M23 irashinja leta ibitero bya 'drones' byishe abantu i Masisi-centre

Umutwe wa AFC/M23 watangaje ko indege nto zitajyamo abapilote zizwi nka 'drones' zo ku ruhande rwa leta zarashe kuri uyu wa gatanu i Masisi-centre zikica abaturage.

Umuvugizi w'uwo mutwe Lawrence Kanyuka yatangaje ku rubuga X ko izo ndege zarimo 'zirasa buhumyi' ahantu hatuwe n'abasivile.

Yongeraho ko ku mibare y'agateganyo "batandatu bapfuye abandi benshi bakomeretse".

Igisirikare cya Congo ntacyo kiratangaza kuri ibi bivugwa na M23.

BBC ntiyashoboye kugenzura mu buryo bwigenga ibyatangajwe na Kanyuka.

Ibi birego bije nyuma y'uko uruhande rwa leta ku wa gatatu rwasohoye itangazo rishinja u Rwanda ibitero by'amabombe na 'drones kamikazes' [z'ubwiyahuzi] ku muhanda wa Kamanyola-Uvira byishe abantu barenga 1,500.

Kinshasa ivuga ko u Rwanda ari rwo ruri inyuma y'umutwe wa M23, ibyo leta ya Kigali ihakana ivuga ko yafashe gusa ingamba zo kwirinda.

Ibirego byatangajwe na leta ya Kinshasa ku wa gatatu umutwe wa AFC/M23 wabihakanye mu itangazo wasohoye mu gitondo cyo kuri uyu wa gatanu, uvuga ahubwo ko ubwicanyi bwabaye muri ako gace bwakozwe n'uruhande rw'ingabo za leta n'abafatanya na rwo.

Ku bwicanyi M23 ivuga ko bwakozwe kuri uyu wa gatanu igashinja 'drones' zo ku ruhande rwa leta, Kanyuka yatangaje amashusho n'amafoto arimo abantu bashobora kuba bapfuye barimo umugore n'umwana muto.

Mu ntangiriro z'ukwezi kwa mbere kwa 2024 ni bwo umutwe wa M23 wafashe Masisi-centre hamwe n'ibice byinshi bigize teritwari ya Masisi y'intara ya Kivu ya Ruguru.

Uruhande rwa Kinshasa n'urwa AFC/M23 zikomeje ubushyamirane, gushinjanya amabi, n'imirwano mu turere turi mu majyepfo y'umujyi wa Uvira mu ntara ya Kivu y'Epfo.

Ni nyuma y'uko kugeza ubu ibiganiro by'i Doha muri Qatar bigamije kugera ku mahoro hagati y'izi mpande bisa n'aho byahagaze, kandi amasezerano ya Washington hagati ya Perezida Paul Kagame w'u Rwanda na Félix Tshisekedi wa DR Congo akaba atarubahirizwa kugeza ubu.

Muri iki cyumweru, umukuru w'umutwe wa AFC/M23 yumvikanye avuga ko nta wundi mugambi bafite uretse "gutsinda intambara" mu rugamba avuga ko barimo rwo "kubohora Congo Nini yose". Mu gihe uwari umuvugizi w'igisirikare cya Congo na we yari aherutse kumvikana avuga ko bagomba "kurwana kugeza" babohoye ahafashwe na M23.