Obama yavuze kuri videwo y'irondaruhu yatangajwe na Trump imugaragaza nk'inguge

Uwahoze ari Perezida w'Amerika Barack Obama yavuze mu buryo buziguye kuri videwo y'irondaruhu yatangajwe ku mbuga nkoranyambaga za Perezida Donald Trump, abwira umuyobozi w'ikiganiro cyo mu buryo gishobora gupakururwa (podcast) kuri murandasi ko kugira "isoni" n'"imyitwarire myiza" byahoze biranga abategetsi, ubu byatakaye.

Iyo videwo ikomeretsa yari irimo igice kigaragaza Obama n'umugore we Michelle nk'inguge, bituma binegwa henshi n'abo mu ishyaka ry'abademokarate n'iry'abarepubulikani.

Mbere, ibiro bya Perezida w'Amerika (byitwa White House) byashyigikiye iyo videwo, bivuga ko umwuka mubi yateje ari "uburakari bwo kwigirisha [mpimbano]". Nyuma ubwo butumwa bwaje kwegekwa ku mukozi wo mu biro bya Perezida ndetse burasibwa.

Obama yavuganaga n'umuyobozi w'ikiganiro cyo mu buryo bwa 'podcast', Brian Tyler Cohen, wo mu murongo wo kwisanzura mu bitekerezo no kubaha ibitekerezo by'abandi, wabajije uwo wabaye Perezida wa mbere w'umwirabura w'Amerika ku mvugo ikoreshwa muri politike. Aha, Cohen yakomoje ku butumwa Trump yatangaje, nk'urugero rw'ubundi bwinshi bwa vuba aha bwateje impaka.

Icyo gice – cyajyanishijwe n'indirimbo The Lion Sleeps Tonight – cyashyizwe ku mpera ya videwo yatangajwe kuri konti ya Trump yo ku rubuga Truth Social, irimo ibivugwa bidafitiwe gihamya byuko habaye uburiganya mu matora ya perezida yo mu 2020.

Ubwo butumwa bwateje uburakari mu banyapolitiki, barimo n'abo ku rwego rwo hejuru bo mu ishyaka ry'abarepubulikani rya Trump.

Senateri Tim Scott – senateri umwe wenyine w'umwirabura w'umurepubulikani – yavuze ko ubwo butumwa ari cyo "kintu cy'irondaruhu rikomeye cyane nigeze mbona kivuye muri iyi White House".

Iyo videwo yibutsa ibindi bishushanyo birimo irondaruhu bigereranya abirabura n'inkende, ndetse uko bigaragara yakuwe mu butumwa bwo ku rubuga nkoranyambaga rwa X bwatangajwe mu kwezi kw'Ukwakira (10) mu mwaka ushize na Xerias, ukora ubutumwa bwo gutebya buzwi nka 'meme', akaba ari uwo mu murongo w'ibitekerezo byo gukomera ku bya kera.

Trump yabwiye abanyamakuru ko atabonye icyo gice cya videwo yagaragazaga Obama n'umugore we.

Ubwo yari abajijwe niba ateganya gusaba imbabazi, yabwiye abanyamakuru ati: "Nta kosa nakoze."

Icyo kiganiro cya 'podcast' cy'iminota 47 kirimo Obama, cyatangajwe ku wa gatandatu. Gitangira umuyobozi wacyo amusaba kugira icyo avuga ku "mvugo" yo muri Amerika, uwo muyobozi w'ikiganiro avuga ko "yageze ku rwego rw'ubugome tutigeze tubona mbere".

Cohen avuga ku byavuzwe na White House ko "abagizweho ingaruka" n'igenzura ry'ikigo cya gasutamo rijyanye n'abimukira (ICE) ari "abakora iterabwoba b'imbere mu gihugu", anongeraho ko "mu minsi micye ishize, Donald Trump yashyize ifoto yawe, mu maso hawe, ku mubiri w'inguge".

Mu gusubiza, Obama yagize ati: "Ni ingenzi kwemera ko benshi mu Banyamerika basanga iyi myifatire ihangayikishije cyane.

"Ni ukuri ko abantu babishigukira. Ni ukuri ko ari uburyo bwo kurangaza."

Ariko Obama yavuze ko mu gutembera mu bice binyuranye byo muri Amerika, we ubwe yahuye n'abantu "bacyemera imico myiza, ikinyabupfura, ubugwaneza".

Yakomeje agira ati: "Hari ubu buryo bwo kwigaragaza butagize icyo bwitaho burimo kubera ku mbuga nkoranyambaga no kuri televiziyo."

"Ndetse ukuri ni uko bisa nkaho nta soni na busa kuri ibi mu bantu bahoze bumva ko ugomba kugira uburyo bw'imyifatire myiza no kwitwara neza no kubaha umwanya urimo, si byo?

"Ibyo byaratakaye."

Mu gusubiza kwe, ntiyigeze avuga Trump mu izina.

Muri icyo kiganiro, Obama yavuze ku ngingo zinyuranye. Yashimye abigaragambya bishyize hamwe mu mahoro bagahangana n'ibikorwa bya leta byo guhashya abimukira, avuga ku buryo bushya bwo guhindura uturere tw'amatora muri Amerika ndetse avuga ku isomero rijyanye n'igihe yari Perezida, ryitezwe gutangira mu mwaka utaha mu mujyi wa Chicago, muri leta ya Illinois.