KAI TSAYE, Labaran wasannin BBC Hausa daga 17 zuwa 23 Agusta

Wannan shafi na kawo muku labaran wasanni ne daga sassan duniya, kasuwar musayar 'yan wasa da kuma manyan sauye-sauyen da ke faruwa a fagen

Taƙaitattu

Ƙungiyoyi 5 da za su ɗauki hankali a Gasar Premier ta bana
Yadda tawagar ƙwallon mata ta Afghanistan ta yi nasara kan tsaurin Taliban
Barcelona da Atletico na rububin Ounahi, Juventus ta haƙura da Martinez
Vicario zai tafi wasan aro daga Tottenham zuwa Juventus
Barcelona za ta biya £65m kuɗin Rodri daga Man City
Mun fi ƙoƙari idan duniya na adawa da mu - Dan Burn
Me yasa magoya bayan Chelsea ke yi wa Enzo ihu?

Rahoto kai-tsaye

Muhammad Buhari Fagge

18 Agusta 2026Jamal Musiala ya sake faduwa a fili karo na biyu a kwana huɗu
Asalin hoton, Getty Images
Bayern Munich ta bayyana cewa Jamal Musiala zai yi magana da kansa bayan da ɗan wasan tsakiyar Jamus ya faɗi a fili yayin wasa karo na biyu cikin kwanaki huɗu.
A ranar Talata, Musiala ya faɗi mintuna shida kacal bayan da ya shiga fili daga benci, a wasan sada zumunta da Bayern Munich ta doke Heidenheim da ci 4-2.
Ɗan wasan mai shekaru 23 ya bayyana kamar yana cikin ruɗani yayin da ma’aikatan lafiya suka ba shi kulawa kafin daga bisani aka taimaka masa wajen fita daga filin wasan.
Lamarin ya faru ne bayan ya kuma faɗi a wasan sada zumunta da Bayern ta doke RB Leipzig 3-1 a Munich ranar Asabar.
Da yake magana ranar Talata, daraktan wasanni na Bayern Munich, Max Eberl, ya ce:
"Jamal zai yi magana game da wannan nan ba da jimawa ba. Mun san abin da ya faru kuma muna da cikakken bayani kan halin da ake ciki."
"Jamal zai yi magana da kansa. Yana cikin ɗakin canza kaya a yanzu, yana shirin canzawa da yin wanka."
An yi zaton cewa tsananin zafi ya taka rawa a faɗuwar da Musiala ya yi ranar Asabar, inda yanayin zafin ya haura digiri 30 na Celsius.
Musiala ya rasa watanni shida na farkon kakar wasan da ta gabata bayan ya karya ƙafarsa a gasar Kofin Duniya na Kungiyoyi ta 2025. Sai dai ya dawo taka leda a rabin na biyu na kakar, sannan ya fara wasa a uku cikin wasanni huɗu da Jamus ta buga a Kofin Duniya na 2026.
Har yanzu Bayern Munich ba ta bayyana cikakken bayani kan musabbabin faɗuwar Musiala ba, amma ana sa ran ɗan wasan zai yi karin haske game da lamarin nan gaba kaɗan.
18 Agusta 2026Ana tattaunawa kan Wan-Bissaka tsakanin West Ham da Aston Villa
Asalin hoton, Getty Images
Ana ci gaba da tattaunawa tsakanin Aston Villa da West Ham United kan yiwuwar ɗaukar ɗan wasan baya Aaron Wan-Bissaka.
Aston Villa na shirin sayar da ɗan wasan baya na dama Kosta Nedeljkovic zuwa ƙungiyar Rangers.
Wan-Bissaka ne babban zaɓin da Villa ke son ɗauka domin maye gurbinsa, kuma rahotanni sun nuna cewa Villa Park ne mafi kusancin wurin da ɗan wasan zai koma idan aka cimma yarjejeniya.
Ɗan wasan mai shekaru 28 ya taka rawar gani a West Ham tun bayan komawarsa daga Manchester United, kuma ƙwarewarsa wajen kare kai da kai hare-hare daga gefen dama ya sa Aston Villa ke ganin zai iya ƙara ƙarfi ga tawagarta.
Har yanzu tattaunawar na gudana tsakanin ɓangarorin biyu, yayin da Aston Villa ke ƙoƙarin kammala cinikin domin ƙarfafa tawagarta kafin rufe kasuwar saye da sayar da 'yan wasa.
18 Agusta 2026Senegal ta naɗa Patrick Vieira a matsayin sabon kocinta
Asalin hoton, Getty Images
Tsohon kyaftin ɗin Arsenal da Faransa, Patrick Vieira, an naɗa shi a matsayin sabon babban kocin ƙungiyar ƙwallon ƙafa ta maza ta ƙasar Senegal.
Vieira mai shekaru 50 ya maye gurbin Pape Thiaw, wanda aka kora daga aiki bayan ficewar Senegal daga gasar Kofin Duniya ta FIFA 2026 a matakin 'yan 32.
An haifi Vieira ne a Dakar, babban birnin Senegal, kuma yanzu zai jagoranci ƙasar da aka haife shi. Ya koma Faransa yana da shekara takwas, inda daga baya ya wakilci tawagar ƙasar Faransa fiye da sau 100, ya kuma lashe Kofin Duniya na 1998 da kuma Euro 2000.
Hukumar Ƙwallon Ƙafa ta Senegal FSF ta ce naɗin nasa yana ya yi daidai da manufofin wasanni na ƙasar.
Har yanzu ana tattauna cikakkun bayanan kwantiraginsa da kuma ranar da zai fara aiki a hukumance.
Ana sa ran wasanninsa na farko tare da Teranga Lions za su kasance a watan gobe, a wasannin neman gurbin shiga gasar cin kofin Afirka ta 2027 AFCON.
Vieira ya zo Senegal ne bayan ya bar aikinsa na kocin Genoa bisa amincewar juna a watan Nuwamban bara, lokacin da ƙungiyar ke kasan teburin Serie A.
A kakar wasa ta 2024-25, ya yi nasara a wasanni takwas sannan ya yi canjaras tara daga cikin wasanni 26, wanda ya taimaka wa Genoa ta tsira daga faɗuwa tare da kammala kakar a matsayi na 13.
Sai dai ya bar ƙungiyar bayan samun nasara biyu kacal a kakar 2025-26, kuma dukkansu a gasar Coppa Italia ne.
Kafin hakan, ya horar da New York City FC, Nice, Crystal Palace da kuma RC Strasbourg.
A Crystal Palace, ya jagoranci ƙungiyar zuwa matsayi na 12 a Premier League tare da isa wasan kusa da na ƙarshe na FA Cup a kakar 2021-22, kafin a kore shi a watan Maris na 2023 bayan wasanni 12 ba tare da nasara ba.
18 Agusta 2026Mark Zuckerberg, Jeff Bezos me Amazon sun sayi kashi 40 na Liverpool
Asalin hoton, Getty Images
Wata ƙungiyar masu zuba jari da ta haɗa da wanda ya kafa Amazon, Jeff Bezos, ta sayi kusan kashi 40% na hannun jarin Liverpool daga Fenway Sports Group.
Da farko an ruwaito cewa kamfanin 1892 Holdings ya sayi kusan kashi ɗaya bisa uku na kulob ɗin, amma kamar yadda jaridar The Athletic ta bayyana, a zahiri adadin ya kai kusan kashi 38%.
Har ila yau, ƙungiyar masu zuba jarin tana da zaɓin sayen rinjayen hannun jarin Liverpool cikin watanni 12 masu zuwa, duk da cewa babu wata yarjejeniya ta tilas da ke tabbatar da hakan a yanzu.
A cikin wata sanarwa da ta fitar ranar Juma'a, FSG ta tabbatar da cewa ta cimma “yarjejeniya ta ƙarshe” kan sayar da wani muhimmin kaso na hannun jari marar rinjaye ga 1892 Holdings.
Ƙungiyar, wadda aka sanya wa suna bisa shekarar da aka kafa Liverpool wato 1892, na ƙarƙashin jagorancin attajirin ɗan kasuwa ɗan asalin Birtaniya da Indiya, Amit Bhatia. Haka kuma ta haɗa da Jeff Bezos da kuma attajirin da ya kafa Facebook tare da Mark Zuckerberg, Eduardo Saverin.
Bhatia zai zama mataimakin shugaban Liverpool, sannan zai shiga sabon kwamitin gudanarwar kulob ɗin da aka fadada, idan hukumomin da suka dace suka amince da hakan.
Bhatia surukin fitaccen attajirin ɗan kasuwar Indiya Lakshmi Mittal ne. Ya shafe shekaru 18 a matsayin darakta kuma mai hannun jari a kulob ɗin Queens Park Rangers (QPR) kafin ya sayar da hannun jarinsa a watan da ya gabata.
Ana sa ran wannan yarjejeniya ta kimanta darajar Liverpool tsakanin fam biliyan biyar zuwa fam biliyan shida.
18 Agusta 2026Ko cinikin Enzo da City zai zama irin na Alexander Isak da Liverpool?
Asalin hoton, Getty Images
Rahoton cewa cinikin Alexander Isak na fam miliyan 125 zuwa Liverpool ya mamaye kasuwar saye da sayar da 'yan wasa ta bazarar bara, kuma akwai alamun cewa yunƙurin Manchester City na ɗaukar Enzo Fernandez zai iya bin irin wannan hanya.
Chelsea ta cimma yarjejeniya da wakilin ɗan wasan tsakiya na Argentina, Javier Pastore, a ƙarshen watan Mayu cewa Fernandez zai iya barin kulob ɗin kan kuɗin fam miliyan 120, amma ta sanya ranar 14 ga Agusta a matsayin wa'adin karɓar tayi.
Yanzu da wa'adin ranar Juma'ar da ta gabata ya wuce ba tare da wata tayi ta hukuma ba, Chelsea ta sanar da tawagar Fernandez cewa ɗan wasan ba na sayarwa ba ne a wannan kasuwar musayar 'yan wasa.
Sai dai, kamar yadda aka gani a saga ɗin Isak a bara, abubuwa ba su da sauƙi haka. Dan wasan gaba na Sweden ya kammala komawarsa Liverpool a ranar ƙarshe ta kasuwar musayar 'yan wasa, duk da cewa Newcastle United ta shafe makonni tana jaddada cewa ba za ta sayar da shi ba.
Shekara guda bayan haka, rashin tabbas kan makomar Fernandez bai ƙare ba.
Manchester City, wadda tsohon kocin Fernandez a Chelsea, Enzo Maresca, ke jagoranta, har yanzu tana da ƙwarin gwiwar ɗaukar ɗan wasan mai shekaru 25, kuma tana ganin Chelsea har yanzu tana sha'awar kulla yarjejeniya.
Manchester City, wadda kuma ke tattaunawa a mataki na gaba kan yarjejeniyar fam miliyan 85 domin ɗaukar ɗan wasan tsakiya na Morocco Ayyoub Bouaddi, na son ƙarfafa tsakiyar fili bayan Rodri ya amince da komawa Barcelona, yayin da Bernardo Silva ya bar kulob ɗin bayan ƙarewar kwantiraginsa.
18 Agusta 2026Rodri ya koma Barcelona zuwa 2030
Asalin hoton, Getty Images
Dan wasan tsakiya na kasar Sifaniya, Rodri, ya bayyana cewa bugawa Barcelona wasa wani babban buri ne a gare shi bayan ya isa birnin domin kammala komawarsa daga Manchester City.
Barcelona ta amince za ta biya Manchester City kusan fam miliyan 65 domin sayen dan wasan mai shekaru 30, wanda ake sa ran zai sanya hannu kan kwantiragin shekara hudu da zakarun gasar La Liga.
Da yake magana da 'yan jarida a filin jirgin sama ranar Litinin, Rodri ya ce: "Ina matukar farin ciki da zuwa nan. Kwanakin baya sun kasance masu cike da abubuwa, amma ina farin cikin ganin an kammala komai. Tabbas, yin wasa a FC Barcelona buri ne a gare ni."
Ya kara da cewa yana marmarin haduwa da sabbin abokan wasa, musamman waɗanda ya taɓa wasa da su a tawagar kasarsu Sifaniya.
"Ba zan iya jira in hadu da abokan wasana ba, da dama daga cikinsu na riga na san su daga tawagar kasa. Lokaci ya yi domin aiki tare kuma in in yi iya kokarina."
Rodri ya kuma bayyana cewa burinsa shi ne ya taimaka wa Barcelona wajen lashe gasar zakarun Turai ta Champions League da sauran kofunan da za su fafata a kansu.
Dan wasan, wanda ya lashe kyautar Ballon d'Or ta 2024, ya buga wasanni 298 a cikin shekaru bakwai da ya yi a Manchester City bayan ya koma kungiyar daga Atletico Madrid a shekarar 2019 kan kudin da ya kasance tarihin kungiyar a lokacin, kusan fam miliyan 62.8.
18 Agusta 2026Real Sociedad na son ɗaukar Alvarez daga West Ham
Asalin hoton, Getty Images
Rahotanni sun nuna cewa kulob ɗin Real Sociedad La Liga yana duba sharuɗɗan da za su ba ta damar kulla yarjejeniya domin ɗaukar ɗan wasan ƙasar Mexico.
An kuma fahimci cewa sha’awar da Ajax ke nuna wa Álvarez mai shekaru 28 ta ragu a wannan watan.
Álvarez yana da saura shekara biyu a kwantiraginsa da West Ham United.
Idan cinikin ya tabbata, zai kasance wata muhimmiyar ƙara ga tawagar Real Sociedad, wadda ke neman ƙarfafa yankin tsakiya kafin fara sabowar kakar wasanni.
18 Agusta 2026Newcastle ta ɗauki Amar Dedić daga Benfica
Asalin hoton, Getty Images
Ɗan wasan ƙasar Bosniya da Herzegovina Amar Dedić ya koma kulob ɗin ne kan kwantiragin shekaru biyar bayan ya yi gwajin lafiya a yankin Tyneside ranar Litinin.
Ya sake haɗuwa da kocinsa Matthias Jaissle, wanda tare da shi suka lashe kambun gasar Austrian League a Red Bull Salzburg a shekarar 2023.
Da yake magana bayan sanar da komawar tasa a ranar Talata, wadda kuma ita ce ranar cikar sa shekaru 24 a duniya, dan wasan ya ce "Jin daɗi ne na musamman kuma babban abin alfahari a gare ni na shiga Newcastle United.
Ina matuƙar farin cikin kasancewa a nan, kuma na ƙagu na fara buga wa kulob ɗin da kuma magoya bayan sa masu ban mamaki wasa. Sake yin aiki tare da Matthias ya kasance babbar hujja a gare ni. Mun san juna sosai. Ya san abin da zan iya bayarwa a fili, kuma ina farin cikin sake ci gaba da wasa ƙarƙashin jagorancin sa.
Yin wasa a gasar Firimiya ta Ingila a filin wasa na St James' Park zai zama wani abu na musamman ƙwarai. Kowane wasa yana kama da babban biki, tare da yanayi mai kayatarwa. Ina ɗaukin fara wasa."
Newcastle na neman sabon ɗan wasan baya na dama tun bayan tafiyar tsohon ɗan wasanta Kieran Trippier, wanda ya koma Wolverhampton Wanderers kyauta bayan kwantiragin sa ya ƙare a farkon wannan bazarar.
18 Agusta 2026Chelsea ta ƙayyade kuɗin da za ta sayar da Neto
Asalin hoton, Getty Images
Chelsea ta yi wa dan wasanta na gaba Pedro Neto kudi da ya kai fam miliyan 100, yayin da kulob ɗin Al Hilal na Saudiyya ke nuna sha’awar ɗaukar dan wasan.
Kulob ɗin na Saudiyya na daga cikin ƙungiyoyi da dama da ke zawarcin ɗan wasan gefe, wanda ya koma Chelsea daga Wolves kan kuɗin fam miliyan 54 shekaru biyu da suka gabata.
Neto ya fara wasa tare da João Pedro da Cole Palmer a wasan Chelsea lokacin da suka doke Real Sociedad da ci 3-1 a wasan sada zumunta a ƙarshen makon da ya gabata.
Chelsea dai na da matasan 'yan wasa da dama, wanda hakan ka iya zama dalilinta na rabuwa da wasu daga cikin 'yan wasanta.
17 Agusta 2026Coventry ta dauki Awoniyi daga Forest fam miliyan 9
Asalin hoton, Getty Images
Coventry City ta kammala ɗaukar ɗan wasan gaba na Najeriya Taiwo Awoniyi daga Nottingham Forest kan kuɗin fam miliyan 9.
Ɗan wasan mai shekaru 29 ya koma Coventry kafin wasan buɗe kakar Premier League da za su yi da zakarun gasar Arsenal ranar Juma’a, yayin da kulob ɗin ya koma gasar ta matakin farko bayan shekaru 25 da rashin halarta.
Awoniyi ya samu gaisuwar ban girma (guard of honour) daga ‘yan wasan da ma’aikatan Forest kafin fara rabin na biyu na wasan sada zumunta na ƙarshe da suka buga da Brest ranar Lahadi. Hakan ya ba shi damar yin bankwana da magoya baya a filin City Ground, inda ya shafe shekaru huɗu da suka gabata.
Kocin Forest, Oliver Glasner, ya ce bayan nasarar da suka samu da ci 2-0 a kan ƙungiyar ta Ligue 1:
"Tabbas yana cikin mafi kyawun mutane da na taɓa haɗuwa da su. Kullum yana da kirki, yana murmushi."
Ya ƙara da cewa:"Kowa a cikin kulob ɗin yana son sa, kuma na ga cewa magoya baya ma suna son sa domin wannan shi ne irin abin da mutane ke girmamawa.
Kullum yana ba da kashi 100 cikin 100 domin ƙungiyar, kuma ko yana benci ma yana bayar da cikakken goyon baya. Shi ya sa ya cancanci irin wannan bankwana da wannan gaisuwar ban girma. Mun yanke shawarar yi masa hakan, kuma ina masa fatan alheri a sabon kulob ɗinsa, amma ba lokacin da za su kara da mu ba."Awoniyi ya zama ɗan wasa mafi tsada da Nottingham Forest ta taɓa saya a lokacin da ya koma daga Union Berlin a shekarar 2022 kan kuɗin fam miliyan 17.2.
A tsawon zamansa a Forest, ya ci ƙwallaye 23 a wasanni 103. Sai dai ya kasance a baya wajen samun gurbin buga wasa idan aka kwatanta da Chris Wood da Igor Jesus, kuma ba a saka shi cikin tawagar Forest da ta buga Europa League a kakar wasan da ta gabata ba.
17 Agusta 2026Kungiyoyin Premeir sun kafa tarihin kashe kuɗin sayen 'yan wasa
Asalin hoton, Getty Images
Kungiyoyin Premier League sun riga sun kashe fam biliyan 2.14 a kasuwar saye da sayarwar 'yan wasa ta bana, duk da cewa har yanzu akwai sama da makonni biyu kafin rufe kasuwar.
Wannan adadi ya zarce jimillar kudin da suka kashe a kasuwar shekarar 2024 inda suka kashe £1.98bn, da ta 2022 da suka kashe £1.94bn, da ta 2021 da nan ma suka kashe £1.13bn da kuma 2020 £1.32bn, kamar yadda alkaluman da Paul Macdonald, wanda ya kafa shafin FootballTransfers.com, ya bai wa BBC Sport suka nuna.
A halin yanzu, shekarar 2023 (da aka kashe £2.36bn da kuma shekarar da ta gabata wadda ta kafa tarihin kashe £3.14bn ne kawai suka fi wannan adadi yawa ya zuwa yanzu.
Saboda haka, har yanzu akwai yiwuwar a ga wata kasuwar saye da sayarwar 'yan wasa da za ta karya tarihi.
Amma abin da ya fi jan hankali ba wai yawan kuɗin da kulob-kulob ɗin gasar Premier League ke kashewa ba ne kawai, sai dai inda waɗannan kuɗaɗen suke tafiya da kuma yadda ake amfani da su.
Bambancin ƙarfin kuɗi tsakanin Ingila da sauran sassan Turai ya bayyana ƙwarai.
Kulob-kulob na Premier League sun kashe fam biliyan 2.14 a wannan bazarar, idan aka kwatanta da fam miliyan 780 da aka kashe a Serie A, fam miliyan 515 a da La Liga ta kashe, fam miliyan 505 a Bundesliga ta kashe, da fam miliyan 412 da aka kashe Ligue 1.
Wannan na nufin cewa gasar matakin farko ta Ingila ta riga ta kashe kuɗi fiye da jimillar waɗannan manyan gasoshin Turai huɗu a haɗe.
Chelsea ce ke kan gaba wajen kashe kuɗi, inda ta riga ta ware fam miliyan 348 a wannan bazarar, inda ta shiga gaban sauran kulob-kulob ɗin Premier. Tottenham ce ta biyo bayan da ta ware fam miliyan 228, yayin da Arsenal da Manchester City suka kashe fam miliyan 151 kowannensu.
Chelsea, Tottenham da Manchester City dukkansu sun karya tarihin mafi tsadar sayen ɗan wasa a tarihin kulob ɗinsu a wannan kasuwar musayar 'yan wasa.
Sai dai kashe kuɗin bai taƙaita tsakanin manyan kulob-kulob ɗin gasar ba kaɗai. Aston Villa, Brentford, Brighton da Leeds United su ma sun kulla yarjejeniyar sayen ɗan wasa mafi tsada a tarihin kulob ɗinsu a wannan bazarar.
Idan aka yi la'akari da duk shekara ta 2026 gaba ɗaya, tare da haɗa sayen Jorgen Strand Larsen da Crystal Palace ta yi a watan Janairu, kulob 11 daga cikin 20 na Premier League sun karya tarihin sayen ɗan wasa mafi tsada a tarihin kulob ɗinsu a cikin wannan shekara.
17 Agusta 2026Hukumar kwallon Ƙafa ta Scotland ta janye goyon bayanta ga Infantino
Asalin hoton, Getty Images
Hukumar Kwallon Ƙafa ta Scotland ta janye goyon bayanta ga shugaban Hukumar Kwallon Ƙafa ta Duniya Gianni Infantino, kuma ba za ta kaɗa masa ƙuri'a ba wajen sake zaɓensa a matsayin shugaban Fifa, kamar yadda babban jami’in gudanarwa Ian Maxwell ya shaida wa BBC Sport.
Wannan na zuwa ne bayan ƙungiyar FairSquare, wata ƙungiya mai zaman kanta da ke fafutukar ganin an samar da gaskiya da riƙon amana a harkokin wasanni, ta rubuta wa kwamitin gudanarwa, bincike da bin ƙa’idoji na Fifa tana neman a ayyana Infantino a matsayin wanda bai cancanci sake tsayawa takarar shugabancin Fifa ba.
Matsin lamba na ci gaba da ƙaruwa a kan Infantino dangane da yunƙurinsa, wanda daga baya aka yi watsi da shi, na kafa wani sabon kamfani da zai kula da haƙƙoƙin kasuwanci da sayar da tikitin dukkanin gasannin Fifa, ciki har da Kofin Duniya. Tsarin ya haɗa da sayar da kashi 21 cikin ɗari na kamfanin ga wani kamfani mai zaman kansa na zuba jari.
An soke shirin Fifa Forward Enterprise (FFE) bayan suka mai yawa daga ƙungiyoyin nahiyoyi daban-daban, musamman Uefa, wadda ta jagoranci adawa da shirin kuma ta yi barazanar kauracewa dukkanin gasannin Fifa.
"Matsayin SFA a bayyane yake tun bayan taron ƙungiyoyin Uefa 55," in ji Maxwell, yayin da yake sanar da ɗan Belgium Sebastian Pocognoli a matsayin sabon kocin tawagar ƙasar Scotland.
17 Agusta 2026Ko nawa aka taya Bruno ba za mu sayar ba - Man United
Asalin hoton, Getty Images
Manchester United ta ce ko nawa za a taya kyaftin ɗinta Bruno Fernandes ba za ta siyawar ba, har lokacin da za a rufe kasuwar saye da sayarwar 'yan wasa ta nahiyar Turai a watan gobe.
BBC Sport ta samu labari a makon da ya gabata cewa kulob ɗin Galatasaray na Turkiyya, tare da manyan kulob ɗin Italiya Juventus da AC Milan, suna nazarin yiwuwar United ko za ta ci gaba da riƙe kyaftin ɗinta.
Ana tunanin cewa Galatasaray ta shirya wani tayin da za ta miƙa wa United, wanda zai kai kimanin yuro miliyan 50, kwatankwacin fam miliyan 42.7.
Sai dai manyan majiyoyi daga Old Trafford sun bayyana cewa Galatasaray za ta ɓata lokacinta ne kawai idan ta yi hakan.
Ko da yake a bara United ta gaya wa Fernandes cewa shi ne zai yanke shawara kan ko zai amince da tayin da kulob ɗin Al-Hilal na Saudi Pro League ya yi masa, inda daga baya ɗan wasan na Portugal ya amsa cewa ya ji "raɗaɗi" saboda wannan ba shi zaɓin, amma a wannan karon United ta fito ƙarara ta bayyana matsayinta.
Majiyoyin kulob ɗin sun ce har yanzu babu wani tayin da aka gabatar wa ɗan wasan mai shekaru 31, amma ta jaddada cewa ko nawa za a taya shi ba za ta sayar da shi ba.
Fernandes yana da sauran shekara ɗaya a kwantaraginsa na yanzu, tare da zaɓin ƙara wata shekara ɗaya.
An san cewa shi da kansa ya fi son ci gaba da zama a kulob ɗin.
Kunshin yarjejeniyar ɗan wasan ɗan ƙasar Portugal wanda ya haɗa da sharadin sayensa kan fam miliyan 57 ya riga ya ƙare.
Har zuwa yanzu, ba a cimma wata yarjejeniya ba kan tsawaita kwantaraginsa a ƙungiyar.
17 Agusta 2026Vicario zai tafi wasan aro daga Tottenham zuwa Juventus
Asalin hoton, Getty Images
Tottenham ta amince da tayin aro daga Juventus kan mai tsaron raga Guglielmo Vicario, wanda ya haɗa da zabin saye na dindindin.
Dan wasan kasar Italiya mai shekaru 29 zai je Turin domin kammala komawarsa Serie A, inda yarjejeniyar ta kunshi zabin sayensa kan fam miliyan 8.6, amma ba wajibi ba ne a aiwatar da sayen.
Wannan na zuwa ne bayan yunƙurin Juventus na daukar mai tsaron ragar Aston Villa, Emiliano Martinez, ya rushe, yayin da Aston Villa ke dab da kammala daukar mai tsaron ragar Parma, Zion Suzuki.
An san cewa Martinez yana fama da rauni a ɗan yatsansa, kuma a halin yanzu ba ya cikin yanayin da zai iya buga wasa.
A gefe guda kuma, Vicario ya rasa matsayinsa a cikin tawagar Spurs a karkashin koci Roberto de Zerbi, wanda ya bai wa mataimakinsa Antonin Kinsky damar zama zabin farko a ragar kungiyar a kakar da ta gabata.
De Zerbi ya tabbatar cewa Kinsky zai ci gaba da kasancewa mai tsaron raga na farko da aka fi zaɓa a sabuwar kakar, yayin da Burnley ta ɗauki Martin Dubravka kyauta a watan Yuli domin maye gurbin mai tsaron raga.
A tarihin kungiyar ta Arewacin Landan wannan kakar na cikin wadda ta fi kashe kudi cikinta, wanda ya riga ya ɗauki sabbin 'yan wasa shida tare da neman ƙara wasu 'yan wasan gaba guda biyu.
Haka kuma sun sayar, sun ba da aro ko kuma sun sallami wasu tsoffin 'yan wasa da dama, ciki har da kyaftin Cristian Romero, ɗan wasan Ingila Djed Spence da kuma Yves Bissouma.
Vicario ya buga wa Spurs wasanni 117 bayan ya koma ƙungiyar daga Empoli kan kuɗi fam miliyan 17.2 a shekarar 2023.
17 Agusta 2026Me yasa magoya bayan Chelsea ke yi wa Enzo ihu?
Asalin hoton, Getty Images
Magoya bayan Chelsea sun riƙa yi wa Enzo Fernandez ihu da zagi a ranar da Morgan Rogers ya ci ƙwallo a wasansa na farko da ya buga wa Chelsea, yayin da Chelsea ta doke Real Sociedad da ci 3-1.
Joao Pedro shi ma ya ci gaba da nuna ƙwazon da yake yi a wasannin share fagen shiga kakar wasa, inda ya zura ƙwallaye biyu, yayin da koci Xabi Alonso ya nuna irin tsarin wasan da zai iya amfani da shi a kakar wasa mai zuwa.
Sai dai abubuwan da suka faru a filin wasa bayan shigowar Fernandez sun nuna rashin jin dadi a kansa, kasa da sa’o’i 24 bayan wa’adin sayer da shi da Chelsea ta sanya wa kanta ya kare.
Fernandez ya kasance yana son komawa Real Madrid a farkon wannan bazarar, amma kulob din na Spain ya janye sha’awarsa ga ɗan wasan na Argentina.
Daga baya, wakilansa sun tattauna da Manchester City, amma babu tayin da aka gabatar da zai kai darajar fam miliyan 120 da Chelsea ta sanya masa kafin ƙarfe 5:00 na yamma (BST) ranar Juma’a.
Wasu daga cikin magoya bayan da suka iso a Stamford Bridge sun yi masa ihu lokacin da aka ambaci sunansa minti 45 kafin a fara wasan.
Daga baya kuma an sake jin ihu lokacin da Fernandez ya shiga wasa a minti na 62.
An ga cewa magoya bayan Chelsea sun rabu gida biyu kan lamarin, domin yayin da wasu ke yi masa ihu, wasu kuma suna rera sunansa suna nuna goyon baya.
17 Agusta 2026Mun fi ƙoƙari idan duniya na adawa da mu - Dan Burn
Asalin hoton, Getty Images
Dan Burn ya yi 'yan watanni kaɗan ne ba tare da zuwa filin atisayen Newcastle United ba.
Sai dai ɗan wasan bayan na Ingila ya ji kamar ya shiga sabuwar ƙungiya ne gaba ɗaya lokacin da ya dawo bayan hutunsa na bayan gasar Kofin Duniya.
Ya ce: "A gaskiya, har yanzu ina koyon sunayen mutane." Ba abin mamaki ba ne ya faɗi haka.
An sake fuskantar tsaka mai wuya saboda sauye-sauye a Newcastle, bayan tafiyar koci Eddie Howe da kuma wasu manyan jiga-jigan ƙungiyar kamar Bruno Guimaraes, Sandro Tonali da Anthony Gordon.
Sabon babban koci, Matthias Jaissle, ya zo tare da kusan ma’aikata shida daga tawagarsa, yayin da Burn ma yake ƙoƙarin sabawa da sabbin abokan wasansa da suka haɗa da Lukas Hornicek, Ewen Jaouen, Aladji Bamba, Sean Steur da Bazoumana Toure.
Baya ga haka kuma, ana sa ran ɗan wasan bayan dama Amar Dedic zai iso daga Benfica nan ba da daɗewa ba.
Duk da haka, maimakon ya yarda da hasashen wasu masana da ke ganin Newcastle za ta sha wahala a wannan kakar wasa, Burn ya sa gaba ne ya jagoranci ƙungiyar ta koma gasar Turai a matsayin sabon kyaftin ɗinta.
Ya ce bayan Newcastle ta yi kunnen doki 1-1 da Strasbourg a wasan sada zumunta na ƙarshe kafin fara kakar wasa: "A koyaushe muna taka rawar gani a matsayin ƙungiya idan muna da wannan tunanin cewa mu ne ke fafatawa da kowa a duniya."
17 Agusta 2026Barcelona za ta biya £65m kuɗin Rodri daga Man City
Asalin hoton, Getty Images
Barcelona ta amince da yarjejeniya domin daukar kyaftin din tawagar Spain, Rodri, daga Manchester City kan kusan fam miliyan 65.
Dan wasan mai shekaru 30, wanda ya lashe kyautar Ballon d'Or a shekarar 2024, ana sa ran zai sanya hannu kan kwangilar shekaru hudu da zakarun Spain.
Ana sa ran za a kammala cinikin a cikin kwanaki masu zuwa.
Rodri ya buga wasanni 298 a tsawon shekaru bakwai masu cike da kofuna a Manchester City bayan ya koma kungiyar daga Atletico Madrid a shekarar 2019 kan kudi fam miliyan 62.8, wanda a wancan lokacin ya kasance mafi tsada da kungiyar ta taba dauka.
Bai buga yawancin wasannin kakar 2024-25 sakamakon raunin da ya ji a gwiwa, ka zalika wasu wasannin kakar 2025/26 ma haka suka kasance masa.
Sai dai ya dawo kan ganiyarsa ne a gasar Kofin Duniya da aka yi a lokacin bazara, inda ya jagoranci Spain zuwa lashe gasar karo na biyu tare da samun lambar yabo ta Mafi Kyawun Dan Wasa a Gasar.
Rodri zai bar Manchester City da tarihin lashe manyan kofuna 12, ciki har da kofunan Premier League hudu, FA Cup biyu, EFL Cup uku, da kuma Champions League a kakar 2022-23.
A makon da ya gabata, Manchester City ta yi watsi da tayin farko na Barcelona na fam miliyan 38.5 kan Rodri, wanda kwangilarsa a filin wasa na Etihad za ta shiga shekararta ta karshe.
Da farko dai an yi hasashen cewa Real Madrid ce za ta zama kungiyarsa ta gaba, amma Barcelona ta kara ƙaimi wajen kammala sayen dan wasan a kwanakin baya-bayan nan.
17 Agusta 2026
Muhammad Buhari Fagge ke fatan kasancewa da ku a wannan mako domin kawo muku labarai da rahotannin wasanni.
Za mu kawo bayanai kan kasuwar saye da sayerwar 'yan wasan nahiyar Turai.
Bayanai kan gasannin Turai da za a fara da wadanda aka ma fara a ƙarshen makon jiya.
Sharhi kan wasu abubuwa da za su shige duhu ga wadanda ba su bibiyar wasanni yadda ya kamata da dai sauransu.
Ku kasance da mu.