Madagascar: Minisitiri Serge Gelle 'yoze amasaha 12' ararokoka nyuma y'impanuka y'indege mu nyanja
Ahavuye isanamu, President Andry Rajoelina/ Twitter
Minisitiri muri Madagascar yavuze ko yoze mu gihe cy'amasaha 12 ararokoka nyuma yuko indege ya kajugujugu yari arimo ikoreye impanuka mu nyanja ubwo yari mu gikorwa cy'ubutabazi.
Ananiwe cyane, arimo kongera kugarura imbaraga ari ku ngombyi igezweho y'abarwayi (stretcher), Minisitiri ushinzwe polisi Serge Gelle yagize ati: "Si igihe cyanjye cyo gupfa".
Undi mutegetsi wo mu rwego rw'umutekano bari bari kumwe muri iyo kajugujugu na we yarokotse.
Iryo tsinda ryari ryafashe indege rigiye kugenzura ahabereye impanuka y'ubwato ku wa mbere nijoro mu majyaruguru ashyira uburasirazuba bw'igihugu.
Umubare w'abapfiriye muri iyo mpanuka wazamutse ugera ku bantu 85, nyuma yuko imirambo 21 ibonetse ku wa gatatu, nkuko bitangazwa n'ibiro ntaramakuru AFP.
AFP yongeyeho ko abantu bagera hafi kuri 50 kugeza ubu bamaze gutabarwa.
Ibiro ntaramakuru Reuters byasubiyemo amagambo y'umutegetsi wo mu kigo gishinzwe ubwikorezi bwo mu mazi avuga ko ubwo bwato bwari ubwo gutwara imizigo butemerewe gutwara abagenzi, kandi ko bwari bwapakiwe birenze urugero ndetse amazi yuzuye muri moteri yabwo.
Kuri Twitter, Perezida wa Madagascar Andry Rajoelina yihanganishije ababuze ababo muri iyo mpanuka y'ubwato, anaha icyubahiro Bwana Gelle n'uwo wundi wo mu rwego rw'umutekano, bageze ukwabo muri uwo mujyi wa Mahambo wo ku nkengero y'inyanja.
Yavuze ko umupilote wari utwaye iyo kajugujugu, hamwe n'undi musirikare wari uyirimo, kugeza ubu baburiwe irengero.
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
BBC ntibazwa ibivuye ku zindi mbuga.
Avuga ku wa kabiri, Bwana Gelle, w'imyaka 57, yavuze ko yoze "kuva saa moya n'iminota 30 z'ijoro, kugeza saa moya n'iminota 30 zo muri iki gitondo", akagera i Mahambo.
Yavuze ko nta bikomere yagize, ariko yongeraho ko yumvaga akonje.
Bwana Gelle yabwiye abaturage b'i Mahambo ati: "Nifuzaga gusa ko mwatangaza iyi videwo kugira ngo umuryango wanjye uyibone, abo dukorana bayibone, abagize guverinoma bayibone. Ndi muzima kandi meze neza".
Umukuru wa polisi Zafisambatra Ravoavy yabwiye ibiro ntaramakuru AFP ko Bwana Gelle yakoresheje imwe mu ntebe zo muri kajugujugu nk'ikintu cyo gutuma areremba ku mazi.
Bwana Ravoavy yagize ati: "Buri gihe yabaga afite imbaraga mu mikino, kandi yakomeje uru rwego [rw'imbaraga] ari na minisitiri, nkaho ari umuntu w'imyaka 30... afite ubushobozi butangaje cyane bwo kuguma atuje mu bibazo bikomeye".
Mbere yuko agirwa Minisitiri mu kwezi kwa munani uyu mwaka, Bwana Gelle yari yarabaye umupolisi mu gihe cy'imyaka 30.
