જમ્મુ-કાશ્મીર વિધાનસભા ચૂંટણીનાં પરિણામો આવી ગયાં, નૅશનલ કોન્ફરન્સ-કૉંગ્રેસના ગઠબંધનને બહુમતી
ઇમેજ સ્રોત, ANI
જમ્મુ-કાશ્મીરની વિધાનસભા ચૂંટણીનાં પરિણામો આવી ગયાં છે. અહીં નૅશનલ કોન્ફરન્સ અને કૉંગ્રેસના ગઠબંધનને બહુમતી મળી ગઈ છે.
નૅશનલ કોન્ફરન્સને 42 બેઠક પર જીત મળી છે અને કૉંગ્રેસના ખાતામાં છ બેઠક આવી છે. તો ભાજપને 29 બેઠક મળી છે. પીડીપીને માત્ર ત્રણ બેઠક મળી છે.
આ સિવાય માર્ક્સવાદી કૉમ્યુનિસ્ટ પાર્ટી (સીપીએમ), જમ્મુ-કાશ્મીર પીપુલ કોન્ફરન્સ (જેપીસી) અને આમ આદમી પાર્ટીને એક-એક બેઠક મળી છે. જ્યારે સાત બેઠક પર અપક્ષ ઉમેદવાર જીત્યા છે.
જમ્મુ-કાશ્મીરમાં કુલ 90 બેઠક છે અને બહુમત માટે 46 બેઠક જોઈએ. નૅશનલ કોન્ફરન્સ-કૉંગ્રેસ ગઠબંધને 48 બેઠક જીતી છે.
જમ્મુ-કાશ્મીરમાં દસ વર્ષ બાદ વિધાનસભા ચૂંટણી થઈ છે. છેલ્લે ભાજપ અને પીડીપીએ મળીને સરકાર બનાવી હતી. એ સમયે મહેબૂબા મુફ્તી મુખ્ય મંત્રી બન્યાં હતાં.
જોકે ભાજપ-પીડીપીના ગઠબંધનવાળી સરકાર પાંચ વર્ષ પૂરાં કરી નહોતી શકી.
