Lafiya Zinariya: Tasirin motsa jiki ga lafiyar mata da gyaran jiki

Hukumar Lafiya ta Duniya (WHO) ta bayyana motsa jiki a matsayin duk wani motsin da mutum zai yi da gaɓɓan jiki a lokacin hutu ko yayin tafiya daga wani wuri zuwa wani, ko a wurin aiki, ko kuma a gida.

A duniya, mata ba su kai maza motsa jiki ba, inda mazan suka ɗara su da kashi biyar cikin 100. Kuma hakan bai sauya ba tun shekarar 2000, a cewar WHO.

Rashin motsa jiki na da ƙaruwa a tsakanin mutane 'yan sama da shekara 60 a duniya, daga maza har mata.

Nau'ukan motsa jiki matsakaita da masu ƙarfi duka suna inganta lafiya, a cewar hukumar.

Motsa jikin da suka fi farin jini sun haɗa da tattaki, hawa keke, zagaye, wasanni da sauransu.

Sai dai rashin motsa jiki na ƙara haɗarin kamuwa da cututtukan da suka shafi zuciya, ciwon suga, cutar sankara da sauransu.

Kimanin mutane manya 1.8 biliyan ne basa motsa jiki kamar yadda hukumar ta bayar da shawara. Wato kashi 31 cikin ɗari na manya a duniya.

Inda ta bayyana fargabar cewa idan hakan ya ci gaba da faruwa, lamarin zai iya ƙaruwa zuwa kashi 35 cikin ɗari nan da shekarar 2030.

Lokacin da ya kamata a cimma wa'adin rage kashi 15 na rashin motsa jiki a tsakanin al'umma a duniya.

Domin jin yadda mata ke motsa jiki da tasirin hakan ga lafiyarsu da kuma wajen inganta surarsu, sai ku latsa makunnin da ke sama.