Taylor Swift yinjiye ku rutonde rw'abaherwe b'isi batunze za miliyari

Taylor Swift yinjiye ku rutonde ruriho abaherwe barusha abandi bose imari ku isi, nk’uko biri ku rutonde rushya rwabo.

Ku nshuro ya mbere, uyu muhanzi wa pop yageze ku rutonde rukorwa n’ikinyamakuru Forbes ruzwi nka World's Billionaires List aho abarirwa umutungo wa miliyari 1.1 y’amadorari ya Amerika.

Uri ku rugero rumwe rw’umutungo na Sam Altman ubarirwa miliyari 1$ wahanze ChatGPT, programu izwi nka chatbot ikoresha ikoranabuhanga rya Artificial Intelligence.

Bernard Arnault n’umuryango we bakuriye ubucuruzi bwitwa LVMH bw’ibintu by’agaciro gakomeye ni we uza imbere kuri uru rutonde n’umutungo wa miliyari $233.

Forbes ivuga ko muri uyu mwaka hari ababiliyoneri 2,781 kandi ko ari bo benshi isi yigeze igira kugeza ubu.

Umubare w’aba batunzi kasha wiyongereyeho abagera ku 141 ugereranyije n’umwaka ushize.

Taylor Swift, umuririmbyi akaba n’umwanditsi w’indirimbo w’imyaka 34, yinjiye kuri uru rutonde nyuma yo kugera ku rwego rwo hejuru cyane mu kwamamara.

Mu bihembo bya Grammy Awards uyu mwaka, yariganje aho yabaye umuhanzi wa mbere watwaye igihembo cya album y’umwaka inshuro enye.

Album ye yise 1989, umwaka ushize yaje mu zaguzwe kurusha izindi.

Kwamamara kwe ntibigarukira mu muziki gusa. Umwaka ushize aho yajyaga ku mikino y’irushanwa rya Football y’Abanyamerika (NFL) kureba umukunzi we Travis Kelce akina, byazamuye imibare y’abareba iri rushanwa.

Naho ku rutonde rw’abaherwe, mu 10 ba mbere ku isi umunani ni abo muri Leta Zunze Ubumwe za Amerika – batandatu bakuye umutungo wabo mu bijyanye n’ikoranabuhanga.

Inyuma ya Bernard Arnault n’umuryango we, Elon Musk nyiri Tesla n’urubuga X, rwahoze rwitwa Twitter, ni uwa kabiri n’umutungo ubarirwa kuri miliyari 195$. Agakurikirwa na Jeff Bezos, nyir'ubucuruzi bwa Amazon.

Ubutunzi bwa Elon Musk bwazamutseho 8% kuva mu mwaka ushize ariko buragabanuka muri rusange ugereranyije no mu mpera za 2021, ubwo yafataga umwanya wa mbere na miliyari 300$.

Undi winjiye kuri uru rutonde ni uwahoze ari icyamamare muri basketball mu ikipe ya Los Angeles Laker, Magic Johnson, ubu ubarirwa umutungo wa miliyari 1.2$.

Chase Peterson-Withorn, umwe mu banditsi ba Forbes bategura uru rutonde, avuga ko uyu mwaka wari “mwiza” ku bakire barusha abandi ku isi.

Ati: “Ubu baciye umuhigo wo kugira abantu 14 batunze hejuru ya miliyari 100. Yewe no muri ibi bihe byo gushidikanya mu by’imari kuri benshi, abaherwe bo bakomeje kuzamuka.”

Itsinda ry'aba miliyari 100$

Forbes ivuga ko itsinda ry’abatunze za miliyari z’amadorari bo 2024 rikize 255% kurusha itsinda ryo mu myaka 10 ishize, kandi ko abatunze miliyari zirenga 100 bonyine bisangije 14% by’abaherwe bose hamwe 2,781 batunze hejuru ya miliyari nibura imwe.

Ku bihugu, Amerika ni yo ikiri imbere n’abatunze za miliyari benshi kurusha ikindi gihugu icyo ari cyo cyose, aho ifite 813 kuri uru rutonde. Ubushinwa buracyari ku mwanya wa kabiri, hagakurikiraho Ubuhinde.

Umunyafurika uza hafi kuri uru rutonde ni Nicky Oppenheimer n’umuryango we bo muri Afurika y’Epfo, ba 249 ku rutonde, babarirwa umutungo wa miliyari 9.5$ bakura ahanini mu bucukuzi n’ubucuruzi bw’ibyuma n’amabuye y’agaciro.

Forbes ivuga ko abantu 189 bavuye kuri uru rutonde harimo 129 bo mu Bushinwa, aho kugura byagabanutse n’agaciro k’amasoko mu bijyanye n’inzu kaguye kakagusha za miliyari z’imitungo.

Abandi 32 bari batunze za miliyari barapfuye, barimo umuherwe wo mu Misiri Mohamed Al-Fayed, Silvio Berlusconi wahoze ari minisitiri w’intebe w'Ubutaliyani, na Sebastián Piñera wahoze ari perezida wa Chile.