Rwanda - Covid: Usabwe kuba ukingiwe byuzuye kugira ngo ujye mu ruhame no mu birori
Ahavuye isanamu, Rwanda Presidency
Leta y'u Rwanda yatangaje ko abantu "basabwa kwikingiza byuzuye kugira ngo beremrewe kujya mu ruhame no kwitabira ibirori bitandukanye", nk'uko bitangazwa n'ibiro bya Minisitiri w'intebe.
Mu Rwanda, hafi miliyoni zirindwi ku baturage bose miliyoni 13 bamaze gukingirwa Covid-19 byuzuye, mu gihe abarenga miliyoni umunani bafashe doze ya mbere.
Ni kimwe mu bihugu bya mbere muri Africa bimaze gukingira abaturage benshi, kikaba icya mbere mu karere.
Nubwo ihame ari uko gukingirwa ari ubushake, hari abaturage bagiye batangaza ko bakingiwe ku ngufu z'abategetsi n'abashinzwe umutekano, cyane cyane mu bice by'icyaro.
Mu gihe umwe mu bavugizi ba leta yabanje guhakana ibyo, nyuma undi yabwiye Radio mpuzamahanga y'Abafaransa RFI ko "bishoboka ko hari abakozi bamwe baba baragize gukabya" bagakingira abantu ku ngufu, ariko ko "atariwo mugambi wa leta".
Ibyo byabaye nyuma y'uko abaturage bamwe bahunze urukingo rwa Covid bakajya muri DR Congo no mu Burundi ariko bagasubizwa mu gihugu cyabo n'inzego z'aho bahungiye.
Icyemezo cyatangajwe mu ijoro ryo kuwa gatatu gisobanuye ko abantu babarirwa muri za miliyoni bagomba guterwa urukingo rwa kabiri kugira ngo bemerwe kujya aho ari ho hose hari abandi.
"Bisa n'aho umuntu utifuza gukingirwa nta mahitamo asigaranye", nk'uko umwe yabyanditse kuri Twitter.
Umwaka ushize, abashinzwe ubuzima mu Rwanda bavuze ko bateganya ko mu gihe hejuru ya 60% by'abanyarwanda baba bakingiwe byuzuye ubuzima bushobora gusubira nka mbere.
Icyo gipimo ubu u Rwanda ruri kugisatira, kandi ibyemezo byaraye bitangajwe na leta bigaragaza ko hari guterwa intambwe zo gufungura ibintu byose.
Amasaha y'umukwabu wa nijoro yavanywe saa yine z'ijoro ashyirwa saa sita z'ijoro kugeza saa kumi z'igitondo.
Ibikorwa by'imyidagaduro, ibitaramo by'imiziki, night clubs n'ibindi byemerewe gufungura mu byiciro, mu gihe imodoka rusange zemerewe gutwara 100% by'ubushobozi bwazo.
Imibare y'abandura Covid mu Rwanda itangazwa yaragabanutse muri minsi ishize, ejo byatangajwe ko hafashwe ibipimo bigera ku 12,000 habonekamo abanduye 131 (1%).
