Enes Kanter Freedom: yahinduye izina nyuma yo kwamburwa ubwenegihugu iwabo akabona ubwa US
Ahavuye isanamu, Getty Images
Enes Kanter umukinnyi wa basketball muri NBA yahinduye izina rye byemewe n'amategeko yitwa Enes Kanter Freedom mu kwishimira ubwenegihugu bwa Amerika.
Uyu mukinnyi wavukiye mu Busuwisi agakurira muri Turkiya, kuwa mbere yatangaje kuri Twitter amashusho ari kurahirira kuba umunyamerika.
Enes w'imyaka 29 ukinira Boston Celtics yamenyekanye kandi yamagana ihonyangwa ry'uburenganzira bwa muntu muri Turkiya no mu Bushinwa.
Mu 2017 abategetsi ba Turkiya batesheje agaciro passport ye.
Mu ganiro na CNN, Enes yavuze ko izina rye rishya risobanuye "intambara" y'ubwisanzure mu buzima bwe bwose.
Yagize ati: "Hano [muri Amerika] hari ubwisanzure bwo kuvuga, ubwisanzure mu ukwemera, ubwisanzure ku bitekerezo, ubwisanzure bw'itangazamakuru. Nta na kimwe nari mfite muri ibyo muri Turkiya."
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
Enes Kanter yavuze ko "ubwisanzure aricyo kintu gikomeye cyane umuntu ashobora kugira".
Ati: "Niyo mpamvu nashatse ko iri jambo riba igice cyanjye, nkarijyana aho ngiye hose".
Mu muhango wo guhabwa ubwenegihugu, ari nawo yahinduyemo izina, ni naryo yakoresheje avuga indahiro nk'umunyamerika.
Izina 'Freedom' rizaba riri kuri jersey ye ubwo Celtics izahura na Philadelphia 76ers muri iki cyumweru. Kanter avuga ko abakinana nawe bo baratangiye kumwita iryo zina.
Mu bishimiye ibyabaye kuri Kanter harimo Mike Pompeo wahoze ashinzwe ububanyi n'amahanga bwa Amerika wavuze ko Kanter "akubiyemo nyinshi mu ndangagaciro zigira igihugu cyacu igihangange".
Kuva yagera muri Amerika mu 2009, kenshi Enes Kanter yagiye anenga uburenganzira n'ubwisanzure iwabo muri Turkiya no mu Bushinwa.
Mu Ukwakira (ukwa 10), izina rye ryavanywe ku mbuga nkoranyambaga z'Ubushinwa kandi imikino ya Celtics bivugwa ko yahagaritswe kwerekanwa kuko Enes yise Pereizda Xi Jinping "umunyagitugu w'umugome".
Yabwiye abamukurikira ati: "Ubutumwa bwanjye kuri leta y'Ubushinwa ni ukubohora Tibet. Tibet ni iy'abanya-Tibet."
Yakoresheje kandi imbuga nkoranyambagaze anenga uko leta y'Ubushinwa ifata abaturage b'aba Uyghur ndetse yasabye ko abantu bakwamagana imikino Olempike yo mu bukonje izabera i Beijing mu 2022.
Mu kumusubiza, minisiteri y'ububanyi n'amahanga y'Ubushinwa yashinje Enes Kanter "kugerageza gushaka kwibonekeza".
Uyu mugabo umaze imyaka 11 muri NBA, kenshi kandi yagiye avuga ko perezida wa Turkiya ko ari "umunyagitugu".
Mu 2019, abategetsi ba Turkiya batanze inyandiko mpuzamahanga yo kumuta muri yombi, bamushinja ko akorana n'imitwe yagerageje guhirika ubutegetsi mu 2016. Ibyo Kanter yahakanye.
