Imvo n'imvano kuri Orchestre Impala yo mu Rwanda yamenyekanye cyane kuva mu myaka ya 1970

Ikaze mu kiganiro Imvo n'imvano cyo kuri uno wa gatandatu tariki 21 z'ukwezi kwa 2 umwaka wa 2026.

Mu kiganiro cyacu turi kumwe na Orchestre Impala, itsinda ryabacuranzi ryamenyekanye cyane kuva mu myaka ya za 70. Uyu mwaka Impala zirizihiza Yubile y'imyaka 50 kuva zitangiye gucuranga.

Benshi mu bacuranzi bari bagize Orchestre Impala barapfuye –bamwe mbere ya jenoside, abandi bazize jenoside, n'abandi bapfuye nyuma yayo.

Abacuranzi basigaye mu batangiye iri tsinda ni 2, Sebigeri Paul uzwi nka Mimi la Rose na Ngenzi Fidèle uzwi nka Fidèle Jacard.

Mu kugerageza kuziba icyuho, Impala ziyongereyemo amaraso mashya agizwe n'abacuranzi bakiri bato barimo Munyanshoza Dieudonné uzwi nka Mibirizi n'abandi.

Impala zakoze izina muri muzika nyarwanda mu gihe cy'imyaka 50 ishize- byageze naho zihimbirwa umugani ngo "Nta cyabuza Impala gucuranga''. Muri iki kiganiro baratubwira aho uwo mugani waturutse.

Muri iyo myaka kandi Impala zasohoye indirimbo zirenga 150, zimwe zishyirwa ku ma Cassette yariho icyo gihe-Indirimbo nyinshi z'urukundo nka za Maria Roza, Dativa, Uragiye n'izindi zirimo izo bagiye baririmba mu buryo bujimije. Iyavugishije abantu cyane ni 'Have sigaho', baratubwira impamvu bayihimbye n'igisobanuro cyayo cya nyacyo ndetse n'ibanga bakoreshaga kugeza n'ubu indirimbo zabo zikaba zigikunzwe kugera no mu rubyiruko.

Iki kiganiro mwagiteguriwe na Yves Bucyana.