Amerika yageneye inkunga y'ingoboka ibihugu 10 bya Africa birimo u Rwanda

Inyandiko gusa
Abagore bikoreye ibikarito by'imfashanyo y'ibinyampeke, aha ni ku itariki ya 13 y'ukwezi kwa gatatu mu 2019, mu cyaro cya Mutoko muri Zimbabwe

Ahavuye isanamu, Getty Images

Insiguro y'isanamu, Umusaruro mubi watumye abantu benshi muri Zimbabwe bacyenera inkunga (ifoto yo mu bubiko)

Leta zunze ubumwe za Amerika zagennye inkunga ya miliyoni $215 y'ingoboka ku bihugu 10 bya Africa bigowe n'ikibazo cy'ibiribwa kubera ingaruka z'imihindagurikire y'ikirere, Covid-19, n'intambara muri Ukraine.

Antony Blinken ushinzwe ububanyi n'amahanga bwa Amerika yatangaje iyo nkunga mu nama ku kibazo cy'ibiribwa ku isi yamuhuje n'abashinzwe ububanyi n'amahanga ba bimwe mu bihugu bya Africa i New York kuwa gatatu.

Amerika ivuga ko iyo nkunga izafasha ibyo bihugu guhangana n'ubukene bw'ibiribwa bwatewe na biriya bibazo.

Algeria, Cameroon, Uganda, Zimbabwe, Mauritania, Nigeria, Burkina Faso, Rwanda, Tanzania, na Kenya nibyo bihugu Blinken yavuze mu bizahabwa iyo nkunga.

Ishami rya ONU ryita ku biribwa, PAM, rivuga ko akarere k'ihembe rya Africa kari mu gakomerewe aho hafi abantu miliyoni 20 bugarijwe n'inzara muri Ethiopia, Kenya, na Somalia kubera kubura imvura mu myaka ine ikurikirana.

Blinken avuga ko iriya nkunga izafasha gukemura ikibazo cy'ibiciro by'ifumbire byikubye kane kuva Covid yatangira, bikamera nabi kurushaho kubera intambara muri Ukraine.

Kuwa gatatu mu kiganiro n'abanyamakuru, Minisitiri w'intebe w'u Rwanda yavuze ko barimo gushakisha aho bagura ifumbire yazamutseho 120% ku giciro kubera iriya ntambara.