Zoleka Mandela, umwuzukuru wa Nelson Mandela, warwanye bikomeye na cancer yamwishe

Zoleka Mandela, umwuzukuru w’uwahoze ari perezida wa Afrika y’Epfo Nelson Mandela n’umugore we Winnie Madikizela Mandela, yapfuye mu ijoro ryo kuwa mbere ku myaka 43 nyuma y’urugamba rurerure yarwanye na cancer.

Umuryango we wemeje urupfu ubicishije mu itangazo washyize kuri ‘page’ ye ya Instagram, uvuga ko yapfuye “agaragiwe n’inshuti n’umuryango”.

Urupfu rwe rwabaye mbere ho umunsi umwe ngo bizihize isabukuru ya nyirakuru Winnie Madikizela uyu munsi wari kuba yujuje imyaka 87, Madikizela yapfuye mu 2018.

Itangazo ry’umuryango wa Zoleka rivuga ko yajyanywe mu bitaro kuwa mbere gukomeza kuvurwa cancer yari afite mu mayasha, umwijima, ibihaha, ubwonko n’uruti rw’umugongo.

Inkuru y’urupfu rw’uyu mugore wari umwanditsi rwababaje benshi muri icyo gihugu kandi bakomeje gutangaza ubutumwa bwo kwihanganisha umuryango we.

Zoleka Mandela yagaragaje umuhate mu kuvuga yeruye no kurwanya cancer ndetse no gutera imbaraga abayifite ngo ntibihebe.

Mu 2012 nibwo bwa mbere bamusanzemo cancer y’ibere, iyi bayimusanzemo inshuro ebyiri, buri nshuro akayikira.

Muri Kanama(8) umwaka ushize wa 2022 yatangaje ko basanze cancer yaramugeze mu bihaha, umwijima, imbavu, uruti rw’umugongo n’amayasha.

Ariko uyu mugore ntiyacitse intege, yakomeje gutangaza urugamba ariho aharanira gukomeza kubaho, ndetse agera aho asubira mu myitozo ngororamubiri.

Zoleka Mandela yari muntu ki?

Ni umukobwa wa Zindzi Mandela n’umugabo wa mbere Zwelibanzi. Zindzi ni umukobwa wa Winnie na Nelson Mandela. Zindzi wari ambasaderi wa Afrika y’Epfo muri Sweden yapfuye mu 2020 i Johanesbourg, umunsi yapfuye bari bamusanzemo Covid-19.

Uyu mukobwa we Zoleka ni nyina w’abana batandatu, barimo umuto asize yabyaye muri Mata(4) umwaka ushize wa 2022.

Zoleka yamenyekanye cyane ku gitabo cy’ubuzima bwe yise 'When Hope Whispers' yasohoye mu 2013 avuga ku rugamba yatsinze rwa cancer ebyiri z’ibere, ihohoterwa rishingiye ku gitsina yakorewe ari muto cyane, kubatwa n’ibiyobyabwenge n’ibindi.

Mu mezi ashize yanditse ku mbuga nkoranyambaga ati: “Ibipimo byerekanye cancer mu mwijima n’ibihaha byanjye. Ntegereje ibipimo byo mu magufa ngo byerekane niba mfite cancer n’ahandi hatari mu mbavu…”

Uyu murwanyi wahanganye na cancer, mu gitabo cye yatangaje uko yapfushije abana babiri, umukobwa we Zenani Mandela wishwe n’impanuka afite imyaka 13 n’undi wapfuye ari uruhinja, hamwe n’ubuzima bwe n’abana be bandi b’imyaka hagati ya 11 n'ufite umwe wavutse umwaka ushize yise Zingce Zobuhle Mandela.

Nubwo yavukiye mu muryango ukomeye kandi ukize, Zoleka mu gitabo cye avuga amakuba n’ibibazo yagiye acamo harimo gusambanywa kuva afite imyaka ine kugeza ari mu myaka cumi na…, no kubatwa na cocaine n’inzoga akaza kubinesha.

Mu 2013 yashinze ikigo yise Zoleka Mandela Foundation kigamije ubukangurambaga kuri cancer y’ibere, kurinda urubyiruko ibiyobyabwenge, n’impanuka zo mu muhanda.

Mu 2016 Zoleka yatowe mu bagore b’ingenzi kandi bavuga rikumvwa ku isi mu gikorwa cya BBC yita 'BBC 100 Women', yari kandi ambasaderi wa ONU ku isi ku ndwara zitandura.