Abubuwan da ke faruwa a Najeriya da sassan duniya

Rahoto kai-tsaye

Muhammad Buhari Fagge da Abdullahi Bello Diginza

1. Sa'o'i 7 da suka wuceAmurka za ta kai hari kan Dutsen Kallang na Iran

   

   Asalin hoton, AFP via Getty Images

   Shugaban Amurka Donald Trump ya shaida wa manema labarai a ranar Juma'a cewa Amurka na iya kai hari kan Dutsen Kalang da ke Iran nan ba da jimawa ba.

   Dutsen Kalang, wanda ke kusa da cibiyar tace sinadarin uranium ta Natanz, wuri ne da ke da tsauraran matakan tsaro, kuma yake ɗauke da manyan rukunin ramukan karkashin ƙasa masu zurfi ƙwarai.

   A wani ɓangare na jawabinsa, shugaban na Amurka ya ce rikicin da ake yi da Iran "ƙaramin batu ne" idan aka kwatanta da sauran manyan ƙalubalen da Amurka ta fuskanta.

   Tun da farko, Mataimakin Shugaban Amurka JD Vance ya ce a ranar Alhamis cewa ba zai bayyana rikicin da Iran da kalmar "yaƙi" ba.

   Da yake mayar da martani ga wani ɗan jarida a ranar Juma'a, wanda ya tambaye shi abin da zai faɗa wa Amurkawa game da rikicin da Iran idan ba za a kira shi yaƙi ba, Trump ya ce:

   "To, zan gaya muku cewa mutane da dama ba sa kiransa yaƙi. Ni ina kiran sa rikicin soja ne, domin a gare mu abu ne mai ƙarancin tasiri idan aka kwatanta da wasu batutuwa. Ba wani babban al'amari ba ne. Mun ɗauki mataki a Venezuela kuma muka aiwatar da shi. Ba mu yi asarar ko mutum ɗaya ba a Venezuela. Mun rasa mutane 18 a rikicin da Iran. Amma a Yaƙin Vietnam, mun yi asarar mutum 100,000."

   Trump ya yi amfani da waɗannan misalan ne domin bayyana cewa, a ra'ayinsa, rikicin da ake yi da Iran bai kai matsayin wasu manyan yaƙe-yaƙen da Amurka ta taba shiga a tarihi ba.

2. Sa'o'i 8 da suka wuceAmurka ta ƙaƙaba wa wani bankin Turkiyya takunkumi kan zargin alaƙa da Iran

   Baitulmalin Amurka ya ƙaƙaba sabbin takunkumi kan wani banki na Turkiyya bisa zargin alaƙarsa da Iran.

   Ma’aikatar ta zargi bankin Golden Global da wasu rassansa biyu da taimaka wa Iran wajen tura kuɗaɗen da ta samu daga sayar da mai daga China zuwa Turkiyya, inda daga bisani ake mayar da su tsabar kuɗi da kuma zinare.

   Washington na ƙoƙarin mayar da Iran saniyar ware a fannin tattalin arziki, yayin da yaƙin da Amurka da Isra’ila suka kaddamar a watan Fabrairu ke ci gaba da haddasa hauhawar farashin makamashi a duniya.

3. Sa'o'i 8 da suka wuceMutum 122 sun mutu a rikici tsakanin dakarun gwamnatin Yemen da mayaƙan Houthi

   Rahotanni sun ce aƙalla mutum 122 sun mutu a wani sabon rikici tsakanin dakarun gwamnati masu samun goyon bayan Saudiyya da mayaƙan Houthi a Yemen.

   Rikicin ya ɓarke ne bayan da mayaƙan Houthi suka ƙaddamar da wani hari ta ƙasa a ranar Alhamis, da nufin ƙwace ikon wasu yankunan bakin teku da ke iyaka da mashigar Bab al-Mandeb a Tekun Bahar Maliya.

   Mayaƙan Houthi masu samun goyon bayan Iran sun shafe makonni suna kai hare-hare kan jiragen ruwan dakon mai na Saudiyya da ke amfani da wannan mashigar ruwa a madadin mashigar Hormuz.

4. Sa'o'i 9 da suka wuceMuna son faɗaɗa alaƙarmu da China - Iran

   

   Asalin hoton, Mizan

   Shugaban sashen shari'a na Iran, Gholamhossein Mohseni-Ejei, wanda ya kai ziyara Indiya domin halartar taron shugabannin hukumomin shari'a na ƙasashen mambobin Ƙungiyar Haɗin Kan Shanghai (SCO), ya bayyana wa Babban Alƙalin China cewa "ƙudurin Jamhuriyar Musulunci ta Iran na faɗaɗa dangantaka da China tabbatacce ne kuma ba zai canja ba."

   Mista Ejei ya kuma ce, "Duniya na cikin wani mataki na sauyawa zuwa sabon tsarin tafiyar da harkokin duniya, kuma Jamhuriyar Jama'ar China na taka muhimmiyar rawa a wannan tsari."

   A cewarsa, an tsara gudanar da taron shugabannin hukumomin shari'a na ƙasashen SCO na bara a Iran, sai dai daga baya aka sauya wurin taron sakamakon yaƙin da ya ɓarke tsakanin Amurka da Isra'ila a gefe guda da Iran a ɗaya gefen.

5. 4 Satumba 2026Tsadar rayuwa ke sa matasan Najeriya sayar da ƙodarsu - Atiku

   

   Asalin hoton, Atiku Abubakar/Facebook

   Tsohon mataimakin shugaban Najeriya, Atiku Abubakar, ya bayyana damuwa kan rahotannin da ya ce yana samu da ke cewa wasu matasan Najeriya na sayar da ƙodarsu kan kusan naira miliyan 1.7, inda ya ce wannan na daga cikin mummunan yanayin da ƙasar ke ciki.

   A cikin wata sanarwa da ya wallafa a shafukansa na sada zumunta, Atiku ya ce halin da matasan Najeriya ke ciki ya kai matsayin da wasu ke tunanin ɗaukar matakan da ba za su taɓa tunanin ɗauka ba domin kawai su samu abin rayuwa.

   Ya ce ya samu labarai masu tayar da hankali kan yadda wasu matasa ke shiga mawuyacin hali domin neman hanyar tsira.

   Ya ce daga cikin mafi tayar da hankali akwai rahotannin da ke cewa wasu matasa na sayar da sassan jikinsu, musamman ƙoda, domin samun kuɗi.

   "Ya kamata matasa su riƙa sayar da mafarkinsu, ra'ayoyinsu da ƙirkire-ƙirkirensu, ba sassan jikinsu ba," in ji shi a sanarwar.

   Atiku ya ce idan tsadar rayuwa ta kai wani mataki da ba za a iya jurewa ba, matsanancin hali na iya sa abin da a da mutum ba zai taɓa tunanin aikatawa ba, ya yi tunanin aikatawa.

   Ya dora alhakin tashin farashin abinci, sufuri, haya, kuɗin makaranta, magunguna da wutar lantarki kan tsarin tattalin arzikin gwamnatin Shugaba Bola Ahmed Tinubu.

   Ya ce: "Lokacin da matasan Najeriya suka fara kallon ƙodarsu a matsayin a wata hanyar samun kuɗi cikin gaggawa, to ba muna magana ne kawai kan matsalar tattalin arziki ba. Muna magana ne kan matsanancin hali abin ban tsoro," in ji Atiku.

   Atiku ya ce akwai dokoki a Najeriya da suka haramta sayar da sassan jiki domin kasuwanci da fataucin gabobin jikin mutum.

6. 4 Satumba 2026Haruna Ibrahim Kakangi ya zama sabon shugaban BBC Hausa

   

   Asalin hoton, Kakangi

   Kafar yaɗa labarai ta BBC ta sanar da naɗa Haruna Ibrahim Kakangi a matsayin sabon shugaban sashen Hausa na BBC.

   Shugabar yankin Afirka na BBC, Juliet Njeri, ce ta sanar da hakan a wata sanarwa da ta fitar a ranar Juma'a.

   Ta ce naɗin ya biyo bayan tantancewa wanda aka yi har zagaye biyu ana fafatawa tsakanin masu neman matayin.

   Haruna Kakangi ya fara aiki ne a kafar DITV/Alheri Radio, sannan ya koma BBC Media Action da gidauniyar MacArthur Foundation, sannun kafar yaɗa labarai RFI kafin daga bisani ya koma sashen Hausa na BBC.

7. 4 Satumba 2026An kama dan tsohon shugaban ƙasar Sri Lanka, Mahinda Rajapaksa kan zargin rashawa

   

   Asalin hoton, Getty Images

   An kama dan tsohon shugaban ƙasar Sri Lanka, Mahinda Rajapaksa, kan zarginsa da hannu a binciken cin hanci da rashawa kan sayen jiragen sama na kamfanin Airbus a shekara ta 2013.

   An tsare Namal Rajapaksa ne bayan wani kwamitin da ke binciken zarge-zargen karɓar rashawa ya gayyace shi domin amsa tambayoyi.

   Ba a bayyana nan take irin tuhume-tuhumen da ake yi masa ba. Iyalan tsohon shugaban ƙasar sun musanta zarge-zargen cewa sun karɓi rashawa daga kamfanonin Turai dangane da sayen jiragen sama goma na kamfanin jirgin sama na kasar, wata yarjejeniya da ta buƙaci amincewar gwamnati.

8. 4 Satumba 2026'Iran na ƙoƙarin faɗaɗa alaƙa da China'

   

   Asalin hoton, Mizan

   Gholamhossein Mohseni-Ejei, shugaban ɓangaren shari’a na Iran, wanda ya ziyarci Indiya domin halartar taron shugabannin ɓangarorin shari’a na ƙasashe mambobin Ƙungiyar Haɗin Kan Shanghai (SCO), ya bayyana a wata ganawa da babban alƙalin ƙasar China cewa: “Jamhuriyar Musulunci ta Iran na da niyyar faɗaɗa alaƙar da ke tsakaninta da China.”

   Mista Ejei ya kuma ce: “Duniya na sauyawa zuwa wani sabon tsarin tafiyar da harkoki, kuma China na taka muhimmiyar rawa wajen wannan sauyi.”

   A cewarsa, an shirya gudanar da taron ƙolin ɓangaren shari’a na Kungiyar Hadin Kan Shanghai (SCO) a Iran a bara, amma aka sauya wurin gudanar da taron sakamakon yakin Amurka da Isra’ila da Iran.

9. 4 Satumba 2026Rikici tsakanin Houthi da gwamnati ya yi ajalin mutum 122 a Yemen

   

   Asalin hoton, Getty Images

   Rahotanni sun ce aƙalla mutum 122 sun mutu a wani sabon rikici tsakanin dakarun gwamnati masu samun goyon bayan Saudiyya da mayaƙan Houthi a Yemen.

   Rikicin ya ɓarke ne bayan da mayaƙan Houthi suka kaddamar da wani hari ta ƙasa a ranar Alhamis, da nufin ƙwace ikon wasu yankunan bakin teku da ke iyaka da mashigar Bab al-Mandeb a Tekun Bahar Maliya.

   Wakilin BBC ya ce Mayaƙan Houthi masu samun goyon bayan Iran sun shafe makonni suna kai hare-hare kan jiragen ruwan dakon mai na Saudiyya da ke amfani da wannan mashigar ruwa a madadin mashigar Hormuz.

   Wannan sabon rikici da ake yi a Yemen na nuna cewa dogon lokacin da aka shafe ana samun sauƙin rikicin ya kusa zuwa ƙarshe.

10. 4 Satumba 2026"Yadda muka kama mata da ba Musulmi ba da hijabi suna satar yara a Abuja"

    

    Asalin hoton, FCT POLICE COMMAND/FACEBOOK

    Rundunar ƴan sandan Najeriya ta babbar birnin tarayya, Abuja ta ce ta sake damƙe wasu mata biyu, waɗanda ake zargi da sace ƙananan yara suna sayarwa.

    Wannan dai na zuwa ne a daidai lokacin da jami'an tsaron ke ƙorafin yawaitar sace-sacen ƙananan yara a babban birnin tarayyar da ma wasu sassan ƙasar.

    An fara kama matan guda biyu ne a shekarar 2025, bisa zargin satar wasu yara huɗu cikin har da ƴan biyu, aka gurfanar da su gaban kuliya, har ma aka yanke masu hukunci, amma bayan wata huɗu sai suka fito.

    SP Josephine Ade, mai magana da yawun rundunar 'yan sandan a Abuja ta yi wa BBC bayani dangane da yadda al'amarin ya faru.

    Karanta cikakken labarin a nan: https://www.bbc.com/hausa/articles/cj9xe8wlzjjo

11. 4 Satumba 2026Har yanzu ba mu yanke shawarar tura sojoji zuwa Mashigar Hormuz ba - Korea ta Kudu

    

    Asalin hoton, Getty Images

    Ofishin shugaban ƙasar Koriya ta Kudu ya sanar cewa har yanzu ba a yanke wata shawara kan tura dakarun sojin ƙasar zuwa Mashigar Hormuz ba.

    Wannan na zuwa ne bayan wasu rahotannin kafafen yaɗa labarai da suka ce Koriya ta Kudu na shirin aikewa da sojoji zuwa wannan muhimmiyar mashigar ruwa kafin ƙarshen shekarar nan.

    Sai dai ofishin shugaban ƙasar ya bayyana a yau cewa har yanzu ana gudanar da bincike da nazari kan lamarin, kuma ba a cimma matsaya ta karshe ba.

    Koriya ta Kudu na fuskantar matsin lamba daga shugaban Amurka Donald Trump da ya nemi ƙawayen Amurka su taimaka wajen tabbatar da tsaron Mashigar Hormuz, wadda ke da matuƙar muhimmanci ga safarar mai a duniya.

    Mashigar Hormuz na ɗaya daga cikin manyan hanyoyin ruwa da ake jigilar ɗanyen mai daga yankin Tekun Fasha zuwa kasuwannin duniya, lamarin da ya sa tsaronta ke da muhimmanci ga tattalin arzikin ƙasashe masu dogaro da makamashi, ciki har da Koriya ta Kudu.

    Tsawon wane lokaci Amurka za ta iya ɗauka tana yaƙi da Iran?

    Manyan ayyuka da gwamnatin Tinubu ke iƙrarin yi a arewacin Najeriya

12. 4 Satumba 2026Mun shirya fuskantar kowane irin ƙalubale - Iran

    

    Asalin hoton, Getty Images

    Alireza Elhami, kwamandan Hedikwatar Tsaron Sararin Samaniya ta Haɗin Gwiwa ta Khatam al-Anbiya, ya ce Iran ta shirya tsaf domin fuskantar kowace irin arangama ta soja a yanzu da ma nan gaba.

    "Mun shirya kanmu domin kowace irin arangama a yau da kuma nan gaba, kuma za mu ci gaba da kasancewa cikin shiri."

    Elhami ya jaddada cewa, a mahangar Iran, barazanar ba ta ƙare ba.

    A cewarsa, sojojin kariyar sararin samaniya na rundunar sojin Iran da na IRGC sun ƙera wani sabon tsarin kariyar sararin samaniya a lokacin yaƙin baya-bayan nan, inda suka inganta shi, suka tura shi zuwa filin aiki, sannan suka yi amfani da shi.

    Ya ƙara da cewa kariyar sararin samaniyar ƙasar ta samu cikakkiyar dogaro da kai wajen samar da kayan aiki da tsarin da take buƙata, sakamakon amfani da ƙwarewar cikin gida, matasan masana kimiyya, kamfanonin fasaha masu dogaro da ilimi, jami'o'i da kuma gogewar da rundunonin sojin ƙasar suka samu a fagen aiki.

    A cewarsa, Iran yanzu tana da ikon samar da mafi yawan kayan aiki da tsarin kariyar sararin samaniya da take buƙata ta hanyar albarkatun cikin gida.

    Abu 4 da suka hana Najeriya magance matsalar garkuwa da mutane - C.G. Musa

    Manyan kamfanonin ƙasashen waje da suka fice daga Najeriya

13. 4 Satumba 2026EU ta bi sawun Amurka wajen killace tattalin arzikin Iran

    

    Asalin hoton, Getty Images

    Sakataren Baitul Malin Amurka, Scott Besant, ya ce sanarwar ministocin kuɗi da gwamnonin manyan bankunan ƙasashen G20, ta bayyana "Tarayyar Turai a hukumance ta shiga shirin killace tattalin arzikin Iran," inda ya ce Amurka "na yaba wa matsayinsu mai ƙarfi da kuma gaggawar ɗauka."

    Mista Besant ya rubuta a shafin sada zumunta na X cewa "Amurka ta yi tsayin daka tare da ƙawayenta domin tabbatar da cewa gwamnatin Iran, wadda muke kallon a matsayin mai aikata laifi, ba za ta iya amfani da tsarin kuɗi na duniya ba wajen tallafa wa burinta na nukiliya, shirye-shiryen makamai, da kuma ƙungiyoyin da take marawa baya.

    Sakataren Baitul Malin na Amurka ya jaddada cewa "Duniya na aikewa gwamnatin Iran da saƙo karara ba za mu tsaya ba har sai an yanke duk wata hanya ta ƙarshe da take samun kuɗaɗe ta cikinta."

    Kwana biyu da suka gabata, Hukumar Tarayyar Turai ta fitar da wata sanarwa a gefen taron ministocin kuɗi da gwamnonin manyan bankunan ƙasashen G20 da aka gudanar a Asheville, inda ta nuna goyon baya ga takunkumin da Amurka ta kakabawa Iran.

14. 4 Satumba 2026Abin da muka sani game da aikin ceton Nepal

    

    Asalin hoton, NEA

    An ceto ma’aikata biyu da ransu daga tashar samar da wutar lantarki ta ruwa ta Trishuli 3A a Nepal, sama da mako guda bayan wata mummunar ambaliyar ruwa ta kwatsam ta afku a yankin tsaunukan Himalaya.

    Ga abin da aka sani game da ma’aikatan da aka ceto zuwa yanzu, An bayyana sunayensu da Sanjaya Shah da Kabir Maharjan. Hukumomi sun ce an kwashe su ta jirgin sama kai tsaye zuwa wani asibiti a birnin Kathmandu.

    Dukkansu suna da raunuka a hannuwa da ƙafafuwa, waɗanda hukumomi suka ce mai yiwuwa sun samu ne sakamakon rarrafe da suka yi a cikin ramin karkashin ƙasa.

    Ana sa ran za a ceto aƙalla wasu mutum 39 da ke cikin wannan ramin bayan masu aikin ceto sun ji muryoyinsu da sanyin safiyar ranar Juma’a.

    Hotunan bidiyo masu ban tausayi sun nuna lokacin da aka fito da ma’aikatan biyu zuwa waje cikin aminci.

    Har yanzu ana fargabar cewa sama da mutum 150 sun makale a wasu wuraren tashoshin samar da wutar lantarki ta ruwa a Nepal.

    Ɗan’uwan ɗaya daga cikin waɗanda aka ceto ya ce zuciyarsa ta cika da farin ciki da jin daɗi bayan samun labarin cewa an same shi da rai.

15. 4 Satumba 2026Koriya ta Kudu na shirin tura dakarunta mashigar Hormuz

    

    Asalin hoton, Getty Images

    Kafofin yaɗa labarai na Koriya ta Kudu sun ruwaito cewa gwamnatin ƙasar na shirye-shiryen tura kayan aiki da sojoji domin tallafawa abin da ake kira “’yancin zirga-zirga a mashigin ruwa na Hormuz”, kuma tana shirin fara wannan aiki kafin ƙarshen shekarar nan.

    Kamfanin dillancin labarai na Reuters ya ruwaito a ranar Alhamis 3 ga Satumba cewa rahotannin kafafen yaɗa labaran Koriya ta Kudu, waɗanda suka ambaci majiyoyin gwamnati da na soja, sun bayyana cewa Seoul na ɗaukar matakan doka da suka dace domin samun amincewar majalisar dokoki kan wannan tura sojoji.

    Bisa ga waɗannan rahotanni, gwamnatin ta tantance shirin a taron majalisar ministoci, tana shirin miƙa buƙatar amincewa a hukumance ga majalisar dokoki a cikin wannan wata.

    Yiwuwar tura sojojin Koriya ta Kudu na zuwa ne a daidai lokacin da matsalolin tsaro a mashigin Hormuz da hare-haren da ake kai wa jiragen kasuwanci suka ƙaru a cikin makonnin baya-bayan nan. Haka kuma, wasu ƙasashe da dama suna nazarin hanyoyin da za su shiga cikin ƙoƙarin kare tsaron harkokin sufuri ta ruwa a wannan muhimmin mashigin ruwa.

    Ya zuwa yanzu, jami’an gwamnatin Koriya ta Kudu ba su fitar da wata sanarwa a hukumance ba dangane da waɗannan rahotanni.

16. 4 Satumba 2026Mun yi kuka mun kuma yi murna sosai.......

    

    Asalin hoton, Handout to BBC Nepali

    Matar ɗaya daga cikin ma’aikatan da aka ceto, Kabir Maharjan, mai suna Hirashova, ta shaida wa BBC Nepali irin farin cikin da take ciki bayan an gano mijinta da rai.

    Ta ce "Na ga hotunansa a Facebook. Na yi matuƙar farin ciki. Yanzu suna kawo shi Asibitin Sojoji da ke Kathmandu. Ni ma ina kan hanyata ta zuwa asibitin."

    Ta ƙara da cewa "Tsawon kwanaki 10 ba mu iya cin abinci ko shan ruwa yadda ya kamata ba. Mun kasance cikin tsananin fargaba. Yanzu kuma dukkanmu muna cikin farin ciki. Har ma muna kuka saboda murna."

    Maganganunta na nuna irin wahala, damuwa da tashin hankalin da iyalansu suka shiga a kwanakin da suka gabata, da kuma babban farin cikin da suka samu bayan da aka ceci Kabir da rai.

17. 4 Satumba 2026Najeriya ta musanta hannu a yunƙurin juyin mulkin Nijar

    

    Najeriya ta musanta zarge-zargen cewa ita ko ƙungiyar ƙasashen yammacin Afirka ta Ecowas sun goyi bayan wani yunƙurin juyin mulki da ake zargin an yi a ƙasar Nijar mai maƙwabtaka da ita.

    Ma’aikatar Harkokin Wajen Najeriya ta bayyana cewa zarge-zargen da ke yawo da su a shafukan sada zumunta “ba su da tushe bare makama, kuma wani yunƙuri ne na yaudarar jama’a da kuma ɓata sunan Najeriya.”

    Sanarwar ta biyo bayan zargin da wani kyaftin ɗin rundunar sojin Nijar ya yi cewa wasu gwamnatocin ƙasashen waje, ciki har da Faransa, Chadi da Côte d’Ivoire, da kuma mutanen da ke da alaƙa da hambararren shugaban ƙasar Mohamed Bazoum, sun shirya tsoma baki cikin wani rikicin da ya faru a wani sansanin soja a birnin Niamey makon da ya gabata.

    Kyaftin Roger Gabriel, kwamandan Bataliya ta Farko ta Sojojin Saman Nijar, ya kuma yi zargin cewa shugaban ƙasar Benin, Patrice Talon, ya samu amincewar Ecowas domin shiga tsakani.

    BBC ta tuntubi gwamnatoci da mutanen da aka ambata a zargin domin neman bayani.

    Faransa ta ƙi cewa komai kai tsaye, amma ta shaida wa BBC cewa duk wani matakin tura sojojinta ƙasashen waje ana yin sa ne tare da haɗin gwiwar ƙasashen abokan hulɗarta.

    Babu dai wanda ya tabbatar da wannan zarge-zargen da Kyaftin Gabriel ya yi, sannan kuma bai gabatar da wata hujja ba a bainar jama’a da za ta tabbatar da ikirarinsa ba.

    Dangantaka tsakanin Najeriya da Nijar ta yi tsami tun bayan da sojoji suka karɓi mulki a watan Yulin 2023 tare da hamɓarar da Mohamed Bazoum.

    A lokacin, Ecowas ƙarƙashin jagorancin shugaban Najeriya na wancan lokaci, Bola Ahmed Tinubu, ta yi barazanar amfani da ƙarfin soja idan gwamnatin mulkin soji ba ta dawo da tsarin mulkin dimokuraɗiyya ba. Hukumomin sojin Nijar sun yi kakkausar suka ga wannan barazana, lamarin da ya ƙara lalata dangantakar ƙasashen biyu.

    Daga baya Ecowas ta ƙaƙaba wa Nijar takunkumi, amma ƙungiyar ta cire su a shekarar 2024. Tun daga wannan lokaci Nijar ta fice daga Ecowas tare da Mali da Burkina Faso, kuma ƙasashen uku masu mulkin soja sun kafa nasu ƙawancen yankin.

    Ma’aikatar Harkokin Wajen Najeriya ta ce ƙasar ta kasance tana adawa da duk wani canjin gwamnati da ba bisa tsarin mulki ba.

    “Najeriya ba za ta taɓa goyon bayan karya doka ko sauyin gwamnati da ba bisa tsarin mulki ba a ko’ina, komai wanda yake da hannu ko ƙasar da abin ya shafa,” in ji sanarwar.

    Ta ce tuni an fayyace matsayar Najeriya a wata sanarwa da aka fitar a ranar 30 ga Agusta bayan rikicin da ya faru a sansanin soja da ke Niamey.

    “Najeriya na kallon duk wani sauyin gwamnati da ba bisa tsarin mulki ba da matuƙar damuwa. A matsayinta na maƙwabciya mai alaƙar tarihi, ‘yan’uwantaka da al’adu da Nijar, Najeriya ba ta fatan komai sai zaman lafiya, tsaro, dimokuraɗiyya da ci gaba ga Nijar, yankin da kuma Sahel baki ɗaya.”

    Ma’aikatar ta ce Najeriya na ci gaba da jajircewa wajen goyon bayan matsayar Ecowas da Tarayyar Afirka na kin amincewa da karɓar mulki ta hanyar juyin mulki.

18. 4 Satumba 2026Isra'ila ta saki 'yan ƙasar Lebanon biyar

    

    Asalin hoton, Getty Images

    Isra’ila ta sanar da cewa za ta saki ‘yan ƙasar Lebanon biyar da ta tsare a kudancin Lebanon.

    A lokaci guda kuma, jami’an Lebanon sun sanar da cewa an miƙa mutum na farko daga cikin rukunin ga rundunar sojin Lebanon.

    Rundunar sojin Lebanon ta bayyana cewa an mayar da ɗaya daga cikin waɗanda ake tsare da su zuwa ƙasar ta hanyar sasancin ta hannun Red Cross.

    Wannan shi ne sakin farko tun bayan tattaunawar watan Agusta tsakanin Beirut da Isra’ila kan sakin wasu fararen hula da aka tsare tun farkon yaƙin Isra’ila da Hezbollah a shekarar 2024.

    Ofishin Firaministan Isra’ila Benjamin Netanyahu ta cikin wata sanarwa ya ce bayan kammala bincike da tambayoyi, an tabbatar da cewa mutanen fararen hula ne, ba mambobin wata ƙungiya da Isra’ila ke ɗauka a matsayin ta’addanci ba ne, kuma ba su shiga ayyukan ta’addanci ba. Saboda haka, babu wani dalilin ci gaba da tsare su.

    Ofishin Netanyahu ya kuma ce wannan matakin ya biyo bayan wani ƙoƙari da aka yi tsakanin Isra’ila da Lebanon domin gano da kuma dawo da gawarwakin shugabannin al’ummar Yahudawan Lebanon waɗanda aka yi garkuwa da su kuma aka kashe su a shekarun 1980 lokacin yaƙin basasar Lebanon da ya ɗauki shekaru 15.

    Karanta ƙarin labari a nan:

    'Yadda na tafi Najeriya daga Spain don neman masoyin da ya yaudari mahaifiyata'

19. 4 Satumba 2026Ma'aikatan sun maƙale ne a cikin bututun na kwanaki tara

    Za mu ci gaba da kawo muku rahotannin kan yadda aikin ceto ke gudana a tashar ruwa ta 3A Hydropower da ke Trishuli.

    Hukumomi sun shaida wa BBC cewa ana sa ran za a ceto kimanin mutane 42 da suka maƙale a wurin.

    

    Asalin hoton, NEA

    

    Asalin hoton, NEA

20. 4 Satumba 2026Hotonan yadda aka ceto ma'aikatan

    

    Asalin hoton, NEA

    

    Asalin hoton, Shaktimaya Tamang/BBC Nepali