Umucuruzi wa magendu y'abantu uzwi cyane yatawe muri yombi nyuma y'icukumbura rya BBC

Umwe mu bazwi cyane i Burayi bajyanaga abantu i Burayi mu buryo butemewe n'amategeko yatawe muri yombi muri Iraq nyuma y'inkuru y'icukumbura yakozwe na BBC.

Umutegetsi wo hejuru muri leta yavuze ko Barzan Majeed yatawe muri yombi mu gitondo cyo ku cyumweru, mu karere ka Kurdistan ko muri Iraq.

Mu gihe cy'imyaka myinshi, we n'igico cye bagize uruhare rukomeye mu bucuruzi bwa magendu y'abantu - mu mato (ubwato) no mu modoka z'amakamyo - bakabinjiza mu Bwongereza, bakoresheje umuhora uri hagati yabwo n'Ubufaransa.

BBC yashoboye kumenya aho Majeed - unazwi nka Scorpion - yari aherereye mu mujyi wa Sulaymaniyah wo muri Iraq, aho yavugiye ko yatwaye abimukira babarirwa mu bihumbi akabambutsa uwo muhora.

Yagize ati: "Wenda igihumbi, wenda 10,000. Simbizi, sinabaze."

Umutegetsi wo hejuru wo muri leta y'akarere ka Kurdistan yavuze ko abategetsi bashoboye gukoresha ibyo BBC yagezeho mu nkuru yayo y'icukumbura bakamenya aho Majeed aherereye.

Uwo mutegetsi yagize ati: "Hari saa moya [7:00] zo muri iki gitondo ubwo yatabwaga muri yombi hanze y'urugo rwe, bamutaye muri yombi nta bibazo bikomeye bibayeho ako kanya agisohoka mu rugo rwe.

"Ubu turimo gusuzuma ibirego aregwa hano mbere na mbere, nuko tuzaganire na polisi n'abashinjacyaha b'i Burayi bashaka kumubaza ibibazo no kugira icyo bamukoraho."

Ikigo cy'Ubwongereza cyo guhashya ibyaha (NCA, mu mpine y'Icyongereza) na cyo cyemeje ko yatawe muri yombi.

Mu itangazo, cyagize kiti: "Turashimira BBC ku kumuvugaho, kandi dukomeje kwiyemeza gukora ibyo dushoboye byose mu guhungabanya no gusenya ibico by'abagizi ba nabi bikora magendu yo kuzana abantu mu Bwongereza, aho [ibyo bico] bikorera aho ari ho hose."

Hagati y'umwaka wa 2016 na 2021, byemezwa ko igico cya Scorpion cyagenzuraga bwinshi mu bucuruzi bwa magendu y'abantu hagati y'Uburayi n'Ubwongereza.

Igikorwa ('opération') mpuzamahanga cya polisi cyamaze imyaka ibiri cyarangiye abantu 26 mu bagize icyo gico bahamijwe ibyaha mu nkiko zo mu Bwongereza, mu Bufaransa no mu Bubiligi.

Ariko Scorpion yaranyereye ntiyatabwa muri yombi, nuko akomeza kwihishahisha.

Atari mu rukiko, yaburanishijwe mu rukiko rwo mu Bubiligi, ahamwa n'ibyaha 121 byo gukora magendu y'abantu.

Mu Kwakira (10) mu 2022, yakatiwe gufungwa imyaka 10, ndetse acibwa amande y'ama-euro 968,000 (angana na miliyari 1,3 uyavunje mu mafaranga y'u Rwanda).

Aho Scorpion yari aherereye ntihari hazwi, kugeza ubwo abanyamakuru ba BBC bamugeragaho.

Mu kiganiro kuri telefone muri Mata (4) uyu mwaka, Majeed yumvikanye nkaho nta mpuhwe afitiye abimukira barohamye mu mazi.

Yagize ati: "Imana [irabyandika] igihe uzapfira, ariko rimwe na rimwe ibi ni ikosa ryawe.

"Imana nta na rimwe ivuga ngo 'Injira mu bwato'."

Amaherezo yemeye guhura na BBC muiguriroririni ry'i Sulaymaniyah.

Aho, yahakanye kuba umuntu ufite ijambo rinini mu gico cy'abagizi ba nabi. Yavuze ko abandi bagize icyo gico bagerageje kumushyiraho icyaha.

Yagize ati: "Abantu bamwe, iyo batawe muri yombi, baravuga ngo 'Turamukorera'. Bashaka guhabwa igihano gito."

Nuko Majeed atumira Rob Lawrie, wahoze ari umusirikare mu ngabo z'Ubwongereza, ubu ukorana n'impunzi, ndetse wakoranye na BBC muri iyo nkuru y'icukumbura, ngo amwereke aho akorera ibyo kuvunja amafaranga i Sulaymaniyah.

Yagize ati: "Nta muntu n'umwe wabashyize ku gahato. Barabishakaga.

"Babaga binginga abakora magendu bati 'Nyabuneka, nyabuneka nimubidukorere'.

"Rimwe na rimwe abakora magendu baravuga bati 'Ku bw'ugushaka kw'Imana, nzabafasha'.

"Nuko bakinuba, bakavuga bati 'Oh [reba] bigenze gutya, [bigenze] kuriya...' Oya, ibi si ukuri."

Ann Lukowiak, ukora mu biro by'umushinjacyaha wa rubanda mu Bubiligi, yakiriye neza inkuru yo gutabwa muri yombi kwe.

Yagize ati: "Amaherezo tugize amahirwe yo kubona ubutabera butangwa muri iyi dosiye, [amahirwe] yo kubona mu buryo butaziguye aryozwa ibyaha bye."