CAR: Batatu batawe muri yompi ku vyaha vyo ntambara

Sentare idasanzwe muri Repubulika ya Sentarafirika (Central African Republic) yaciye urubanza rwa mbere, ku bantu batatu bahoze ari inyeshamba, ku vyaha vyo mu ntambara vyabereye mu buraruko bushira uburengero bw’igihugu mu 2019.

Abarwanyi bagenzura bibiri vya gatatu vy’igihugu cose, kigihanganye no kuva mu ntambara hagati y’abavukagihugu.

Urubanza rwo kuri uyu wa mbere, ni amateka kuri iyi sentare idasanzwe imaze imyaka ine ishinzwe i Bangui, kugirango ice imanza z’ivyaha vyo mu ntambara yatanguye muri Repubulika ya Santarafirika - CAR - kuva mu 2003.

Issa Sallet Adoum na Ousman Yaouba bahawe igihano c’umunyororo w’imyaka 20, nayo Tahir Mahamat ahanishwa umunyororo w’ubuzima bwose, kubera kwica abanyagihugu baharurwa mu mirongo, mu buraruko bushira uburengero bwa CAR, hari muri 2019.

Abo bose baciriwe urubanza uko ari batatu, bari abanywanyi ba 3R, umugwi witwaje ibirwanisho washinzwe mu 2015, mu gihe c’indyane hagati y’abavukagihugu.

N’aho urubanza rwabo rwaciwe, impinga iracari ndende mu nzira yo kurandurana n’imizi ubugizi bwa nabi bukorwa n’imigwi yitwaje ibirwanisho ikiri muri ico gihugu.

N’ubwo igisirikare gikomeza kubarwanya, ndetse gifatanije n’abacangero b’Abarusiya, ibice binini biherereye ahari ubutunzi bw’amabuye y’agaciro bugenzurwa n’imigwi y’abarwanyi muri ico gihugu.

Hari abandi benshi mu bakuru b’imigwi yitwaje ibirwanisho bafise imanza z’ivyaha i La Haye mu rwego rwa sentare mpuzamakungu, rukurikirana imanza z’ivyaha vyabaye mu ntambara hagati y’abavukagihugu muri CAR.

Muri 2019, amasezerano y’amahoro hagati ya leta ya CAR n’imigwi ikomakomeye mu yitwaje ibirwanisho yaburijwemwo, igihe iyo migwi yihindukiza igatunganya imigumuko yo gukura ku butegetsi Perezida Faustin Touadéra.