M23 yatangaje 'kwimura ingabo zayo' zari ziri mu mujyi wa Walikale

Inyandiko gusa
Ifoto ya Justin Gacheri Musanga, umwe mu bakuru ba M23, ku isangano ry'imihanda hagati muri Walikale-centre ku wa kane

Ahavuye isanamu, M23

Insiguro y'isanamu, Ifoto ya Justin Gacheri Musanga, umwe mu bakuru ba M23, ku isangano ry'imihanda hagati muri Walikale-centre ku wa kane

Ihuriro AFC M23 ryatangaje ko ryafashe icyemezo cyo 'kwimura ingabo' zayo zari ziri muri Walikale-centre no mu nkengero zayo mu ntara ya Kivu ya Ruguru ya DR Congo.

Mu itangazo, iri huriro rivuga ko ibi bigendanye no kubahiriza agahenge kasabwe n'imiryango y'ibihugu ya EAC na SADC mu kwezi gushize hagamijwe gushaka igisubizo cy'iyi ntambara mu nzira z'amahoro.

Umutwe wa M23 wafashe umujyi wa Walikale ku wa gatatu nijoro, aha ni ho kure mu burengerazuba wari ugeze kuva watangira gufata ibice bitandukanye mu burasirazuba bwa DR Congo.

Inzobere mu bya gisirikare yabwiye BBC ko "kwimura ingabo" M23 yatangaje bisobanuye kuzivana mu mujyi wa Walikale zikaba zashyira ibirindiro ahandi.

Mu itangazo ryayo kuri uyu wa gatandatu, M23 iburira ko mu gihe habayeho "ubushotoranyi" bw'uruhande rw'ingabo za leta mu bice igenzura cyangwa ibirindiro byayo "bizatera kuvanaho iki cyemezo ako kanya".

Uruhande rwa leta kenshi rushinja urwa M23 ko ari rwo rurenga ku gahenge kaba kasabwe cyangwa kagiye kumvikanwaho mbere.

Perezida Ruto nyuma yo guhura na mugenzi we Mnangagwa wa Zimbabwe ku wa gatanu, yatangaje ko mu cyumweru gitaha imiryango ya EAC na SADC izongera igaterana ku kibazo cya DR Congo

Ahavuye isanamu, William Ruto/X

Insiguro y'isanamu, Perezida Ruto nyuma yo guhura na mugenzi we Mnangagwa wa Zimbabwe ku wa gatanu, yatangaje ko mu cyumweru gitaha imiryango ya EAC na SADC izongera igaterana ku kibazo cya DR Congo

Kuvana ingabo muri Walikale kwa M23 gutangajwe nyuma y'uko ku wa kabiri Perezida Paul Kagame w'u Rwanda na Félix Tshisekedi wa DR Congo bahuriye i Doha muri Qatar bahujwe n'umukuru w'iki gihugu, bakemeranya guhera hano bagakomeza ibiganiro biganisha ku mahoro arambye.

ONU, DRC, n'ibihugu bimwe byo mu burengerazuba bw'isi bashinja u Rwanda gufasha inyeshyamba za M23. Mu bihe bya vuba aha u Rwanda ntirwabihakanye byeruye cyangwa ngo rubyemere.

M23 yatangaje iki cyemezo cyayo uyu munsi nyuma y'uko Perezida William Ruto ubu ukuriye umuryango w'bihugu bya Afurika y'iburasirazuba (EAC) atangaje ko mu cyumweru gitaha hazaba indi nama izahuza EAC na SADC (ihuriro ry'iterambere ry'ibihugu bya Afurika y'amajyepfo) ku kibazo cya DR Congo iri muri iyi miryango yombi.

Ruto yavuze ibi nyuma y'inama yamuhuje na Perezida Emerson Mnangagwa wa Zimbabwe – ukuriye umuryango wa SADC, ku wa gatanu i Windhoek muri Namibia.

Ruto avuga ko EAC na SADC "byiyemeje ishyirwa mu bikorwa ry'imyanzuro y'inama yahuje iyi miryango mu kwezi gushize i Dar es Salaam muri Tanzania", ari na yo yasabye ko hagomba kuba guhagarika imirwano hagashakwa igisubizo mu mahoro.