuceZa a gurfanar da wanda ya kai hari a taron da Trump ya halarta a Amurka

   

   Asalin hoton, Getty Images

   Za a gurfanar da Ba-Amurken nan ɗan asalin birnin Los Angeles a gaban kotu a Washington domin fuskantar tuhuma kan yunƙurin da ya yi na shiga da bindiga wani taron liyafa, da Shugaba Donald Trump da manyan jami’an gwamnatinsa suka halarta a ranar Asabar.

   Mutumin mai suna Cole Allen na fuskantar tuhume-tuhume da suka haɗa da amfani da bindiga da kuma kai hari, bayan da ya harbi wani jami’in tsaro na sirri wanda rigar kariyar da yake sanye da ita ta cece shi.

   Shugaban hukumar binciken manyan laifuka ta FBI, Kash Patel, ya ce yanzu sun fahimci yadda wanda ake zargin ya iya ƙetare tsaron otal ɗin.

   Shugabar ma'aikatan fadar white house Susie Wiles kenan, ta ce wannan ne karo na 3 da shugaban Amurkar ke tsalleke yuƙurin kashe shi da ake, don haƙa za ta jagoranci wani zama na musamman domin sake nazartar tsarin tsaron shugaba Trumph.

4. Sa'o'i 2 da suka wuceHar yanzu ba a ji ɗuriyar Shugaban Mali ba

   

   Asalin hoton, EPA

   Har yanzu ba a ji ɗuriyar shugaban gwamnatin sojin Mali da wasu manyan kwamadojin ƙasar ba tun bayan hare-haren da ƙungiyar al-Qaeda da ƙungiyar ƴan aware suka ƙaddamar a ƙasar.

   Wannan ya sa ake raɗe-raɗin cewa shugaban ya ji rauni, ko kuma an fitar da shi daga ƙasar.

   Haka kuma an fara raɗe-raɗin cewa akwai fafutikar mulki a ƙasar, inda ake tunanin akwai yunƙurin maye gurbinsa da muƙaddashin shugaban majalisar ƙasar, Latfanal janar Malick Diaw Full, kamar yadda kafar Nouvel Horizon mai zaman kanta ta ruwaito.

   Jamaat Nusrat al-Islam wal-Muslimin (JNIM) ce ta jagoranci hare-hare a sansanin soji da ke Bamako, wanda ya yi ajalin ministan tsaron ƙasar, Laftanl janar Sadio Camara.

   Daga cikin waɗanda ba a ji ɗuriyarsu ba akwai shugaban ƙasar Janar Assimi Goita da mai ba shugaban ƙasa shawara kan tsaro Laftanal janar Modibo Kone da ministan sulhu Laftanal janar Ismael Wague da sauran su.

5. Sa'o'i 2 da suka wuce'Iran ta ƙware wajen shiga tattaunawa'

   

   Asalin hoton, RALF HIRSCHBERGER/AFP

   Shugaban Jamus Friedrich Merz ya ce gwamnatin Iran na watsa wa Amurka ƙasa a gwiwa ne ganin yadda wakilan ƙasar suka je tafi har Pakistan amma suka koma ba tare da samun maslaha ba.

   Wakilin BBC ya rawaito Mista Merz na cewa bai ga wata hanyar ficewa da Amurka ke da ita daga rikicin ba a yanzu, musamman yadda Iraniyawa suka kware wajen tafiyar da tattauwar.

   A wani ɓangaren kuma, Ministan harkokin wajen Iran Abbas Araghchi ya gana da Shugaban Rasha Putin a birnin St Petersburg, inda ya bayyana masa cewa alaƙar da ke tsakanin ƙasarsa da Rasha za ta cigaba da ƙara ƙarfi ne.

   A Iran kuma, an sanar da cewa rundunar tsaron ƙasar ce ke da alhakin ɗaukar duk wani mataki a game da mashigar Hormuz.

6. Sa'o'i 4 da suka wuceRikici kan rijiya ya yi ajalin aƙalla mutum 42 a Chadi

   

   Asalin hoton, AFP

   Hukumomi a ƙasar Chadi sun tabbatar da cewa rikici tsakanin garuruwa biyu da ke yankin gabashin ƙasar ya yi ajalin aƙalla mutum 42, sannan sama da mutum 10 suka jikkata.

   Rikicin ya fara a tsakanin wasu maƙwabta a ranar Asabar da ta gabata saboda saɓani kan wata rijiya a ƙauyen Igote da ke lardin Wadi Fira, amma daga bisani sai rikicin ya ƙazance, kamar yadda hukumomin da ke da alaƙa da lamarin suka sanar.

   Mataimakin ministan ƙasar mai kula da harkokin yankuna, Limane Mahamat wanda ya jagoranci tawagar gwamnati zuwa yankin ya ce an samu zaman lafiya.

   Tuni aka kai waɗanda suka jikka zuwa asibiti domin a kula da lafiyarsu.

   Ƙasar Chadi ta daɗe tana fama da rikice-rikice, musamman na manoma da makiyaya.

   Wannan na zuwa ne a daidai lokacin da ƙasar ke fama da yaƙin Sudan da ke tsallakawa yankunanta, inda aka samu lokutan da aka kai harin jirage marasa matuƙa a garuruwan da ke bakin iyaka.

7. Sa'o'i 5 da suka wuceMutane da dama sun jikkata a rikicin kan iyaka tsakanin Afghanistan da Pakistan

   

   Asalin hoton, Reuters

   Rahotanni daga lardin Kunar da ke gabashin Afghanistan sun ce an hallaka aƙalla mutum uku, yayin da hamsin suka jikkata a wani hari ta sama da ake zargin sojojin Pakistan ne suka kai.

   Cikin waɗanda suka jikkata har da ɗalibai da dama daga jami'ar Kunar da kuma wani malami.

   Bidiyon da aka aike wa BBC na nuna yadda aka lalata gine gine a jami'ar.

   Zuwa yanzu babu martani daga hukumomin Pakistan.

   Gomman mutane sun mutu, yayin da ɗaruruwa suka jikkata a faɗan kan iyaka da ake gwabzawa tsakanin makwaftan biyu a ƴan makonnin da suka gabata.

8. Sa'o'i 6 da suka wuceSojojin Isra'ila sun ƙaddamar da sabbin hare-hare a Lebanon duk da yarjejeniyar tsagaita wuta

   

   Sojojin Isra’ila sun ce sun ƙaddamar da sabbin hare-hare kan wuraren Hezbollah a yankin Bekaa da kuma wasu sassa na kudancin Lebanon, duk da yarjejeniyar tsagaita wuta da ke gudana.

   Sanarwar da rundunar IDF ta fitar a shafukan sada zumunta, ta biyo bayan hare-haren jiya Lahadi, da yayi sanadiyyar mutuwar mutane goma sha huɗu.

   Wannan shi ne mafi yawan asarar rayuka tun bayan ƙulla yarjejeniyar tsagaita wutar a farkon watan nan.

   Wakilin BBC ya ce tsarin kiwon lafiyar ƙasar na fuskantar gagarumar barazana, sakamakon yadda suke samun ƙaruwar gawarwaki a kullu yaumin.

   A yau Litinin ne, shugaban Lebanon, Joseph Aoun, ya sake jaddada kudirinsa na shiga tattaunawa kai tsaye da Isra’ila, amma ya ce ba zai amince da wata yarjejeniya da ta ƙunshi wulakanci ba.

9. Sa'o'i 7 da suka wuceAn ceto marayu 15 cikin yaran da ƴan bindiga suka sace a Kogi

   

   Asalin hoton, SOCIAL MEDIA

   Wasu ƴan bindiga sun sace yara 23 da mai ɗakin shugaban makaranta da gidan marayu na Dahallukitab da ke Zariagi, wani ƙauye da ke Kabba a kan titin Lokoja zuwa Okene da ke ƙaramar hukumar Adavi a jihar Kogi.

   A cikin wata sanarwa da kwamishinan yaɗa labarai na jihar Kingsley Fanwo ya fitar a yau Litinin, ya ce an sace yaran ne a daren ranar jiya Lahadi.

   Ya kuma ce jin kaɗan bayan samun rahoton harin, ƴan sanda tare da goyon bayan wasu jam'ain tsaro suka isa yankin, inda suka yi nasarar ceto yara 15.

   Gwamnatin jihar na Allah-wadai da harin, inda ta bayar da tabbacin cewa jami'an tsaro na ci gaba da aiki wajen ceto sauran mutanen.

   Sai dai sanarwar ta bayyana cewa makarantar wadda kuma take aiki a matsayin gidan marayu ba ta da rajista, inda ya ce irin waɗannan makarantu da ke irin waɗannan yankunan kuma gwamnati ba ta san da su ba, na kasancewa cikin barazana musamman a wannan lokaci na rashin tsaro.

10. Sa'o'i 7 da suka wuceMajalisar dokokin Kano ta amince da naɗa Garo a matsayin mataimakin gwamna

    

    Asalin hoton, GARO/FACEBOOK

    Majalisar dokokin jihar Kano ta amince da naɗin Murtala Sule Garo a matsayin mataimakin gwamnan jihar bayan ta tantance shi.

    A ranar 22 ga wannan watan ne gwamnan jihar Abba Kabir Yusuf ya miƙa sunan Murtala Garo ga majalisar.

    Mataimakin kakakin majalisar Hon. Muhammad Bello Butubutu wanda ya tabbatar wa da BBC amincewar, ya ce sun tabbatar da cewa Garo ɗan asalin jihar Kano ne, kuma ya yi karatu har matakin HND wanda ya kai ya riƙe muƙamin, hakazalika sun tabbatar ya kai shekarun zama mataimakin gwamna.

    Ya kuma ce sun tabbatar Murtala Sule Garo na da gogewar da zai iya zama mataimakin gwamna domin a baya ya zama shugaban ƙaramar hukuma, da kwamishinan ma'aikatar kula da kananan hukumomi, hakazalika ya taɓa yin takarar neman zama mataimakin gwamna.

    Hon Muhammad Bello ya ce bayan sun tabbatar da hakan, ya gabatar da rahotonsa a zauren majalisar, inda aka bayar da damar yin tambayoyi ko kalubalantar rahoton, sai dai ba a samu wanda ya kalubalanci rahoton ba wanda ke nufin an amince da shi.

    Zaɓen sabon mataimakin gwamnan dai na zuwa ne bayan murabus ɗin da tsohon mataimakin gwamna Kwamred Aminu Abdussalam Gwarzo ya yi a ranar 27 ga watan Maris ɗin 2026.

    Wannan dai ya samo asali ne sakamakon sauye-sauyen sheƙa da aka samu tsakanin gwamnan da mataimakinsa da wasu 'yan majalisar jihar da sauran masu ruwa da tsaki cikin gwamnatin.

11. Sa'o'i 8 da suka wuceMatuƙa jiragen ruwan da suka maƙale a Mashigar Hormuz na cikin 'mawuyacin hali'

    

    Asalin hoton, Reuters

    Shugaban ƙungiyar masu jiragen dakon mai ya ce dubban ma'aikatan jirage sun maƙale a mashigar Hormuz, lamarin da ya fara shafar lafiyar ƙwaƙwalwarsu, da sanya musu gajiya da kuma barazana ga lafiyarsu.

    Da yake bayyana halin da ma'aikatan da suka maƙale ke ciki, Tim Wilkins, shugaban ƙungiyar Intertanko, ya kuma ce samun abinci da sauran kayyayakin amfani na ci gaba da yi musu wahala, a yayin da ake ci gaba da samun tsaiko a ɗaya daga cikin mashigar ruwa mafi hada hadar jirage a duniya.

    Ya bayyana cewa gwamnatoci na ɗaukar matakai daban daban, inda wasu ƙasashe kamar Philippines ke hana sauya ma'aikata, yayin da wasu kuma ke buƙatar ƴan ƙasashen su dawo gida.

12. Sa'o'i 9 da suka wuceKongo za ta kafa sabuwar rundunar samar da tsaro a wuraren haƙar ma'adinai

    

    Asalin hoton, Getty Images

    Jamhuriyar Dimokraɗiyyar Kongo ta sanar da ƙirƙiro wata sabuwar rundunar tsaro domin inganta tsaro a fannin haƙar ma'adinai a ƙasar.

    Rundunar, wadda za a kafa ƙarƙashin wani asusun haɗin gwiwa tsakanin Amurka da Haɗaɗɗiyar ɗaular Larabawa na dala miliyan 100, na da nufin ɗaukar ma'aikata aƙalla dubu uku domin samar da tsaro a wuraren haƙar ma'adinai, da kuma sanya ido kan haƙo ma'adinai har ya zuwa yadda ake sarrafa su.

    Kongo, wadda ita ce ƙasa ta biyu wajen samar da jan ƙarfe a duniya, na fama da rikicin ƙungiyoyi masu ɗauke da makamai a gabashin ƙasar da ke da ɗimbim ma'adinai, inda rikicin da ake yi ya kai ga mutuwar dubban mutane.

13. Sa'o'i 9 da suka wuceUkraine ta ce tana kashe sojojin Rasha dubu talatin duk wata

    

    Asalin hoton, EPA

    Kwamandan rundunar jirage marasa matuƙa ta ƙasar Ukraine ya shaida wa BBC cewa dakarunsa na daƙile ci gaban sojojin Russia ta hanyar kashe sojojin da yawansu ya kai dubu talatin a duk wata.

    Robert Brovdi, wanda aka fi sani da “Magyar,” ya ce suna kashe sojojin ne daidai da waɗanda Moscow ke iya ɗauka aiki a kowane wata, inda kuma jirage marasa matukan ke ɗaukar hoton kowanne soja da suka kashe, sannan a tantance tare da rubuta bayanansa.

    Mista Brovdi ya kuma ce hare-haren jirage marasa matuƙa na dogon zango kan cibiyoyin mai na Rasha za su ci gaba, domin sun rage fitar da man fetur din kasar sosai.

    Wakiliyar BBC ta ce yana fatan irin wadannan hare hare da ake kai wa can cikin Rasha da kuma yawan dakarun da ake kashe wa ƙasar a filin daga zai tayar da hankalin ƴan kasar, kana su nuna shakku kan yaƙin da shugabansu ya fara, harma su taka masa birki.

14. 27 Aprilu 2026'Sojojin Rasha da na Mali sun janye daga birnin Kidal'

    

    Asalin hoton, AFP VIA GETTY

    Rundunar sojojin hayan Rasha da ke aiki a Afirka, mai alaƙa da ma'aikatar tsaro ta Rasha ta janye daga birnin Kidal da ke Mali tare da sojojin ƙasar, bayan shafe kwanaki biyu suna yaƙi da ƙungiyar FLA da ta JNIM mai alaƙa da al-Qaeda, kamar yadda rundunar ta wallafa a shafinta na Telegram a yau Litinin 27 ga watan Afrilu.

    ''Bisa matakin haɗin gwiwa da shugabannin Mali suka ɗauka, jami'an rundunar ta 'Africa Corps' da ke Kidal sun fice daga birnin tare da jami'an rundunar sojin Mali. Sojojin da suka jikkata tare da manyan motocin yaƙi ne suka fara ficewa. Sojoji za su ci gaba da ayyukansu. Har yanzu ana zaman ɗarɗar a Mali,'' in ji ƙungiyar.

    Rahotannin ficewar sojojin daga birnin sun soma fitowa ne da yammacin jiya Lahadi a wasu shafukan Telegram masu yada bayanai kan ayyukan sojojin haya na Rasha a Afirka.

    Wani sanannen shafi da ke wallafa labarai game da yaƙi a ayyukan sojin ya wallafa abin da ya ce bidiyo ne na yadda mayaƙan FLA da na JNIM ke kai-kawo a sansanin rundunar Africa Corps da ke Kidal, da kuma wasu bidiyo na abin da ya ce yadda Rudunar ke barin sansanin ne.

15. 27 Aprilu 2026An ayyana kwanaki biyu na makokin ministan tsaron Mali

    Rahotanni daga Mali sun ce an harbi shugaban hukumar tattara bayanan sirri na ƙasar tare da jikkata shi a hare haren da aka kai a babban birnin ƙasar Bamako, da wasu birane a ranar asabar.

    Gwamnatin sojin Mali ta ayyana kwanaki biyu na makokin mutuwar ministan tsaron ƙasar Sadio Camara a faɗin ƙasar, wanda aka kashe a wani harin ƙunar baƙin wake kusa da gidansa da ke babban birnin ƙasar Bamako a ranar Asabar.

    Janar Camara ya mutu ne a yayin da yake karɓar kulawa sakamakon raunukan da ya samu a lokacin da rahotanni suka ce yana gwabzawa da mayaƙan jiihadi da suka kai hari gidansa.

    Mali dai na fama wajen daƙile ayyukan ƴan bindiga duk da tsananta ayyukan tsaro da ake yi tun bayan da sojoji suka ƙwace mulki a 2020.

16. 27 Aprilu 2026Farashin ɗanyan mai ya ƙaru bayan tsaiko a tattaunawar zaman lafiya tsakanin Amurka da Iran

    

    Asalin hoton, Getty Images

    Farashin ɗanyan mai ya ƙaru a kasuwannin duniya bayan da aka sake samun tsaiko a shirin zagaye na biyu na tattaunawar zaman lafiya tsakanin Amurka da Iran.

    Farashin mai nau'in Brent ya ƙaru da kusan kashi 2 cikin 100 zuwa dala 107.26 duk ganga, yayin da ɗanyan man da ake kasuwancinsa a Amurka ya ƙaru da kashi 1 cikin 100 zuwa dala 95.40.

    Hakan na zuwa ne bayan da Shugaban Amurka Donald Trump a ranar Asabar ya ce Washington ta soke shirin aika tawaga Pakistan domin tattaunawa da wakilan Iran.

    Samar da makamashi a duniya ya soma fuskantar tsaiko tun soma yaƙi a Iran, bayan da aka rufe mashigar Hormuz.

17. 27 Aprilu 2026Buƙatun Amurka na son kai ne suka sa aka gaza cimma matsaya - Iran

    

    Asalin hoton, Getty Images

    Ministan harkokin wajen Iran Abbas Araqchi, ya ce an gaza cimma matsaya a tattaunawar da suka yi da Amurka a farkon wannan watan da nufin kawo karshen yaƙin ne saboda abin da ya kira '' buƙatun Washington na son kai".

    A yayin da ya isa Rasha domin tattaunawa da shugaba Putin, Mista Arachi ya ce tattaunawar zaman lafiyar zagaye na farko a Pakistan ya soma samun nasara, amma kuma daga bisani ya ruguje saboda yadda Amurka ta tunkari tattaunawar.

    Kafafen yaɗa labarai na Amurka sun ruwaito cewa Iran ta gabatar da wani sabon ƙuduri ga Washington na yadda za a buɗe mashigar Hormuz da kuma kawo ƙarshen yaƙin, amma kuma ta ɗage batun tattaunawa kan nukiliya zuwa wani lokaci na gaba.

18. 27 Aprilu 2026Gwamnatin Nijar ta haramta sayar da shinkafar Bulmex

    

    Asalin hoton, Getty Images

    Ma’aikatar kasuwanci a Jamhuriyar Nijar ta haramta sayar da wata shinkafa da ake kira Bulmex.

    Gwamnatin ta hana shigowa da sayar da wannan shinkafa a faɗin ƙasar, sakamakon wani sinadari mai cutarwa da aka ce bincike ya gano a cikinta.

    A cikin wata sanarwa da gwamnatin ta fitar mai lamba 0031, ma'aikatar ta ce bayan binciken lafiya da aka yi a kasuwanni, an gano ɓurɓushin ƙarfe a wasu buhuhunan shinkafar.

    Sanarwar ta kuma yi kira ga yan kasuwa su yi gaggawar fitar da shinkafar daga shagunansu ko su fusknaci hukunci.

    Mamman Nouri, shugaban wata kungiyar kare masu sayen kaya a Nijar, ya yabawa matakin gwamnati, sai dai ya kuma ce akwai sakaci daga bangaren gwamnati na rashin yin binciken da ya dace kan abubuwan da ake shigarwa ƙasar.

    Mamman ya kuma yi kira ga ƴan kasuwa su yi hattara tare da yin taka-tsantsan kan wasu dabaru da yake zargi ana yi don shigar da shinkafar, '' zai iya yiwuwa a chanza mata buhu, don haka in ka siya ta buɗe, in akwai mayen karfe ka saka, zai janyo duk wani karfe da ke ciki, idan an samu, daga nan sai ka gaya wa hukuma mafi kusa'' in ji shi.

19. 27 Aprilu 2026Rikicin ƙabilanci ya yi sanadin mutuwar mutum fiye da 40 a gabashin Chadi

    Jami’an gwamnati a ƙasar Chadi, sun ce aƙalla mutane arba’in da biyu ne suka mutu a wani rikici da ya ɓarke tsakanin ƙabilu a gabashin ƙasar.

    An yi imanin cewa tashin hankalin da ya faru a lardin Wadi Fira, ya samo asali ne daga taƙaddama kan wata rijiyar ruwa, lamarin da daga bisani ya haifar da jerin hare haren ramuwar gayya a faɗin yankin.

    Mataimakin firaministan ƙasar, Limane Mahamat, ya shaida wa gidan talabijin ɗin ƙasar cewa yanzu an shawo kan lamarin.

    Gabashin Chadi dai ya daɗe yana fama da rikice-rikicen kabilanci tsakanin manoma da larabawa makiyaya tsawon shekaru.

    Sai dai kuma rikicin ya ƙara tsananta sakamakon ƙarancin albarkatu da matsalolin tsaro, musamman bayan kwararar ‘yan gudun hijira sakamaon yaƙin basasar Sudan.

20. 27 Aprilu 2026Yau za a gurfanar da mutumin da ake zargi da kai wa Trump hari

    

    Asalin hoton, @REALDONALD TRUMP / TRUTHSOCIAL

    Nan gaba a yau Litinin ne za a gurfanar da mutumin da ake zargi da kutsawa wajen wata liyafar cin abinci domin kai hari ga Shugaban Amurka, Donald Trump.

    Za a tuhumi Cole Tomas, mai shekara 31 a duniya, daga Los Angeles, da laifin kai hari ga jami’in gwamnatin tarayya da kuma amfani da bindiga yayin aikata laifin.

    Ana zargin ya buɗe wuta ne a kusa da wurin binciken jami'an tsaro, lamarin da ya tilasta fitar da Shugaba Trump daga wurin cikin gaggawa.

    Jami’an tsaro sun ce an samu wani sakon email da maharin ya aikawawa 'yan uwansa mintuna kaɗan kafin ƙaddamar da harin, inda a ciki yake bayani a kan ajandarsa ta kai hari kan jami'an gwamnatin Mista Trump din.