FBI mu iperereza ku iraswa ry'abanyeshuri i Minneapolis nk'icyaha cy'urwango ku bagatolika
Ahavuye isanamu, Reuters
- Umwanditsi, Tom Bateman na Ana Faguy
- Igikorwa, BBC News i Minneapolis n'i Washington
Urwego rw'ubugenzacyaha bw'Amerika (FBI) ruvuga ko rurimo gukora iperereza nk'icyaha cy'urwango ku bagatolika ku iraswa ryo ku ishuri ryo mu mujyi wa Minneapolis muri leta ya Minnesota muri Amerika, ryiciwemo abana babiri naho abandi bantu 17 barakomereka.
Umukuru wa FBI Kash Patel yatangaje ku rubuga nkoranyambaga rwa X ati: "FBI irimo gukora iperereza kuri iri raswa nk'igikorwa cy'iterabwoba ry'imbere mu gihugu n'icyaha cy'urwango kigambiriye abagatolika."
Abana babiri, uw'imyaka umunani n'uw'imyaka 10, bishwe ubwo ku wa gatatu mu gitondo uwateye yarasaga acishije mu madirishya ya Kiliziya yitwa 'Annunciation Church' yo muri uwo mujyi igihe abana bari bari mu misa.
Uwateye, wapfiriye aho byabereye bivuye ku gikomere yari yiteye mu kwirasa, nyuma yatangajwe na polisi ko ari Robin Westman wari ufite imyaka 23.
Abategetsi ntibaratangaza impamvu bacyeka ko ari yo yabaye intandaro y'icyo gitero.
Ku wa gatatu nijoro, abantu bakomeje kugera aho byabereye mu kwifatanya n'abaho, bamwe bahashyira indabo.
Hari hari umwuka w'akababaro n'uburakari kubera ko ibi byabaye mu ntangiriro ya misa yo gutangiza ikindi gihembwe kuri iryo shuri.
Papa Léon XIV, Papa wa mbere w'Umunyamerika, ni umwe mu bantu bahaye icyubahiro abo bana bishwe, avuga ko ababajwe cyane n'icyo gitero.
Brian O'Hara, umukuru wa polisi mu mujyi wa Minneapolis, yabwiye abanyamakuru ati: "Iki cyari igikorwa cy'urugomo cyakozwe ku bushake ku bana hamwe n'abandi bantu basengaga b'inzirakarengane."
"Ubugome ubwabwo n'ubugwari bwo kurasa muri kiliziya yuzuyemo abana ntibisobanutse na gato."
