Umugabo yatawe muri yombi afite umuzigo urimo impiri z'ubumara ku kibuga cy'indege cy'i Mumbai

Abategetsi bo mu Buhinde bataye muri yombi umugabo wari urimo kugerageza kwinjiza muri icyo gihugu mu buryo bwa magendu ibikururanda bidakunze kuboneka bibarirwa muri za mirongo, birimo n'inzoka z'ubumara.

Uwo Muhinde, wari usubiye iwabo avuye muri Thailand, yahagaritswe ku cyumweru n'abategetsi bo kuri gasutamo ku kibuga cy'indege cyo mu mujyi wa Mumbai.

Abategetsi bavuze ko ibyo bikururanda, birimo n'inzoko z'impiri z'ubumara 47, byasanzwe bihishe mu muzigo w'uwo mugabo.

Ibyo bikururanda byafashwe hashingiwe ku mategeko anyuranye arengera ibinyabuzima byo mu gasozi yo mu Buhinde.

Izina ry'uwo mugenzi ntiryatangajwe ndetse ubu ari muri kasho. Nta cyo aratangaza ku itabwa muri yombi rye.

Abategetsi bo kuri gasutamo batangaje amafoto ku rubuga nkoranyambaga X agaragaza inzoka z'amabara, zizingazinze ku ndobo.

Mu butumwa bwabo, bavuze ko uwo mugenzi bamufatanye impiri eshatu zo mu bwoko bwa 'spider-tailed horned vipers', utunyamasyo dutanu two mu bwoko bwa 'Asian leaf turtles', hamwe n'impiri 44 zo mu bwoko bwa 'Indonesian pit vipers'.

Inkomoko y'ibyo bikururanda ntisobanutse.

Nubwo kwinjiza inyamaswa muri icyo gihugu bitanyuranyije n'amategeko, amategeko y'Ubuhinde yo kurengera inyamaswa abuza kwinjiza mu gihugu amoko amwe n'amwe yazo, arimo nk'ay'inyamaswa ziri mu cyiciro cy'iziri mu byago byo gushiraho cyangwa izirinzwe na leta.

Umugenzi anacyenera kubona uruhushya rwa ngombwa mbere yo kwinjiza mu gihugu inyamaswa iyo ari yo yose.

Amakuru avuga ku bategetsi bo kuri gasutamo bafata inyamaswa zibujijwe bazambura abagenzi bagerageza kuzinjiza mu gihugu mu buryo bwa magendu, si ibintu bidasanzwe.

Muri Mutarama (1) uyu mwaka, abategetsi bo mu Buhinde bataye muri yombi Umunya-Canada w'umugabo ku kibuga mpuzamahanga cy'indege cy'i Delhi kubera gutwara igihanga cy'ingona mu muzigo we.

Muri Gashyantare (2) uyu mwaka, abategetsi bo ku kibuga cy'indege cy'i Mumbai bahagaritse umugenzi wari utwaye inkende eshanu zo mu bwoko bwa 'Siamang gibbons', zikomoka mu mashyamba yo muri Endoneziya (Indonesia), Malaysia na Thailand.

Izo nkende z'ubwo bwoko, ziri ku rutonde rw'umuryango mpuzamahanga wo kurengera ibidukikije nk'iziri mu byago byo gushiraho ku isi. Zari zihishe mu isanduku yo muri plasitike ziri imbere mu gikapu cyo gukurura cy'uwo mugenzi.

Mu Gushyingo (11) kw'umwaka ushize, abategetsi bo kuri gasutamo bataye muri yombi abagenzi babiri bari basubiye mu Buhinde bavuye i Bangkok mu murwa mukuru wa Thailand, bafite utunyamasyo 12.

Mu mwaka wa 2019, abategetsi bo ku kibuga cy'indege cy'i Chennai mu Buhinde, bafashe impiri yo mu bwoko bwa 'horned pit viper', imiserebanya itanu yo mu bwoko bwa 'Iguana', imiserebanya ine yo mu bwoko bwa 'blue-tongued skinks', imitubu (ibikeri) itatu yo mu bwoko bwa 'green tree frogs', hamwe n'utunyamasyo 22 tuzwi nk'utwo mu Misiri (Egyptian tortoises), byose babifatana umugabo wari uvuye muri Thailand.