Ibuye rya mbere rinini ryo kuri Mars ryabonetse ku isi ryagurishijwe miliyoni $4.3 muri cyamunara

Ikimanyu cy'"imbonekarimwe cyane" cy'umubumbe wa Mars – cya mbere kinini cyane cyabonetse ku isi – cyagurishijwe miliyoni 4.3 z'amadolari y'Amerika muri cyamunara yabereye i New York ku wa gatatu.

Ayo arenga miliyari 6 uyavunje mu mafaranga y'u Rwanda.

Iryo buye, rizwi nka NWA 16788, ripima ibiro (kg) 24.5 ndetse rifite uburebure bwa santimetero (cm) hafi 38.1, nkuko inzu Sotheby's ikoresha cyamunara ibivuga.

Ryavumbuwe mu karere kitaruye ko muri Niger mu Gushyingo (11) mu mwaka wa 2023 ndetse ni rinini cyane ku kigero cya 70% kuruta irindi rinini cyane ryabonetse ryavuye kuri Mars, nkuko iyo nzu yabivuze.

Amabuye azwi nka 'meteorites' ni ibisigazwa by'amabuye asigara iyo 'asteroid' cyangwa 'comet' – izwi nka kibonumwe – inyuze mu kirere cy'isi.

Inzu Sotheby's iteza cyamunara yavuze ko iryo buye ry'ibara ry'ikigina kijya kuba umutuku, ari "imbonekarimwe cyane". Kugeza ubu amabuye hafi 400 avuye kuri Mars ni yo amaze kuboneka ku isi.

Cassandra Hatton, umuyobozi wungirije wa Sotheby's ushinzwe siyanse n'amateka y'ibidukikije, yatangaje muri videwo yashyize ku mbuga za interineti ati:

"Iki ni cyo kimanyu cya mbere kinini cyane cya Mars kiri ku mubumbe w'isi. Amahirwe yo kuhava kikagera hano aba ari macye cyane."

"Mwibuke ko hafi 70% by'ubuso bw'isi butwikiriwe n'amazi. Rero turahirwa cyane kuba iri ryaguye ku butaka bwumutse aho kugwa rwagati mu nyanja aho mu by'ukuri tutajyaga kuribona."

Ntibiramenyekana aho iri buye bizarangira rigarukiye kuko amakuru y'uwariguze yagizwe ibanga.

Sotheby's yavuze ko imisoro n'amafaranga y'inyongera byatumye igiciro cyose hamwe cyaryo kigera kuri miliyoni hafi 5.3 z'amadolari y'Amerika, ni ukuvuga arenga miliyari 7.5 z'amafaranga y'u Rwanda.