Guinea: General Mamadi Doumbouya yatsinze amatora n'amajwi 86%

Perezida Mamadi Doumbouya wa Guinea ni we watsinze amatora ku majwi 86% nk'uko byagaragajwe n'ibiro bishinzwe amatora bivuga ko ari ibyavuye mu majwi amaze kubarurwa by'agateganyo

Iyi iraba intangiriro y'ubutegetsi bwa gisivile butanzwe mu matora nyuma y'uko mu 2021 Doumbouya afashe ubutegetsi kuri 'coup d'état' ahiritse Perezida Alpha Condé wari muri uwo mwanya kuva mu 2010.

Umukuru w'ibiro bishinzwe amatora muri Guinea watangaje ibyayavuyemo mu ijoro ryacyeye, yavuze ko abaturage b'iki gihugu biyandikishije gutora bitabiriye ku kigero cya 80%.

Itsinda rya sosiyete sivile riharanira ko abasivile basubizwa ubutegetsi ryamaganye aya matora riyita "ikinamico" nyuma y'uko abari guhatana bya nyabyo na Doumbouya babujijwe kwiyamamaza, naho ababyemerewe bakavuga ko amatora yaranzwe na byinshi bitagenze neza.

Ku wa mbere, NetBlocks ikurikirana uko abantu bagera kuri internet n'imbuga nkoranyambaga yavuze ko imbuga za TikTok, YouTube na Facebook zitafungukaga mu gihe abaturage b'iki gihugu bari bategereje ibyavuye mu matora.

Mu 2021 ubwo yari amaze gufata ubutegetsi, Doumbouya yasezeranyije Abanya-Guinée ko azaha abasivile ubutegetsi "ku neza" kandi ko nta musirikare uziyamamaza mu matora.

Icyo gihe yagize ati: ""Ntabwo jye, cyangwa undi wo mu ngabo, nzaba umukandida ku kintu icyo ari cyo cyose. Nk'abasirikare, duha agaciro cyane ijambo ryacu".

Imyaka ine nyuma yaho, Itegeko nshinga rishya ry'iki gihugu ryashyizweho muri Nzeri(9) ryemereye abasirikare kwiyamamaza, bituma General Doumbouya – wafashe ubutegetsi ari Colonel, abikora.

Mu gihe Alpha Condé hamwe na Cellou Dalein Diallo ukomeye mu batavuga rumwe n'ubutegetsi bari hanze mu buhungiro, byari byitezwe cyane ko Doumbouya atsinda nta guhatana.

Iyi ntsinzi yatangajwe imuhaye manda y'imyaka irindwi yo gutegeka iki gihugu kiri mu bikungahaye cyane ku butare bwa 'beauxite'

Nubwo akunzwe cyane mu rubyiruko, General Doumbouya yakomeje gushinjwa guhonyora ibikorwa by'abatavuga rumwe na we, guca imyigaragambyo, no gutsikamira ubwisanzure bw'itangazamakuru mu nzira igana kuri aya matora.

Guinea ni cyo gihugu gifite ubutare bwa bauxite bwinshi ku isi kandi kikaba no mu bihugu bifite n'ubwa 'iron-ore' bwinshi.

Mu kwezi gushize, abategetsi b'iki gihugu bafunguye ikirombe rutura cy'ubutare bwa 'iron-ore' buba bugize 98% mu gukora ibyuma.

Bimwe wamenya kuri Doumbouya