Umutoza Ole Gunnar wa Manchester United avuga ko ashobora gutsindira ku kibuga cya Barcelone
Ahavuye isanamu, AFP
Umutoza Ole Gunnar Solskjaer wa Manchester United avuga ko ikipe ye ishobora gutsindira Barcelone iwayo mu mukino wo kwishyura wa kimwe cya kane cya Champions League.
Barcelone ubu ni yo iri imbere nyuma yo gutsinda Manchester United igitego 1-0 mu mukino ubanza wabaye ejo ku wa gatatu, ukabera ku kibuga Old Trafford cya Manchester United.
Amakipe yombi azongera guhura mu mukino wo kwishyura uzabera muri Espanye ku itariki ya 16 y'uku kwezi kwa kane.
Umutoza Ole Gunnar yabwiye televiziyo BT Sport ati: "Turi gukina n'ikipe ikomeye. Irakaze - tuzajyayo tuzi ko tugomba kuhatsindira".
"Tuzajyayo dufite ikintu kimwe mu mutwe wacu: ko tugomba gutsinda".
Mu mikino ya kimwe cy'umunani, Manchester United yasaga n'igiye gusezererwa nyuma yo gutsindirwa iwayo ibitego 2-0 na Paris Saint-Germain yo mu Bufaransa mu mukino ubanza, ariko iza kuyigaranzurira iwayo mu murwa mukuru Paris w'Ubufaransa iyitsinda ibitego 3-1 mu mukino wo kwishyura.
Ihita inayisezerera hagendewe ku mubare munini w'ibitego yatsindiye hanze.
Ole Gunnar yagize ati: "Uko twitwaye mu mukino waduhuje na PSG biduha icyizere no kumva ko dushobora kubigeraho, ariko kandi turi gukina n'ikipe ihabwa amahirwe menshi yo gutwara igikombe".
Yongeyeho ko kugera mu cyiciro cy'imikino ya kimwe cya kabiri kwaba ari "igikorwa cyiza kurushaho" ugereranyije n'intsinzi y'i Paris mu mukino wayihuje na Paris Saint-Germain.
'Yatwocyeje igitutu iduteza ibibazo'
Umutoza Ernesto Valverde wa Barcelone na we yirinze kuvuga ko yamaze gusezerera Manchester United.
Yagize ati: "Reba ibyo bakoreye i Paris, ni cyo kintu cyonyine ucyeneye kureba - ntabwo birarangira".
"Ni ikipe ikomeye kandi yatwocyeje igitutu iduteza ibibazo. Umupira w'amaguru uratangaje cyane, ugira ibyawo. Biragoye gutambaza umupira iyo iri kugukarira ikotsa igitutu".
"Twabitekerezaga ko uza kuba umukino ukomeye cyane kandi igitego 1-0 ntacyo kiribucyemure".
Barcelone yabonye iyo ntsinzi yo mu mukino ubanza ku munota wa 12 ubwo myugariro Luke Shaw wa Manchester United yitsindaga igitego.
Manchester United yashoboye gutuma Barcelone itahira icyo gitego cyonyine, ariko na yo ntiyagira ishoti itera mu izamu rya Barcelone.
