Imvo n'imvano: Impamvu hatubahirizwa amasezerano yo guhagarika imirwano yagizwe hagati ya leta ya Congo na leta y'u Rwanda

Mu cyumweru gishize ntitwashoboye kubagezaho igice cya kabiri cy'ikiganiro twabagejejeho kuwa gatandatu tariki 18 z'ukwa mbere, nkuko nabibemereye. Ariko ubu tugiye kukibagezaho.

Icyo kiganiro cyavugaga ku mirwano yongeye kubura mu ntara ya Kivu y'amajyaruguru muri Repubulika ya Demokarasi ya Congo hagati y'ingabo za leta FARDC, bivugwa ko zifatanya n'imitwe y'abaWazalendo, FDLR n'ingabo z'u Burundi, hamwe n'umutwe wa AFC - M23 bivugwa ko ufashwa n'ingabo z'u Rwanda nubwo leta y'u Rwanda ibihakana.

Iyo mirwano imaze iminsi ibera cyane cyane mu karere ka Masisi.

Umutwe wa M23 ukaba warigaruriye n'umujyi wa Minova uri mu karere ka Kirehe kari mu ntara ya Kivu y'amajyepfo.

Nyuma yaho dukoreye icyo kiganiro umutwe wa M23 ubu wigaruriye n'umujyi wa Goma nubwo hakivugwa umutekano muke mu duce tumwe tw'uwo mujyi.

Muri iki kiganiro rero tukaba twaribazaga igiteye iyubura ry'iyi mirwano ?

Twanarebaga impamvu hatubahirizwa amasezerano yo guhagarika imirwano yagizwe hagati ya leta ya Congo na leta y'u Rwanda ? Twanabazaga abatumire bacu umuti wihuse n'urambye babona wahagarika iyi mirwano, kugirango abaturage badakomeza kwangazwa no kuhasiga ubuzima ?

Abatumire bacu bari Patrick Beza Shirimpumu, umujyanama w'umuyobozi w'intara ya Kivu y'amajyaruguru, ushinzwe ibya politike n'ubutegetsi, twari kumwe kandi n'umuvugizi w'umutwe wa M23, Oscar Balinda, hamwe na Olivier Kanyejomba, umuyobozi wa Nouvelle Societe Civile Congolaise y'i Masisi. Muri iki kiganiro kandi turaza no guha umwanya Onesphore Sematumba, umushakashatsi ushinzwe akarere k'ibiyaga bigari mu kigo mpuzamahanga kireba ibyo gukemura amakimbirane, ICG.

Iki kiganiro mwagiteguriwe kandi murakigezwaho na Felin Gakwaya