KAI TSAYE, Labaran wasannin BBC Hausa na 31 Agusta zuwa 6 Satumba 2026

Rahoto kai-tsaye

Ibrahim Mohammed, Haruna Kakangi, Buhari Fagge

1. Sa'o'i 8 da suka wuceGolan Chelsea, Sanchez, ya koma Como a matsayin aro

   

   Asalin hoton, Getty Images

   Mai tsaron ragar Chelsea, Robert Sanchez, ya koma Como a matsayin aro na tsawon kakar wasa guda bayan ya rasa matsayinsa na mai tsaron raga na farko ga Emiliano Martinez.

   Sanchez ne ya fara wasan da Chelsea ta doke Fulham da ci 3-2 a wasansu na farko a gasar Premier, amma ya bari ƙwallon da Josh King ya buga ta kuɓuce masa a kusurwar raga.

   Damuwa game da yadda dan kasar Spain din ke taka leda ta sa ƙungiyar ta Xabi Alonso ɗauko ɗan ƙasar Argentina, Martinez, daga Aston Villa kan kuɗi £7.5m.

   Martinez ne ya fara wasan da Chelsea ta doke Brighton da ci 4-3 a ranar Lahadi — sa'o'i kaɗan bayan ƙungiyar ta sanar da ɗaukarsa — yayin da aka cire Sanchez daga cikin jerin ƴan wasan da za su buga wasan.

   Sanchez, wanda ya kasance zaɓin farko a matsayin mai tsaron ragar Chelsea tun bayan komawarsa daga Brighton a shekarar 2023, ya buga wasanni 112 kuma ya lashe gasar Conference League da kuma Club World Cup tare da ƙungiyar ta Stamford Bridge.

   BBC Sport ta samu labarin cewa kungiyar Como, wadda tsohon ɗan wasan tsakiya na Chelsea da Spain, Cesc Fabregas, ke horaswa, tana da damar sayen ɗan wasan mai shekaru 28 bayan ƙarewar wa'adin aron.

2. Sa'o'i 8 da suka wuceTottenham ta ɗauki aron Mudryk daga Chelsea

   

   Asalin hoton, Getty Images

   Tottenham ta ɗauki ɗan wasan gefe na Chelsea, Mykhailo Mudryk, a matsayin aro har zuwa ƙarshen kakar wasa.

   A ƙarƙashin yarjejeniyar, ƙungiyar ta Spurs tana da damar mayar da zaman ɗan wasan na Ukraine mai shekara 25 zuwa dindindin kan kuɗi £75m.

   Wannan matakin ya sake haɗa shi da kociyan Spurs, Roberto de Zerbi, wanda ya taɓa horas da shi a ƙungiyar Shakhtar Donetsk kafin ya koma Chelsea a shekarar 2023.

   Mudryk ya warware batun shan kwayoyi masu ƙara kuzari da Hukumar ƙwallon ƙafa a watan da ya gabata, amma bai buga wasa ba tun watan Nuwamban 2024.

   Mudryk shi ne ɗan wasa na tara da Spurs ta saya a wannan bazarar inda ta kashe sama da fam miliyan 300 wajen cefanen ƴan wasa.

   Ana kuma sa ran Tottenham za ta kammala sayen ɗan wasan baya na Chelsea Tosin Adarabioyo ka kwantiragin dindindin kafin rufe kasuwar bazarar nan.

3. 1 Satumba 2026Man City ta ɗauki Ndiaye daga Everton kan fam miliyan 65

   

   Asalin hoton, Getty Images

   Manchester City ta ɗauki ɗan wasan gefe Iliman Ndiaye daga Everton a yarjejeniyar da ta kai fam miliyan 65.

   An kammala cinikin ɗan wasan na Senegal mai shekaru 26 a ranar ƙarshe ta kasuwar musayar ƴan wasa, inda aka biya fam miliyan 60 tare da ƙarin fam miliyan 5 idan har aka cika wasu sharuɗɗa na musamman.

   ''Na yi ta ƙokari tsawon rayuwata domin samun irin wannan dama," in ji Ndiaye, wanda ya amince da kwantiragin shekara biyar a filin wasan Etihad.

   Ndiaye ya buga wasanni 74 tare da zura ƙwallaye 21 a Everton tun bayan komawarsa daga Marseille a shekarar 2024.

   Tottenham ta cimma yarjejeniya da Everton kan batun Ndiaye a daren Juma'a, a daidai lokacin da ake ganin kamar Richarlison zai koma Everton ɗin a wani cinikin daban.

   Sai dai, majiyoyi sun bayyana cewa Richarlison bai cimma yarjejeniya kan sharuɗɗan kwantiraginsa da tsohuwar ƙungiyarsa ba, lamarin da ya sa Tottenham ta kasa ci gaba da cinikin Ndiaye.

4. 1 Satumba 2026Chiesa zai ci gaba da zama a Anfield

   

   Asalin hoton, Getty Images

   An danganta Federico Chiesa da yiwuwar barin Liverpool a wannan bazarar, amma yanzu ya bayyana cewa ɗan wasan na Italiya zai ci gaba da zama a Anfield ƙarƙashin jagorancin Andoni Iraola.

   Chiesa yana da kwantiragin da zai ta ƙare a shekarar 2028, kuma a kakar wasan da ta gabata ya fara wasa sau ɗaya ne kacal a gasar Premier League; sai dai idan aka samu wani tayin ba-zata kafin rufe kasuwar musayar ƴanwasa, zai kasance ɗaya daga cikin zaɓin ƴan wasan gaba na Liverpool a wannan kakar.

   A watan Yuli, Chiesa ya shaida wa manema labarai cewa "Liverpool kawai nake tunani a halin yanzu" kuma hakan na nufin "sabon babi" a rayuwarsa.

   Chiesa bai samu damar buga wasanni biyu na farko na Liverpool a gasar Premier League ba saboda raunin da ya ke fama da shi.

5. 1 Satumba 2026Valencia ta ɗauki aron Elliott daga Liverpool

   

   Asalin hoton, Getty Images

   Ɗan wasan tsakiya na Liverpool, Harvey Elliott, ya koma Valencia a matsayin aro har zuwa Ƙarshen kakar wasa.

   BBC Sport ta bayyana cewa babu wani tanadi na sayen ɗan wasan mai shekara 23 gaba daya bayan kammala kakar wasan.

   Ɗan wasan tsakiyar ya isa ƙasar Spain a daren ranar Litinin domin kammala yarjejeniyar bayan Liverpool da Valencia sun cimma matsaya a kan cinikin.

   Wannan shi ne karo na biyu a jere da Liverpool ta bayar da aron Elliott, bayan ya shafe kakar wasan da ta gabata a Aston Villa.

   Yarjejeniyar ɗan wasan, wanda ya taɓa wakiltar tawagar Ingila ta ƴan ƙasa da shekara 21, da Liverpool za ta ƙare ne a shekarar 2028.

   Elliott ya koma Liverpool ne daga Fulham yana da shekara 16 a shekarar 2019, kuma ya shafe kakar wasa ta 2020-21 a matsayin aro a ƙungiyar Blackburn Rovers dake gasar Championship.

6. 1 Satumba 2026McTominay ba zai buga wa Scotland wasanni ba saboda matsalar ciwon zuciya

   

   Asalin hoton, Getty Images

   Kungiyar Napoli ta sanar da cewa ɗan wasan tsakiyar Scotland, Scott McTominay, zai yi karamar tiyatar zuciya bayan an gano yana da matsalar bugun zuciya mara hadari da ak kira 'mild benign arrhythmia'.

   An cire ɗan wasan mai shekaru 29 daga filin wasa bayan mintuna 56 a wasan da suka sha kashi da ci 2-1 a hannun Como a gasar Serie A ranar Lahadi, kuma zai a yi masa tiyata don gyara matsalar "a cikin kwanaki masu zuwa".

   Napoli na sa ran zai koma buga wasa bayan hutun wasannin ƙasa da ƙasa a farkon watan Oktoba, kuma shi kansa McTominay ya wallafa a shafinsa na Instagram cewa: "Sai mun haɗu nan ba da jimawa ba Napoli. Ba zan daɗe ba."

   Sai dai, hakan na nufin mai yiwuwa ya rasa wasanni huɗu na farko da Sebastien Pocognoli zai jagoranci Scotland a matsayin babban koci, waɗanda suka haɗa da karawa da Slovenia (a gida da waje), North Macedonia da Switzerland a gasar Nations League.

   A cewar hukumar lafiya ta NHS, matsalar bugun zuciya (arrhythmia) na faruwa ne idan zuciya ta buga da sauri ko a hankali fiye da yadda ya kamata.

7. 1 Satumba 2026Aston Villa ta ɗauki Mbaye da Harwood-Bellis

   

   Asalin hoton, Getty Images

   Aston Villa ta kammala ɗaukar ɗan wasan gefe na Senegal, Ibrahim Mbaye, daga Paris St-Germain da kuma ɗan wasan baya ɗan kasar Ingila, Taylor Harwood-Bellis, daga Southampton.

   Mbaye, mai shekara 18, ya zo ne daga Paris St-Germain kan kuɗi Yuro miliyan 55 (fam miliyan 47), yayin da Villa za ta iya biyan har zuwa fam miliyan 29 domin ɗaukar Harwood-Bellis.

   Villa ta biya fam miliyan 25 a matsayin kudin tashin farko na cinikin—tare da ƙarin fam miliyan 4 da za a iya biya nan gaba, bayan da aka ƙi amincewa da tayi guda biyu da ta yi a baya. Mbaye ya zura ƙwallaye uku tare da bayar da ƙwallaye biyu aka ci a wasanni 31 a dukkan gasannin da aka buga a kakar wasan da ta gabata, lokacin da PSG ta yi nasarar kare kambunta na gasar Ligue 1 da Champions League.

   Matashin ɗan wasan ya buga dukkan wasanni huɗu da Senegal ta yi a gasar cin kofin duniya ta 2026, inda ya zura ƙwallo a wasan da Faransa ta doke su da ci 3-1, lamarin da ya sa ya zama ɗan wasan Afirka mafi ƙarancin shekaru da ya taɓa zura ƙwallo a gasar cin kofin duniya ta maza.

   Mbaye ya koma PSG ne a bazarar shekara ta 2018 daga FC Versailles 78.

   An haifi ɗan wasan ne a Faransa kuma ya wakilci tawagar matasan ƙasar (Les Bleus), amma ya sauya sheƙa zuwa tawagar Senegal a shekarar 2025 bayan ya samu cancantar wakiltar ƙasar ta hanyar mahaifinsa.

8. 1 Satumba 2026Man City ta amince ta biya fam miliyan 125 kan Enzo Fernandez

   

   Asalin hoton, Getty Images

   Manchester City ta amince ta biya kuɗi har £125m—adadin da ya kafa sabon tarihi a Birtaniya—domin ɗaukar ɗan wasan tsakiyar Chelsea, Enzo Fernandez.

   Fernandez ya koma Chelsea ne daga Benfica a shekarar 2023 kan kudi £107m, adadin da ya zama mafi tsada a lokacin a Birtaniya; wannan sabon cinikin ya yi daidai da kuɗin da Liverpool ta biya domin ɗaukar Alexander Isak a lokacin a bazarar da ta gabata.

   Ƙungiyoyin sun shafe sa'o'i 24 suna tattaunawa kuma yanzu sun cimma matsaya.

   Yanzu za a yi wa Fernandez gwajin lafiya kafin ya rattaba hannu kan kwantiragin dogon lokaci da City.

   Batun sharuɗɗan kwantiragi na kashin kansa ba zai zama matsala ba.

   Fernandez, wanda ɗan wasan tawagar ƙasar Argentina ne, ya taɗa aiki tare da kocin City, Enzo Maresca, a lokacin da ɗan ƙasar Italiyar ke jagorantar Chelsea.

   Maresca na matuƙar son sake yin aiki tare da shi bayan da ƙungiyar ta rasa ƴan wasan tsakiya da dama a wannan bazarar.

   Ba a saka Fernandez cikin tawagar Chelsea ba a wasan da ta doke Brighton da ci 4-3 a gasar Premier ranar Lahadi, da kuma wasan da ta doke Luton da ci 2-0 a gasar Carabao Cup kwana uku kafin hakan, yayin da rahotanni daga Argentina suka nuna cewa shi da kansa ya nemi a cire shi daga cikin ƴan wasan.

9. 1 Satumba 2026Man Utd na ci gaba da tattaunawa kan ɗan wasan tsakiyar Leicester

   

   Asalin hoton, getty

   Manchester United na ci gaba da tattaunawa da Leicester City kan yiwuwar ɗaukar ɗan wasan tsakiya mai hazaƙa, Louis Page, a ranar ƙarshe ta kasuwar saye da sayar da ƴan wasa.

   United na da shakku kan ko za su iya kammala yarjejeniyar kafin rufe kasuwar musayar ƴan wasa, amma jami'an ƙungiyar na ƙoƙarin ganin an cimma nasara; ana sa ran kuɗin cinikin zai zarce fam miliyan 10 idan aka cimma yarjejeniyar.

   Sha'awar da ƙungiyar ke nunawa kan Page ta fara fitowa fili ne ta hanyar rahoton BBC Sport a watan Agusta.

   Matashin mai shekara 18 ya fara buga wa babbar ƙungiyar wasa ne a watan Agustan 2025, amma tuni ya samu gagarumar karɓuwa, inda ya buga wasa ya zuwa yanzu 25.

   Ba a san takamaiman shirin da ake da shi a kansa ba, ganin cewa United ta riga ta dauki ƴan wasan tsakiya uku, bayan bayar da fifiko kan sake gina ɓangaren tsakiyar fili a wannan bazarar.

   Youri Tielemans da Andrey Santos sun riga sun fara buga wasa, yayin da Carlos Baleba - wanda aka saya daga Brighton kan fam miliyan 70 - zai yi jinyar raunin idon sawu na tsawon makonni kaɗan masu zuwa.

10. 1 Satumba 2026Me ke faruwa a kasuwar musayar ƴanwasa?

    

    Asalin hoton, Getty Images

    Abubuwan da ke faruwa a kasuwar musayar ƴanwasa a baya-bayan nan:

    • Chelsea da Man City na tattaunawa kan cinikin Enzo Fernandez
    • Aston Villa ta ɗauki ɗanwasan baya na Southampton, Taylor Harwood-Bellis
    • Newcastle United ta sayi Matias Fernandez-Pardo daga Lille
    • Ɗanwasan gaba na Lyon, Malick Fofana ya amince ya koma Sunderland – sai dai Palace na son yi mata yankan baya
    • Aston Villa ta ɗauki ɗanwasan gefe Ibrahim Mbaye daga Paris St-Germain kan fam miliyan 47
    • Chelsea ta amince ta ɗauki ɗanwasan baya Honest Ahanor daga Atalanta
    • Ɗanwasan gaba Ilyas Ansah ya koma Hull City daga Union Berlin
    • Chelsea ta miƙa tayin fam miliyan 38.5 ga Monaco domin ɗaukar Lamine Camara
    • Everton na fafutikar sayen ɗanwasan Lyon, Ainsley Maitland-Niles

11. 1 Satumba 2026Brighton ta cimma yarjejeniyar fam miliyan 15 kan ɗan wasan Millwall, Azeez

    

    Asalin hoton, Getty Images

    Brighton ta amince da yarjejeniyar ɗaukar ɗan wasan gefe na Najeriya Femi Azeez daga Millwall.

    Ɗan wasan mai shekara 25 ya zura ƙwallaye 11 kuma ya taimaka aka ci wasu 8 a wasanni 37 a kakar wasa da ta gabata, wanda hakan ya ba shi matsayi a ƙungiyar PFA Championship ta shekara.

    Azeez yana ta ƙoƙarin komawa gasar Premier, inda Millwall ta ƙi amincewa da tayin Seagulls aƙalla sau uku a cikin ƴan makonnin nan.

    Tafiyarsa za ta zama ciniki mafi tsoka a tarihin Millwall, wanda ake sa ran za ta sami kuɗi har fam miliyan 12.5 - wanda hakan zai iya ƙaruwa zuwa sama da fam miliyan 15.

    Azeez zai zama ɗan wasa na 11 da Brighton ta saya a wannan bazarar, ciki har da cinikin da suka yi na fam miliyan 45 na ɗan wasan baya na Tottenham Luka Vuskovic.

    Seagulls sun kuma samu kuɗi mai yawa ta hanyar sayar da ƴan wasa, ciki har da komawar Carlos Baleba zuwa Manchester United kan fam miliyan 70, yayin da ake alaƙanta Liverpool da ɗan wasan gefe Yankuba Minteh.

12. 1 Satumba 2026Palace da Sunderland na fafutukar ɗaukar Fofana daga Lyon

    

    Asalin hoton, Getty Images

    Crystal Palace na ƙoƙarin katsalandan yunƙurin Sunderland na ɗauko ɗan wasan Lyon, Malick Fofana. Wannan ɗan wasan mai buga gefen fili ya riga ya amince ya koma Sunderland kan yarjejeniyar da kuɗinta ya kusa kai wa fam miliyan 30, amma Palace ta gabatar da nata tayin.

    Yanzu dai ya rage ga matashin mai shekara 21 ya yanke hukunci yayin da yake kan hanyarsa ta zuwa Ingila domin gwajin lafiya, bayan an ba shi kwantiragin shekaru biyar a filin wasa na Stadium of Light.

    Kuɗin dauko wannan ɗan wasan gaba na Belgium zai fara ne daga fam miliyan 25.6, tare da yiwuwar ƙarin fam miliyan 4.3 dangane da wasu sharudda.

    An fahimci cewa Fofana yana matuƙar sha'awar komawa Sunderland kafin su fara gasar zakarun Turai ta farko cikin shekaru 51, bayan sun samu tikitin shiga gasar Europa League, sai dai Palace ma ta samu tikitin shiga wannan gasar.

    Arsenal ma ta yi ƙoƙarin dauko Fofana, amma ƙungiyar da ta lashe gasar Premier League ta kasa cimma matsaya da Lyon kan farashin ɗan wasan.

13. 1 Satumba 2026Arteta ya shiga jerin manyan masu horaswa a tarihin Premier

    

    Asalin hoton, Getty Images

    Idan ana magana kan masu horaswa da suka yi zarra a gasar Premier ta Ingila, waɗanda ake magana a kansu su ne irin su Arsene Wenger, Sir Alex Ferguson da kuma Pep Guardiola.

    Suna daga cikin masu horaswa ƙalilan da suka jagorancin ƙungiyoyinsu buga wasa aƙalla 250 a ƙungiya ɗaya a gasar Premier, yanzu Mikel Arteta ya shiga cikin kociyoyi 10 da ke cikin wannan jeri.

    Nasarar da Arsenal ta yi da ci 1-0 a kan Aston Villa shi ne wasa na 250 da Arteta ya jagoranci Arsenal.

    Arsenal ce ƙungiya da ta fi ƙarancin ƙwallaye da aka zura mata a kakar wasa da ta gabata, inda ta lashe kofin karo na farko a cikin shekara 22.

    A tsawon kusan shekara 7 da Arteta ya yi yana horas da Arsenal ƙungiyar ta yi ƙaurin suna wajen tsaron baya.

    Baya ga shiga cikin masu horaswa da suka jagoranci ƙungiya ɗaya a wasa 250, nasarar da Arsenal ta samu kan Aston Villa ta sanya Arteta ya zama koci na huɗu da ya fi lashe wasanni a jimlace, inda masu horaswa Guardiola, Ferguson da Jurgen Klopp ne kawai suke gaba da shi.

    Mikel Arteta na da maki 60.4% na lashe wasanni a tsawon zaman shi a Arsenal.

14. 1 Satumba 2026Newcastle ta ɗauki Fernandez-Pardo daga Lille kan fam miliyan 51

    

    Asalin hoton, Getty Images

    Newcastle United ta ɗauki dan wasan gaba Matias Fernandez-Pardo daga ƙungiyar Lille kan kuɗi da ya kai fam miliyan 51.4.

    Fernandez-Pardo ya isa yankin Tyneside a daren ranar Litinin domin yin gwajin lafiya da kuma sanya hannu kan kwangilar dogon lokaci.

    Ɗan wasan mai shekara 21 ya bayyana cewa yana "matuƙar alfahari da kasancewa a irin wannan babbar ƙungiya" bayan tattaunawa da babban koci Matthias Jaissle.

    Ɗan wasan gaban ya daƊe yana cikin jerin ƴan wasan da ƙungiyar Newcastle ke son ɗauka—tun zamanin tsohon kociyan ƙungiyar, Eddie Howe.

    Ƙwarewar da yake da ita na taka leda a sassan fili daban-daban ya sa ya zama ɗan wasan da ake matuƙar sha'awar ɗauka, yayin da Jaissle ke ƙoƙarin ƙarfafa tawagarsa.

15. 1 Satumba 2026Fulham ta cimma yarjejeniyar ɗaukar Larsson da Angel

    

    Asalin hoton, Getty Images

    Fulham ta cimma yarjejeniyar ɗaukar ɗan wasan tsakiya na Eintracht Frankfurt, Hugo Larsson, kan Yuro miliyan 25, da kuma Manuel Angel daga Real Madrid kan kuɗin da ba a bayyana su ba.

    Dukkan ƴan wasan biyu sun samu izinin gudanar da gwajin lafiya.

    Angel zai zama ɗan wasa na uku da ƙungiyar ta ɗauko daga tsohuwar ƙungiyar koci Alvaro Arbeloa, bayan Gonzalo Garcia mai shekara 22 (kan fam miliyan 34) da Cesar Palacios mai shekaru 21 (kan fam miliyan 8.5).

16. 1 Satumba 2026City da Chelsea na ci gaba da tattaunawa kan Fernandez

    

    Asalin hoton, Getty Images

    Manchester City da Chelsea sun shiga matakin ƙarshe na tattaunawa kan batun cinikin Enzo Fernandez.

    Ana cewa tattaunawar kan kuɗin sayen ɗan wasan na ci gaba da samun ci gaba, inda City ke shirin amincewa da farashin da Chelsea ta ƙayyade na aƙalla fam miliyan 120.

    Haka kuma, cimma yarjejeniyar ta ƙarshe ya dogara ne kan ko Chelsea za ta samu ɗan wasan da zai maye gurbin Fernandez, inda ake duba yiwuwar ɗaukar Lamine Camara ko Manu Kone.

17. 1 Satumba 2026Barca ta kammala ɗaukar Jesus daga Arsenal

    

    Asalin hoton, Getty Images

    Barcelona ta kammala ɗaukar ɗanwasa Gabriel Jesus daga ƙungiyar Arsenal.

    BBC ta ruwaito tun farko cewa Barcelona ta ɗauki ɗanwasan ɗan asalin ƙasar Brazil ne kan kuɗi fam miliyan 8.6.

    Jesus ya rasa damar buga wasanni yadda ya kamata a Arsenal saboda yawan samun rauni da kuma kasancewar Kai Haverts da Viktor Gyokeres a matsayin waɗanda aka fi amfani da su.

    Napoli ma ta nuna sha’awar ɗaukar ɗanwasan, sai dai yanzu ta tabbata Jesus ya koma Barcelona, ƙungiyar da ta lashe La Liga a kakar da ta gabata.

    A shekarar 2022 ne Jesus ya koma Arsenal daga Manchester City, inda a tsawon zaman shi a Arsenal ya zura ƙwallo 32, ya taimaka aka ci ƙwallo sau 22 a wasa 123 da ya buga.

    Jesus ya zama ɗanwasa na uku da Barcelona ta dauka daga gasar Premier a wannan lokaci, bayan ɗaukar Anthony Gordon daga Newcastle da kuma Rodri daga Manchester City.

    Arsenal da Barcelona duk suna neman dan wasan Atletico Madrid Julian Alvarez, sai dai Atletico ta sha alwashin cewa ɗanwasan ba zai je Barca ba, yayin da ake ganin da wuya ya tafi Arsenal.

18. 1 Satumba 2026Ahanor zai koma Chelsea a kakar wasa mai zuwa bayan ya kammala zaman aro a Palace

    

    Asalin hoton, Getty Images

    Matashin ɗan wasa Honest Ahanor zai koma Chelsea a kakar wasa mai zuwa, amma ɗan wasan bayan na Atalanta zai kammala wannan kakar a matsayin aro a ƙungiyar Crystal Palace.

    Chelsea ta cimma yarjejeniyar da ta kai fam miliyan 40 kan dɗn wasan mai shekara 18, wanda ke wakiltar Italiya.

    Sai dai ba zai koma Stamford Bridge nan take ba; maimakon haka, ya fara komawa Palace ne kafin daga bisani ya zama ɗan wasan Chelsea a hukumance a lokacin bazara mai zuwa.

    "Ina matuƙar farin cikin kasancewa a nan da kuma zama cikin wannan babbar ƙungiyar," in ji Ahanor yayin da yake zantawa da shafin intanet na Crystal Palace bayan komawarsa ƙungiyar ta Eagles.

    Chelsea ta fara nuna sha'awarta kan Ahanor, mai shekara 18, a lokacin da ta ɗauki ɗan wasan baya na gefen dama Marco Palestra daga ƙungiyar ta Serie A a watan Yuli.

    A galibin lokuta yana taka leda ne a matsayin ɗan wasan baya na hagu, kuma ya koma Atalanta daga Genoa ne a kan yarjejeniyar shekara uku a lokacin bazara na bara, kan kuɗin da aka bayyana cewa ya kai Yuro miliyan 16, tare da karin Yuro miliyan 4 idan aka cika wasu sharuɗɗa.

19. 1 Satumba 2026Everton ta amince ta sake ɗaukar Grealish a matsayin aro daga Man City

    

    Asalin hoton, Getty Images

    Everton ta cimma yarjejeniyar da za ta sa Jack Grealish ya koma ƙungiyar a matsayin aro na tsawon kakar wasa ɗaya daga Manchester City.

    Ana sa ran ɗan wasan mai shekara 30 zai yi gwajin lafiya a ƙungiyar ta Toffees, kuma ana fatan kammala yarjejeniyar kafin rufe kasuwar musayar ƴan wasa ta wannan bazarar.

    Grealish ya shafe mafi yawan lokacin kakar wasan da ta gabata a Everton a ƙarƙashin irin wannan tsari, inda ya zura ƙwallaye biyu tare da bayar da ƙwallayen da aka ci guda shida a wasanni 20 da ya buga, ƙafin ya samu raunin da ya sa ya daina buga wasa har ƙarshen kakar a watan Janairu.

    Haka kuma, Everton ta cimma yarjejeniyar biyan fam miliyan 3 domin ɗaukar Ainsley Maitland-Niles daga ƙungiyar Lyon ta Faransa.

    Tsohon ɗan wasan Arsenal mai shekara 29 ya taɓa buga wa Ingila wasanni biyar, kuma yana iya taka leda a matsayin mai tsaron baya (full-back) ko kuma a tsakiyar fili.

    An danganta Grealish, wanda ke buga wasa a gefen fili a tawagar Ingila, da wasu ƙungiyoyi - ciki har da Aston Villa, ƙungiyar da ya fara buga wa ƙwallo tun yana yaro - amma ya fi son komawa Everton; ƙungiyar da babban jami'inta Angus Kinnear ya shaida wa gidan rediyon BBC Radio Merseyside cewa sun "ci gaba da tuntuɓar" Grealish.

20. 1 Satumba 2026Juventus ta amince ta ɗauki Woltemade a matsayin aro daga Newcastle

    

    Asalin hoton, Getty Images

    Juventus ta cimma yarjejeniyar ɗaukar ɗan wasan gaba na Newcastle United, Nick Woltemade, a matsayin aro na tsawon kakar wasa ɗaya.

    Ƙungiyar ta Italiya na ɗaya daga cikin ƙungiyoyi da dama na Turai da suka nuna sha'awar ɗaukar ɗan wasan mai shekaru 24 kafin rufe kasuwar musayar ƴan wasa na bazarar.

    Yanzu haka, Woltemade—wanda aka ɗauko daga Stuttgart zuwa Newcastle a watan Agustan 2025—ya tafi birnin Turin domin gwajin lafiya bayan an cimma yarjejeniyar da ta kai fam miliyan 3.5.

    Yarjejeniyar ba ta ƙunshi zaɓin mayar da cinikin ya zama na dindindin ba.

    Duk da cewa Woltemade ya shigo daga benci ne ya kuma taimaka aka zura ƙwallon da Yoane Wissa ya ci a wasan da Newcastle ta doke Tottenham Hotspur da ci 2-0 a ranar Asabar, ɗan wasan da ƙungiyar ta ɗauko kan kuɗi fam miliyan 69 ya fara wasa ɗaya ne kacal cikin wasanni uku na farko da sabon koci Matthias Jaissle ya jagoranta ya zuwa yanzu.

    Juventus na neman ɗan wasan gaba ne yayin da ake sa ran Jonathan David zai koma Atletico Madrid a matsayin aro.