Imvo n'Imvano Montreal: Fabrice na Patience baratanga umwizero ku Barundi n'Abanyamulenge baba muri Canada

Ikaze mu kiganiro Imvo n'Imvano cyo kuri uyu wa gatandatu tariki 22 z'ukwa 11 mu 2025. Turacyari muri rwa ruhererekane rw'ibiganiro nagiye gukorera muri Canada.

Uyu munsi turajya mu mujyi wa Montreal, aho nasanze Fabrice Ndayisaba, umunyamulenge ufite ikigo kigurisha amamodoka mu mujyi wa Quebec, cyitwa Auto Iwacu Inc, hamwe n'umurundi witwa Patience Kubwumuremyi, umunyamabanga w'ishyirahamwe ryitwa Horizon Espoir, rigerageza guha umwizero Abarundi baba muri Canada.

Ikigo Auto Iwacu Inc kimaze imyaka 2 gitangiye, cyatangiye kigurisha imodoka 5 none kigeze ku modoka 120 ku mwaka. Umuyobozi wacyo Fabrice Ndayisaba yatangiye ari wenyine, none ubu afite abakozi bagera kuri 4.

Yatangiye nta kibanza afite none ubu afite ikibanza gishobora kujyamo imodoka zigera kuri 40. Ikigo cye kandi gifite ubushobozi bwo kuguriza abantu imodoka bakagenda bishyura buhoro buhoro.

Naho muri Horizon Espoire ho batangiye bafasha Abarundi bagera kw'i 120 kugirango bamenyere ubuzima bushya batangiye muri Canada, bashobore kwiteza imbere kandi bafatanye munda.

Ryatangiye ryitwa Horizon Developement, umwaka ushize baryita Horizon Espoir. Bafite imigambi ifatiye ku mibano, imico, ubutunzi no kwiteza imbere, akaranga n'utugenegene cyangwa ubugeni mu Kinyarwanda, hamwe rero no gushishikariza abarundi kujya muri politike yo muri Canada.

Baravuga ko mu mibare baherutse kubona, babonye Abarundi bari muri Canada bamaze kurenga ibihumbi 20.

Baravuga ko nubwo ataribo bamutoresheje, ngo bagize umushikiranganji ku rwego rwa leta ya Canada w'umurundikazi, ubu akaba yarabaye umushingamateka ku rwego rw'igihugu. Ibyo ngo bituma bashobora kwumvisha abandi ko bishoboka nubwo ari abimukira.

Bamaze no gutangiza umugambi wo kwigisha i Kirundi abana bavukiye aho muri Canada. Ubu bafite abana 42 n'abarimu 8. Kwiyandikisha, umwana atanga amadolari yo muri Canada 30, naho amasomo agatanga amadolari 40 ku kwezi.

Nubwo Fabrice Ndayisaba atuye kandi agakorera mu mujyi wa Quebec, namusabye kuza i Montreal aho nari mfite studio, maze ansanga ndikumwe na Patience Kubwumuremyi we uba mu mujyi wa Montreal maze dukora iki kiganiro ngiye kubagezaho.

Iki kiganiro mwagiteguriwe kandi murakigezwaho na Felin Gakwaya.