Wannan shafi ne da ke kawo muku muhimman abubuwan da ke faruwa a duniyar wasanni daga Lahadi 15 zuwa 20 ga Fabrairu 2026
Mohammed Abdu
Asalin hoton, Getty Images
Tottenham za ta kashe kuɗi a wannan bazara domin cefanen yanwasa ciki har da ɗanwasan tsakiya na Aston Villa da Ingila Morgan Rogers. (Football Insider)
Amma ɗanwasan gaba na Tottenham Richarlison zai iya tafiya inda Flamengo da Atletico Madrid ke farautarsa. (Fichajes - in Spanish)
AC Milan na da ƙwarin guiwar ɗanwasan tsakiya na Croatia Luka Modric mai shekara 40 zai amince ya tsawaita yarjejeniyarsa zuwa shekara ɗaya. (Calciomercato - in Italian)
Asalin hoton, Getty Images
Ƙungiyar Marseille ta nada tsohon ɗan wasan Newcastle United da Aston Villa, Habib Beye a matsayin sabon kocinta, mako guda tsakani da Rennes ta sallame shi.
Marseille ta kori Roberto De Zerbi a makon da ya gabata, bayan shan kashi 5-0 a hannun Paris Saint-Germain da kuma fitar da ita da aka yi daga Champions League a kakar nan.
An kori Beye daga Rennes, sakamakon wasa hudu ba tare da nasara ba, wanda ya bar su a matsayi na shida a teburin Ligue 1 na bana.
Baye mai shekaru 48, zai fara jagorantar Marseille a wasan da za ta kara da Brest a ranar Juma’a.
Tsohon ɗan wasan tawagar Senegal, ya bar Marseille zuwa Newcastle United a 2007, inda ya buga wasa 54 a kaka biyu.
Daga baya ya koma Aston Villa a 2009 da yin karawa 18, kafin ya ya yi ritaya da taka leda a Doncaster Rovers.
Asalin hoton, Getty Images
Manchester United na nadama kan matakin amincewa ta sayar wa Barcelona Ɗanwasan gaba na Ingila Marcus Rashford kan fam miliyan 26 inda take ganin yanzu darajarsa ta kai fam miliyan 50. (Star)
Ɗanwasan baya na Bournemouth da Argentina Marcos Senesi, mai shekara 28, na son zuwa Barcelona a wannan bazara bayan yanke shawarar ba zai tsawaita kwangilar shi ba. (Teamtalk)
Ɗanwasan gaba na Ingila Liam Delap, mai shekara 23, akwai alamun zai bar Chelsea a wannan bazara matakin da ya sa Manchester United da Newcastle da Everton ke rubibinsa. (Caughtoffside)
Manchester United a shirye take ta raba gari da ɗanwasan gaba na Ingila Jadon Sancho idan an kammala kaka. (Sun)
Asalin hoton, Getty Images
Mai horar da Liverpool, Arne Slot, ya ce suna sa ran Alexander Isak zai iya komawa taka leda zuwa karshen watan Maris.
Robon da Isak ya yi wasa tun cikin watan Disamba, sakamakon karya ƙafa da yayi, wanda aka yi wa tiyata da ta kai har yanzu yana jinya.
Isak, wanda shi ne mafi tsadar ɗan wasan da Liverpool ta taɓa saya a tarihi – kan kudi fam miliyan 125 kan fara kakar bana – wasa 16 ya kacal.
Slot ya kuma bayyana cewa Jeremie Frimpong, wanda ke jinya zai iya buga wasan da Liverpool za ta yi da West Ham a karshen mako.
Asalin hoton, Getty Images
Leicester City ta daukaka kara kan hukuncin cire mata maki shida saboda karya dokokin kudi na English Football League (EFL).
Wani kwamiti mai zaman kansa ne ya samu ƙungiyar da laifi a farkon wannan wata, wanda ya sa ta yi kasa zuwa matsayi na 20 a teburin gasar Championship.
Haka kuma, Premier League, wacce tun farko ta tuhumi Leicester da karya dokokin kashe kudi daidai samu a cikin shekara uku har zuwa kakar 2023-24 a watan Mayu, ita ma ta shigar da nata daukaka kara kan hukuncin da ya ce ba za a hukunta kungiyar ba saboda jinkirin mika rahoton asusun kudi na shekara-shekara.
Asalin hoton, Getty Images
Real Madrid ta bai wa hukumar ƙwallon ƙafa ta Turai, wato UEFA, hujjoji dangane da zargin da ɗan wasanta Vinicius Jr ya yi cewa ɗan ƙwallon Benfica, Gianluca Prestianni, ya yi masa kalaman wariyar launin fata a wasan da suka yi a ranar Talata.
Real Madrid ce ta yi nasarar cin 1-0 a gidan ƙungiyar Portugal a karawar farko ta cike gurbin neman shiga zagaye na biyu a Champions League.
An dakatar da wasan na tsawon mintuna 11 bayan da Vinicius ya zargi Prestianni da furta kalmar batanci, jim kaɗan bayan da dan wasan tawagar Brazil ya zura kwallo a zagaye na biyu a fafatawar.
Prestianni ya musanta zargin, yana cewa Vinicius “ya fahimci abin da ya yi imanin ya ji ba daidai ba,” yayin da Benfica ta bayyana cewa tana goyon bayan ɗan wasanta.
Tuni dai UEFA ta naɗa kwamitin bincike domin fayyace abin da ya faru.
Ana sa ran Benfica za ta je Sifaniya, domin buga wasa na biyu a Champions League ranar
Asalin hoton, Getty Images
Leicester City mai fama da kalubale a Championship a bana ta bai wa tsohon ɗan wasanta, Gary Roett aikin sabon kociyanta.
Mai shekara 51, wanda Oxford ta kora a wata biyu baya, har ya fara atisaye da ƴan wasa a ranar Laraba.
Kenan Rowett ne zai maye gurbin Marti Cifuentes, wanda aka sallama mako ukun da ya gabata.
Kawo yanzu Leicester City tana ta ukun kashe a teburin Championship mai bukatar maki 14 ta bar matakin da take.
Asalin hoton, Getty Images
Ɗanwasan gaba na Al-Ahli da Ingila Ivan Toney ya buɗe ƙofarsa ta son komawa taka leda a gasar Premier. (Sky Sports)
Liverpool ba ta son sayar da Dominik Szoboszlai duk da alaƙanta ɗanwasan na tsakiya da Real Madrid, amma tana ci gaba da tattaunawa da shi domin sabunta kwangilar shi. (Teamtalk)
Ɗanwasan gaba na Jamus Nick Woltemade ba ya jin daɗin zamansa a Newcastle kuma ɗanwasan mai shekara 24 na son ya koma taka leda a Stuttgart ko Bayern Munich. (Bild - in German)
Manchester United ba ta son rage farashin da ta saka kan ɗanwasan gaba na Ingila Marcus Rashford, wanda ke murza leda a matsayin aro a Barcelona. (Mail)
Asalin hoton, Getty Images
Manny Pacquiao ya tabbatar zai dambata da tsohon zakaran duniya ajin junior welterweight, Ruslan Provodnikov a Las Vegas ranar 18 ga Afrilu.
Karo na biyu da zai yi damben boksin tun bayan dawowarsa daga ritaya a bara, bayan tsawon shekaru huɗu.
Pacquiao mai shekaru 47 ya yi wasa na ƙarshe a watan Yuli da zakaran kambun WBC, Mario Barrios, inda suka tashi damben canjaras.
Tiger Woods, wanda har yanzu ke murmurewa daga tiyatar ciwon baya da aka yi masa a watan Oktoban bara, har yanzu ba shi da takamaiman ranar dawowa wasa.
Sai dai ya bayyana cewa bai bai fitar da rai zai buga gasar Masters ba ta kakar nan.
Woods, yayi wannan kalaman kafin gasar Genesis Invitational a birnin California - an tambaye shi ko zai iya buga gasar Masters da za a fara daga 9 zuwa 12 ga watan Afrilu - sai ya ce yana fatan za a fafata da shi.
Asalin hoton, Getty Images
Ƙungiyar magoya bayan Tottenham ta yi maraba da sallamar Thomas Frank, amma ta yi kira ga mahukunta da su ɗauki matakai kan barazanar faduwa daga gasar Premier League da muhimmanci.
Tottenham ta kawo ƙarshen wata bakwai da Frank ya ja ragamar ƙungiyar, bayan rashin nasara 2-1 a gida a hannun Newcastle United, wanda ta yi nasar biyu a cikin wasa 17 a Premier League, kuma ya bar ƙungiyar tana da maki biyar tsakaninta da ƴan ukun karshen teburin kakar bana.
Kungiyar magoya bayan ta tambayi dalilin da ya sa aka dauki dogon lokacin kafin a sallami Frank - ta kuma bayar da shawarar cewar ya kamata a ɗauki tsari mai dogon zango domin mayar da ƙungiyar kan ganiya.
Asalin hoton, Getty Images
Real Madrid ta je ta ci Benfica 1-0 a wasan farko a neman gurbin shiga zagaye na biyu a Champions League da suka fafata a Portugal ranar Talata.
Karawar ta ci karo da cikas, bayan da aka ta yi wa Vinicius Junior na Real Madrid kalaman wariya da ta kai an samu tsaikon minti 10 daga baya aka ci gaba da taka leda.
Sauran sakamakon wasannin da aka buga Monaco ta yi Rashin nasara 3-2 a gida a hannun Paris St Germain, Borussia Dortmund ta doke Atalanta 2-0 a Jamus da wanda Galatasaray ta ragargaji Juventus da cin 5-2.
Ci gaban wasannin Champions League ranar Laraba:
Asalin hoton, Getty Images
Sunderland na son sayen ɗanwasan gaba domin maye gurgin ɗanwasan Faransa Wilson Isidor, da ke son raba gari da ƙungiyar. (Football Insider)
Atletico Madrid na son ɗanwasan gaba na Argentina Julian Alvarez ya sabunta yarjejeniyar shi amma ɗanwasan mai shekara 26 ya fi son ya koma Barcelona. (Sport - in Spanish)
Tottenham da Crystal Palace da West Ham na cikin ƙungiyoyin da ke hamayya kan ɗanwasan baya na Real Madrid mai shekara 32 Antonio Rudiger a wannan bazara (Fichajes - in Spanish)
Chelsea na farautar ɗanwasan baya na Nottingham Forest da Brazil Murillo amma sai Chelsea ta biya fam miliyan 70. (Caught Offside)
Asalin hoton, Getty Images
Mikel Arteta ya tabbar da cewar Riccardo Calafiori na cikin koshin lafiya domin fuskantar Wolverhampton a gasar Premier ranar Laraba.
Ya zama ɗan wasan ƙungiyar na baya bayan nan da ya ji rauni lokacin motsa jiki kafin fuskantar abokiyar karawa.
An tsara cewar Calafiori mai tsaron bayan tawagar Italiya, zai buga wasan FA Cup da Wigan ranar Lahadi, amma sai ya ji rauni da ta kai bai yi fafatawarr ba.
Wannan ne karo na huɗu da ɗan wasan Arsenal ya ji rauni lokacin motsa jiki kafin wasa a wannan kakar.
William Saliba ya gurɗa kafa kafin fara wasa da Liverpool a watan Satumba, Bukayo Saka ya hakura da karawar da Arsenal ta yi da Leeds a watan Janairu, sannan Calafiori ma ya taɓa samun rauni a lokacin motsa jikin kafin fuskantar Brighton a watan Disamba.
Koci Mikel Arteta ya ce za su ci gaba da bincike kan musabbabin raunuka da ƴan kwallon Arsenal ke ji lokacin motsa jiki kan fara wasa, domin hakan zai iya kawo cikas a fatan lashe kofuna a kakar nan.
Asalin hoton, Getty Images
Za a buga wasa daya a Premier League mako na 27 ranar Laraba, inda Arsenal ta ziyarci Wolverhampton a Molinuex - a wasan farko da suka fuskanci juna a cikin watan Disamba, Gunners ce ta yi nasara 2-1 a Emirates.
Arsenal tana matakin farko a kan teburi, ita kuwa Wolverhampton tana ta karshe.
Gunners ta lashe dukkan wasa 14 da ta yi da ƴan kasan teburi da cin ƙwallo 40 aka zura mata hudu a raga.
Haka kuma ƙungiyar Emirates ta cinye dukkan wasa takwas da ta yi ranar Laraba a kowacce gasa a kakar nan.
Tun farko an tsara yin wasan ranar Asabar 21 ga watan Maris, to sai dai Arsenal za ta fuskanci Manchester City a wasan karshe a Carabao Cup, shi yasa za su buga wasan a ranar Laraba.
Da zarar Arsenal ta ci Wolverhamton za ta kara tazarar maki tsakaninta da Manchester City ta biyun teburi zai koma bakwai.
Asalin hoton, Getty Images
Ɗan wasan Benfica, Gianluca Prestianni, ya musanta zargin ya ci zarafin Vinicius Junior a wasan Champions League da suka buga ranar Talata.
UEFA ta kaddamar da bincike bayan da Vinicius, mai shekaru 25, ya kai rahoton zargin cin zarafinsa da Prestianni ya yi a wasan da Real Madrid ta ci Benfica 1-0 a Lisbon.
Sai da alkalin wasa, Francois Letexier ya dakatar da karawar tsawon minti 10 daga baya komai ya daidaita aka ci gaba da fafatawar.
Tun a baya ɗan wasan tawagar Brazil ya sha fuskantar kalaman wariya da cin zarafi a filaye da yawa.
Benfica za ta je Real Madrid ranar Laraba 25 ga watan Fabrairu, domin buga wasa na biyu a neman cike gurbin neman kai wa zagaye na biyu a Champions League
Asalin hoton, Getty Images
Sabon kocin riƙon ƙwarya na Tottenham, Igor Tudor, ya ce babu lokacin neman uzuri, yayin da yake kokarin mayar da ƙungiyar kan ganiya, wadda ke fama da kalubale a Premier League..
An naɗa tsohon kocin Juventus a matsayin wanda ya maye gurbin Thomas Frank wanda aka kora a makon da ya gabata.
Tottenham tana da tazarar maki biyar tsakaninta da ƴan ukun karshen teburin Premier League, kuma saura wasa 12 a kammala kakar bana.
Tottenham, wadda take mawuyacin hali tana da ƴanƙwallo 11 da ke jinya.
An dakatar da babban jami’in gudanarwa na Juventus, Damien Comolli daga shiga sabgogin tamaula har zuwa ranar 31 ga watan Maris, saboda halaye marasa ƙyau ga alkalin wasa a karawar da suka sha kashi a hannun Inter Milan ranar Asabar.
An samu Comolli da laifi sakamakon kalubalantar alkalin wasa, Federico La Penna a lokacin da za su je daɗin hutawa bayan kammala zagayen farko da yi masa barazana.
Shima daraktan Juventus, Giorgio Chiellini an dakatar da shi har zuwa 27 ga Fabrairu, saboda rashin girmama La Penna da yi masa kalaman ɓatanci da mataimakan alkalin wasan.
Wannan matakin ladabtarwa ya biyo bayan jan katin da aka bai wa mai tsaron bayan Juventus, Pierre Kalulu, hakan ne ya fusata ƙungiyar da kalubalantar alkalin wasan.
An kori Kalulu ne jim kaɗan kafin hutun rabin lokaci bayan ya samu katin gargaɗi na biyu, saboda ketar da ya yi wa wasan Inter, Alessandro Bastoni.
Inter ta yi nasara da ci 3-2, kuma tana jagorantar teburin Serie A da maki 61, yayin da Juventus ke matsayi na biyar da maki 46 daga wasa 25.
Mai tsara alkalai da ke busa gasar Serie A, Gianluca Rocchi, ya nemi afuwa ranar Lahadi, yana mai cewa hukuncin da La Penna ya yanke na korar Kalulu kuskurene tare da bayyana takaici cewa VAR ba ta da ikon shiga cikin lamuran kati na biyu.
Asalin hoton, Getty Images
Wakilin Jurgen Klopp ya bayyana cewa Manchester United da Chelsea sun yi kokarin tuntubar tsohon kocin Liverpool bayan da ya bar Anfield.
Marc Kosicke ya kuma sanar a wata hira da Transfermarkt cewa ɗan kasar Jamus mai shekaru 58 ya samu damar jan ragamar tawagar Ingila, bayan da ya bar Liverpool a karshen kakar 2023-24.
Sai dai rahotanni sun nuna cewa Manchester United da Chelsea sun musanta zargin cewa sun taɓa tuntuɓar Klopp, kai tsaye ko ta hannun wani wakilinsa.
Tsohon kocin Mainz da Borussia Dortmund ya shafe shekaru tara a Liverpool kafin ya karɓi mukaminsa na yanzu a matsayin shugaban harkokin ƙwallon kafa na kamfanin Red Bull.
Asalin hoton, Getty Images
An raba jadawalin zagayen kwata fainals a Champions League na Afirka ranar Talata a birnin Alkhahira a Masar.
Zagayen kwata fainals:
Duk ƙungiyar farko za ta fara wasa a gida daga 13 zuwa 15 ga watan Maris, sai wasa na biyu ranar 22 ga watan Maris.
