Labarin wasanni daga 30 zuwa 5 ga watan Satumbar 2025

Rahoto kai-tsaye

Mohammed Abdu

1. 4 Satumba 2025Ghana ta tashi canjaras da Chadi a wasan neman zuwa Kofin Duniya

   

   Asalin hoton, Getty Images

   Tawagar ƙwallon ƙafa ta Ghana ta tashi canjaras 1-1 a wasan neman gurbin zuwa gasar Kofin Duniya ta 2026 da suka buga da Chadi.

   Jordan Ayew ne ya fara ci wa tawagar ta Black Stars ƙwallo a minti na 17 da take wasa, kafin Celestine Ecua ya farke wa masu masauƙin baƙin.

   Sakamakon ya sa Ghana ta ci gaba da zama a samen teburin Rukunin I da maki 16 bayan wasa bakwai, yayin da Chadi take a matakin ƙarshe da maki ɗaya.

   Comoros ce ta biyu a teburin da maki 12, sai Madagascar ta uku da maki 11, da Mali mai maki 9, da Afirka ta Tsakiya mai maki 6.

   A ranar Litinin Ghana za ta buga wasanta na gaba, inda za ta karɓi baƙuncin Mali a birnin Accra.

2. 4 Satumba 2025Burina cin ƙwallaye fiye da 20 a NPFL, in ji Anas Yusuf na Nasarawa

   

   Asalin hoton, Nasarawa United

   Ɗanwasan gaba na Nasarawa United da ke buga gasar firimiyar Najeriya ta NPFL Anas Yusuf ya ce fatansa ya ci ƙwallaye fiye da 20 a sabuwar kakar wasa ta bana.

   A ranar Talata ne hukumar NPFL ta karrama ɗanwasan da takalmin zinare na ƙwallaye 18 da ya ci mafiya a bara ranar Talata, da kuma kuɗi naira miliyan biyu yayin bikin da aka jinkirta saboda gasar CHAN da ya buga wa Najeriya.

   Yusuf ya ce kyautar ta ƙara masa ƙaimin cin wasu ƙwallayen fiye da waɗanda ya ci a kakar da aka kammala.

   "Na ji daɗin karrama ni da NPFL ta yi. Kyautar ƙarin ƙaimi ne domin na ƙara zagewa kuma ina fatan zan zarta ƙwallayen da na ci a kakar bara zuwa fiye da 20," in ji shi bayan karɓar kyautar.

3. 4 Satumba 2025NPFL ta karrama Anas Yusuf da naira miliyan 2 bayan cin ƙwallaye mafiya yawa

   

   Asalin hoton, NPFL

   Hukumar kula da gasar firimiyar Najeriya ta NPFL ta karrama zaƙaƙurai daga cikin 'yanwasan da suka taka rawar gani a kakar da aka kammala ta 2024-25 da kuɗaɗe da kuma kyautuka.

   Yayin bikin da aka gudanar ranar Talata a Abuja, an bai wa ɗanwasan Nasarawa United Anas Yusuf naira miliyan biyu da takalmin zinare saboda ƙwallaye 18 mafiya yawa da ya ci a kakar.

   Shi ma kociyan Remo Stars, Daniel Ogunmodede, ya samu naira miliyan biyu bayan jagorantar ƙungiyar lashe kofin gasar ta NPFL karon farko a tarihinta.

   Yayin bikin karranawar, sakataren hukumar ƙwallon ƙafa ta Najeriya NFF, Dr Mohammed Sanusi, ya yaba wa cigaban da ake samu a gasar.

   "Gasar na samun cigaba duk mako. Ya kamata mu taimaka wa ɗorewar cigaban maimakon mu dinga kushe ta a kodayaushe," in ji shi.

4. 4 Satumba 2025Djed Spence zai zama Musulmi na farko a babbar tawagar Ingila

   

   Asalin hoton, PA Media

   Djed Spence na fatan zama zakaran gwajin dafi a matsayin Musulmi na farko da zai taka wa babbar tawagar Ingila ta maza leda.

   Ɗanwasan bayan na Tottenham ya buga wa tawagar 'yan ƙasa da shekara 21 leda sau shida, amma wannan ne karon farko da aka kira shi babbar tawagar da za ta buga wasannin neman shiga gasar Kofin Duniya ta 2026 da Andorra da kuma Serbia.

   Duk da cewa hukumar ƙwallon ƙafa ta Ingila ba ta adana bayanan addinin 'yanwasanta, an fahimci cewa Spence zai iya zama Musulmi na farko da zai taka mata leda.

   "Abin alheri ne - abin murna. Na rasa ma kalaman da zan bayyana," a cewar ɗanwasan mai shekara 25.

   "Ina yawan yin addu'a. Ina gode wa Allah a lokutan da nake cikin ƙunci. Na yi imanin cewa Allah yana tare da ni a kodayaushe. Wannan muhimmin abu ne a wurina, da addinina."

   Tottenham ta tura ɗanƙwallon wasan aro har sau uku a Rennes, da Leeds, da Genoa.

5. 3 Satumba 2025Jamus ta ce ba za a buga Bundesliga ba a wajen kasar

   Mahukuntan tamaula a Jamus, sun bayar da sanarwa a jiya cewa ba za amince a buga wasannin a wajen kasar ba.

   Ana buga Spanish Super Cup da na Serie A a Saudiyya.

   A watan Agusta aka sanar da cewar za a gudanar da La Liga tsakanin Barcelona da Villarreal a Miamin Amurka ranar 20 ga watan Disamba, inda Real Madrid ta nuna adawa da matakin.

   Watakila wasan da AC Milan za ta yi da Como a Seria A, ka iya zama na farko da za a yi a wajen kasar, bayan da hukumar kwallon kafa ta Italiya ta ba da haske a watan Yuli domin buga fafatawar a Australia.

   Tuni ƙungiyoyin magoya baya daga sassa daban-daban na Turai suke bayyana rashin amincewarsu da irin wadannan wasannin, suna masu cewa ana karya ka’idojin gasar ne domin samun kudi na kankanin lokaci, kuma za su yi illa ga gasar su ta gida.

6. 3 Satumba 2025Kounde ya yi kira ga Fifa da ta rage yawan wasanni da ake yi duk kaka

   

   Asalin hoton, Getty Images

   Mai tsaron bayan tawagar Faransa, Jules Kounde ya yi kira ga hukumar ƙwallon kafa ta duniya Fifa da cewar wasanni suna yi musu yawa, hakan kan taɓa koshin lafiyarsu da nakasu ga tamaula.

   Ya yi kiran ne a lokacin ganawa da ƴan jarida a wasan da Faransa za ta yi na neman shiga gasar kofin duniya da Ukraine da kuma Iceland a cikin watan nan.

   Faransa za ta kara da Ukraine ranar Juma'a, sannan ta kece raini da Iceland a birnin Paris ranar Talata.

   Kounde, wanda bai buga Fifa Club World ba, wadda aka sauyawa fasali da aka yi daga 14 ga watan Yuni zuwa 13 ga watan Yuli a Amurka, ya kara da cewar ba a samu isashen hutu ba, sannan aka faɗa wasannin kakar nan.

   Ɗan wasan Manchester City, Ryan Cherki da na Arsenal, William Saliba, ba za su buga wa Faransa karawar ba, yayin da ɗan ƙwallon Paris St Germain, Ousmane Dembele bai yi atisaye ba ranar Talata.

   PSG, wadda ta kai zagayen karawar karshe a Club World Cup ta buga wasa 65 jimilla a kakar da ta wuce.

7. 3 Satumba 2025An ɗaure ɗan kallo shekara ɗaya kan cin zarafin Williams

   

   Asalin hoton, Getty Images

   An daure wani mai kallon tamaula shekara ɗaya a jiya Laraba a Sifaniya, bayan da wata kotu ta same shi da laifin cin zarafin dan wasan Athletic Bilbao, Inaki Williams a wasan da suka kara a gidan Espanyol a 2020.

   Mai shigar da kara ya ce mutumin ya kwaikwayi halayyar biri a lokacin wasan da nufun harzuka Williams.

   A kakar da ta wuce an samu tsaiko a lokacin gasar La Liga a watan Fabrairu a wasan Athletic Bilbao da Espanyol, inda Williams ya kai kara ga alkalin wasa cewar an ci zarafin takwaransa, Maroan Sannadi.

   Ana ta cin zarafi da kalamam wariya a Sifaniya, tun bayan abinda ya faru a kan dan wasan Brazil, mai taka leda a Real Madrid, Vinicius Junior a 2023 a karawa da Valencia a filinta na Mestalla.

   Tun daga lokacin an hukunta mutane da yawa da aka samu da laifin cin zarafin Vinicius.

8. 3 Satumba 2025Kungiyar magoya bayan West Ham sun kaɗa ƙuri'ar rashin amincewa ga shugabanci

   

   Asalin hoton, Getty Images

   Ƙungiyar magoya bayan West Ham ta fitar da kuri'ar rashin amincewa zuwa ga mahukuntanta.

   Sun rubuta buɗaɗɗiyar wasika zuwa ga manyan masu hannun jari da ya haɗa da David Sullivan da Vanessa Gold da Daniel Kretinsky da kuma Tripp Smith.

   Sun zargi cewar ƙungiyar tana tare da yawan ƴan wasan da shekaru suka ja, hakan ya sa suka shiga tsaka mai wuya a wasannin da suke bugawa a kakar nan.

   West Ham ta sha kashi a wasan farko da fara Premier League a hannun Sunderland, sannan Chelsea ta ɗura mata ƙwallaye da yawa a karawar hamayya a tsakaninsu.

   Koda yake matsin lamba ya ɗan ragu a kan koci, Graham Potter, bayan da West Ham ta je ta doke Nottingham Forest 3-0 a makon jiya.

   Sai dai tuni ƙungiyar magoya bayan ta bukaci yin zanga-zanga a wasannin da West Ham za ta buga a gida nan gaba.

9. 3 Satumba 2025Musiala ya ce zai koma kan ganiya a Bayern Munich bayan jinyar karaya

   

   Asalin hoton, Getty Images

   Ɗan wasan Bayern Munich, Jamal Musiala ya sanar ranar Laraba, cewar yana da ƙwarin gwiwa zai koma kan ganiya a kakar nan, bayan jinyar karaya a lokacin Fifa Club World Cup a Amurka a watan Yuli.

   Mai shekara 22, yana cikin kashin bayan tawagar Jamus a wasannin neman shiga gasar kofin duniya da za a yi a 2026, ya karya kafa ne lokacin da golan Paris St Germain, Gianluigi Donnarumma ya yi masa keta a karawar da suka yi a Atalanta.

   Musiala, wanda ya ci ƙwallo 21 da bayar da takwas aka zura a raga a dukkan karawa a kakar da ta wuce da Bayern ta lashe Bundesliga, bai ga laifin mai tsaron ragar ba, ya kara da cewar tsautsayi ne.

10. 2 Satumba 2025Man City ta ɗauki Donnarumma, Ederson ya koma Fenerbahce

    

    Asalin hoton, Getty Images

    Manchester City ta tabbatar da ɗaukar Gianluigi Donnarumma daga Paris St Germain, yayin da Ederson ya koma Fernerbahce, kenan ya kawo karshen kaka takwas a Etihad.

    Ba a fayyace kuɗin da mai tsaron ragar ya koma City ba, amma ana cewa zai kai fam miliyan 35, sai dai ƙungiyar Etihad ta sanar cewar ya saka hannu kan yarjejeniyar kaka biyar.

    Donnarumma, wanda zai saka riga mai lamba 99 a City, shi ne ya tsare raga a lokacin da PSG ta lashe Champions League a karon farko a tarihi a bara, kuma shi ne golan Italiya a lokacin da ta ɗauki Euro 2020.

    Haka kuma City ta sanar cewar ta bayar da aron Manuel Akanji ga Inter Milan zuwa karshen kakar bana.

    Tun farko Crystal Palace ce ta nuna sha'awar sayen Akanji, wanda ya koma City a Satumbar 2022, daga baya ta yi ta jan kafa.

    Ya lashe Champions League da Premier League da kuma FA Cup a 2023 da wani babban kofin tamaula na gasar Ingila a 2024.

11. 2 Satumba 2025An ci tarar Grimsby, saboda amfani da ɗan wasan da bai cika ka'ida ba a wasan Man United

    

    Asalin hoton, Getty Images

    An ci tarar Grimsby Town fan 20,000, saboda amfani da ɗan wasan da bai cika ka'ida ba a Carabao Cup a karawar da ta yi waje da Manchester United.

    Grimsby ta kai zagayen gaba, saboda yin waje da United a bugun fenariti, bayan tashi 2-2.

    Ƙungiyar mai buga League Two ta saka Clarke Oduor a karawar, wanda ya je domin buga wasannin aro daga Bradford City, amma daga baya aka gane an yi masa rajista minti daya da dakika 59 bayan wa'adi.

    Oduor ya shiga wasan a minti na 73, kuma Andre Onana ya tare fenaritin da ya buga a fafatawar da Grimsby ta kai zagayen gaba da cin 12-11.

    Ƙungiyar za ta fara biyan fam 10,000 daga baya ta biya sauran a karshen kakar bana.

    Manchester United tana da lokaci har zuwa kwana biyar, idan tana fatan ɗaukaka kara.

12. 2 Satumba 2025Ingila ta mika goron gayyata ga Loftus-Cheek da Quansah

    

    Asalin hoton, Getty Images

    Tawagar ƙwallon kafa ta Ingila ta mika goron gayyata ga ɗan wasan AC Milan, Ruben Loftus-Cheek da na Bayer Leverkusen, Jarell Quansah hkan wasannin neman shiga gasar kofin duniya da za ta yi da da Andorra da kuma Serbia.

    Loftus-Cheek da Quansah za su shiga tawagar da Thomas Tuchel ke jan ragama a a karawa biyun da Ingila za ta yi, bayan da Adam Wharton zai yi jinya sakamakon raunin da ya ji a wasan Premier League da Crystal Palace ta je ta doke Aston Villa ranar Lahadi.

    Karon farko da aka gayyaci Loftus-Cheek tawagar Ingila a shekara shida, wanda ya yi mata wasan karshe a cikin Maris ɗin 2019.

    Ya buga mata wasa 10 jimilla, kuma na karshe shi ne da Amurka a Nuwambar 2018.

    Shi kuwa Quansah, wanda ya koma Bayern Leverkusen a bana, maimakon Liverpool wadda ta yi zawarcinsa, bai taɓa yi wa Ingila wasa ba, amma an sha gayyatarsa.

13. 2 Satumba 2025An kashe kusan fam biliyan uku a Premier League a bana

    

    Asalin hoton, Getty Images

    An kashe makudan kuɗi a Premier League a lokacin cinikayyar ƴan ƙwallo kusan fam biyan uku a bana.

    An rufe kasuwar saye da sayar da ƴan ƙwallo ranar Litinin, inda aka kashe fam biliyan biyu da miliyan 730, amma cinikin ɗan wasa da aka yi mafi tsoka shi ne wanda Liverpool ta sayi Alexander Isak daga Newcastle kan fam miliyan 125.

    Cafanen da aka yi a bara ya kai fam biliyan ɗaya da miliyan 960, amma dai kakar da aka sayi ƴan wasa da tsada ita ce a 2023 da aka kashe fam biliyan biyu da miliyan 360.

    Kuɗin da aka kashe wajen sayen ƴan ƙwallo a bana a Premier League ya haura yawan wanda aka yi a Bundesliga da La Liga da Ligue 1 da kuma Serie A jimilla.

14. 2 Satumba 2025Liverpool ce kan gaba a yawan kashe kuɗi wajen sayen ƴan ƙwallo a bana

    

    Asalin hoton, Getty Images

    Wasu na hasashen Liverpool za ta kara lashe kofin Premier League a bana, bayan da ta lashe na kakar da ta wuce na 20 jimilla iri ɗaya da yawan na Manchester United.

    A ranar Litinin aka rufe kasuwar saye da sayar da ƴan ƙwallo a nahiyar Turai, inda Liverpool ce kan gaba a yawan kashe kuɗi da ta sayo ƴan wasa a bana da ya kai fam miliyan 415.

    Chelsea ce mai rike da tarihin a 2023, wadda ta sayi ƴan ƙwallo kan fam miliyan 400, kuma Liverpool ta yi kokarin sayen Marc Guehi daga Crystal Palace ranar Litinin kan fam miliyan 35, sai a soke cinikin.

    Tun farko an cimma matsaya daga baya Palace ta janye daga cinikin da cewar ba ta samu damar sayen madadinsa ba.

    A karo biyu a bana Liverpool ta ɗauki ƴan wasa kan kuɗi mai tsoka a matakin mafi tsada a Burtaniya da ya haɗa da Florian Wirtz daga Bayern Leverkusen kan fam miliyan 100, sai kuma ta sayi Alexander Isak daga Newcastle United kan fam miliyan 125, yanzu shi ne cinikin ɗan wasa mafi tsada a Burtaniya.

    Jerin ƴan wasan da suka koma Liverpool a bana:

    • Giorgi Mamardashvili (Valencia)
    • Jeremie Frimpong (Bayer Leverkusen)
    • Armin Pecsi (Valencia)
    • Florian Wirtz (Bayer Leverkusen)
    • Milos Kerkez (Bournemouth)
    • Freddie Woodman (Preston North End)
    • Hugo Ekitike (Eintracht Frankfurt)
    • Will Wright (Salford City)
    • Giovanni Leoni (Parma)
    • Alexander Isak (Newcastle)

15. 2 Satumba 2025Manchester City ta saya mai tsaron raga Donnarumma daga PSG

    

    Asalin hoton, Getty Images

    Ƙungiyar Manchester City ta Ingila ta tabbbatar da sayen mai tsaron ragar PSG, Gianluigi Donnarumma ɗan asalin ƙasar Italiya.

    Tsohon mai tsaron ragar ta AC Milan ya sanya hannu ne a kwantiragin shekara biyar a ƙungiyar, inda zai zai ci gaba da tsare ragar ƙungiyar zuwa kakar 2030.

    Golan zai riƙa amfani da riga mai lamba 99 domin ranar haihuwarsa ta 1999, kamar yadda ƙungiyar ta sanar.

    Da yake magana kan komawa ƙungiyar, Donnarumma ya ce yana cike da farin ciki da jin daɗi.

    "Na koma ƙungiya da ke cike da zaratan ƴanwasa, sannan kuma ƙungiya ce da ke samun horo daga ɗaya daga cikin zaratan masu horar da ƴanwasan ƙwallon ƙafa da aka yi a tarihin tamaula a duniya wato Guardiola.

    "Na daɗe ina sha'awar Manchester City. Don haka komawa ƙungiyar abin alfahari ne a gare ni. Buga ƙwallo a filin wasan Ettihad zai zama abin alfahari ne a wajena."

16. 1 Satumba 2025Hojlund zai buga wasannin aro a Napoli, Antony ya zama mallakin Real Betis

    

    Asalin hoton, Getty Images

    Ɗan ƙwallon Manchester United, Rasmus Hojlund zai buga wa Napoli wasannin aro zuwa karshen kakar nan, yayin da Real Betis ta mallaki Antony kan fam miliyan 21.65.

    Cikin yarjejeniyar Napoli za ta iya sayen Hojlund kan fam miliyan 38 da zarar ya taka rawar gani a kakar nan.

    Shi kuwa ɗan wasan Brazil ya koma Sifaniya da taka leda kan yarjejeniyar kaka biyar, bayan taka rawar gani a bara a wasannin aro da cin ƙwallo tara a wasa 26 a dukkan fafatawa.

    United ta sayi Antony kan fam miliyan 81.3 daga Ajax a 2022, ya yi wasa 62 a Premier League da cin ƙwallo biyar da bayar da uku aka zura a raga.

17. 1 Satumba 2025Bournemouth ta ɗauki Milosavljevic daga Red Star ta kuma yi aron Jimenez daga AC Milan

    

    Asalin hoton, Getty Images

    Bournemouth ta ɗauki mai tsaron baya, Veljko Milosavljevic daga Red Star Belgrade, ta kuma yi aron Alex Jimenez daga AC Milan.

    Milosavljevic, mai shekara 18, ya amince da ƙunshin yarjejeniyar kaka biyar a Bournemputh.

    A kwantiragin Jimenez kuwa mai shekara 20 da zarar ya buga mata wasa 18 a Premier League, za ta biya kuɗin mallakarsa kan fam miliyan 16.5.

    Milosavljevic ya buga wasa 14 a lik a Red Star Belgrade, kuma shi ne matashi na uku da ya fara buga wa ƙungiyar tamaula.

18. 1 Satumba 2025Fulham ta sayi Tyrique George daga Chelsea kan fam miliyan 22

    

    Asalin hoton, Getty Images

    Fulham ta kammala sayen ɗan wasan Chelsea Tyrique George kan fam miliyan 22 kan yarjejeniyar kaka biyar.

    Ƙungiyoyi da dama sun yi rububin sayen George, musammam RB Leipzig a ranar rufe kasuwar cinikayyar ƴan ƙwallo wato Litinin.

    Zai bar Chelsea bayan cin ƙwallo uku da bayar da biyar aka zura a raga a karawa 27 tun daga farkon kakar bara.

    Fulham ta ɗauki George ne, bayan da Shakhtar Donets ta ƙi sayar mata da Kevin.

19. 1 Satumba 2025Forest ta kammala sayen Bakwa daga Strasbourg

    

    Asalin hoton, Getty Images

    Nottingham Forest ta biya fam miliyan 30 ga Strasbourg, kuɗin sayen Dilane Bakwa.

    Mai shekara 23 ya zama cewa Forest ta kashe fam miliyan 180 wajen sayen ƴan wasa a bana.

    Ya buga wa Strasbourg karawa 66 tun bayan da ya koma can daga Bordeaux kaka biyun da ta wuce.

    Bakwa shi ne na 10 da Forest ta saya, wadda ke fatan kammala sayen ɗan wasan Botafogo, Cuiabano.

    Cikin ƴan ƙwallon da ta ɗauka har da Omari Hutchinson daga Ipswich kan fam miliyan £37.5 da James McAtee daga Manchester City kan fam miliyan 30 da kuma Arnaud Kalimuendo daga Rennes kan fam miliyan 26.

20. 1 Satumba 2025Chelsea ta amince da tayin da Bayern Munich ta yi wa Jackson

    

    Asalin hoton, Getty Images

    Chelsea ta amince da Nicolas Jackson ya koma Bayern Munich.

    Zai koma ƙungiyar Bundesliga kan fam miliyan 70, wanda da farko wasannin aro aka tsara zai yi, sai kuma Liam Delap ya ji rauni daga nan ƙungiyar Stamford Bridge ta yi masa kiranye, amma bai amsa ba.

    Ɗan wasan tawagar Senegal ya koma Chelsea kan fam miliyan 32 a 2023 da cin ƙwallo 30 a wasa 81.

    Tuni kuma Chelsea ta ɗauki aron ɗan ƙwallon tawagar Argentina, Facundo Buonanotte daga Brighton kan fam miliyan biyu.