Abubuwan da ke faruwa a Najeriya da sauran sassan duniya 18/08/2026

Rahoto kai-tsaye

Daga Aisha Babangida da Haruna Kakangi

1. Sa'o'i 9 da suka wuceUAE ta sanar da dakatar da duk wata hulɗar kasuwanci da Iran

   

   Asalin hoton, Getty Images

   Hadaddiyar Daular Larabawa ta ce ta dakatar da duk wata hulɗar kasuwanci da hada-hadar kuɗi da Iran har sai baba-ɗa-gani, sakamakon ƙarin tsamin rikicin yankin.

   Ma'aikatar Harkokin Wajen UAE ta ce matakin ya biyo bayan ƙara tsananta rikicin da ke barazana ga zaman lafiya da tsaron yankin da kuma duniya.

   Sa'o'i kaɗan kafin sanarwar, Ma'aikatar Tsaron UAE ta ce ta gano makamai masu linzami kirar ballistic guda biyu da aka harbo daga Iran zuwa ƙasar. Ta ce ɗaya ya faɗi a wajen ruwanta, yayin da ɗayan ya faɗa cikin ruwanta.

   Tun bayan fara hare-haren Amurka da Isra'ila kan Iran, UAE na cikin ƙasashen yankin da suka fuskanci hare-haren Iran, amma tun bayan yarjejeniyar fahimtar juna tsakanin Washington da Tehran, ba a kai mata hare-hare ba har zuwa sabon rikicin.

2. Sa'o'i 9 da suka wuceFaransa ta kori jami’an diflomasiyyar Iran biyu

   

   Asalin hoton, Getty Images

   Faransa ta sanar da cewa za ta kori jami’an diflomasiyyar Iran biyu daga ƙasar cikin kwanaki masu zuwa, a wani mataki na mayar da martani kan takun-saƙar diflomasiyya tsakanin ƙasashen biyu.

   Ministan Harkokin Wajen Faransa, Jean-Noël Barrot, ya sanar da matakin ranar Talata, kwana guda bayan Iran ta ce ma’aikatan ofishin jakadancin Faransa biyu da ke Tehran ba za su koma ƙasar ba.

   Faransa ta zargi jami’an tsaron Iran da tsarewa da kuma cin zarafin ma’aikatan nata a Tehran a watan Yuli, tana mai cewa an keta dokar diflomasiyya.

   Iran kuwa ta ce mutanen sun shiga ayyukan da suka shafi ƙungiyoyin fararen hula, wanda ta ɗauka a matsayin tsoma baki cikin harkokin cikin gida.

3. 18 Agusta 2026UAE ta ce Iran ta harba mata makamai masu linzami biyu

   

   Asalin hoton, Getty Images

   Hadaddiyar Daular Larabawa ta ce Iran ta harba mata makamai masu linzami guda biyu.

   Ma'aikatar Tsaron ƙasar ta ce tsarin kariyar sararin samaniyarta ya gano makaman, amma babu wanda ya faɗa cikin yankin ƙasar.

   A cewar ma'aikatar, makami na farko ya faɗi a wajen ruwan da UAE ke da ikon mallaka, yayin da na biyun ya faɗa cikin ruwan yankinta.

   Zuwa yanzu, Iran ba ta yi wani bayani kan zargin ba.

4. 18 Agusta 2026Malaman da suka ajiye aiki a jami'ar KASU ba su wuce 50 ba - Gwamnatin Kaduna

   

   Asalin hoton, KASU

   Gwamnatin Jihar Kaduna ta yi ƙarin bayani kan turka-turkar da ake yi tsakaninta da malaman Jami’ar Jihar, KASU, bayan da ƙungiyar malaman jami’o’i ta ASUU ta yi iƙirarin cewa sama da malamai 200 sun ajiye aikinsu saboda rashin kyawawan yanayin aiki.

   Kwamishinan Yaɗa Labarai na jihar, Ahmed Maiyaki, ya shaida wa BBC cewa rahotannin da ASUU ke yaɗawa ba gaskiya ba ne.

   Ya ce gwamnatin jihar ta yi iya bakin ƙoƙarinta wajen biyan da dama daga cikin buƙatun malaman cikin sama da shekaru ukun da ta yi tana mulki.

   Ya ce yawan waɗanda ake cewa sun ajiye aiki bai wuce mutum 50 ba cikin shekaru ukun da gwamnatin ta yi, kuma mafi yawansu sun samu sauyin wurin aiki ne, ba wai saboda rashin jin daɗin yanayin aiki ba.

   Kwamishinan ya ƙara da cewa gwamnati na tattaunawa da malaman jami’ar domin lalubo mafita kan matsalolin da suka taso.

   Ita ma jami’ar ta KASU ta musanta iƙirarin ASUU, inda ta ce rahoton cewa malamai sama da 200 sun yi murabus ba ya cikin bayanan jami’ar.

   Shugaban jami’ar, Farfesa Abdullahi Ibrahim Musa, a wata sanarwa da ya fitar ya ƙalubalanci ASUU da ta gabatar da hujjoji da sunayen waɗanda ake zargin sun yi murabus, kwanakin da suka yi murabus da kuma dalilan da suka sa suka bar Jami'ar Jihar Kaduna.

   Za ku iya karanta cikakken bayanin da gwamnatin Kaduna da KASU suka fitar a nan.

5. 18 Agusta 2026Da a ce ni Tinubu ya tura Osun, da mun kayar da Adeleke - Wike

   

   Asalin hoton, Nyesom Wike

   Ministan Babban Birnin Tarayya Abuja, Nyesom Wike, ya ce da Shugaba Bola Tinubu ya yi amfani da cikakken ƙarfin gwamnatin tarayya wajen ganin APC ta lashe zaɓen gwamnan Osun, da ya je jihar da kansa domin taimakawa wajen kayar da Gwamna Ademola Adeleke.

   Wike ya ce sakamakon zaɓen ya nuna cewa gwamnatin tarayya ba ta yi amfani da tasirinta wajen ƙwaace zaɓen domin APC ta yi nasara ba.

   Ya ce da Tinubu ya so APC ta lashe zaɓen ko ta halin ƙaƙa, da shi ma zai je Osun, kuma da an ga bambancin sakamako.

   Ya bayyana haka ne ranar Talata bayan ya kammala duba wasu wuraren da ambaliyar ruwa ta shafa a Maitama, Abuja.

   Wike ya kuma ce ya kamata a ce Adeleke yana cikin APC ne da abubuwa sun tafi yadda ya kamata.

   A zaɓen da aka gudanar ranar 15 ga Agusta, INEC ta bayyana Adeleke, wanda ya tsaya takara a ƙarƙashin jam'iyyar Accord, a matsayin wanda ya yi nasara bayan ya lashe ƙananan hukumomi 19 daga cikin 30, yayin da ɗan takarar APC, Bola Oyebamiji, ya lashe 11.

6. 18 Agusta 2026Mun shirya gudanar da zaɓe mai kyau da inganci a Najeriya - Shugaban INEC

   

   Asalin hoton, VON

   Shugaban Hukumar Zaɓe ta Najeriya, INEC, Joash Amupitan ya ce ƴan ƙasar su kwantar da hankalinsu domin hukumar ta shirya gudanar da zaɓe mai kyau da inganci wanda babu maguɗi a cikinsa.

   Amupitan ya bayyana haka ne a yayin taron sanya hannu kan yarjejeniyar zaman lafiya tsakanin jam’iyyun siyasa da kuma ƴan takarar shugaban ƙasa da ‘yan majalisar tarayyarsu da na gwamnoni, wanda ya gudana a Abuja babban birnin ƙasar.

   Ya ce san san cewa mutane na da shakku a kan lamuran hukumarsu amma suna tabbatar da cewa za su yi komai a buɗe ba tare da rufa-rufa ba

   A yayin gabatar da maƙalarsa, ya shawarci yan siyasa da subkaucewa kalaman cin zarafi da na tun zura mutane ko kuma bata suna, wanda yana cikin maƙasudin sanya hannun da suka yi

   Kwamitin zaman lafiya na kasa ne ya jagoranci taron Wanda ya gayyaci manyan yan siyasa daga fadin kasar da shugabannin jam’iyya da yan takararsu.

7. 18 Agusta 2026ƴan takara a Najeriya sun sa hannu kan yarjejeniyar zaman lafiya a lokacin zaɓe

   Jam'iyyu da 'yan takarar shugaban ƙasa a Najeriya sun sanya hannu kan yarjejeniyar zaman lafiya ta farko a Abuja babban birnin ƙasar.

   Wanna na zuwa ne a yayin da ake shirin fara yaƙin neman zaɓen 2027.

   Yarjejeniyar ta ƙunshi alƙawarin gudanar da kamfen cikin lumana da kuma kauce wa kalaman tunzura jama'a, tashin hankali da duk wani abu da ka iya kawo cikas ga tsarin zaɓe.

   'Yan takarar da suka halarci taron sun haɗa da Peter Obi na NDC Donald Duke na PRP da Omoyele Sowore na African Action Congress, AAC.

   Shugaban INEC, Sanata Barau Jibrin da wasu manyan 'yan siyasa sun halarci taron, amma Shugaba Bola Ahmed Tinubu na APC bai halarta ba.

   Shi ma tsohon Mataimakin Shugaban Ƙasa kuma ɗan takarar ADC, Atiku Abubakar, bai halarci taron ba.

   Peter Obi ya ce bai kamata sanya hannu kan yarjejeniyar ta zama bikin kawai ba, yana mai kira ga 'yan siyasa da su tabbatar da cewa ɗabi'unsu a lokacin kamfen da bayan zaɓe sun yi daidai da abin da suka rattaba wa hannu.

8. 18 Agusta 2026Babu wata tattaunawa da Iran da ke gudana - Trump

   

   Asalin hoton, Getty Images

   Shugaba Donald Trump ya ce babu wata tattaunawa da ke gudana ko kuma aka shirya yi tsakanin Amurka da Iran.

   A wani saƙo da ya wallafa a shafinsa na Truth Social, Shugaban na Amurka ya ce: “Babu wata tattaunawa da ke gudana ko aka shirya yi da Jamhuriyar Musulunci ta Iran. Mashigar Hormuz a buɗe take kuma ana amfani da ita. An tarwatsa dukkan nakiyoyin da ke cikin teku.”

   Kafin nan, Trump ya wallafa wani hoto a shafinsa na Truth Social da ke nuna Mashigar Hormuz da wata da'ira a kanta, tare da cewa “sabon yankin Amurka.”

   Mataimakin ministan harkokin wajen Iran, Kazem Gharibabadi, ya rubuta a shafin X cewa: “Kamar yadda Donald Trump ya koyi rubuta sunan Tekun Fasha daidai, nan ba da jimawa ba za mu gyara kuskurensa game da Mashigar Hormuz.”

9. 18 Agusta 2026Kotu ta yanke wa ɗan’uwan tsohon shugaban Syria, Assad hukuncin kisa

   

   Asalin hoton, Getty Images

   Wata Kotu a Syria ta yankewa ɗanuwan tsohon shugaban ƙasar, Bashar al-Assad hukuncin kisa bayan samunsa da tafaka laifukan yaƙi da kuma cin zarafin ɗan adam.

   An kama Wassim al-Assad a watan Yuni bara.

   Mutane da dama na danganta shi da ƙungiyoyin fataucin miyagun ƙwayoyi , sai dai kotu ta ce bata same shi da laifi ba saboda rashin shaida.

   Hakuncin ya zo mako guda bayan yankewa Bashar al-Assad hukuncin kisa yayin da ya ke ci gabad a gudun hijira a Rasha.

   Ana ganin matakin a matsayin kokarin Siriya na yin adalci bayan kwashe shekaru ana gwabza rikici.

10. 18 Agusta 2026Mawuyacin halin da sojojin Amurka suka shiga yayin yaƙar Iran

    Jirgin USS Lincoln ya daɗe yana kan ruwa yayin da yake aikin yaƙi da Iran.

    Wannan tsawaitaccen aiki ya janyo damuwa game da gajiya da matsalolin ƙwaƙwalwa da sojojin da ke cikin jirgin ke fuskanta.

11. 18 Agusta 2026An kwance wani bam da ƴanbindiga suka dasa a Zamfara - Sojoji

    

    Asalin hoton, Getty Images

    Rundunar sojin Najeriya ta ce dakarunta a Arewa maso Yammacin ƙasar sun gano tare da kwance wani bam da ake zargin ƴanbindiga ne suka dasa a wani babban titin Jihar Zamfara, lamarin da ya hana afkuwar hasarar rayuka da dukiyoyi.

    A cewar rundunar, dakarun sun gano bam ɗin ne a ranar 17 ga watan Agustan 2026 a gefen hanyar Gurusu zuwa Gwashi da ke Karamar Hukumar Bukkuyum.

    Ta ƙarar da cewa, suna gano abin fashewar, sojojin suka killace yankin domin hana masu amfani da hanyar shiga cikin haɗari.

    Daga nan ne aka kira ƙwararrun masu lalata abubuwan fashewa domin gudanar da aikin.

    Rundunar ta ce masu lalata abubuwan fashewa sun samu nasarar kwance bam ɗin ba tare da wata matsala ba.

    Ta ƙara da cewa wannan nasara na nuna jajircewar dakarunta wajen tabbatar da tsaro a manyan hanyoyi da kuma hana ƴanbindiga amfani da bama-bamai wajen kai hare-hare kan fararen hula da jami’an tsaro.

12. 18 Agusta 2026Ɗaliban jami’ar ABU za su wakilci Najeriya a gasar jami’o’in duniya

    

    Asalin hoton, ABU, Zaria

    Ɗaliban jami’ar Ahmadu Bello (ABU) za su wakilci Najeriya a gasar ƙirƙire-ƙirƙire ta jami’o’in duniya ta ENACTUS da za a gudanar a birnin Sao Paulo na ƙasar Brazil

    Za a gudanar da gasar ne a watan Nuwamba, kuma sun samu wannan damar ne bayan da suka lashe gasar ta ƙasa da aka gudanar a Najeriya.

    Tawagar ENACTUS ta jami’ar ta zama zakarar Najeriya a gasar ta shekarar 2026, wadda aka gudanar a Legas daga ranar 11 zuwa 15 ga watan Agusta.

    Gasar ta haɗa ɗalibai daga jami’o’i da kwalejojin fasaha daban-daban na ƙasar.

    Nasarar ta ABU ta samu ne sakamakon wani aiki da tawagar ta gabatar kan magance matsalolin da ke addabar noman tumatur, musamman ƙwari da suke lalata tsirrai kafin girbi da kuma asarar amfanin gona bayan girbi.

    Mai ba da shawara ga tawagar, Farfesa M.K. Aliyu, ya ce nasarar ba ta rasa nasaba daga irin bincike, haɗin gwiwa da al’umma da kuma jajircewar ɗaliban.

13. 18 Agusta 2026Sojojin Najeriya sun daƙile yunƙurin garkuwa da mutane a Zamfara

    

    Asalin hoton, Getty Images

    Rundunar sojin Najeriya ta ce dakarunta a Arewa maso Yammacin ƙasar sun daƙile yunƙurin garkuwa da mutane da ƴan ta’adda suka yi a yankuna daban-daban na Jihar Zamfara, inda suka kuɓutar da fararen hula daga hannun maharan.

    A ranar 17 ga watan Agustan 2026, dakarun sun kai ɗauki bayan samun rahoton sace mutane a kan hanyar Gurusu zuwa Anka.

    Rundunar ta ce sojojin sun bi sahun maharan cikin gaggawa, lamarin da ya tilasta musu watsar da waɗanda suka yi garkuwa da su tare da tserewa.

    An ceto mutum bakwai da suka haɗa da mata huɗu da yara uku ba tare da sun samu rauni ba. Haka kuma a Karamar Hukumar Tsafe, dakarun sun mayar da martani bayan samun bayanan cewa ƴan ta’adda na ƙoƙarin yin garkuwa da matafiya a kusa da ƙauyen Magazu.

    Bayan artabu tsakanin ɓangarorin biyu, maharan sun tsere zuwa cikin daji yayin da aka kuɓutar da waɗanda suka kama.

    Wasu daga cikin waɗanda aka ceto sun samu raunukan harbin bindiga, kuma an garzaya da su asibiti domin samun kulawar likitoci. Rundunar ta ce dakarunta za su ci gaba da matsa wa ƴan ta’adda lamba domin kare rayuka da dukiyoyin jama'a a yankin.

14. 18 Agusta 2026Sojojin ruwa sun ceto mutum 22 daga hannun ƴan fashin teku a Akwa Ibom

    

    Asalin hoton, Getty Images

    Rundunar sojin ruwan Najeriya ta ce ta ceto fasinjoji 22 da ƴan fashin teku suka yi garkuwa da su tare da ƙwato wani jirgin ruwa na fasinja da aka sace a hanyar ruwa tsakanin Calabar da Ibaka a jihar Akwa Ibom.

    Rundunar ta bayyana cewa an gudanar da aikin ceton ne bayan samun rahoton harin da aka kai wa jirgin a ranar 11 ga watan Agusta.

    A cewar daraktan yaɗa labaran rundunar, Kyaftin Abiodun Folorunsho, maharan sun tare jirgin ne jim kaɗan bayan ya wuce yankin Enwang, inda suka yi awon gaba da jirgin tare da sace fasinjojin da ke cikinsa.

    Ya ce jami'an sansanin FOB Ibaka sun haɗa gwiwa da Operation Delta Safe da kuma ƴansandan ruwa domin gano waɗanda aka sace da kuma kwato jirgin.

    Rundunar ta ce an kai waɗanda aka ceto asibitin FOB Ibaka domin yi musu gwajin lafiya da ba su agajin gaggawa kafin mayar da su Calabar tare da jirgin da aka ƙwato.

15. 18 Agusta 2026Najeriya za ta kwaso ƙarin ƴan ƙasarta daga Afrika ta Kudu kan ƙyamar baƙi

    

    Asalin hoton, Getty Images

    Gwamnatin Najeriya na shirin kwaso wasu ƙarin ƴan ƙasarta 83 daga Afirka ta Kudu, yayin da ake ci gaba da nuna damuwa kan ƙaruwa da zanga-zangar ƙyamar a ƙasar.

    Ana sa ran mutanen za su isa Legas ranar Laraba, inda wasu mutane masu zaman kansu suka ɗauki nauyin tikitin dawowarsu.

    Dawowar tasu na zuwa ne a lokacin da ƙungiyoyin masu zanga-zanga ke ci gaba da neman a fitar da baƙin da ba su da takardun zama, har ma suka sanya ranar 30 ga Satumba a matsayin wa’adin da suke son su fice daga ƙasar.

    Fiye da mutum 150 ne suka gudanar da zanga-zanga a Durban, suna kira ga ƙasashen yankin kudancin Afirka su magance matsalar ƙaura ba bisa ƙa’ida ba.

    Gwamnatin Afirka ta Kudu ta ce sama da mutum 80,000 ne aka kora ko kuma suka koma ƙasashensu da kansu yayin da take tsaurara matakan kula da shige da fice.

16. 18 Agusta 2026EFCC ta gurfanar da wanda ake zargi da damfarar maniyyata aikin Hajji

    

    Asalin hoton, EFCC/Facebook

    Hukumar yaƙi da cin hanci da rashawa a Najeriya EFCC ta gurfanar da wani mutum a gaban wata babbar kotun jihar Oyo bisa zargin shi da damfarar maniyyata ikin hajji naira miliyan 56.4.

    An gurfanar da mutumin ne kan zarge-zarge 57 wadanda ke da alaƙa da fashi da kuma yaudara.

    Hukumar ta lissafo sunayen wasu mutane 10 wadanda ta ce mutumin da take zargi ya damfara.

    Bayanin shari’ar da EFCC ta shigar ya nuna cewa mutumin ya karɓi kuɗin naira miliyan 56,491,000 daga mutane daga watan Nuwamban 2022 zuwa watan Yulin 2024.

    Mutumin ya riƙa shaida wa mutanen da yake karɓar kudi daga wurin su cewa shi jami’in hukumar kula da mahajjata ne ta jihar Kaduna.

    EFCC ta ce ya karɓi kuɗaɗen a hannunsu ne bisa hujjar cewa zai taimaka musu wajen tsara tafiyarsu zuwa aikin hajjin shekarar 2023.

    Hukumar ta ƙara da cewa mutumin ya ba su rasiɗin shaidar biyan kuɗi na ƙarya daga jihar Kaduna da kuma ƙasar Saudiyya.

17. 18 Agusta 2026Iran ta ce ba za ta buɗe Hormuz ba har sai Amurka ta cika sharuɗɗan yarjejeniya

    

    Asalin hoton, Getty Images

    Kakakin Majalisar Dokokin Iran, Mohammad Baqer Qalibaf, ya sake jaddada cewa Iran ba za ta buɗe Mashigar Hormuz ba har sai Amurka ta aiwatar da dukkan sharuɗɗan da ke cikin yarjejeniyar da aka ƙulla tsakanin ƙasashen biyu.

    Qalibaf ya ce Iran na buƙatar a cire takunkumin da aka ƙaƙaba mata, a saki ƙadarorinta da aka ƙwace, a kawo ƙarshen takunkumin man fetur, tare da dakatar da duk wata barazanar soja kafin a buɗe mashigar.

    Ya kuma yi gargaɗin cewa Iran a shirye take ta mayar da martani mai tsanani idan aka sake kai mata hari.

    Kalaman nasa sun zo ne bayan jami’an Rundunar Juyin Juya Halin Iran sun bayyana irin wannan matsayi, yayin da wa’adin kwanaki 60 da yarjejeniyar ta tanada ya ƙare ba tare da cimma cikakkiyar yarjejeniyar ba.

    A nasa ɓangaren, shugaban Amurka Donald Trump ya ce ba ya sha’awar tsawaita yarjejeniyar wucin gadi da Iran.

18. 18 Agusta 2026Malaman KASU kimanin 200 ne suka bar jami'ar - ASUU

    

    Asalin hoton, Uba Sani/X

    ƙungiyar malaman jami'o'i ta Najeriya (ASUU) reshen jami'ar jihar Kaduna (KASU) ta ce malaman jami'ar kimanin 200, ciki har da furofesoshi ne suka bar jami'ar sakamakon rashin kyawun yanayin aiki da kuma rashin aiwatar da yarjejeniyar da gwamnatin tarayya ta ƙulla da ASUU a 2025.

    Shugaban ASUU-KASU, Dakta Abubakar Abdullahi, ya bayyana haka a wani taron manema labarai ranar Litinin, inda ya ce mafi yawan malaman da suka fice sun samu aiki a sabbin jami'o'i da ke ciki da wajen jihar Kaduna.

    Ya ce rashin aiwatar da yarjejeniyar, wadda ta fara aiki tun watan Janairun 2026, ya sanya malaman KASU cikin mafi ƙarancin albashi tsakanin ma'aikatan jami'o'i a Najeriya.

    ASUU ta bai wa gwamnatin jihar Kaduna da mahukuntan jami'ar wa'adin makonni biyu su fara aiwatar da yarjejeniyar, tare da gargaɗin cewa rashin yin hakan na iya jawo yajin aikin sai baba-ta-gani a jami'ar.

19. 18 Agusta 2026Kashi 40 cikin 100 ne na asibitoci suka da tsabta - MDD

    

    Asalin hoton, Getty Images

    Majalisar Ɗinkin Duniya (MDD) ta ce kashi 40 cikin 100 ne kawai na cibiyoyin kiwon lafiya a duniya ke da banɗakuna masu tsabta da sauran muhimman kayayyakin tsafta da suka dace da marasa lafiya da ma’aikatan lafiya.

    A cikin wani rahoto da Hukumar Lafiya ta Duniya (WHO) da UNICEF suka fitar, an nuna cewa kashi 11 cikin 100 na cibiyoyin kiwon lafiya ba su da wata hidimar tsafta kwata-kwata, lamarin da ke shafar kusan mutum miliyan 936 a faɗin duniya.

    Rahoton ya kuma bayyana cewa akwai babban bambanci tsakanin yankuna, inda kashi 23 cikin 100 ne kawai na asibitocin da ke yankin Afirka ta kudu da Sahara ke da ingantattun ayyukan tsafta, idan aka kwatanta da kashi 55 cikin 100 a yankunan Tsakiya da Kudancin Asiya.

    Baya ga tsafta, rahoton ya ce kashi 85 cikin 100 na cibiyoyin kiwon lafiya suna da wadataccen ruwa, amma ƙasa da kashi 60 cikin 100 ne suka cika ƙa’idojin tsaftace muhalli da hana yaɗuwar cututtuka, musamman a ƙasashe masu ƙarancin ci gaba

20. 18 Agusta 2026Iran ta musanta kai hari kan ofishin Barzani daga ƙasarta

    

    Asalin hoton, Getty Images

    Ministan Harkokin Wajen Iran Abbas Araqchi ya ce babu wata shaida da ke nuna cewa harin da aka kai kan ofishin firaministan yankin Kurdistan na Iraq, Masrour Barzani, ya fito ne daga cikin ƙasar Iran.

    Araqchi ya bayyana hakan ne a wata tattaunawa da takwaransa na Iraq, Fuad Hussein, inda ya jaddada cewa Iran ba ta da wani bayani da ke nuna harin ya samo asali daga yankinta.

    A gefe guda, Fuad Hussein ya bayyana harin a matsayin wani abu mai haɗari da ka iya yin tasiri ga tsaron Iraq da ma yankin gaba ɗaya.

    Tun da safiyar ranar Talata, Masrour Barzani ya zargi Iran da kai harin jirgin maras matuƙi kan ofishinsa da kuma gidan shugaban hukumar leƙen asirin yankin Kurdistan.

    Shi ma mai magana da yawun Ma'aikatar Harkokin Wajen Iran, Esmail Baghaei, ya yi allawadai da harin, yana mai bayyana shi a matsayin wani lamari mai matuƙar tayar da hankali da ke buƙatar bincike da taka-tsantsan.