Brook House – UK: Uburyo bwo kuhafungira abasaba ubuhungiro bari koherezwa mu Rwanda bwanenzwe

Uburyo bwo gushyira mu ndege imfungwa zikuwe mu kigo gifungirwamo abantu kubera uko binjiye mu gihugu, zigashyirwa mu ndege zari kwerekeza mu Rwanda, bwanenzwe n'ikigo cy'ubugenzuzi kuri leta.

Ikigo cy'ubugenzuzi bw'amagereza muri uyu mwaka cyasuye icyo kigo Brook House gifungirwamo abo basaba ubuhungiro kiri hafi y'i Gatwick mu Bwongereza, ubwo minisiteri y'ubutegetsi bw'igihugu yageragezaga kohereza mu Rwanda izo mfungwa.

Raporo y'icyo kigo kigenzura amagereza ivuga ko imfungwa zitahawe amakuru ahagije, kandi ko zitahuraga n'abanyamategeko mu buryo buhagije.

Minisiteri y'ubutegetsi bw'igihugu yavuze ko akazi "karimo gukorwa" mu gushyira mu bikorwa ibyasabwe muri raporo y'icyo kigo.

Charlie Taylor, umugenzuzi mukuru w'amagereza, yagize ati: "Imfungwa [zari] zabwiwe ko zizahakurwa, zagowe no kubona uburenganzira bwazo bwo mu rwego rw'amategeko ndetse zihabwa amakuru adahagije.

"Nta musemuzi wari uhari mu biganiro bya minisiteri y'ubutegetsi bw'igihugu byo guha amakuru imfungwa, bivuze ko benshi batasobanukiwe ibyo bari barimo kubwirwa".

Taylor yanavuze ko abakozi ba minisiteri y'ubutegetsi bw'igihugu batahawe amakuru ahagije, bivuze ko "batashoboraga kumara impungenge abo bagabo cyangwa gusubiza ibibazo byabo".

Kugenzura iki kigo byabaye hagati y'itariki ya 30 y'ukwezi kwa gatanu n'itariki ya 16 y'ukwezi kwa gatandatu muri uyu mwaka.

Ku itariki ya 15 y'ukwezi kwa gatandatu, kugerageza kohereza mu Rwanda abasaba ubuhungiro barindwi byahagaritswe n'urukiko.

Muri icyo gihe habaga ubwo bugenzuzi, imfungwa 68 zari zifungiye mu kigo Brook House zari zaramaze kubwirwa ko zirimo kwigwaho ngo zihavanwe, muri zo imfungwa 19 ni zo zari zarahawe amabwiriza ajyanye no kuhakurwa mu ndege.

Raporo y'icyo kigo cy'ubugenzuzi bw'amagereza yagaragaje icyo yise kunanirwa kumenya amahitamo ajyanye n'imibonano mpuzabitsina y'imfungwa, "nubwo amabwiriza ya minisiteri y'ubutegetsi bw'igihugu ku Rwanda avuga ku makuru y'ihonyorwa ry'uburenganzira bwa muntu ku bantu b'aba LGBT".

Taylor yavuze ko imikorere rusange ku kwita ku bafungiye muri Brook House yari "myiza".

Iyo raporo ivuga ko imfungwa zabagaho "ahantu hasukuye kandi hakwiye [heza] hajyanye n'abafunzwe kubera uburyo binjiye mu gihugu".

Ariko ivuga ko imfungwa nyinshi zari zihangayitse kubera gutinda kumenyeshwa aho dosiye zigeze ndetse n'amakuru macyeya yatangwaga n'abategetsi bo muri minisiteri y'ubutegetsi bw'igihugu.

Umuvugizi wa minisiteri y'ubutegetsi bw'igihugu yagize ati: "Dushimishijwe nuko abagenzuzi basanze ikigo Brook House... kirimo umutekano kandi abantu bahafungiye bafashwe mu buryo burimo icyubahiro.

"Ubufasha bw'imibereho butangwa na bwo bwemejwe ko ari bwiza.

"Aha hantu ni ingenzi cyane mu guhangana n'abinjira mu buryo bunyuranyije n'amategeko, mu kurinda rubanda no gukuraho [kwigizayo] abadafite uburenganzira bwo kuba mu Bwongereza".

Iperereza ku gufatwa nabi muri icyo kigo ririmo gukorwa, nyuma y'amaperereza yashingiye ku kiganiro Panorama cya BBC cyo mu mwaka wa 2017. Iryo perereza ntiriragera ku musozo.