Musk mu bushyamirane na Apple ku kwamamaza kuri Twitter

Ben Derico

BBC News, San Francisco

Elon Musk yavuze ko kompanyi y'ikoranabuhanga Apple yahagaritse kwinshi mu kwamamaza kwayo kuri Twitter, ndetse ashinja iyo kompanyi gukangisha gukura Twitter mu bubiko byayo buzwi nka 'app store'.

Ubu bushyamirane bubaye mu gihe kompanyi nyinshi zahagaritse amafaranga zitanga kuri Twitter, mu gihe hari impungenge kuri gahunda za Musk zijyanye no gucenshura (gukora ubugororangingo) bw'ibitangazwa kuri uru rubuga.

Apple ntiyasubije ku busabe bwa BBC bwo kugira icyo ibivugaho.

Musk yavuze ko Twitter yahuye n'igabanuka "rinini cyane" ry'inyungu, ibyegeka ku mpirimbanyi zocyeje igitutu abamamaza kuri uru rubuga nkoranyambaga.

Ku wa mbere, mu rukurikirane rw'ubutumwa bwo kuri Twitter, Musk yashinje Apple "kuniga gutanga ibitekerezo" ndetse ayishinja guca imisoro ku bicuruzwa biguzwe mu bubiko bwayo bwa 'app store'.

Yagize ati: "Apple ahanini yahagaritse kwamamaza kuri Twitter. Banga ko umuntu avuga icyo ashaka muri Amerika?"

Yinginze mu buryo butaziguye umuyobozi mukuru wa Apple, Tim Cook, amubaza ati: "Ni ibiki birimo kuba hano @tim_cook?"

Musk, nyir'uru rubuga rwa Twitter, yanavuze ko Apple yakangishije gutuma Twitter idakoreshwa ikuwe muri 'app store' ya Apple, ariko ko Apple itavuze impamvu yabyo.

Musk, waguze Twitter kuri miliyari 44 z'amadolari y'Amerika mu kwezi gushize kwa cumi, ari ku gitutu, mu gihe za kompanyi zimwe zirimo guhagarika amafaranga zitanga muri iyo kompanyi.

Yavuze ko afite icyizere cyo gukura amafaranga mu buryo bwa Twitter bwo gushyira akarango k'ubururu kuri konti kagaragaza ko konti ari nta makemwa, konti z'abantu bagafite bakajya bariha ifatabuguzi.

Ariko kugeza ubu amafaranga menshi y'inyungu ya kompanyi ya Twitter ava mu kwamamaza.

Ikinyamakuru The Washington Post cyo muri Amerika cyatangaje ko Apple ari yo ya mbere yamamaza cyane kuri Twitter, mu mezi atatu ya mbere yo muri uyu mwaka wa 2022 ikaba yaratanze miliyoni 48 z'amadolari y'Amerika kuri Twitter.

Kompanyi zirimo nka kompanyi General Mills na Volkswagen, ni zimwe muri kompanyi zahagaritse kwamamaza kuri Twitter mu byumweru bya vuba aha bishize.

Media Matters, urubuga rw'ubugenzuzi, mu cyumweru gishize yatangaje ko kimwe cya kabiri cy'abamamaza bakomeye kuri Twitter bahagaritse ibyo bamamaza kuri Twitter, nyuma y'impungenge ku cyerekezo cya Twitter.

Ikigo Omnicom cyo gutangaza amakuru kigira inama Apple, ni cyo cyayigiriye inama yo guhagarika kwamamaza kuri Twitter kubera impungenge ku "mutekano w'izina [kwamamara] ryayo", nkuko bitangazwa n'urubuga The Verge rw'amakuru y'ikoranabuhanga rwo muri Amerika.

Mu guhangana na Apple, Musk arimo kwishora mu mpaka ngari ku mbaraga Apple ifite ku bikorwa byo ku rubuga rwa Internet zishingiye kuri 'app store' yayo, iyi ikaba ari uburyo abatunze za telefone za iPhone bapakurura imikino (games) n'izindi 'apps' bakoresha.

Uko ibintu bimeze kuri ubu, Apple ishobora gufata 30% by'amafaranga y'ifatabuguzi rya buri kwezi Twitter iteganya kujya yaka bamwe mu bayikoresha.

Kompanyi zose ziri muri 'app store' zigomba gukurikiza amategeko ya Apple ndetse zikagira amafaranga ziyiriha, bitaba ibyo zigakurwamo cyangwa zigahagarikwa.

Mu mwaka ushize, Apple yahagaritse urubuga nkoranyambaga Parler mu bubiko (store) bwayo, ivuga ko rutakoze ibihagije mu kuguraho amagambo y'urwango.

Nyuma yaho, Apple yasubije urubuga Parler mu bubiko bwayo, nyuma yuko kompanyi y'uru rubuga ivuguruye amategeko yayo.